Zuize 1 - ꞌRe Ihâimana Uꞌâsi Mono Zadawa Wasuꞌu

Adoni-Bezequihi ãma da te i'ai'utézé wasu'u

¹ Tawamhã Zozué dâ'â parimhã, ma tô Izaraéu nhihudu norĩ, 'Re ihâimana u'âsi mono Uburé Danhib'apito hã siwi sadanha ãne: — E mahã nhihudu a'uwẽ wa'reb za'ra hã te za imorĩ'rata na siwi 'wapé, cananeu norĩ hã.

² Tawamhã Uburé Danhib'apito ma tô ãma sada'âbâ za'ra ãne: — Zudaha nhihudu norĩ te za imorĩ'rata na 'wapé za'ra. E marĩ wa. Ti'a hã ta norĩ ma, wa hã te tãma sõmri siromo za'ra wa.

³ Tahawa te Zudaha nhihudu norĩ, Simiã nhihudu norĩ ma nharĩ za'ra ãne: — Oto ti'a, da te wama ipisutu za'ra tẽme wasiré wasi'aba'réi wa'aba, wa te 'wapé za'ra da, cananeu norĩ hã. Taha parip si wa za wasiré hã ai'aba'ré ni, za ti'a da te aima ipisutu za'ra wa'aba u. Ãne wa, Simiã nhihudu norĩ,

⁴ Zudaha nhihudu norĩ me, siré simisutu ma tô ai'aba'ré, te te 'wapé za'ra da. Tawamhã Uburé Danhib'apito, cananeu norĩ ãma, duré perizeu norĩ ãma te te ãma i'ai'uté za'ra zé te te tãma sõmri za'ra wamhã, ma tô ta norĩ hã siwi uprosi, 10 miu na 'rinho'u Bezequi na isisi ãma aibâ norĩ 're ihâimana za'ra mono hã.

⁵ Tawamhã tame Adoni-Bezequi ma tô siwi sõpẽtẽ. Te te siwi sõpẽtẽ wamhã, ma tô siwi 'wapé. Tahawa, cananeu norĩ ãma, duré perizeu norĩ ãma, ma tô ãma ai'uté za'ra.

⁶ Tahawa Adoni-Bezequi hã ma tô tiwi aimani za'ra. Tane nherẽ, isarina sisa'rei mono wa, ma tô siwi ti'â. Tahawa, ma tô siwi siptõmohi na'rata nhihâ. Ma tô duré siwi paradub'rã na'rata nhihâ.

⁷ Ãhã wa, te Adoni-Bezequi hã tinha ãne: — Wa hã wa tô ti'ru, 70 na apito norĩ nhiptõmohi na'rata za'ra hã, duré iparadub'rã na'rata za'ra hã, da te tiwi sihâri za'ra da. Ta norĩ hã ma tô ĩte wedeza zahâpâ dasai'a'a hã te te 're waibu. Tahawa, ãhã na awa'awi na hã 'Re ihâimana u'âsi mono, ma tô ãne hã ĩma 'manha, ta norĩ ma, te 're i'ab'manharĩ mono zém ne hã. Tawamhã Adoni-Bezequi, 'rinho'u Zeruzalẽ u ma tô dasiwi saprõni ni. Tahawa, tame ma tô oto dârâ.

Zeruzalẽ ãma, Hebrõ na 'ri nho'õmo nhisi me, da te ãma i'ai'uté zahuré zé wasu'u

⁸ Tawamhã Zudaha nhihudu si'aibâ norĩ, ma tô Zeruzalẽ hã siwi rési. Tahawa, ma tô ãma ai'uté za'ra. Ma tô duré iwa 're ihâimana za'ra mono norĩ hã siwi uprosi. Ãhã wa, ma tô duré 'ri nho'õmo na hã ãma siwi sazu.

⁹ Taha pari, ma tô ai'aba'ré, cananeu norĩ, ẽtẽ ãma, hâiwa nhimi'e niwĩ rop si marĩ ãna 're isa'wari mono wa, duré Sefela na romharé nhisi ãma 're ihâimana za'ra mono norĩ, te te 'wapé za'ra da hã.

¹⁰ Tawamhã 'rinho'u Hebrõ na isisi, aré imorĩ'rada Quiriate-Arba na isisi ãma 're ihâimana za'ra mono norĩ zama, ma tô siwi wano'õ, cananeu norĩ hã. Tahawa, Anaquihi 'ra norĩ ãma, Sesai ãma hã, Aima ãma hã, duré Tauma'i ãma hã ma tô ãma ai'uté za'ra.

Débi na 'ri nho'õmo nhisi ãma, da te duré i'ai'utézé wasu'u

¹¹ Tawamhã ta hawi, ma tô te te ropãrĩ za'ra mono sina sisõré pese na oto ai'aba'ré, Débi na 'ri nho'õmo nhisi ãma 're ihâimana za'ra mono norĩ te te 'wapé za'ra da hã, imorĩ'rata na Quiriate-Sefe na isisi ãma.

