Zozué 8 - ꞌRe Ihâimana Uꞌâsi Mono Zadawa Wasuꞌu

'Rinho'u Ai na isisi isiprubzé wasu'u

¹ Tawamhã te Uburé Danhib'apito hã tinha ãne, Zozuéhé ma: — Aipahi tõ! Sada asib'ru na! Uburé ate dasi'wapéi 'manharĩ'wa norĩ me, 'ri nho'u Ai zada, asõré pese na ai'aba'réi wa'aba. Wa hã wa za ta norĩ nhib'apito ãma i'ai'uté za'ra wa'aba zéb da hã aipawaptob za'ra wa'wa. Tahawa asib'ratab za'ra wa'aba, wa za Ai ãma a'uwẽ norĩ hã duré 'ri nho'u hã, duré isipti'a za'ra zama aima sõmri za'ra wa'wa.

² Tahawa te za ã hã 'ri nho'õmo ma, Zerico ma, i'manharĩ za'ra wa'aba ne hã tãma i'manharĩ za'ra wa'wa za. Tawamhã ãhã na uburé pese marĩ mono hã, powawẽ norĩ hã te za aima tihâimana za'ra wa'wa. Tahawa ma'ãpé pi'uriwi 'ri nho'õmo babarã u ni'wam norĩ satõrĩ za'ra na, simiza'rese õ ré bâtâ pisutu zarina te te isusi za'ra da hã.

³ Tawamhã Zozué, uburé pese dasi'wapéi 'manharĩ'wa norĩ me ma tô oto sima robza'ra wẽ za'ra, te te ropãrĩ za'ra mono sina sisõré pese na si'aba'ré da, Ai zada hã. Tawamhã aibâ norĩ 30 miu na isib'ru norĩ te te ipisutu za'ra, ma tô bara na hã satõrĩ za'ra,

⁴ ãne te te tãma iwaihu'u za'ra ré: — Aima'uri za'ra wa'aba za, 'ri nho'õmo babarã niwĩmhã. Romhâ na aihâimana za'ra wa'aba tõ. Asimiza'rese sina te za sada aihâimana za'ra wa'wa.

⁵ Tawamhã wa norĩ dasi'wapéi 'manharĩ'wa norĩ me hã wa za 'ri nho'õmo u wa te wasina rotété za'ra. Tawamhã Ai te, dasi'wapéi 'manharĩ'wa norĩ te te wa'wapé za'ra da, wazô wairébé wamhã, wa za imorĩ'rata na tãma iwasisa'rei mono ne a'â duré sena ne hã tãma wasisa're.

⁶ Tawamhã ta norĩ hã wazarina sisa'rei mono wamhã, te za 'ri nho'õmo nhiti wama sina tipahâ za'ra. Te za duré imorĩ'rata na wapahi te, tãma iwasisa'rei mono ne hã, wasisa'rei mono newa, wa'ãma rosa'rata za'ra.

⁷ Tawamhã ãhã ré, i'aima'uri za'ra wa'aba zém hawimhã te za aiwairébé 'wa. Tawamhã te za 'ri nho'u asiwi i'âri 'wa. Tawamhã Uburé Danhib'apito, wate za'ra 'Re ihâimana u'âsi mono te za Ai hã aima sõmri za'ra wa'wa.

⁸ Tawamhã 'ri nho'u asiwi âri aba parimhã, te za uzâ hã ãma isõré wa'aba mo, si'unhama da, Uburé Danhib'apito te te i'ruzéb zarina. Ãne wa aima 'ru za'ra wa'wa.

⁹ Tawamhã Zozué ma tô, tô dasi'wapéi 'manharĩ'wa norĩ hã satõrĩ za'ra. Te te satõrĩ za'ra wamhã, ma tô Ai norĩ wa'wa Bétéu 're me tame rowa'wa sima'uri za'ra da hã ai'aba'ré, Ai ãma bâtâ zasizém niwĩ. Tane nherẽ, Zozuéhé ãma, romhâ 'manharĩ na 'ri nhoré ãma a'uwẽ norĩ siré hã ma tô ãma ti'awẽ.

¹⁰ Ãma awẽ wamhã, mararé uptabi ma tô udu. Ma tô duré dasi'wapéi 'manharĩ'wa norĩ hã 'rã'õtõ. Tawamhã Zozué hã, Izaraéu nhihudu norĩ ma i'rãnho'õmo norĩ me hã ma tô a'uwẽ norĩ nhowamhã te te ropãrĩ za'ra mono sina sisõré pese na ai'aba'ré, Ai nho'õmoi wa'waibaba.

¹¹ Tawamhã Zozuéhé siré dasi'wapéi 'manharĩ'wa, 'ri ahâ u 'ridawa za'ẽtẽ na 're idanhisisi mono zé wa'waibaba te te ropãrĩ za'ra mono sina, sisõré pese na isi'aba'ré norĩ hã, ma tô hâiwa nhimi'e niwĩ sima 'ri nhoré za'ra, Ai norĩ wa'wamhã romharé ihâimana wa.

