Zozué 6 - ꞌRe Ihâimana Uꞌâsi Mono Zadawa Wasuꞌu

Zerico ãma da te i'ai'utézé wasu'u

¹ 'Ri nho'u Zerico te, 'ridawa za'ẽtẽ norĩ hã sitop tete uptabi za'ra di, Izaraéu nhihudu norĩ sisisi tõ da hã. Tahawa ni'wa isébré da hã mare di, duré ni'wa iwatobro da hã mare di, 'ri nho'õmo hawimhã.

² Tawamhã Zozuéhé ma, te Uburé Danhib'apito hã tinha, ãne: — Ma'ãpé waihu'u! Zerico hã wa tô aima tisõ asib'rata, isib'apito hã, duré ite dasi'wapéi 'manharĩ'wa isib'ru norĩ hã.

³ Tahawa a hã, Izaraéu nhihudu norĩ te, dasi'wapéi 'manharĩ'wa norĩ me hã te za misi si bâtâ mono na nasi 'rinho'u hã asõré pese na ropãrĩ za'ra wa'aba mono sina i'uirĩ za'ra wa'aba mo, 6 na bâdâ ihâimana 'remhã.

⁴ Ĩte wedehâ're 'manharĩ nhowamhã, te za sasedoti norĩ hã 7 na ai'aba'ré, pone'ẽrebâ zéré mapure si'aibâ õmo na tinhimnhihârâzé hã hâiba mono bâ te te 'wasari sina. Tawamhã a hã, 7 bâtâ ãmamhã ate dasi'wapéi 'manharĩ'wa norĩ me hã te za 'rinho'u 7 na ropãrĩ za'ra wa'aba mono sina asõré pese na asiwi i'uirĩ wa'wa, sasedoti norĩ hã tinhimnhihârâzé te te hãsi mono ré.

⁵ Tawamhã ta norĩ, pẽ'ẽ hâ sina te te hãsi mono wamhã, te za uburé a'uwẽ norĩ hã sa'ẽtẽ uptabi tizadari za'ra. Tahawa, 'ri nho'õmo 'wawi wa'ra 'rãihâ hã te za waptãrã. Tawamhã hâiba mono bâ awa'awi te za 'ri nho'õmo u hã sisa're, sisisi mono da.

⁶ Tawamhã Zozué, ma tô sasedoti norĩ zô hâ, te te tãma nharĩ za'ra da, ãne: — Wedehâ're 'manharĩ 'Re ihâimana u'âsi mono te ré hã te za asiwi i'âri 'wa. Tawamhã te za isõwamhã 7 na sasedoti norĩ tinhimnhihãsi zéb ré hã ai'aba'ré.

⁷ Tawamhã te duré a'uwẽ norĩ ma nharĩ za'ra, ãne: — 'Ri nho'õmo uirĩzém na ma'ãpé ãma sãna'rata za'ra wa'aba oto, ropãrĩ za'ra wa'aba mono sina asõré pese aba na! Duré Uburé Danhib'apito te, wedehâ're 'manharĩ nhowamhã te za dasi'wapéi 'manharĩ'wa norĩ hã sõré pese na hã ai'aba'ré.

⁸ Tawamhã Zozué te te tãma iwaihu'u za'ra zéb zarina, ma tô wedehâ're 'manharĩ nhowa, sasedoti norĩ 7 na ihâimana za'ra tinhimnhihãsizé hârâ na hã ãma sãna'rata za'ra.

⁹ Tawamhã sasedoti tinhimnhihãsizé te te ihãsi norĩ nhowamhã te dasi'wapéi 'manharĩ'wa norĩ hã ai'aba'ré. Te duré wedehâ're 'manharĩ zarina dasi'wapéi 'manharĩ'wa iwa'õtõ hâiba amo isarina ai'aba'ré. Si'aba'ré sina ma tô te te hãsi, tinhimnhihãsizéb za'ra hã.

