Zozué 9 - ꞌRe Ihâimana Uꞌâsi Mono Zadawa Wasuꞌu

Gibiã norĩ, Zozuéhé ma, hâimana nhipese na te te i'manharĩ za'ra zé wasu'u

¹ Tawamhã Zodã pa bâtâ zasizém niwĩ, uburé apito 're ihâimana za'ra mono norĩ hã ma tô ãne na Izaraéu nhihudu norĩ te te da'ãma i'ai'uté za'ra zé hã waihu'u za'ra, ẽtẽ ãma 're ihâimana za'ra mono norĩ hã duré romharé ãmam norĩ hã, duré uburé âporé Mediterãniu zaihâ ãmam norĩ zama, Libanu na romnhisi u hã. Ta norĩ te apito, hitita norĩ te hã, amoreu norĩ te hã, cananeu norĩ te hã, perizeu norĩ te hã, heveu norĩ te hã, duré zebuzeu norĩ te hã.

² Tawamhã ã norĩ hã, Zozué, Izaraéu nhihudu norĩ me te te 'wapé za'ra da hã, ma tô uburé si'rã'õtõ.

³ Tawamhã heveu norĩ, 'ri nho'u Gibiã ãma 're ihâimana za'ra mono norĩ, Zerico ma, Zozué te te i'manharĩzé hã, duré 'ri nho'u Ai ma, te te i'manharĩzé hã te te wapari za'ra wamhã,

⁴ ma tô sima waihu'u za'ra, Zozuéhé ma, niha na hâimana nhipese na te te tãma 'manharĩ za'ra da. Tahawa dasa hã ma tô waibu za'ra. Te te waibu za'ra wamhã, ma tô tite awaru po're pore norĩ ba nhisiwimhã siwi 'wasa, sa'u idub'ratare hã, duré romhâ 'manharĩ na marĩ wa'u nhemezé isitari norĩ inomo hâ babarĩ ré hã.

⁵ Dapara'uza wasisi za'é i'rata na ma tô sipara'uza za'ra, isi'éré sipari na hã. Duré da'uza ihâ siwazu ahâ na ma si'uza za'ra. Tawamhã i'u'ẽtẽ wapu i'ré'a te te ihuri mono da hã ma tô duré 'wasa, i'umimire hã.

⁶ Tawamhã Gilga ãma romhâ 'manharĩ na 'ri nhoré u ma tô ai'aba'ré. Si'aba'réi wamhã, ma tô Zozuéhé ma nharĩ za'ra, duré uburé aibâ Izaraéu nhihudu norĩ ma, ãne: — Wa norĩ wa tô we aihutu ni, ti'ai wa'õtõ nho'u romhâ uptabi hawimhã. Tahawa dasi'wapéi ãna dahâimanazém na dasisazezé hã ma'ãpé wama 'manharĩ za'ra wa'aba.

⁷ Tane nherẽ, te Izaraéu nhihudu norĩ aibâ norĩ hã tãma nharĩ za'ra, ãne: — Ãté te 'râwimhã 're aihâimana za'ra wa'aba mo, wa'ratab za'ra. E niha wa za wasiwapari pire zém na wasisazezé hã wasima 'manharĩ za'ra ni.

⁸ Tawamhã ma tô ãne ãma sada'âbâ za'ra: — Wa norĩ hã aima za'ra wa'aba romhuri'wa na 're iwahâimana za'ra mono da si, wa wasima wẽ za'ra ni! Tawamhã Zozué te sadanharĩ za'ra ãne: — E 'wam norĩ hã bété, a norĩ wa'wa hã. E ma hawi we i'ai'aba'réi wa'wa bété.

⁹ Tawamhã Gibiã norĩ ma tô ãne ãma sada'âbâ za'ra: — Wa norĩ hã asib'a'uwẽ za'ra wa'wa, romhâ na ti'ai wa'õtõ nho'õmo ãma 're iwahâimana za'ra mono, wa we ãwamhã ai'aba'ré ni, Uburé Danhib'apito, ate 'Re ihâimana u'âsi mono wasu'u wa te wapari za'ra wa. Õ hã Ezitu ãma uburé te te i'manharĩzé wasu'u hã wa tô wapari za'ra ni.