¹² Tawamhã Zozué, aibâ norĩ 5 miu na bâtâ zasizém niwĩ isima'uri za'ra da hã ma tô sõré, Aihi 'rem norĩ me, Bétéu me.

¹³ Ãne te te da'wapé za'ra da, dasi'wapéi 'manharĩ'wa, da te isõré hã: ni'wam norĩ hã romhâ 'manharĩ na 'ri nhoré hã, 'ri nho'u hâiwa nhimi'e niwĩ ihâimana ãma, duré ihâiba amo norĩ hã bâtâ zasizém niwĩ. Tawamhã Zozuéhé ãmamhã ma tô ti'awẽ, romharé ãma.

¹⁴ Tawamhã Ai te apito, Izaraéu nhihudu norĩ te te 'madâ'â za'ra wamhã, ma tô waptu na asapẽtẽ. Uburé tite dasi'wapéi 'manharĩ'wa norĩ me hã ma tô robza'rã ré wairé. Wairébé wamhã, ma tô, tô õme iwana Izaraéu nhihudu norĩ te te i'wapé za'ra zéb u ai'aba'ré, te te duré 'wapé za'ra da hã, Zodã na romharé nhisi nho're ãma. Tahawa, za ibabarãi hawi te te i'wapé za'ra da hã te te waihu'u õ di.

¹⁵ Tawamhã Zozué, duré uburé Izaraéu nhihudu norĩ me da te ãma ai'uté za'ra newa, ma tô a'â tãma sisa're 'rãnhipese sina, isarina za'ra a'â sisa'rei mono da. Tahawa, a'ubuni wi supara 'ré si ro 're isa'wari mono u, ma tô a'â tãma sisa're, sena ne hã.

¹⁶ Tawamhã Ai ãma uburé aibâ norĩ zô ma tô sô tahãsi ni, Izaraéu nhihudu norĩ zarina isi'aba'ré da hã. Tawamhã oto Zozuéhé zarina si'aba'réi wamhã, ma tô 'ri nho'õmo nhiti sina si'ré za'ra.

¹⁷ Uburé pese ma tô aibâ norĩ hã Izaraéu nhihudu norĩ zarina wairé. Tahawa ma tô 'ri nho'u 'ridawa haré siwi tirẽ, ni'wa i'wawimhã isimapa da hã hâimana ãna.

¹⁸ Tahawa te Uburé Danhib'apito, Zozuéhé ma tinha, ãne: — Ma'ãpé, Ai nho'õmoi baba ate isi'uwazi 'rã'wa hã wẽ na. E marĩ wa. Ã hã 'ri nho'u hã za oto te aima sõmri wa. Tawamhã te te tãma iwaihu'uzéb zarina ma tô ãma sama.

¹⁹ Tawamhã tinhib'rada oto hâimo te te wẽ wa, aibâ norĩ isima'uri za'ra sa'ẽtẽ ma tô tiwahutu za'ra, 'ri nho'õmo u sisa'rei mono da. Tawamhã 'ri nho'u hã ma tô siwi ti'â. Ma tô duré õne haré te te ãma siwi sõré, uzâ hã.

²⁰ Tawamhã Ai ãma aibâ norĩ siwa'rãmi te te rob'madâ'â za'ra wamhã, ma tô hâiwa u unhama nhizé isi'réi mono hã siwi 'madâ. Tane nherẽ, nima niwĩ sisa'rei waihu'u mono õ di. E marĩ wa. Izaraéu nhihudu norĩ, a'ubuni wi supara 'ré si ro 're isa'wari mono u tãma isisa'rei mono hã apâ sitẽmeb za'ra hã sô sito mono wa, te te i'wapé za'ra da hã siwi.

²¹ Tawamhã Zozué norĩ, tite dasi'wapéi 'manharĩ'wa norĩ me hã ma tô siwi 'madâ, isiré norĩ 'ri nho'u te te siwi i'âri hã, duré te te ãma siwi isõré mono zé, uzâ hã. Tahawa ma tô apâ sô a'ãsi za'ra. Tahawa ma tô Ai ãma aibâ norĩ pãrĩ na sãna'rata za'ra.

²² Tawamhã 'ri nho'õmo ãma Izaraéu nhihudu norĩ ihâimana za'ra zama ma tô wairé, Ai te, aibâ norĩ te te 'wapé za'ra da hã. Ãhã wa, aibâ norĩ ma tô uirĩ pese za'ra ni. Tahawa ma tô Izaraéu nhihudu norĩ nhib'rata ai'utõ.

²³ Ai te, apito si, te dâ'â ãna hã siwaprosi tihâiba. Ta hã da te âri wa, ma tô Zozuéhé ma saprõni ni.

