Zuize 11 - ꞌRe Ihâimana Uꞌâsi Mono Zadawa Wasuꞌu

Zéptéhé wasu'u

¹ Tawamhã Zépté, Ziliadi ti'ai ãma 're isãmra mono hã, dasi'wapéi 'manharĩ'wa isib'ru duré ipahi waihu'u'õ. Taha mama nhisi hã Ziliadi na. Duré taha na hã tisiwa'âbâ zô 're isisõmri mono.

² Tawamhã Ziliadihi mro uptabi ma zama ma tô duré isé're hawimhã i'ra norĩ tãma ti'maipoto za'ra. Tawamhã ta norĩ oto prédub za'ra wamhã, ma tô Zépté hã sihawib za'ra oto siwi waze. Tahawa, te tãma nharĩ za'ra ãne: — Wamama nhimarĩ hã i'uirĩ na ãma wasima iwasipo'o mono hã aima i'maihâimana da hã mare di za. E marĩ wa. A hã aimawi pi'õi 'ra na aihâimana wa.

³ Tahawa Zépté, ma tô tisisãnawã norĩ hawimhã aimani. Simani wamhã, ma tô Tobi na ti'a nhisi u mo, tame 're sãmra mono da oto. Tawamhã ni'wam norĩ aibâ niha na siwa'ru 're inomro mono hã ma tô tamemhã ãma sihâibatob za'ra. Ma tô duré siré si 're nomro oto.

⁴ Tawamhã we ropsa'wari mono pari, nimahã na ma tô amonita norĩ hã siwi 'wapé, Izaraéu nhihudu norĩ hã.

⁵ Tawamhã Ziliadi ãma danhib'ihâ'a norĩ hã ma tô Zéptéhé zô ai'aba'ré, Tobi hawi te te ãma siwi siri da apâ.

⁶ Tahawa, ma tô ãne ta norĩ ma nharĩ za'ra: — Ma'ãpé ãma wasiré aimorĩ za'ra na, amonita norĩ wa te 'wapé za'ra wa, wate dasi'wapé nhib'ihâ'a na wama aihâimana za'ra da.

⁷ Tawamhã Zépté ma te ãne ãma tãma wa'rãmi za'ra: — Oro a norĩ wa'wa hã asiwi ĩ'ruiwapari aba wa, ĩmama nhorõwa hawi asiwi ĩwazere aba za. E niha te ãne nherẽ we ĩzô ai'aba'réi wa'wa, ropire aima hâimana za'ra wa'aba wapsi.

⁸ Tane nherẽ, ma te duré ãne ãma sada'âbâ za'ra: — Tane nherẽ, wa asô aipizari za'ra ni, wa te wasima aiwẽ za'ra wa, uburé Ziliadi ãma 're idahâimana za'ra mono norĩ nhib'ihâ'a na aihâimana da, amonita norĩ, za wa te 'wapé za'ra ma ropibu ma!

⁹ Tawamhã Zépté te duré tãma nharĩ za'ra ãne: — Amonita norĩ te a'wapé da, apâ 'ri u ĩ'ãma siri za'ra wa'aba wa, duré Uburé Danhib'apito, ta norĩ hã te te ĩma sõmri za'ra wamhã, wa za duré wa hã aima ĩsi'ĩ'rãnho'õmo za'ra wa'wa. E wẽ di za ãne hã tawamhã aima za'ra wa'aba hã.

¹⁰ Tawamhã ma te duré ãne ãma sada'âbâ za'ra: — Ĩhe, tane hã wẽ di za. Inharĩzéb zarina, wa za tô wasiwi 'manharĩ ni za. Uburé Danhib'apito nho'a wa ãne na hã aima ropisutu za'ra ni.

¹¹ Tawamhã Zépté, ma tô Ziliadi ãma i'rãnho'õmo norĩ me oto mo apâ. Ãhã wa, a'uwẽ norĩ dama i'rãnho'õmo na, duré uburé danhib'ihâ'a na te te 're da'a'madâ'â mono da, ma tô siwi tisẽ. Tawamhã Mispa ãma, ma tô te te inharĩzéb 'rata zarina duré timreme na ãma dama sahu, Uburé Danhib'apito nho'a hã.

