Zozué 7 - ꞌRe Ihâimana Uꞌâsi Mono Zadawa Wasuꞌu

Acã iwasétézé wasu'u

¹ 'Re ihâimana u'âsi mono ma tô aré tãma roti siromo za'ra, Izaraéu nhihudu norĩ ma, 'ri nho'õmo 're uburé marĩ za te te iprub za'ra hã ni'wa te te sima 'maihiri tõ da. Tane nherẽ, aihĩni pese te te ãne hã sima tété za'ra õ di. Acã hã ma tô marĩ simi'u. Tahawa ma tô Izaraéu nhihudu norĩ zada Uburé Danhib'apito hã tinhiti'ru za'ra. Acã hã, Carmihi 'ra, Zabdihi nhihudu, duré Zeraha nhihudu, Zudaha nhihudu norĩ hawi a'uwẽ.

² Tawamhã Zozué ma tô aibâ norĩ hã satõrĩ za'ra, Zerico hawi si'aba'ré da, Ai na 'ri nho'õmo nhisi u, Bétéu bâtâ pusizém niwĩ 're ihâimana mono niwĩ, Bete-Awé na romnhisi 'ratamhã. Ti'a te te siwi 'madâ'â da, ma tô satõrĩ za'ra. Tawamhã oto ta norĩ hã si'aba'réi wamhã, ma tô 'ri nho'u siwi waihu'u wẽ.

³ Tawamhã oto apâ sihutu wamhã, ma tô ãne Zozuéhé ma rowasu'u za'ra: — Uburé aihĩni pese iwasi'aba'ré da hã mare di za. Tahawa te za 2 miu na wahâiba za'ra na si iwazatõrĩ za'ra, aibâ norĩ hã, niha wamhã duré 3 miu na wahâiba za'ra na, Ai hã te te siwi i'wapé da hã, õmemhã da'umrore na 're dahâimana za'ra mono wa.

⁴ Tahawa ma tô 3 miu na ai'aba'ré, aibâ norĩ hã. Tane nherẽ, Ai ãmamhã aibâ norĩ hã ma tô Izaraéu nhihudu norĩ hã te te wano'õ.

⁵ Tahawa, ma tô aiwétési siwi uprosi, 36 na. Tawamhã 'ri nho'õmo te, 'ridawa za'ẽtẽ hawi ma tô Izaraéu nhihudu norĩ zarina sisa're, ẽtẽ nhihârizéb u. Tawamhã ẽtẽ na si'razé rowahâpâ na ma tô te te pãrĩ. Tahawa, ma tô a'uwẽ norĩ wi hã tirobzei'õ pese za'ra. Ma tô duré siptete hai'utõrĩ za'ra.

⁶ Tawamhã Zozué, ti'uza ma tô hâiwazu, robzei'õ zé te. Ti'ai u, ma tô duré sime. Ti'ubu na ma te ti'ai u ropto, Uburé Danhib'apito nhimiroti ré wedehâ're 'manharĩ nho're. Tawamhã tô õne Zozuéhé siré ma tô Izaraéu nhihudu norĩ ma i'rãnho'õmo norĩ hã siwi 'manha. Tahawa ma tô hâiwahâ u ime tihâimana za'ra. Duré isine ma tô siwi 'manha: Ti'a na ma tô si'rãzazub za'ra, robzei'õ na tihâimana za'ra zém na siwasu'u za'ra da.

⁷ Tahawa te Zozué tinha, ãne: — Uburé Danhib'apito, ĩte 'Re ihâimana u'âsi mono, e marĩ da, ma tô bété ã hã a'uwẽ panho'u Zodã pa na te te isaprĩ za'ra da hã isa'ré. E amoreu norĩ ma, wanhomri za'ra wa, duré ta norĩ hã te te siwi wanhimro da. E marĩ wa bété, Zodã pa zara niwĩmhã wahâimana u'âsi za'ra õ di.

⁸ Ĩnhib'apito, Izaraéu nhihudu norĩ hã tinhitob'ru norĩ ma sisa're mono wa, niha hã te aima nharĩ waihu'u õ di.

