Zuéu 2 - ꞌRe Ihâimana Uꞌâsi Mono Zadawa Wasuꞌu

Wanhib'apito nhibâdâ, romhutu na za iwisizé wasu'u

¹ Asimnhihârâzé hã ma'ãpé hãsi aba, Siã na ẽtẽ nhisi ãma. Ma'ãpé duré ropire wa ãma dapo're pu'uzéb da, hãsi aba, 'Re ihâimana u'âsi mono te ẽtẽ'rãihâ ãma. Ã hã daza'rui 're, 're i'ai'ubumroi wa'aba mono norĩ, aipahi za'ra wa'aba wa, airẽrẽ'ẽ za'ra wa'aba, Uburé Danhib'apito nhibâdâ te te ipisudu hã za oto romhutu na wisi dâ'âsina.

² Taha bâtâ na hã te za oto tirobra. Duré te za hâiwa'a norĩ hã ti'rãdâ'â za'ra. Taha ré, te za 'ridi hã sina rotété za'ra, dasi'wapéi 'manharĩ'wa norĩ i'ahâ isiptete ne hã, duré hâiwa'a i'rãdâ hã ẽtẽ 'rãirã te te siwi i'upsibi ne hã. Niwamhã ãne hã iwatobro õ. Duré niwamhã romhutu'õmhã ãne hã za iwatobro õ.

³ Ta norĩ te za uburé marĩ hã te te uprosi, uzâ hã te te 're iromhõmo mono ne. We ãne hã romhâimana wana ré hã ti'a hã wẽ uptabi di, Édẽ na rob're nhisi ãmam ne. Tane nherẽ, we oto ãne romhâimana parimhã, aiwa oto rop si 're irosa'wari mono ne hã. 'Riti norĩ wi, marĩ i'maiba'a da hã mare di.

⁴ Ta norĩ hã awaru ne te 're hâimana za'ra. Duré 're dasi'wapé za'ra mono wa, awaru 're isisa'rei mono ne, te 're sisa're.

⁵ Ẽtẽ 'rãirã nhisiwi 're sarõtõ za'ra mono wamhã, te te sina 're robruru'u zani za'ra, wedewara zapore na 're dasi'wapé za'ra mono wa, da te dasina 're irobruru'u za'ra mono ne, duré amnho teihi, 're ro'o za'ra mono wa, uzâ te te 're iteihi sinhama mono ne. Duré dasi'wapéi 'manharĩ'wa norĩ ahâ uptabi na dasi'wapé da, sada 're isisõré pese za'ra mono ne, te 're hâimana za'ra.

⁶ Te te sina 're rotété za'ra mono wamhã, te uburé pese tãma 're darẽrẽ'ẽ za'ra. Uburé te duré tãma 're da'ubu'a za'ra, dapahi te.

⁷ Te duré te te 're da'wapé za'ra, dasi'wapéi 'manharĩ'wa norĩ isib'ru ne hã. Te duré 'ri 'wawi wa'ra 'rãihâ na te te 're sa'uri za'ra, sima iwẽ na. Ropãrĩ sina te duré wa'õmo pese na 're nomro, nima niwĩ siwi sipéi ãna.

⁸ Sisãmra mono ãna, te sisõwamhã te te ropãrĩ za'ra mono sina, sisõré pese na ai'aba'réi u'âsi, hâiba mono bâ tite na bâdâdi na si. Danhimnhi'ã hã 'maihâimana õ di, te te isõwada za'ra da hã.

⁹ Ta norĩ hã te duré 'ri'ahâ simiza'rese õ ré te te 're susi za'ra. Te duré 'ri 'wawi wa'ra 'rãihâ na te te 're sai'uri za'ra. Taha pari, te duré 'ri na'rata na te te 're sai'uri za'ra, zanela 'ri zadazâri na 're sisisi mono da, isimisaihuri norĩ ne.

¹⁰ Ta norĩ hã sisõré pese na we sisarina 're nomro mono ré, te duré ti'a hã 're popo'o, duré hâiwa hã. Bâtâ norĩ hã te duré 're tõmo 'rãdâ'â zahuré, a'amoi me. Wasi norĩ hã te duré 're ro'osipari za'ra.

¹¹ Uburé Danhib'apito hã te tite dasi'wapéi 'manharĩ'wa norĩ nho'remhã tãma rob'ru za'ra, mreme 'rãihâ na. Ite dasi'wapéi 'manharĩ'wa norĩ hã ahâ uptabi di. Duré sib'ru uptabi za'ra mono di. Uburé Danhib'apito nhibâdâ hã pipa uptabi di za. E 'wa hã tiwi siptete da bâ za bété niwamhã.

'Re ihâimana u'âsi mono, tinhib'a'uwẽ te te 're isawi pese za'ra mono zé wasu'u

¹² Uburé Danhib'apito te tinha ãne: “Tane nherẽ, ma'ãpé oto apâ ĩtẽme aipizari za'ra wa'aba, aipẽ'ẽ na, asai ãna aihâimana za'ra wa'aba sina, duré aiwawa za'ra wa'aba sina, duré ai'ru'ru wa'aba sina.