¹² Tawamhã Zépté ma tô romreme 'wapéi'wa norĩ, amonita norĩ nhib'apito u hã satõrĩ za'ra. Ta norĩ hã ma tô tawamhã ãne tãma sadawa wasu'u za'ra: — E marĩ bâ, te wazada aihâimana za'ra wa'wa, wate ti'ai wa'õtõ nho'õmo u we i'asisisi aba zéb na hã.

¹³ Tawamhã amonita norĩ nhib'apito, ma te ãne ãma tãma wa'rãmi za'ra: — Izaraéu nhihudu norĩ, nimahã na Ezitu hawi we wairébé wamhã, ĩte ti'a, panho'u Arno na isisi hawi, panho'u Zaboqui na isisi u, duré Zodã pa panho'õmo u hã ma tô uburé ĩwi âri za'ra. Tahawa ãma wasi'wapé za'ra ãna te za apâ ĩnhipti'a hã asiwi ĩma isõmri 'wa.

¹⁴ Tawamhã Zépté, romreme 'wapéi'wa norĩ hâiba amo hã ma tô duré amonita norĩ nhib'ihâ'a u hã satõrĩ za'ra,

¹⁵ ãne timreme na te te ãma tãma iwa'rãmi ré: — Izaraéu nhihudu norĩ, moabita norĩ nhipti'a, amonita norĩ nhipti'ai me te te siwi mrami zahuré õ di.

¹⁶ Nimahã na Izaraéu nhihudu norĩ, Ezitu hawi we wairébé wamhã, ma tô rop si 're irosa'wari mono wa'waibaba, Âpré na â poré nhisi u hã ai'aba'ré. Ta hawimhã ma tô Cadi na romnhisi u oto aihutu.

¹⁷ Tawamhã Izaraéu nhihudu norĩ, ma tô duré romreme 'wapéi'wa edomita norĩ nhib'ihâ'a u satõrĩ za'ra, ãne timreme za'ra ré: “Asipti'a na wa te a'â ro'rahâri za'ra da hã wama sa'ré za'ra na.” Tane nherẽ, apito hã te te tãma rowairébé za'ra õ di. Tahawa moabita norĩ nhib'apito wi, tô timreme na te te irowaptẽrẽ za'ra zém ne, ma tô aré duré tiwi rowaptẽrẽ za'ra. Tane nherẽ, taha zama te te tãma sa'ré za'ra õ di. Tahawa te te ãne taré tiwi rowaptẽrẽ baba za'ra wa, ma tô Cadi ãmap si a'â oto 're hâimana za'ra.

¹⁸ Tawamhã Zépté ma tô duré rob'rãzarõtõ na ãma uzusi, ãne: — Taha pari, Izaraéu nhihudu norĩ hã ma tô rop si 're irosa'wari mono wa'waibaba hã zâmo. Tahawa, edomita norĩ nhipti'a, moabita norĩ nhipti'ai me ma tô taré te te sa'oto za'ra. Ãhã wa, ma tô Moabi ti'a bâtâ pusizém niwĩb u oto aihutu, Arno na panho'õmo zara niwĩ. Tahawa, tame ma tô oto sima 'ri nhoré za'ra. Tane nherẽ, taha â na te te saprĩ za'ra õ di, moabita norĩ nhipti'a zada'ré na simizazâri za'ra wa.

¹⁹ Tawamhã Izaraéu nhihudu norĩ, romreme 'wapéi'wa norĩ, ma tô Seõ na amoreu norĩ nhib'apito nhisi u satõrĩ za'ra, Hesbõ na 'ri wa'õtõ nhisi u, te te tiwi waptẽrẽ za'ra da, õ hã ti'ai wa'õtõ nho'õmo na te te ãma ro'rahâri za'ra da hã, za isipti'a za'ra na tãma ihâimana za'ra u sihutu da.