⁹ Cananeu norĩ hã duré uburé ã hã ti'ai 're, 're idahâimana za'ra mono norĩ hã ãne na te te waihu'u za'ra wamhã, te za siwi wa'uirĩ. Duré te za tawamhã uburé siwi wa'uprosi za. Ãne wamhã, e marĩ te za asisi za'ẽtẽ ma ropibu ma hã i'manha.

¹⁰ Tawamhã Uburé Danhib'apito, ma te Zozué sada'â, ãne: — Aiwahutu! E marĩ wa, te bété tane ti'ai u ai'ubu na roptom haré asã.

¹¹ Izaraéu nhihudu norĩ hã ma tô tiwasété za'ra. Te te sima 're tété za'ra mono da, ĩnhimiroti te i'manharĩzé hã ma tô siwi tirẽ. Te te siwi prub da, te tãma i'ru za'ra 'remhã ma tô marĩ hã tãma tihâimana za'ra. Ã hã ma tô ta norĩ hã simi'uri za'ra. Ma tô sadawa hapese za'ra. Tinhimarĩ wazari ma tô sa'ra za'ra.

¹² Ãne wa, tinhitob'ru norĩ da, Izaraéu nhihudu norĩ, sada hâimana waihu'u za'ra õ di tô oto. Tãma sisa'rei zei mono di. E marĩ wa. Ta norĩ hã isi'utõrĩ da si, te tãma pisutu za'ra wa. Marĩ te te isimi'uri za'ra hã asiwi uprosi aba õ wamhã, wa hã asiré za'ra wa'aba ĩhâimana da hã mare di za.

¹³ Tahawa ma'ãpé aiwahutu, a'uwẽ norĩ ma, waihu'u za'ra da aimorĩ da, ta norĩ hã sipese za'ra da, ĩnho're simasab da, awẽmhã. Tawamhã te za wa hã Uburé Danhib'apito, Izaraéu nhihudu norĩ te 'Re ihâimana u'âsi mono, tãma ĩzadawa wasu'u za'ra, ãne: “Izaraéu nhihudu norĩ, ma tô marĩ asisa isa'ra wa'wa, prub za'ra wa'aba da, wa hã te i'rui 'remhã. Tawamhã marĩ ma, tãma rowairébé za'ra wa'aba õ wamhã, asitob'ru norĩ da, asiptete na i'aihâimana za'ra wa'aba da hã mare uptabi di za.

¹⁴ Awẽmhã te za Izaraéu nhihudu norĩ ai'upsãtã mono bâ asihâi'ré za'ra wa'wa, dapisutuzé ihâimana u. Tawamhã wa hã nimahã nhihudu upsãna te pisutu wamhã, te za imorĩ'rata na dama tihâimana za'ra, danho're u, dasisãnawã siwadi iwa'õtõ mono bâ. Tawamhã te i'maipisudu hã te za danhowamhã sihâi'ré za'ra, dahawi a'uwẽ mono bâ upsãtã pese na. Tame te za i'rãsutu ãma dahawi a'uwẽ upsãna hã sihâi'ré za'ra, te ipisutu za'ra hã, tô aibâ norĩ hã.

¹⁵ Tawamhã ni'wa te ipisudu hã marĩ te te isimi'uri hã te za prémhã dasiwi 'rãmi ni za, duré uburé pese marĩ tãma ihâimana za'ra zama. Ã hã aibâ marĩ te te i'manharĩ hã, wasété uptabi di. Ta hã ma tô ĩnhimiroti hã upa. Taha zarina ma tô sina ro'wa'rutu, Izaraéu 'remhã.”

¹⁶ Tawamhã Zozué ma tô robza'rã ré a'uwẽ norĩ ma waihu'u za'ra, Izaraéu nhihudu upsãtã mono bâ sihâi'ré za'ra da. Tahawa, Zudaha nhihudu norĩ ma tô wasu'u za'ra.

¹⁷ Taha pari Zudaha nhihudu norĩ ma, te te tãma 'ru za'ra wamhã, ma tô sihâi'ré za'ra. Tahawa, Zeraha sisãnawã siwadi upsãna hã ma tô wasu'u za'ra, dapisutuzé hã. Tawamhã Zeraha sisãnawã siwadi upsãna te te 'mahârâ wamhã, ma tô duré wasu'u za'ra, Zabdihi sisãnawã upsãna hã.