¹³ Aiwasété na i'asiwẽ'õ za'ra wa'aba zéb zarina, ai'uza ihâiwazu za'ra wa'aba da hã mare di. Aihâiba uptabi si te za aipẽ'ẽ 're 'râwi i'madâ'â za'ra wa'wa.” Apâ aipizari za'ra wa'aba, Uburé Danhib'apito wate 'Re ihâimana u'âsi mono tẽme, ta hã simipawapto pese wa, duré da'ãma 're siwamri pese mono wa. Ta hã da'ãma wa'a su'u õ di. Tinhimizawizé hã te sa'ẽtẽ na te te dama 're ahâi'ré. Tãma wẽ di, tinhimirosa'rata na te te ãma 're isaprĩ mono da hã, te te dama 're arob'manharĩ mono tõ da.

¹⁴ Tahawa, ãté te za tinhimirosa'rata na ãma saprĩ, iwẽ hã tinhib'a'uwẽ norĩ ma, te te tãma pisutu za'ra da, amnho tehârizé iwẽ hã te te tãma isõmri za'ra zém na hã. Ãne wamhã, te za a norĩ wa'wa hã amnho na duré rob'rãi wa'u na 'Re ihâimana u'âsi mono ma, 're asõprub za'ra wa'aba mo.

¹⁵ Ma'ãpé danhimnhihârâzé hã asiwi 'maihârâ aba, Siã na ẽtẽ'rãihâ nhisi ãma. Ma'ãpé bâdâ iwazéb zahi na asai ãna i'aihâimana za'ra wa'aba zéb da hã asiwi pisutu aba. Duré ma'ãpé dazô aihãsi aba, 'Re ihâimana u'âsi mono nhorõwa 'ri 'rãihâ u ai'rã'õtõ aba da, 'Re ihâimana u'âsi mono ma.

¹⁶ Uburé da'rã'õtõ aba. Tawamhã uburé te za dama i'ru za'ra wa'wa, dasihâiba pese za'ra da. We dasi'aba'ré da uburé, ihi norĩ hã, ai'uté norĩ hã, dapabre norĩ zama. Duré si'ãma imro téb za'ra norĩ hã te za we wairé 'ri hawimhã, ta norĩ zama we si'aba'ré da, 'Re ihâimana u'âsi mono nhorõwa u hã.

¹⁷ Sasedoti norĩ, a norĩ wa'wa hã 'Re ihâimana u'âsi mono nhorõwa 'ri zahâpâ, tãma 're iromhuri za'ra wa'aba mono hã te za ai'ru'ru wa'wa. Te za duré tãma aimreme zusi 'wa ãne: “'Re ihâimana u'âsi mono, rob'manharĩ tõ, asib'a'uwẽ norĩ ma hã. Wasiré a'uwẽ'õ norĩ nho'remhã wanhiséb za'ra tõ da, waza'ré za'ra tõ, wa'ãma wa'ẽ za'ra sina, te te duré wazada nharĩ za'ra tõ da ãne: ‘E mahã, ate za'ra wa'wa 'Re ihâimana u'âsi mono.’ ”

'Re ihâimana u'âsi mono, ti'a apâ wẽ na 're sa'wari mono da, te te ipisutuzé

¹⁸ Tawamhã Uburé Danhib'apito hã ma tô tinhimizawi za'ẽtẽ zém na hã sihâi'ré, tinhipti'a na. Ma tô duré tinhib'a'uwẽ norĩ ãma tipẽ'ẽzé.

¹⁹ Ãne ma tô tinhib'a'uwẽ norĩ hã ãma sada'âbâ za'ra oto: “Ãhã na hã wa za aima sõmri za'ra wa'wa amnho hã, duré uwa 'rãi wa'u isé hã, azeitona wa'u tob zama. Ãhã wamhã, te za a norĩ wa'wa hã asa na 're asidupu za'ra wa'aba mo. Niwamhã te duré dama 're iwaprosi mono da hã mare di za, asiré a'uwẽ'õ norĩ ai'ãma 're wa'ẽ za'ra wa'aba mono da hã.

²⁰ 'Riti norĩ ipipa hã hâiwa nhimi'e hawi we iwatobro hã wa za sãmra romhâ na, asiti za'ra wa'aba, supara'ré na si 're iropsa'wari mono a'ubuni u. 'Ridi hã danhowa we iwatobro hã wa za sãmra, Â Warĩrĩ na pu'u nhisi u hã. Duré isa'u we iwatobro hã te za rere, Mediterãniu na â poré nhisi u. Tawamhã 'riti norĩ hã te za ai'utõ, sa'ra 'rãihâ na. Sizub za'ra wamhã, te za ti'roi pese za'ra. Ãne wa za marĩ isa'rese'õ hã te 're ab'manharĩ.