¹² Tawamhã Calebi, te ãne tinha: — Ĩ'ra Aquisa hã wa za nimahã ma aibâ ma tisõ, ãma mro da, Quiriate-Sefe za te te ĩma i'âri da ma.

¹³ Tawamhã Otonié ma tô 'ri nho'õmo ãma hã oto ai'uté. Ta hã Quenazihi 'ra, Calebihi no sipodo. Tahawa Calebi ma tô ti'ra hã tô tãma tisõ, ãma mro da.

¹⁴ Tawamhã Aquisa, Otoniéhé siré oto 're hâimana mono wamhã, ma tô wati, imama wi, ti'a hã te te tiwi 'maiwaptẽrẽ da. Ãhã wa, ma tô Aquisa hã imama Calebi 're ihâimana mono zéb u ĩtẽme mo. Tawamhã awaru po'repore na te te si'rai wamhã, ma tô imama hã sadanha ãne: — E marĩ te asima iwẽ.

¹⁵ — Wa tô ĩsima wẽ, asõprubzé hã! A hã ti'ai 'ré si ma tô ĩma isõ. Tahawa ma'ãpé oto u siro 're ihâimana mono ré hã ĩma 'manhomri. Tahawa ma tô Calebi, sa'a nhisi ti'a, sa'a zahâpâ ti'ai me, u siromo ré hã tãma sõmri zahuré.

Zudaha nhihudu norĩ, Bẽzamihĩ nhihudu norĩ me, te te da'ãma i'ai'uté za'ra zé wasu'u

¹⁶ Tawamhã queneu norĩ siré Mozésihi maprebaba nhihudu norĩ hã ma tô Zudaha nhihudu norĩ siré wairé, 'rinho'u Zerico norõwede ahâ na iwa 're isimasa mono hawimhã, Zuda na rop si 're irosa'wari mono nhisi u, si'aba'ré da, Arade hâiwa nhimire niwĩb u. Tawamhã tame ma tô amalequita norĩ wa'wamhã 're si'ubumro.

¹⁷ Tawamhã Zudaha nhihudu norĩ, Simiã nhihudu norĩ me, sina sihâibatob za'ra wamhã, ma tô cananeu norĩ 'rinho'u Zefate na isisi ãma 're irob za'ra mono hã 'wapé za'ra. Tawamhã 'Re ihâimana u'âsi mono nhisi na, ma tô uburé 'ri nho'u hã siwi uprosi. Tahawa ma tô 'ri nho'õmo nhisi hã oto sisaprĩ, Horma na isisi hã 're hâimana mono da oto.

¹⁸ Tane nherẽ, ta norĩ iwaptoma 're ihâimana za'ra mono, Gaza na romnhisi ti'a hã te te siwi âri õ di, Asquerõ na romnhisi ti'a hã, duré Ecrõ na romnhisi ti'a hã.

¹⁹ Tawamhã Uburé Danhib'apito, a'uwẽ Zudaha nhihudu norĩ te te pawaptob za'ra wa, ma tô ta norĩ hã ẽtẽ 'rãihâ niwĩ ti'a 're ihâimana mono ãma, ãma ai'uté za'ra. Tane nherẽ, a'uwẽ ti'a zada'ré ãma 're ihâimana za'ra mono norĩ hã te te siwi sani za'ra õ di. E marĩ wa. Ta norĩ te isi'uwazi tete 'manharĩ na wedewara dasi'wapézé tãma 're hâimana za'ra mono wa.

²⁰ Tawamhã Mozési te te i'ruzéb zarina, ma tô Calebihi ma 'rinho'u Hebrõ na isisi hã tãma sõmri ni. Duré taha si, ma tô Anaquihi 'ra si'ubdatõ ihâimana za'ra hã ta hawi oto sani za'ra.

²¹ Tane nherẽ, a'uwẽ Bẽzamihĩ nhihudu norĩ, zebuzeu na a'uwẽ iwamri norĩ 'rinho'u Zeruzalẽ ãma 're ihâimana za'ra mono norĩ hã te te ta hawi sani za'ra õ di. Tahawa te tame zahadu zebuzeu norĩ, Bẽzamihĩ nhihudu norĩ siré 're hâimana u'âsi za'ra, ã bâtâ u hã.

Zuzéhé nhihudu norĩ, Bétéu ãma te te i'ai'uté za'ra zé wasu'u

²² Tawamhã Zuzéhé nhihudu norĩ si'aibâ, ma tô Bétéu hã siwi 'wapé. Taha ré, ma tô Uburé Danhib'apito duré ta norĩ siré tihâiba.

²³ Tahawa, ma tô Bétéu duréihã Rowa'a na isisi u hã, dama wapsãi'a'wa norĩ hã siwi 'mazatõrĩ za'ra.

²⁴ Tawamhã ta norĩ, 'ri nho'õmo hawi aibâ iwatobro te te siwi i'madâ'â ma hã, ma tô tãma nharĩ za'ra ãne: — E niha 'ri nho'õmo u, dazasizé hã. Ma'ãpé wama wasu'u za'ra na. Tahawa, niha na wa te aima rob'manharĩ wasété za'ra õ di za.