¹⁸ Tawamhã oto i'rãsutu ãma ma tô Zabdihi sisãnawã upsãna hã 'mahârâ za'ra, aibâ mono bâ. Tawamhã ma tô Acã wasu'u. Ta hã Carmihi 'ra, Zabdihi nhihudu, duré Zeraha nhihudu, Zudaha nhihudu norĩ hawimhã.

¹⁹ Tawamhã Acãhã ma, te Zozué tinha, ãne: — Ĩ'ra, sena na te za asiwẽ'õ, Uburé Danhib'apito, Izaraéu nhihudu norĩ te 'Re ihâimana u'âsi mono nho're. Ĩma wasu'u na, marĩ i'manharĩzé hã; duré rosa'rata tõ, asima i'udâ da hã.

²⁰ Tawamhã Acã, ma tô sada'â, ãne: — Ĩhe, tô sena wa tô ĩwasété, Uburé Danhib'apito Izaraéu nhihudu norĩ te 'Re ihâimana u'âsi mono wi. Tahawa wa za tô aima wasu'u, marĩ te i'manharĩzé hã.

²¹ Marĩ hã te iwaibu za'ra 'remhã, wa tô Babilonia hawi da'uza ihâpa iwẽ hã 'madâ. Duré ẽtẽ waipo prã prata zama wa tô 200 na iwa'õno hã 'madâ, duré ẽtẽ waipo pré oru aiwa ãma isipo'o na ipire pibuzém na hã. Ã norĩ hã ĩma 'ruiwapari za'ẽtẽ wa, wa tô ĩsima sa'ra za'ra. Ĩte romhâ 'manharĩ na 'ri 're, te daba'wara simi'uri pese na, ti'ai 'rowi. Da'rowimhã prata hã te duré daba'wara.

²² Tawamhã Zozué, Acãhã nhorõwa u sa'ẽtẽ sisa'rei mono da hã, ma tô ni'wam norĩ aibâ ma hã, rob'ru za'ra. Tahawa, ta norĩ hã ma tô sena na marĩ ti'ai 'rowi isimi'wara hã siwi tisã, duré da'rowi prata isimi'wara hã.

²³ Tawamhã romhâ 'manharĩ na 'ri hawi te te siwi sani za'ra wamhã, Zozuéhé ma, duré uburé Izaraéu nhihudu norĩ ma, te te siwi 'wasari wamhã, ma tô siwi sa'ra, 'Re ihâimana u'âsi mono Uburé Danhib'apito nho'remhã.

²⁴ Tawamhã Zozué, uburé Izaraéu nhihudu norĩ me hã ma tô siwi pa'ubumro, Acã hã. Duré ẽtẽ waipo prã prata, da'uza ihâpa, ẽtẽ waipo pré oru, i'ra si'aibâ norĩ, i'ra sipi'õ norĩ, duré ite powawẽ norĩ, awaru po're pore norĩ, pone'ẽrebâire norĩ, isib'ri, duré uburé pese isimarĩ norĩ hã ma tô siwi 'wasa, Aco na romharé nhisi u hã.

²⁵ Tawamhã te Zozué tãma tinha, ãne: — E marĩ da, ropire hã wanhisiwi waptã'ã za'ra da, ma tô bété ã hã iwẽ'õ hã i'manha, a hã. Tahawa, ãhã na te za Uburé Danhib'apito ropire hã asisiwi iwaptã'ã da hã aima 'manha! Tawamhã õne haré ma tô Acã hã uburé pese dasiwi wĩrĩ ni, ẽtẽ na. Taha pari isõrõwa 're, ihâimana za'ra norĩ hã ẽtẽ na te te siwi simroi wamhã, ma tô siwi sãmra, unhama wa, zata za'ra da hã. Duré uburé pese isimarĩ zama ma tô siwi sãmra, si'unhama da unhama wa.

²⁶ Taha parimhã ma tô isisiwimhã ẽne siwi sa'ra 'rãihâ pese. Zahadu te ãhã na tamemhã ẽtẽ za'ra 'rãihâ hã 're hâimana. Tahawa taha romnhisi hã, “Dama marĩ 'manharĩ wasétézém na Romharé” te zahadu ãhã na da te ãma 're rowamri za'ra. Tawamhã Uburé Danhib'apito nhiti'ruzé hã ma tô oto sa're.