Zuize 12 - ꞌRe Ihâimana Uꞌâsi Mono Zadawa Wasuꞌu

Zépté, Efraĩhĩ nhihudu norĩ da, ihâimanazé wasu'u

¹ Tawamhã Efraĩhĩ nhihudu si'aibâ norĩ, ma tô si'rã'õtõ, si'wapé za'ra da hã. Tahawa panho'u Zodã pa â na ma tô saprĩ za'ra, Zafõ na 'ri nho'õmo niwĩ. Tahawa, ma tô ãne Zéptéhé ma nharĩ za'ra: — E marĩ da, ma tô amonita norĩ a'wapé da hã asiwaprosi aiwato, wa norĩ zama asiré wasi'aba'ré da, wazô aihârâ za'ra ãna. Ãhã wa, wa za asõrõwa hã airé wasiwi ãma sazu ni!

² Tawamhã Zépté, ma te ãne ãma tãma wa'rãmi za'ra: — Wa hã ĩnhib'a'uwẽ ré, amonita norĩ me wasisada iwahâimana za'ra zé watobro wamhã, wa tô aré asô ĩhârâ za'ra wa'wa. Tane nherẽ, a norĩ wa'wa hã tiwi ĩnho'reptu za'ra wa'aba õ di.

³ Tahawa wa hã asiwi ĩpawaptob za'ra wa'aba õ zém na, te ai'madâ'â za'ra wa'aba wa, wa tô te ĩsima romnhimimnhasi nherẽ hã mo tô, ta norĩ te a'wapé da hã. Tawamhã ãne nherẽ, ma tô Uburé Danhib'apito ĩma tisõ tô, te da'ãma i'ai'utézé hã. Ãne nherẽ, e marĩ da, te we bété ĩzô ai'aba'réi wa'wa, asiwi ĩ'wapéi wa'aba da, ãhã na hã.

⁴ Tawamhã Zépté, uburé Ziliadi ãma aibâ norĩ ma tô 'rã'õtõ. Tahawa, ma tô Efraĩhĩ nhihudu si'aibâ norĩ hã 'wapé za'ra. Te te 'wapé za'ra wamhã, ma tô ãma ai'uté za'ra, Zépté norĩ hã. Efraĩhĩ nhihudu norĩ hã ma tô õne wana ré tãma nharĩ za'ra: “A norĩ wa'wa Ziliadi norĩ, Efraĩhĩ nhipti'ai ãma, duré Manaséhé nhipti'ai ãma 're i'aihâimana za'ra wa'aba mono, ma tô Efraĩ hã irẽme za'ra wa'wa.” Ãne na hã te te tãma nharĩ za'ra wa, ma tô ãne hã tãma rob'manharĩ za'ra.

⁵ Tawamhã Efraĩhĩ nhihudu norĩ te te ãma ro'rahâri za'ra tõ da, ma tô Ziliadi norĩ panho'u Zodã pa â na da te ãma 're isaprĩ pese za'ra mono zé hã ro siwi ti'â. Tahawa, duré Efraĩhĩ nhihudu norĩ si'udâ sina, panho'õmo na te te saprĩ za'ra da, nasi sihutu sidâpâsi ma tô Ziliadi si'aibâ norĩ hã nasi sadanha za'ra ane: — E a hã, Efraĩhĩ nhihudu. Tahawa, duré ta norĩ sidâpâsi mare na te te ãma sada'âbâ za'ra wa,

⁶ ma tô ãne damreme hã tãma 'ru za'ra: “Ma'ãpé nharĩ ãne: Chiboléti na”. Tawamhã isadawa parab za'ra “Siboléti na”, damreme õhõ zarina si te te nasi nharĩ za'ra wamhã, ma tô nasi waibu ni. Ma tô duré nasi simro ni, tô tame â zaihâ na. Tahawa, Efraĩhĩ nhihudu norĩ, tô tamemhã ma tô ai'utõ, 42 miu na.

⁷ Tawamhã Zépté, Ziliadi hawi 're ihâimana mono hã ma tô Izaraéu nhihudu ma i'rãnho'õmo na hã 're hâimana, 6 wahub 're. Tawamhã dâ'â wamhã, ma tô ãma ti'a ni, ite 'ri nho'õmo ãma, Ziliadi na isisi ãma.

Ibsã norĩ wasu'u, Elõhõ wasu'u me, duré Abdõhõ wasu'u me

⁸ Tawamhã Zéptéhé parimhã, Ibsã, 'rinho'u Belẽ ãma 're ihâimana mono hã ma tô Izaraéu nhihudu norĩ ma si'i'rãnho'u.

⁹ I'ra si'aibâ hã 30 na, duré tô i'ra sipi'õ hã 30 na. Tawamhã ti'ra sipi'õ 30 na ihâiba za'ra hã ma tô tisiré a'uwẽ'õ norĩ ma, aibâ ma sa'ré za'ra, nasi ãma mro za'ra da hã. Duré tô 30 na ti'ra si'aibâ norĩ ma, ma tô azarudu hã tãma ãwisi za'ra, taha na si mro za'ra da. Tawamhã Ibsã, ma tô Izaraéu nhihudu norĩ ma si'i'rãnho'u, 7 wahub 'remhã.

¹⁰ Tawamhã duré oto dâ'â wamhã, ma tô Belẽ ãma dasiwi sẽrẽ ni.

¹¹ Ibsãhã parimhã, ma tô Elõ, Zébulõhõ nhihudu norĩ hawi a'uwẽ hã Izaraéu nhihudu norĩ ma si'i'rãnho'u 10 na wahub 'remhã.

¹² Tawamhã duré ta hã dâ'â wamhã, ma tô Aizarõ, Zébulõhõ nhipti'ai ãma hã dasiwi ãma ti'a ni.

¹³ Elõhõ parimhã, ma tô Abdõ si'i'rãnho'u, Izaraéu nhihudu norĩ ma. Ta hã Hile'uhu 'ra, 'rinho'u Piratõ na isisi ãma 're ihâimana mono.

¹⁴ Abdõ hã 40 na i'ra, duré 30 na isihudu, 70 na awaru po'repore na 're inomro mono. Ta hã Izaraéu nhihudu norĩ ma, 8 wahub 'remhã ma tô si'i'rãnho'u.

¹⁵ Tawamhã duré dâ'â wamhã, ma tô ãma dasiwi ti'a ni, Piratõ na 'ri nho'õmo nhisi ãma, Efraĩ ti'a niwĩ 're ihâimana mono ãma, amalequita norĩ nhipti'ai ãma ẽtẽ za'wari ne niwĩ.