¹⁰ Zodã pa bâtâ zasizém niwĩ maparane apito amoreu 're ihâimana zahuré mono ma, marĩ te te i'manharĩzéb zama wa tô waihu'u za'ra ni; apito Seõ, Hesbõ norĩ nhib'apito ma, duré apito Ogue, Basã norĩ nhib'apito ma, Astarote ãma aré 're ihâimana mono ma.

¹¹ Tawamhã we wa te i'wasari da, dasa wa te ubumro za'ra da hã, ma tô wanhib'ihâ'a norĩ wama 'ru za'ra, duré uburé warob 're, 're idahâimana za'ra mono norĩ hã. Ma tô wama 'ru za'ra, wa te asõpẽtẽ za'ra wa'aba wa, ãne wa te aima nharĩ za'ra wa'aba da hã: “Wa norĩ hã aima za'ra wa'aba romhuri'wa za oto! Tahawa ma'ãpé dasi'wapéi ãna dahâimanazém na dasisazezé hã wama 'manharĩ za'ra wa'aba.”

¹² Ma'ãpé wate i'u'ẽtẽ wapu hã asiwi 'madâ'â aba! Aré wa'ro za'ra di, wanhorõwa hawi wawairébé na we oto wa te sãna'rata za'ra wamhã ãwa. Tane nherẽ, ma tô oto ãhã na hã wawi ti'ré tete za'ra. Ma tô duré wawi ti'umimi za'ra.

¹³ Ã hã romhâ 'manharĩ wa, uwa 'rãi wa'u isé hã wa te iwa i'masisi za'ra mono hã aré nomo hâ téb za'ra di. Tane nherẽ, ma tô wawi nomohâ sisinarĩ za'ra. Duré wa'uza norĩ hã, ma tô wawi hâ sisinarĩ za'ra. Duré wapara'uza hã ma tô wawi tihâpâ pese za'ra, romhâ na we iré iwasi'aba'ré zarina.

¹⁴ Tawamhã aibâ norĩ Izaraéu nhihudu norĩ hã ma tô tisa te te i'wasari hã suru na siwi tẽ'ẽ za'ra. Tane nherẽ, Uburé Danhib'apito wi, rowaihu iwẽ hã te te tiwi waptẽrẽ za'ra õ di.

¹⁵ Tawamhã Zozué, Gibiã norĩ ma, ma tô dasisazezé hã tãma 'manharĩ za'ra, te te simro tõ da, te te tãma iropisutu za'ra zém na hã. Tahawa Izaraéu nhihudu norĩ ma i'rãnho'õmo norĩ zama ma tô ropisutu za'ra, za te te ãma tãma i'uwaimrami za'ra zém na hã.

¹⁶ Tawamhã si'ubdatõ bâtâ parip si, ma tô Izaraéu nhihudu norĩ hã siwi upsibi me, Gibiã norĩ 'râwi 're ihâimana za'ra mono zé hã.

¹⁷ Tahawa Izaraéu nhihudu norĩ ma tô 'ri nhoré hawi wairé. Wairébé wamhã, ma tô si'ubdatõ bâtâ parip si aihutu, Gibiã norĩ te 'ri nho'õmo u, ãne iwamri norĩ 're ihâimana za'ra mono zéb u hã, Gibiã, Cefira, Be'erote, duré Quiriate-Zearĩ.

¹⁸ Tane nherẽ, dama i'rãnho'õmo norĩ, Uburé Danhib'apito Izaraéu nhihudu norĩ te, 'Re ihâimana u'âsi mono nhisi na, ropisudu Gibiã norĩ ma, te te tãma 'manharĩ za'ra wa, Izaraéu nhihudu norĩ hã te te siwi uprosi õ di. Tahawa ma tô tite i'rãnho'õmo norĩ ma hã, uburé a'uwẽ norĩ hã tãma aiwapsari za'ra.