²¹ “Ti'a, asima rowẽ za'ra wa'aba, duré aipahi za'ra wa'aba tõ, wa hã Uburé Danhib'apito, marĩ isa'rese'õ hã te 're ab'manharĩ mono wa.

²² Abaze norĩ, aipahi za'ra wa'aba tõ, du hã ãma 're i'asaihuri aba mono zéb da hã, za apâ uzé za'ra mono wa. Wede norĩ hã te za duré oto apâ ti'rã za'ra. Duré figuera hã 'rãi pese di za, uwa'ru 'rã zama.

²³ “Siã ãma a'uwẽ norĩ, 're ato za'ra wa'aba mono, wa hã Asib'apito za'ra wa'wa 'Re ihâimana u'âsi mono, marĩ isa'rese'õ hã te 're ab'manharĩ mono wa. Wa hã wa tô tãi ma hã te 're rob'ru, 're ita'a mono zéb uwaibaba 're ta'a mono da, 're a'ẽ ta'a mono da hã, duréi we te 're i'ab'manharĩ mono zém ne hã.

²⁴ Amnho trigu, da te 're ipré'é za'ra mono zé mono bâ te za i'rã na hã da te 're 'masisi za'ra. Ahâ uptabi di za, uwa 'rãi wa'u isé hã, duré azeitona wa'u to hã.

²⁵ Uburé wa za isimini za'ra wa'aba nhowa're'remhã apâ aima sõmri za'ra wa'wa, hâiwa'a za'ẽtẽ ne 'riti norĩ ma, te tãma rob'rui wa, dasi'wapéi 'manharĩ'wa norĩ ne, amnho tehâri hã te te i'uprosi za'ra wa'rãmimhã.

²⁶ A norĩ wa'wa hã te za 're asaihuri u'âsi aba mo, 're i'mahâpãrĩ za'ra wa'aba mono zéb u. Tahawa, te za ĩ'ãma si 're aiwata u'âsi za'ra wa'aba mo, wa hã Asib'apito za'ra wa'wa 'Re ihâimana u'âsi mono, ai'u'âbâ za'ra wa'aba, marĩ isa'rese'õ iwẽ hã te 're i'ab'manharĩ mono zém na. Tawamhã ĩnhib'a'uwẽ norĩ hã niwamhã isiséb zahu za'ra da hã mare di za.

²⁷ Tawamhã te za ĩwaihu'u za'ra wa'wa, wa hã aiwa'wa wa'aba 're ĩhâimana mono na, Izaraéu nhihudu norĩ wa'wamhã. Te za duré ĩwaihu'u za'ra wa'wa, wa hã Asib'apito wa'wa, misire ate za'ra wa'wa 'Re ihâimana u'âsi mono na, duré aimawi ĩsine i'maihâimana õ na hã. Duré ĩnhib'a'uwẽ norĩ, niwamhã isiséb zahu za'ra da hã mare di za.”

'Re ihâimana u'âsi mono nhibâdâ

²⁸ Uburé Danhib'apito te tinha ãne, tinhib'a'uwẽ norĩ ma: “Ãhã parimhã, wa hã wa za ãma ropé Ĩpẽ'ẽzani na, uburé pese dama. Ai'ra si'aibâ norĩ hã duré ai'ra sipi'õ norĩ hã te za te te dama 're ĩzadawa wasu'u za'ra. Duré ihi norĩ hã te za te te 're rosawẽrẽ za'ra. Ipréduptém norĩ hã te za duré marĩ hã sõ'awi te te 're 'madâ'â za'ra, sõtõ 'rowim ne.

²⁹ Pawa'âbâ ãna dama romhuri'wa norĩ si'aibâ ma, wa za ãma ropé, Ĩpẽ'ẽzani na hã, pawa'âbâ ãna dama romhuri'wa norĩ sipi'õi ma zama, tô taha bâtâ mono na hã.

³⁰ Wa za duré niha na hã rob'manha, marĩ isa'rese'õ ipipa na, za hâiwa na iwairébé da hã, duré ti'a na, za marĩ iwairébé mono da hã. Dawapru pu hã te za duré tihâiba. Unhama norĩ hã, isizédé me, te za duré tipusi zahuré.

³¹ Bâdâ hã te za titõmo 'rãdâ'â. Duré a'amo hã te za titõmo wapru, Uburé Danhib'apito nhibâdâ tô sena ipipa uptabi wisi wana ré hã.”

³² Tawamhã ni'wam norĩ hã Uburé Danhib'apito nhimipawaptobzé te te tiwi iwaptẽrẽ za'ra hã te za uburé sõ'reptu za'ra. E marĩ wa. Wanhib'apito hã ma tô ropisutu, ni'wam norĩ hã isi'utõrĩ'õ hã za Siã na ẽtẽ'rãihâ nhisi ãma, Zeruzalẽ ãma 're si'ubumroi mono da. Ã norĩ hã Uburé Danhib'apito te te ipisutu za'ra norĩ si te za tinho'reptuzé hã sina uwaimrami za'ra, hâiba ré.