Zuize 13 - ꞌRe Ihâimana Uꞌâsi Mono Zadawa Wasuꞌu

Sãsãhã potozé wasu'u

¹ Tawamhã Izaraéu nhihudu norĩ, Uburé Danhib'apito wi, ma tô tiwasédé hã apâ te te 're 'manharĩ za'ra. Tahawa 40 wahum na filisteu norĩ nhib'rata te te 're robzépata za'ra mono da hã, ma tô tãma pisutu za'ra.

² Tawamhã aibâ te 're hâimana 'rinho'u Zora na isisi ãma, Manoa na isisi hã Dãhã nhihudu hawi a'uwẽ. Imro hã i'razéb 'ré.

³ Tawamhã Hâiwa ãma Romhuri'wa ma tô itẽme wi. Ta hã itẽme wisi wamhã, ma tô ãne tãma tinha: — Ai'ra waihu'u ãna te aré 're aimo. Tahawa aré niwamhã dana na hã 're aihâimana waihu'u mono õ di. Tane nherẽ, te za ãhã na hã oto aiwasã, ai'ra aima poto da.

⁴ Tahawa uwa 'rãi wa'u isé 're hâsi mono õ di za, â zaipro zama. Duré dasa iprã hã 're 'mai'rẽne mono õ di za.

⁵ E marĩ wa. A hã za aiwasã wa, ai'ra aima poto da hã. Duré niwamhã séré nhihâri õ di za. E marĩ wa. Ta hã, ipotozém hawim haré, 'Re ihâimana u'âsi mono te na, za tãma 're hâimana mono wa, Nazire norĩ siré 're hâimana mono da hã. Tahawa te za filisteu norĩ nhiptetezé wi, Izaraéu nhihudu norĩ te te 're i'anho'reptui mono zém na ãma sãna'rata za.

⁶ Tawamhã pi'õ, timro zô ma tô rĩni, te te tãma rowasu'u da ãne: — 'Re ihâimana u'âsi mono ãma aibâ 're imorĩ hã ma tô we ĩtẽme wi, te te ĩma rowasu'u da. Ta hã aiwa 'Re ihâimana u'âsi mono ma hâiwa ãma romhuri'wa ne. Tahawa ma tô sina ĩpẽ'ẽwara. Tahawa, wa hã te sadanharĩ õ di, nima hawi we imorĩzéb zô hã. Duré ĩma sisisi õ di.

⁷ Tane nherẽ, ma tô ĩma ropisutu, za ĩwasã na hã, ĩ'ra ĩma 'maipoto da. Ma tô duré ĩma waihu'u, wa hã te zâ'rẽne tõ da uwa 'rãi wa'u isé hã, duré â zaipro hã. Duré dasa iprã te 'mai'rẽne tõ da hã, ma tô ĩma waihu'u. E tihai wa. 'Watébrémi hã za, 'Re ihâimana u'âsi mono te na tãma 're hâimana mono wa Nazire norĩ siré 're hâimana mono da.

⁸ Tawamhã Uburé Danhib'apito ma, Manoa mreme wamhã, ma tô ãne tãma tinha: — Ĩte 'Re ihâimana u'âsi mono, aibâ ai'ãma 're ihâimana mono hã we isatõrĩ hã wa ãma aiwi waptẽ, we apâ watẽme satõrĩ da, te te ãma wama rowasu'u da, 'watébrémi poto wa, za marĩ wa te ãma i'manharĩzém na hã.

⁹ Tawamhã 'Re ihâimana u'âsi mono, Manoa te te iwaptẽrẽzé hã ma tô 'manha. Tahawa 'Re ihâimana u'âsi mono ma, Hâiwa ãma Romhuri'wa ma tô apâ pi'õ tẽmemhã wi, rom na sãmra ré. Ãhã wa, imro hã 'râwi i'ratamhã hâimana õ di.

¹⁰ Tahawa imro ihâimanazéb u hã, ma tô sa'ẽtẽ wara. Tawamhã ma tô ãne tãma rowasu'u: — Aibâ nimahã na we ĩtẽme iwi hã, apâ ma tô duré we ĩtẽmemhã sihâi'ré.

¹¹ Tawamhã Manoa ma tô wahudu. Wahutu wamhã, ma tô timro siré hã mo, aibâ isabzéb u. Tawamhã ma tô ãne sadanha: — E a hã ĩmro ma, nimahã bâtâ na inharĩ. — Ĩhe! Ta hã, wa hã. — Ãne ma te ãma tãma wa'rã.

¹² Tawamhã Manoa te ãne duré tãma tinha: — Niwa ãne inharĩzé te te sina uwaimrami wamhã, e niha te za 'watébrémi hã 're hâimana. E marĩ te za duré tawamhã te te 're 'manharĩ.