²⁰ Tane nherẽ, apito Seõ tãma i'umnhasi za'ra õ zarina, te te ãma saze za'ra õ di, isipti'a na te te ãma iro'rahâri za'ra da hã. Tahawa apito, uburé tite dasi'wapéi 'manharĩ'wa norĩ te te sima 'rã'õtõ wamhã, ma tô ta norĩ hã sima 'ri nhoré za'ra, Zasa na 'ri nho'õmo nhisi ãma. Tahawa, ma tô Izaraéu nhihudu norĩ hã duré siwi 'wapé.

²¹ Tane nherẽ, Uburé Danhib'apito, Izaraéu nhihudu norĩ te 'Re ihâimana u'âsi mono, apito Seõ ãma duré uburé ite aibâ norĩ ãma te te ai'uté za'ra da hã, ma tô isib'rata tãma hâiba nhomri za'ra. Tawamhã Izaraéu nhihudu norĩ, ma tô uburé amoreu norĩ iwa 're ihâimana za'ra mono zé ti'a hã siwi ti'â.

²² Ãne uburé ti'a norĩ hã amoreu norĩ wi te te siwi i'âri hã: Hâiwa nhimire niwĩ panho'u Arno na isisi hawi, hâiwa nhimi'e niwĩ panho'u Zaboqui na isisi u hã, duré bâtâ pusizém niwĩ rop si 're irosa'wari mono hawi, bâtâ zasizém niwĩ panho'u Zodã pa â 're ihâimana mono u hã ma tô siwi ti'â.

²³ E Uburé Danhib'apito, Izaraéu nhihudu norĩ te, 'Re ihâimana u'âsi mono, tinhib'a'uwẽ norĩ ma, amoreu norĩ te te tãma 're sate mono nherẽ, te niha hã a hã bété asima iwẽ, apâ âri da, ti'a hã.

²⁴ Camo na ihâiba'õ nhisi ate za'ra wa'wa, ti'a te te aima 're isõmri za'ra wa'aba mono hã e asima 're waibui wa'aba mono õ di za bété. Tane wa za duré wa norĩ hã, Uburé Danhib'apito, wate 'Re ihâimana u'âsi mono, ti'a te te wama 're isõmri za'ra mono hã wa te wasima 're waibu za'ra.

²⁵ E a hã ma tô asina irosa'ra Baraqui, Zipoho 'ra, moabita norĩ te apito nhipai u i'aihâimana na hã. Duré e ta hã, ma tô nimahã na Izaraéu nhihudu norĩ zada tihâiba. E niwa ma tô wa a'wapé.

²⁶ Izaraéu nhihudu norĩ hã 300 wahum na ma tô Hesbõ 'ri wa'õtõ ãma, duré Aro'e 'ri wa'õtõ ãma 're hâimana za'ra. Duré 'ri wa'õno iwaptoma 're ihâimana za'ra mono ãmab zama ma tô 're si'ubumro, duré uburé 'rinho'u ihâiba amo panho'u Arno na isisi zaihâ na zama. E marĩ wa, bété a norĩ wa'wa ãne na romhâimana mono ré hã apâ 'ri nho'õmo norĩ asiwi waibui aba õ di.

²⁷ Mare di, wa hã! Marĩ te 'manharĩ õ di, taha u'âbâ asada ĩhâimana za'ra wa'aba da hã. Aiwétési ma iwasédé hã i'manha, ĩ'wapé da, asima iwẽzéb zarina. Uburé Danhib'apito si, da'ãma rowairébé'wa hã. Tahawa, te za taha si nimahã i'uwaibaba ma, tãma rowairébé zahuré, niha wamhã, Izaraéu nhihudu norĩ ma, niha wamhã duré amonita norĩ ma hã.

²⁸ Tane nherẽ, amonita norĩ nhib'apito hã te te sima wẽ õ di, Zépté romreme te te tãma isõmri, te te iwapari da hã.

²⁹ Tawamhã Uburé Danhib'apito pẽ'ẽzani, ma tô Zéptéhé wamhã ãzé. Tahawa Ziliadi ti'a wa'waibaba duré Manasé ti'a wa'waibaba ma tô ro'razâ. Tahawa, ma tô Ziliadi ãma Mispa u apâ sina siri. Tawamhã duré ta hawi Amo ti'ai u oto morĩ wamhã,

³⁰ ma tô Uburé Danhib'apito ma ropisutu ãne: — Amonita norĩ, ĩnhib'rata ĩma sõmri za'ra wamhã,

³¹ dasi'wapéi hawi apâ ĩwisi wa, ni'wa te te ĩnhopẽtẽ da, imorĩ'rata na ĩnhorõwa hawi iwatobro hã wa za wa hã ãma aima ĩnhoprubzéb da hã zata za.

