Zuéu 3 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, dapoto mono bâ te te dama irowairébézé wasu'u

¹ Uburé Danhib'apito hã te tinha ãne: — Taha wahu mono 'remhã, wa za pisutu, Zeruzalẽ ãma 're idahâimana za'ra mono norĩ hã duré Zuda na romnhisi ãma 're idahâimana za'ra mono norĩ hã apâ rowẽ na duré simarĩ ahâ na 're hâimana za'ra mono da.

² Tahawa, wa za ubumro, uburé ti'ai wa'õtõ nho'õmo mono bâ a'uwẽ norĩ hã, Zozafa na ẽtẽ siwa'aba wa romharé nhisi u, te simroi mono da, tame niha na te tãma rowairébé za'ra da. Ĩnhib'a'uwẽ Izaraéu nhihudu norĩ da, iwasédé hã te te 're 'manharĩ za'ra mono wa, wa za ãne hã 'manha. Ta norĩ hã ma tô Izaraéu nhihudu norĩ na te te ropé, ti'ai wa'õtõ nho'õmo mono bâ. Ma tô duré sima sipo'o, ĩnhipti'a nho'õmo ãma hã.

³ Datozébre ma tô nasi siwi sãmra, ĩnhib'a'uwẽ da te iwaibu za'ra norĩ hã da te dasima sõmri za'ra da. Ma tô duré nasi wede za'ra ni, 'watébrémi norĩ hã duré ba'õtõ norĩ hã pawa'âbâ ãna te te dama 're romhuri za'ra mono da, taré rob'uiprazé hã te te 're uprosi za'ra mono da, pi'õ iwa'âbâ zô 're isisõmri za'ra mono norĩ ãma, duré uwa 'rãi wa'u isé ãma. Taha na ma tô taré pese rob'uiprazé dapawa'â hã nasi ãma uprosi za'ra ni.

⁴ — Tiru ãma a'uwẽ norĩ, Sidõ ãma a'uwẽ norĩ, duré uburé Filistéa ãma a'uwẽ norĩ zama, e marĩ zarina te ĩzada 're aihâimana za'ra wa'aba mo bété. E ma tô asima iwẽ za'ra wa'wa, asi'ruiwa'âbâ za'ra wa'aba da hã. Tane ze te bâ, ĩzama wa oto mare siro, i'manharĩ za'ra wa'aba u'âbâmhã, taha na si oto ĩsi'ruiwa'âbâ da.

⁵ E marĩ wa. A norĩ wa'wa hã ma tô isimi'uri za'ra wa'wa, ĩte ẽtẽ waipo prã prata hã, duré oru ẽtẽ waipo pré hã, ate za'ra wa'wa ihâiba'õ norĩ ãma 're i'aiwata za'ra wa'aba mono zé 'ri norĩ 're, sa'ra za'ra wa'aba da.

⁶ A norĩ wa'wa, Zuda ãma 're idahâimana za'ra mono norĩ, duré Zeruzalẽ ãma, ma tô romhâ na isipti'a nhiti isimroi wa'aba mo, gregu norĩ ma, 're wede za'ra wa'aba mono da, pawa'âbâ ãna ta norĩ ma, te te 're romhuri za'ra mono da hã.

⁷ Tane nherẽ, wa hã wa za apâ sani za'ra ĩnhib'a'uwẽ norĩ, tô dama iwede za'ra wa'aba mono zém hawimhã. Wa za duré aima rob'manharĩ za'ra wa'wa, tãma i'manharĩ za'ra wa'aba zém ne, asisiwib za'ra wa'aba waptã'ã da hã.

⁸ Wa za ai'ra si'aibâ norĩ ma, duré ai'ra sipi'õ norĩ ma, da te wede za'ra da hã tãma 'manharĩ za'ra, pawa'âbâ ãna Zuda ãma a'uwẽ norĩ ma, te te 're romhuri za'ra mono da, ta norĩ hã te te duré sabeusi norĩ ma, oto 're wede za'ra mono da, a'uwẽ ti'ai wa'õtõ nho'u romhâ uptabi na 're ihâimana za'ra mono norĩ ma. Wa hã Uburé Danhib'apito wa ãne tinha.

⁹ — Ãne te za idapo're pu'u za'ra wa'wa: “Ma'ãpé, asima rob'ubumro za'ra wa'aba, dasi'wapé u da hã. Sô aihârâ za'ra wa'aba, dasi'wapéi 'manharĩ'wa norĩ zô, uburé ta norĩ ubumroi wa'aba da, simire sina dasi'wapé da hã oto hâimana za'ra da.

¹⁰ Ma'ãpé ate za'ra wa'wa ti'ai hâipo'ozém na sib'ézé 'wapa hã 'manharĩ za'ra wa'aba. Duré popanone na isi'uwazi 'rã'wa hã, ma'ãpé 'manharĩ za'ra wa'aba. Ni'wam norĩ, sib'uware na 're hâimana za'ra mono zahã, te za nharĩ za'ra ãne: “Wa hã ĩnhib'rui uptabi.”