¹³ Tawamhã Uburé Danhib'apito ma, Hâiwa ãma Romhuri'wa, ma te ãne ãma sada'â: — Aimro si te za uburé marĩ na te ãma tãma irowaihu'uzé hã te te 're ab'manharĩ.

¹⁴ Tahawa, uwa 'ru 'rã hã te te 're 'masi mono õ di za. Uwa 'rãi wa'u isé hã te te 're hâsi mono õ di za, â zaipro hã. Duré dasa iprã norĩ hã te te 're a'masi mono õ di za. Marĩ na te ãma tãma irowaihu'uzé hã, uburé te za te te 're ab'manharĩ.

^15-16 Tane nherẽ, Manoa te te waihu'u õ di, Uburé Danhib'apito ma Hâiwa ãma Romhuri'wa na, õ hã. Tahawa te ãne tãma tinha: — Ĩzawi na hã a'â aimorĩ tõ. Pone'ẽrebâ zéré uzé 'ra na aima iwanhipi hã a'â sapari. — Ĩnhamra wamhã, te 'rẽne dai õ di, asai wa'wa hã! — Ãne Hâiwa ãma Romhuri'wa ma te ãma tãma wa'rã. Te duré tãma tinha ãne: — Tane nherẽ, asima iwẽ zarina dasa 'manharĩ da wamhã, ma'ãpé Uburé Danhib'apito ma asõprubzéb da hã tãma zata.

¹⁷ Tawamhã Manoa te isisi zô sadanha ãne: — E niha asisi. Asisi wa te waihu'u da, wa wasima wẽ ni, niwa aimreme na ãma uwaimrami wa, ai'ãma iwawatazéb da hã.

¹⁸ — E marĩ da, te ĩnhisi waihu'u da hã asima iwẽ. — Ãne te Hâiwa ãma Romhuri'wa asa ãma sadanha. — Ĩnhisi hã uburé marĩ dama isa'rese'õ zéb ré 're ihâimana mono na.

¹⁹ Tawamhã Manoa, pone'ẽrebâ zéré uzé 'ra si'aibâ hã duré amnho hã ma tô 'mai'â. Tahawa, taha na ma tô ẽtẽ nhisiwimhã Uburé Danhib'apito ma ãma tãma tinhopru. Tawamhã Manoa norĩ timro me te te 'madâ'â zahuré ré, ma tô Uburé Danhib'apito hã marĩ aimawi dama isa'rese'õ hã 'manha:

²⁰ Ẽne danhoprubzé zatazém hawi unhama ro hâimo nasi ro'o pusi ré, ma tô Manoa norĩ, timro me hã Hâiwa ãma Romhuri'wa, hâiwa u unhama ro'o wa'wamhã morĩ ré, te te 'madâ'â zahuré. Ãhã wa, hi'rãtitõ ma tô aimasisi. Duré ti'ubu na ti'ai u hã ma tô roptob zahuré.

²¹ Tawamhã Manoa norĩ, timro me niwamhã Hâiwa ãma Romhuri'wa hã te te oto 'madâ'â na sitéb zahuré õ di. Tahawa Manoa, ma tô oto waihu'u, õ hã tô aibâ, Uburé Danhib'apito ma Hâiwa ãma Romhuri'wa na hã.

²² Tahawa Manoa te timro ma tinha ãne: — Wa za tô wadâ'â ni. E marĩ wa. 'Re ihâimana u'âsi mono hã wa te 'madâ'â wa, watõmo na.

²³ Tane nherẽ, ma te pi'õ ãma sada'â ãne: — Uburé Danhib'apito te te wapãrĩ da 'wa'âhã, aré wanhoprubzé hã te te wẽsãmri õ di. Duré aré ãne hã te te wama romhâi'ré õ di. Duré aré tiha na hã uburé te te wama rowaihu'u mono õ di.

²⁴ Tawamhã Manoaha mro zé're hawimhã oto ai'uté poto wamhã, ma tô sisi 'watébrémi hã Sãsã na. Duré 'watébrémi oto prédu wamhã, ma tô Uburé Danhib'apito iwẽ na hã te te 're pawapto.

²⁵ Tawamhã Sãsã, Ma'ane-Dã ãma Zora na 'ri wa'õtõ nhisi norĩ wa'wamhã, Esta'o na 'ri wa'õtõ nhisi 're me 're hâimana mono ré, ma tô Uburé Danhib'apito pẽ'ẽzani iwa ihâimana na hã duré ãma sãna'rata, niha marĩ te te 're i'a'manharĩ mono zéb da hã.