³² Tawamhã Zépté pa nho'õmo na ma tô saprĩ, amonita norĩ te te a'wapé da hã. Ãhã wa, ma tô Uburé Danhib'apito te te da'ãma i'ai'utézé hã tãma tisõ.

³³ Tawamhã 20 na uburé 'ri nho'õmo ãma, ma tô ãma ai'uté za'ra, Aro'e hawi, Minite ti'ai 'rata 're ihâimana za'ra mono u, duré taha nhipai u, Abéu-Querami na 'ri nho'õmo nhisi u hã. Ãne ma tô Izaraéu nhihudu norĩ, amonita norĩ hã we te te a'uprosi.

Zéptéhé 'ra sipi'õi wasu'u

³⁴ Tawamhã Zépté apâ Mispa ãma tinhorõwa u te te sina siri wamhã, ma tô i'ra sipi'õ te te sõpẽtẽ da, itẽme watobro, si'rẽne mono sina, duré ropta'azé tãborĩ na te te ropta'a mono sina. Ta hã õhõ sire i'ra hã. Aimawi i'ra sipi'õ hã, duré i'ra si'aibâ hã tãma 're 'maihâimana mono õ di.

³⁵ Tawamhã Zépté ti'ra te te 'madâ'â wa, isabâdâ tiwi robzei'õ pese wa, ma tô ti'uza te te hâiwazui mono sina duré sadari sina tinha ãne: — E niha ĩ'ra! Ĩma ropire uptabi di ãhã na hã, aihâiba u'âbâmhã. E marĩ wa. Wa hã wa tô Uburé Danhib'apito ma ropisudu ipire hã 'manha. Tahawa te ãma sipai waihu'u õ di, te tãma iropisutuzém na hã.

³⁶ Tawamhã i'ra, ma te ãne ãma tãma wa'rã: — Ĩmama, tô Uburé Danhib'apito ma, ropisudu hã 'manharĩ wamhã, ma'ãpé tiha hã ĩ'ãma 'manharĩ, tô tãma iropisutuzéb zarina. E tihai wa. Uburé Danhib'apito hã ma tô asitob'ru amonita norĩ na hã ai'ruiwa'âbâ za'ra wa'wa.

³⁷ Te duré tawamhã zahadu tãma tinha ãne: — Misi tiha hã wa za aiwi waptẽ ãne: Ma'ãpé ĩsiwaihu'u norĩ me, ẽtẽ 'rãihâ norĩ u ĩmorĩ da hã ĩma rowairébé, tame maparane a'amo na ĩsiwa'õ sina a'â ĩhâimana da. E tihai wa. Niwamhã za dana na hã ĩhâimana õ wa.

³⁸ Tawamhã imama ma tô tãma rowairébé, morĩ da hã, maparane a'amo na a'â hâimana da. Tahawa tisiwaihu'u norĩ me oto ẽtẽ 'rãihâ norĩ u si'aba'réi wamhã, ma tô tame nasi aiwa'õ za'ra, niwamhã za dana na hã hâimana õ wa.

³⁹ Tawamhã maparane a'amo ãma si'utõrĩ pari, ma tô apâ hã mo, timama u. Ãhã wa imama, 'Re ihâimana u'âsi mono ma, te te iropisutuzé hã ma tô tãma ãma uwaimra. Ãne ma tô tawamhã hâiba ubuni ré dârâ. Ãne hawi te oto Izaraéu nhihudu norĩ hâimanazéb 'remhã

⁴⁰ isipi'õ norĩ wahup sidâpâsi maparane si'uiwa na bâtâ na hã 're wairébé nimomo, Zéptéhé 'ra sipi'õi ãma 're 'ru'ru mono da, Ziliadi norĩ siré ãma hã.