²⁵ Tawamhã 'ri nho'õmo tẽme 're idanhisisi mono zé hã, ma tô tãma hâi'ré za'ra. Ãhã wa, ta norĩ oto sisisi wamhã, ma tô uburé 'ri nho'õmo 're, 're ihâimana za'ra mono norĩ hã siwi uprosi. Ãhã wa, õhõ si aibâ te te siwi wĩrĩ õ di, ime ihâimana za'ra me.

²⁶ Tawamhã ta hã ma tô hitita norĩ nhipti'ai u hã mo. Morĩ wamhã, tame 'rinho'u te te i'ri hã ma tô sisi, Rowa'a na. Ta hawim haré te zahadu ãhã na zama õhõ na si da te 're sisi za'ra.

Nima norĩ a'uwẽ, irom hawi da te isani õ za'ra zé wasu'u

²⁷ Tane nherẽ, Manaséhé nhihudu norĩ, 'rinho'u Bete-Sã na isisi ãma a'uwẽ 're ihâimana za'ra mono hã, Ta'anaqui na isisi ãma hã, Dori ãma hã, Ibre'ã ãma hã, Megido ãma hã, duré 'ri nho'õmo waptoma 'ri wa'õtõ mono na 're ihâimana za'ra mono hã te te siwi sani za'ra õ di. E marĩ wa. Cananeu norĩ iwa 're hâimana u'âsi za'ra mono da hã te te sima rowairébé zahi za'ra wa.

²⁸ Tawamhã Izaraéu nhihudu norĩ siptete na oto 're hâimana za'ra mono wamhã, ma tô cananeu norĩ ma, romhuri te te tãma 're sõmri za'ra, te te tãma 're romhuri pese za'ra mono da. Tane nherẽ, uburé hã te te siwi sani za'ra õ di.

²⁹ Tawamhã a'uwẽ Efraĩ nhihudu norĩ, cananeu norĩ Geze na 'rinho'u isisi ãma 're ihâimana za'ra mono norĩ hã, te te siwi wano'õ mono õ di. Ãne wa, ma tô cananeu norĩ hã õ norĩ siré tô õhõ 're, 're hâimana u'âsi za'ra.

³⁰ Tawamhã Zébulõhõ nhihudu norĩ, 'rinho'u Quitrõ na isisi ãma, duré Na'aro na isisi ãma a'uwẽ 're ihâimana za'ra mono norĩ hã te te siwi wano'õ mono õ di. Tahawa ma tô cananeu norĩ duré õ norĩ me hã siré 're hâimana u'âsi za'ra. Tane nherẽ, õ norĩ ma, te te tãma 're romhuri za'ra mono da hã, ma tô te te 're wada'uri pese za'ra.

³¹ Tawamhã Aséhé nhihudu norĩ, 'rinho'u Aco na isisi ãma 're ihâimana za'ra mono norĩ hã te te siwi wano'õ mono õ di, Sidõ na isisi ãma, Alabe na isisi ãma, Aczibe na isisi ãma, Helba na isisi ãma, duré Afeca na isisi ãma, duré Reobe na isisi ãma hã.

³² Tawamhã Aséhé nhihudu norĩ, cananeu norĩ õme 're ihâimana za'ra mono norĩ siré, ma tô 're hâimana za'ra, te te siwi wano'õ mono õ wa.

³³ Naftalihi nhihudu norĩ, 'rinho'u Bete-Semesi ãma, duré Bete-Anate na isisi ãma 're ihâimana za'ra mono norĩ hã te te siwi wano'õ mono õ di. Tahawa, te cananeu norĩ hã Naftalihi nhihudu norĩ siré õhõ 're, 're hâimana u'âsi za'ra. Tane nherẽ, ma tô romhuri hã tãma pisutu zahi za'ra, õ norĩ ma, te te tô 're romhuri pese za'ra mono da hã.

³⁴ Tawamhã Dãhã nhihudu norĩ da hã, ma tô amoreu norĩ hã sada tinhiptede 'manharĩ za'ra, ẽtẽ u sisiti te te wano'õ mono da. Tahawa, ẽtẽ nhi'riti wa romharé ihâimana u te te si'ra za'ra tõ da, ma tô tiwi rosawi za'ra.

³⁵ Tawamhã amoreu norĩ, ẽne Heresi na isisi ãma ma tô 're hâimana za'ra, Aizarõ na 'ri wa'õtõ nhisi ãma, duré Sa'alabi na 'ri wa'õtõ nhisi ãma. Tane nherẽ, Zuzéhé nhihudu norĩ, siptete na sada hâimana za'ra wamhã, ma tô siptete sina te te tãma 're romhuri za'ra mono da hã, romhuri hã tãma pisutu zahi za'ra.

³⁶ Tawamhã amoreu norĩ nhipti'a zada'ré hã, ma tô tinhana'rata, apa'apa 'wa nhi'oto na rowamri ihâimana hawi, Sela na 'ri wa'õtõ nhisi na ti'a inomro u, hâiwa nhimi'e niwĩ ti'a hã inomro na.