Zuéu 1 - ꞌRe Ihâimana Uꞌâsi Mono Zadawa Wasuꞌu

¹ Ã hã Wanhib'apito, ma tô timreme hã Zuéu, Petuéhé 'ra ma tisõ.

'Riti norĩ na rob'manharĩ pipa zé wasu'u, rob'ré ta'a wasu'u me

² Ihi norĩ, ma'ãpé asiwi ĩwapari pese aba. Ãhã daza'rui 're, uburé 're i'aihâimana za'ra wa'aba mono norĩ, ma'ãpé asiwi ĩwapari pese aba. E niwamhã ma tô marĩ ãne hã watobro, iwasété uptabi hã wate bâtâ mono 'remhã, duré wahi'rata norĩ 're hâimana za'ra mono ré hã.

³ Ma'ãpé ai'ra norĩ wa'aba ma, tãma 're wasu'u za'ra wa'aba mono, ã hã marĩ iwatobrozé hã, ta norĩ zama ti'ra norĩ ma, tinhihudu norĩ ma, duré tinhihudu sidâpâsi te te tãma 're wasu'u za'ra mono da.

⁴ 'Riti norĩ hã ahâ uptabi na ma we sõ'uma watobro. Ta hã ma tô rob're hã uburé te te uprosi. 'Ridi imorĩ'rata na we iwairébé, rob're te te i'uprosi mono õ hã, ma tô isa'u we iwairébé norĩ si te te uprosi pese.

⁵ Ma'ãpé âzé hâsi za'ẽtẽ 'wa norĩ, atopo'o za'ra wa'aba! Duré rob'rãi wa'u isé zei'wa norĩ, ma'ãpé ai'utu za'ra wa'aba, ai'ru'ru wa'aba da. E marĩ wa. Uwa 'rã hã ma tô oto ai'utõrĩ pese. Tahawa 're i'âhuri aba mono da hã tô oto 'maihâimana õ di.

⁶ 'Riti norĩ hã dasi'wapéi 'manharĩ'wa norĩ, ahâ uptabi na duré siptete uptabi na 're inomro mono ne, ma tô we sõ'uma watobro. Ta hã sa'rese ãna ma sisisi ãwa, ĩte ti'ai wa'õtõ nho'õmo u hã. I'wa mono hã hu'u zérépa 'wa ne i'wa 'wa pe.

⁷ Ta hã wate za'ra uwa'ru hã ma tô siwi uprosi, duré figuera wede zama. Ma tô duré te te wedehâ zani za'ra. Tahawa te nemo panhipti ã'a.

⁸ Ma'ãpé ai'ru'ru wa'aba, pi'õ ihâiba ubuni pẽ'ẽzé te, ti'uza ihâiro na ãma isi'uza ré 're isiwa'õi mono ne, aibâ na za aré ãma imro da hã, tiwi dâ'â wa.

⁹ Sasedoti, 'Re ihâimana u'âsi mono ma da'ãma romhuri'wa norĩ hã te 're 'ru'ru u'âsi, Wanhib'apito nhorõwa 'ri 'rãihâ ma, danhoprubzé hã 're hâimana zahu mono õ wa oto, amnho na hã, duré uwa 'rãi wa'u isé na hã.

¹⁰ Rom na da te 're irobzuri mono hã te u'õi pese na hâ su'u na nomro. Ti'a te duré 'ré pese na hã nomro. E marĩ wa. Amnho hã ma tô ai'utõrĩ pese. Duré uwa 'rãi wa'u isé wa'u ité hã ma tô ai'utõ. Azeitona 'rãi wa'u zô zama ma tô tirobaba.

¹¹ Buru na romhuri'wa norĩ, asihâzé za'ra wa'aba. Duré uwa'ru 'madâ'â'wa norĩ, ai'ru'ru wa'aba. E marĩ wa. Hâimana õ wa oto, amnho trigu hã, duré cewada hã. Uburé ma si'utõrĩ pese, da te 're itehâri za'ra mono hã.

¹² Uburé ma tô 'ré mono uwa'ru hã, figuera wede hã, romazeira wede hã, duré norõwede hã, duré maçã na rob'rã nhisi wede zama. Duré uburé rowede hâiba amo norĩ zama ma 'ré. Ãne wa, ma tô oto dawi tirobzei'õ pese za'ra.

¹³ Sasedoti norĩ, wedezane 'manharĩ nhisiwi, danhoprubzé 're isa'ra za'ra wa'aba mono norĩ, ma'ãpé zazahâ hâiro na asi'uza za'ra wa'aba, iré ai'ru'ru wa'aba da. 'Re ihâimana u'âsi mono ma da'ãma romhuri'wa norĩ, we ai'aba'réi wa'aba, 'ri zahâpâ u, ai'ru'ru wa'aba da marabâre, 'Re ihâimana u'âsi mono nhorõwa 'ri 'rãihâ ãma. E marĩ wa. Wate 'Re ihâimana u'âsi mono nhorõwa ãma hã amnho na duré uwa 'rãi wa'u isé na danhoprubzé hã hâimana õ wa oto.

¹⁴ Ma'ãpé asisô aihârâ za'ra wa'aba, ubumroi wa'aba da, 'Re ihâimana u'âsi mono nhorõwa 'ri ãma, misi bâtâ na asaihuri aba ãna aihâimana za'ra wa'aba zé hã asima pisutu za'ra wa'aba da. Duré ubumroi wa'aba, uburé dama ipire norĩ, duré uburé daza'rui 're, 're i'ai'ubumroi wa'aba mono norĩ, Uburé Danhib'apito wate 'Re ihâimana u'âsi mono nhorõwa 'ri 'rãihâ ãma, aimreme 'rãihâ na tãma aimreme zusi aba da, tiwi iwaptẽrẽ za'ra wa'aba zém na, te te aipawaptob za'ra wa'aba da.

¹⁵ Wanhib'apito isiptete uptabi nhibâdâ iwa iwaptã'ãzéb u hã romhuture di oto, tinhiptete na za te te ida'a'uprosizéb da hã. Ta hã bâdâ hã pipa uptabi di za.

¹⁶ Marĩ, wa te 'manharĩ waihu'u za'ra ãna, wa tô taré 'madâ'â za'ra ni, wanhimirob're norĩ isi'utõrĩzém na hã. Tahawa, wate 'Re ihâimana u'âsi mono nhorõwa 'ri 'rãihâ 'remhã, hâimana õ di oto dasima rowẽzé hã, duré datozé hã.

¹⁷ Rom na daburu mono na rob'ré wa, romnhamare hã poto mono õ di. Duré trigu tehâri hã hâimana õ di. Amnho nhimi'warazéb zama te oto siprum haré simi'wara, ti'a.

¹⁸ Powawẽ norĩ hã te nasi hãsi, mrap te. I'rã siwamnarĩ ne te duré siwa'ru 're nomro, dui õ wa, isa za'ra zéb da hã. Duré pone'ẽrebâ zéré mapure norĩ zama te nasi tidâ'â za'ra, mrap te.

¹⁹ Wanhib'apito, taha wa, wa ĩmreme 'rãihâ na sa'ẽtẽ aiwi rowaptẽ, wede norĩ hã duré du hã 'ré za'ra wa, uzâ hã uburé te te 're ihõmo mono ne.

²⁰ Abaze norĩ zama pawaptob za'ra da, te hârâ 'rãihâ na aima 're hãsi, panho'u hã pa're 'ré mono wa, duré uzâ hã du te te hõmo mono wa.