Zuize 10 - ꞌRe Ihâimana Uꞌâsi Mono Zadawa Wasuꞌu

Tola norĩ wasu'u, Zaihi me

¹ Tawamhã Abimelequi dâ'â parimhã, Puaha 'ra Tola, Dodoho nhihudu hã ma tô Izaraéu nhihudu norĩ te te anho'reptu da hã watobro. Ta hã Isacaha nhihudu norĩ siré a'uwẽ, 'rinho'u Sami na isisi ãma 're ihâimana mono, Efraĩ ti'a niwĩ ẽtẽ za'ra ahâ ãma.

² Tawamhã Tola Izaraéu nhihudu norĩ ma i'rãnho'õmo na ma tô 're sa, 23 na ãma iwahum na. Taha pari oto dâ'â wamhã, ma tô Sami ãma dasiwi ãma ti'a ni.

³ Taha pari, Zai na isisi hã ma tô duré watobro, Ziliadi na rowamri hawimhã. Ta hã ma tô Izaraéu nhihudu norĩ, i'rãnho'õmo na hã te te 're a'madâ'â, 22 na ãma iwahum na.

⁴ Taha 'ra hã 30 na awaru po'repore na 're isisa'rei mono. Duré i'ra norĩ te 'rinho'u hã 30 na Ziliadi na rowamri niwĩmhã. Ta hã 'ri nho'õmo norĩ nhisi, te zahadu ãhã na zama “Zaihi te” na da te 're sisi za'ra.

⁵ Tawamhã Zai oto dâ'â wamhã, ma tô ãma ti'a ni, Camo na 'ri wa'õtõ nhisi wa.

Amonita norĩ, Izaraéu nhihudu norĩ te te 're iwada'uri pese za'ra mono zé wasu'u

⁶ Tawamhã Izaraéu nhihudu norĩ, ma tô apâ Uburé Danhib'apito wi tiwasédé te te 're 'manharĩ za'ra. Ma tô ihâiba'õ Baauhu ãma, 'ri nho'õmo mono bâ 're wata za'ra, ihâiba'õ Asitaroti ãma, Siria norĩ te ihâiba'õ ãma, Sidõ norĩ te ãma, moabita norĩ te ãma, Amo norĩ te ãma, duré filisteu norĩ te ãmamhã. Tahawa ta norĩ, Uburé Danhib'apito te te siwi rẽme pese wa, ãma 're wata za'ra mono õ di oto.

⁷ Tahawa Uburé Danhib'apito, Izaraéu nhihudu norĩ zada sahi za'ra wa, ma tô filisteu norĩ nhib'rata, duré amonita norĩ nhib'rata te te 're robzépata za'ra mono da tãma hâiba za'ré za'ra.

⁸ Tahawa, tô taha wahum na Izaraéu nhihudu norĩ ãma te te ãma ai'uté za'ra wamhã, ma tô tinhimiwada'uri na te te 're wati pese za'ra. Tawamhã ma tô 18 wahum na uburé Izaraéu nhihudu norĩ Ziliadi ãma 're ihâimana za'ra mono, Zodã pa bâtâ pusizém niwĩ ãne zarina te te 're robzépata za'ra, amoreu norĩ nhipti'ai ãmamhã.

⁹ Tawamhã amonita norĩ zama ma tô panho'u Zodã pa â na hã saprĩ za'ra, Zudaha nhihudu norĩ, Bẽzamihĩ nhihudu norĩ, duré Efraĩ nhihudu norĩ, te te 'wapé za'ra da hã. Ãne ma tô Izaraéu nhihudu norĩ te te 're irobzépata za'ẽtẽ za'ra mono zém na hã 're hâimana za'ra.

¹⁰ Tahawa Izaraéu nhihudu norĩ, mreme 'rãihâ sina Uburé Danhib'apito wi te te rowaptẽrẽ za'ra wamhã, ma tô ãne tãma siwẽ'õ za'ra: — Uburé Danhib'apito, wa norĩ hã wa tô wawasédé hã wa te aiwi 're 'manharĩ za'ra. Duré wate 'Re ihâimana u'âsi mono, wa te wasiwi airẽme wa, wa tô ihâiba'õ norĩ Baau na iwamri ãmap si 're wawata za'ra.

¹¹ Tawamhã Uburé Danhib'apito, ma te ãne ãma sada'âbâ za'ra: — Nimahã na hã ezipsiu norĩ, amoreu norĩ, amonita norĩ, duré filisteu norĩ,

¹² Sidõniu norĩ, amalequita norĩ, duré Maoni norĩ, tinhimiwada'uri pese na te te 're aiwati za'ra wa'aba mono wamhã, ma tô ĩwi irowaptẽrẽ zahi za'ra wa'wa, te aipawaptob za'ra wa'aba da hã. E tawamhã wa hã te asõ'reptu za'ra wa'aba õ di bété. Wa tô, tô asõ'reptu za'ra wa'wa.

¹³ Tane nherẽ, ma tô a norĩ wa'wa duré asiwi ĩrẽme 'wa, aimawi ihâiba'õ norĩ ãmap si 're aiwata za'ra wa'aba mono da hã. Tahawa, wa hã te i'aipawaptob za'ra wa'aba na te isahu da hã mare di za.

¹⁴ Tahawa ma'ãpé ihâiba'õ norĩ asima ipisutu za'ra wa'aba wi si, tiwi rowaptẽrẽ za'ra wa'aba, ropire 're, aihâimana za'ra wa'aba ré, pé ta norĩ si te te aipawaptob za'ra wa'aba da.

¹⁵ Tawamhã Izaraéu nhihudu norĩ, ma duré ãne ãma tãma wa'rãmi za'ra: — Tô sena, wa norĩ hã wa tô wawasété za'ra ni tô. Tahawa ma'ãpé asima iwẽzéb zarina, niha na wama rob'manharĩ za'ra na. Tane nherẽ, ma'ãpé wazawi na hã ãhã na wanho'reptu za'ra na.

¹⁶ Tahawa Izaraéu nhihudu norĩ, tisiré a'uwẽ'õ norĩ te ihâiba'õ norĩ hã ma tô oto siwi sãmra, Uburé Danhib'apito ãma si oto 're wata za'ra mono da. Tahawa ma tô oto duré itõmo na ãma aiwamri pese za'ra, ropire tãma 're ihâimana za'ra mono zém na.

¹⁷ Tawamhã amonita norĩ te, dasi'wapéi 'manharĩ'wa zô dahãsi wamhã, Ziliadi ãma te te sima 'ri nhoré za'ra wa, ma tô duré Izaraéu nhihudu norĩ hã si'ubumro, Mispa ãma te te sima i'ri nhoré mono zéb ãma hã.

¹⁸ Tawamhã Ziliadi ãma i'rãnho'õmo norĩ, ma tô ãne sima nharĩ za'ra: “Ni'wa, amonita norĩ 'wapé na te te sãna'rata wamhã, te za Ziliadi ãma 're idahâimana za'ra mono norĩ ma hã si'apito za”.