¹⁹ Tane nherẽ, te ãne ãma tãma rowasu'u za'ra: — Wa norĩ hã wa tô ropisutu za'ra ni, Uburé Danhib'apito Izaraéu nhihudu norĩ te, 'Re ihâimana u'âsi mono nhisi na. Tahawa awa'awi na hã Gibiã norĩ hã wa te upi waihu'u za'ra õ di.

²⁰ Wa te ropisutu za'ra wa, hâiba ré 're hâimana za'ra mono da, wa za tãma sawi za'ra ni. Ãnei õ wamhã, 'Re ihâimana u'âsi mono hã te za wama rob'manharĩ za'ra.

²¹ 'Re hâimana za'ra mono tô. Tane nherẽ, te za mimi nhihâri'wa na duré â amrami'wa na wama 're hâimana za'ra. Ãne ma tô i'rãnho'õmo norĩ hã dama nharĩ za'ra.

²² Tawamhã Zozué, Gibiã norĩ zô hârâ wamhã, te ãne sadanharĩ za'ra: — E marĩ da, ma tô wama asadawa nhipese za'ra wa'wa, romhâ hawi we i'ai'aba'réi wa'aba na asiwasu'u za'ra wa'aba na hã wama, sena na hã ãme 're aihâimana za'ra wa'aba mono nherẽ.

²³ Ãne hã 'manharĩ za'ra wa'aba wa, te za oto 'Re ihâimana u'âsi mono nhimihâzéb ré 're aihâimana u'âsi za'ra wa'aba mo. Õne u'â te za aipawa'âbâ ãna romhuri'wa na 're aihâimana za'ra wa'aba mo, wede nhihâri'wa na, duré ĩte 'Re ihâimana u'âsi mono nhorõwa ma, â amrami'wa na hã.

²⁴ Tawamhã ma tô ãne ãma sada'âbâ za'ra: — Ãne hã wa tô, 'manharĩ za'ra ni. E marĩ wa. Uburé Danhib'apito, ate 'Re ihâimana u'âsi mono hã wa te wasiwi waihu'u wa, tinhib'a'uwẽ Mozésihi ma te te iwaihu'uzém na uburé ã hã ti'a Izaraéu nhihudu norĩ ma, za te te isõmri na hã. Ma tô duré aima waihu'u za'ra wa'wa, sasãmri za'ra wa'aba mono sidâpâsi, za uburé nasi asiwi i'uprosi aba na hã, uburé iwa 're ihâimana za'ra mono norĩ hã. Tahawa wa tô ãne hã 'manharĩ za'ra ni, aima wapahi uptabi za'ra wa'aba wa, za iwasi'utõrĩzém na hã.

²⁵ Ãhã na hã wa asib'ratab za'ra wa'aba wahâimana za'ra ni. Tahawa aima iwẽ za'ra wa'aba zéb zarina, marĩ wama 'manharĩ za'ra wa'aba.

²⁶ Tawamhã Zozué hã ma te 'ma'rã, Gibiã norĩ 'wawimhã. Te te dama waprosi õ di, da te dasiwi i'uprosi da hã.

²⁷ Tane nherẽ, tô taha bâtâ na ma tô tãma pisutu za'ra Gibiã norĩ ma, mimi nhihâri'wa na, â amrami'wa na, Izaraéu nhihudu norĩ ma, 're hâimana za'ra mono da, duré danhimizama zatazéb da, ẽtẽ za'ra u, Uburé Danhib'apito, 'Re ihâimana u'âsi mono te u. Tawamhã ãhã na zama te ta norĩ hã ãne na romhuri hã te te 're 'manharĩ u'âsi za'ra, 'Re ihâimana u'âsi mono ãma 're idawata za'ra mono zéb da, ro hã te te ipisutu ãma.