²⁴ Tawamhã ma tô uburé tinhitob'ru norĩ, Izaraéu nhihudu norĩ hã siwi uprosi pese rom na, a'ubuni wi supara 'ré si ro 're isa'wari mono u isarina isisa'rei mono zéb ãma. Taha pari Ai u apâ si'aba'réi wamhã, ni'wam norĩ ihâimana za'ra hã ma tô duré tamemhã siwi uprosi.

²⁵ Ãne hã Ai ãma uburé 're ihâimana za'ra mono norĩ hã tô taha bâtâ na ma tô ai'utõ, 12 miu na dahâiba na.

²⁶ Zozué hã ma tô wẽ u'âsi isi'uwazi 'rã'wa hã, Ai nho'õmoi babamhã te te ãma ti'awi ãna, 'ri nho'õmo ãmamhã uburé a'uwẽ norĩ isi'utõrĩ pese zéb u.

²⁷ Tawamhã Izaraéu nhihudu norĩ hã ma tô marĩ te te sima waibu, 'ri nho'õmo ãma, Uburé Danhib'apito, Zozué te te 'manharĩ da, te te tãma iwaihu'uzéb zarina.

²⁸ Zozué hã ma tô duré Ai ãmamhã ãma sazu. Tahawa ma tô isiprubzé sa'ra 'rãihâ na 're hâimana u'âsi. Tahawa, te ãhã na zama baba na hã 're hâimana.

²⁹ Tawamhã duré Ai ãma apito, wede 're isa mono na ma tô sõ'reti, hâiwi. Tawamhã hâiwi sa'o ré, ãma hâiwahâ da ma tô tirẽ. Duré oto bâdâ sébré wamhã, ma tô ihâiba hã ti'ru, da te si'ra da, duré 'ri nho'õmo u 'ridawa za'ẽtẽ na 're idanhisisi mono zéb ãma da te dasiwi me da. Tawamhã ẽtẽ na ma tô dasiwi suwa 'rãihâ ni. Ta hã te zahadu ãhã na hã 're hâimana.

Zozué, Uburé Danhib'apito nhimi'ui'éré, Izaraéu nhihudu norĩ ma, te te isõrézé wasu'u

³⁰ Tawamhã Ebau na ẽtẽ nhisi ãma, ma tô Zozué ẽtẽ za'ra hã 'manha, Uburé Danhib'apito, Izaraéu nhihudu norĩ te 'Re ihâimana u'âsi mono ma.

³¹ Uburé Danhib'apito ma romhuri'wa Mozési, Izaraéu nhihudu norĩ ma, te te iwaihu'uzéb zarina, ma tô 'manha, ãne na Mozésihi nhimiroti na hã: “Ma'ãpé, ẽtẽ tõmo wawẽ, isihâri za'ra õ na ẽtẽ za'ra 'manharĩ, 'Re ihâimana u'âsi mono ma, 're idanhoprub za'ra mono zatazéb da hã.” Tawamhã taha nhisiwi ma tô danhimizama da te izata pese na tãma ãma tinhoprub za'ra, Uburé Danhib'apito ma, duré aimawi da te dasima ipo'o hâiba amoi wa'õtõ na hã danhoprubzéb ãma dama 're irowẽ za'ẽtẽ za'ra mono nhisi na hã.

³² Tawamhã tame ma tô Zozué, Mozési te te irob'ui'éré na hã, Izaraéu nhihudu norĩ nho'remhã ãma rob'ui'éré, ẽtẽ na.

³³ Tawamhã uburé Izaraéu nhihudu norĩ, ite za'ra i'rãnho'õmo norĩ, dama ipire norĩ, da'ãma rowairébé'wa norĩ, duré uburé isiré a'uwẽ'õ norĩ, iwazari 're ihâimana za'ra mono norĩ zama ma tô 'Re ihâimana u'âsi mono te, wedehâ're 'manharĩ a're si'uiwa na hã aimasa, levita sisasedoti norĩ te te siwi imrami mono nhowamhã. Duré a'uwẽ aiwa ãma isipo'o na ma tô ẽne Gerizi na isisi nho'remhã, duré Ebau na ẽne isisi nho'remhã aimasa, Mozési te te dama iwaihu'uzéb zarina, sasedoti norĩ, 'Re ihâimana u'âsi mono zadawa para rowẽ hã za te te tãma ipisutu za'ra da hã, Izaraéu nhihudu norĩ ma.

³⁴ Tawamhã Zozué, te mreme 'rãihâ na uburé sõré ibaihâ na ãma irob'ui'érézéb zarina 'Re ihâimana u'âsi mono, rowẽ te te dama 're i'apisutu mono zém na hã, ro iwasédé te te duré dama 're i'apisutu mono zém na zama.

³⁵ Mozésihi nhimiroti na ãma irob'ui'éré mono bâ, ma tô Zozué hã uburé pese sõré, Izaraéu nhihudu uburé norĩ ma, pi'õ norĩ ma, ai'uté norĩ ma, duré isiré a'uwẽ'õ iwazari 're ihâimana za'ra mono norĩ ma. Te te 'mairẽme õ pese na ma tô uburé sõré, Zozué hã.