¹¹ Ma'ãpé sa'ẽtẽ we ai'aba'réi wa'aba, uburé wawaptoma dapoto mono bâ 're i'aihâimana za'ra wa'aba mono norĩ, ẽtẽ nhi'riti romharé wa ai'rã'õtõ aba da. Uburé Danhib'apito, ma'ãpé ate dasi'wapéi 'manharĩ'wa norĩ ma, 'manharĩ za'ra na, we te te si'ra za'ra da.

¹² “Ma'ãpé asima rob'ubumro za'ra wa'aba, uburé a'uwẽ daro mono bâ 're i'aihâimana za'ra wa'aba mono norĩ. We ai'aba'réi wa'aba, Zozafa na sa'a wa'wa romharé nhisi u. E marĩ wa. Tame wa za wa hã Uburé Danhib'apito, uburé a'uwẽ aiwaptoma 're ihâimana za'ra mono norĩ ma, niha na tãma rowairébé za'ra.

¹³ A'uwẽ norĩ wasédé hã sa'ẽtẽ uptabi di. Tahawa te za ta norĩ hã asiwi i'uprosi 'wa, trigu 're 'rãi 'ré za'ra mono wa, da te dasiwi 're itehâri za'ra mono ne, duré uwa 'rã iwa'u zô, da te 're iwati'i za'ra mono ne, i'rãi wa'u hã 're ipu'u za'ra mono zéb u isémezém hawimhã.”

¹⁴ Tahawa, te za da'ahâ uptabi na tahâimana za'ra ni, Dasima Rowairébézém na romharé nhisi ãma. Romhuture di oto Uburé Danhib'apito nhibâdâ hã taha romharé ãma za marĩ te te i'manharĩzéb da hã.

¹⁵ Tawamhã bâtâ norĩ hã a'amoi me te za titõmo 'rãdâ'â zahuré. Duré wasi norĩ hã te za ro'ohaimani za'ra.

'Re ihâimana u'âsi mono, iwẽ na tinhib'a'uwẽ norĩ te te ipawaptob za'ra zé wasu'u

¹⁶ Uburé Danhib'apito te za Siã na sa'a nhisi ãma mreme 'rãihâ na tinha, tãirãrã'ã ne. Zeruzalẽ hawi te za mreme 'rãihâ na mreme watobro. Tawamhã, hâiwa norĩ ti'ai me te za tipopo'o zahuré. Tane nherẽ, te za tinhib'a'uwẽ Izaraéu nhihudu norĩ 'wawimhã aimapa, 'Re ihâimana u'âsi mono hã.

¹⁷ 'Re ihâimana u'âsi mono hã te tinha ãne, tinhib'a'uwẽ norĩ ma: “Ãne te za a norĩ wa'wa hã iwaihu'u za'ra wa'wa, wa hã Asib'apito za'ra wa'aba na, duré ate za'ra wa'wa 'Re ihâimana u'âsi mono na. Siã nhisi ãma wa 're ĩnhamra, ĩte sa'a iwazéb zahi ãma. Zeruzalẽ hã te za 'ri'ahâ iwazéb zahi na 're hâimana. Tawamhã a'uwẽ dasiré'õ norĩ hã niwamhã te te ãma i'ai'uté za'ra da hã mare di za.

¹⁸ “Tô taha wahu mono na uwa'ru hã te za ẽtẽ'rãirã hã te te ubu. Duré tawamhã powawẽ norĩ hã te za tisa hã ropâ te te nasi huri, sa'a mono na. Duré â hã te za Zuda ti'a na 're praba, pa nhipti mono na. Duré ĩnhorõwa 'ri 'rãihâ hawi te za â na'rada hã watobro, Acasia na romharé nhisi te te 're idi'i mono da hã.

¹⁹ Ezitu hã te za dasipara dasiwi rẽme ni. Duré Edõ hã rop si 're irosa'wari mono ne, te za 're hâimana. E marĩ wa. Taha 're, 're idahâimana za'ra mono norĩ, Zuda ti'ai u pi'uriwi isisi, iwẽ norĩ hã te te siwi uprosi wa.

^20-21 A'uwẽ norĩ isi'utõrĩ hã, wa hã wa za 'ruiwa'âbâ za'ra. Duré dawapru pu'u na i'upai'wa norĩ hã, wa za hâ za'ra. Tane nherẽ, Zuda ti'ai ãma, duré Zeruzalẽ ãma te za õne u'â i'remhã 're dasi'ubumro. Wa hã Uburé Danhib'apito, Siã nhisi ãma, wa za 're ĩnhamra u'âsi.”