¹⁰ Zozué hã ma tô a'uwẽ norĩ ma waihu'u siromo za'ra, a'â sadari za'ra mono tõ da, duré a'â robruru te te siwi 'manharĩ tõ da, te te tãma iwaihu'u za'ra zé bâtâ u.

¹¹ Tawamhã Zozuéhé nhimiwada'uri zarina ma tô oto sasedoti norĩ hã 'Re ihâimana u'âsi mono te, wedehâ're 'manharĩ te te siwi âri sina, misi haré 'rinho'u hã siwi uirĩ. Taha pari ma tô apâ ai'aba'ré, romhâ 'manharĩ na 'ri nhoré u, tame a'â ãma awẽ za'ra da.

¹² Tawamhã awẽ bâtâ na mara hâ ré, ma tô Zozué hã udu. Utu wamhã, wedehâ're 'manharĩ ma tô sasedoti norĩ hã siwi ti'â.

¹³ Tawamhã wedehâ're 'manharĩ nhowa, te 7 na sasedoti norĩ tinhimnhihâsizéb ré ai'aba'ré, te te hãsi mono sina, duré ihârâ hã te te sahâri za'ra ãna. Ta norĩ nhowa dasi'wapéi 'manharĩ'wa norĩ hã te ai'aba'ré. Te duré wedehâ're 'manharĩ zarina ai'aba'ré, dasi'wapéi 'manharĩ'wa iwa'õtõ hâiba amo hã, daza'u. Tawamhã danhimnhihãsizém hârâ hã simizahâri za'ra õ di.

¹⁴ Tawamhã oto maparane bâtâ ãmamhã ma tô te te ropãrĩ za'ra mono sina sõré pese na ai'aba'ré, 'rinho'u hã misi haré te te siwi uirĩ da. Taha pari ma duré apâ romhâ 'manharĩ na 'ri nhoré u hã sina siri za'ra. Tawamhã 6 bâtâ 'remhã ãne si ma tô nasi siwi 'manha.

¹⁵ Tawamhã 7 bâtâ ãmamhã robza'rã ré oto duré utu za'ra wamhã, ma tô 'rinho'u tô taha bâtâ na 7 na te te ropãrĩ za'ra mono sina, sisõré pese na hã siwi uirĩ. Õhõ bâtâ na si ma tô, 'rinho'u 7 na siwi uirĩ.

¹⁶ Tawamhã oto 7 na te te siwi i'uirĩ zahu zéb ãma sasedoti norĩ tinhimnhihãsizé te te siwi hãsi zahâri wamhã, ma tô a'uwẽ norĩ ma Zozué hã tãma nharĩ za'ra, ãne: — Oto asadari na hã aihãsi aba! Uburé Danhib'apito ma tô oto Zerico hã aima sõmri za'ra wa'wa.

¹⁷ Tahawa, uburé marĩ hã 'ri nho'õmo 're, ihâimana za'ra mono hã te za asiwi i'uprosi 'wa, 'Re ihâimana u'âsi mono ma 're idanhoprub za'ra mono ne. Pi'õ Ra'abi, sihâiba wa'âbâ zô 're isisõmri mono si te za siwaprosi dâ'â ãna hã tihâiba, duré uburé isõrõwa 're, ihâimana za'ra norĩ zama. E marĩ wa. Õ hã wapsãi'a'wa norĩ wa te isatõrĩ za'ra hã te te simi'uri zahuré wa.

¹⁸ Tane nherẽ, marĩ hã asiwi uprosi aba da, te aima i'ru za'ra wa'wa hã asiwi waibui wa'aba õ di za. 'Mai'âri aba wamhã, te za ropire hã duré ropsi'utõrĩzé hã asina i'mai'ãwisi 'wa, Izaraéu nhihudu norĩ te 'ri nhoré u hã.

¹⁹ Tane nherẽ, ẽtẽ waipo prã prata na, ẽtẽ waipo pré oru na, ẽtẽ topsada brõzi na, duré isi'uwazi tete na danhib'manharĩ mono hã, uburé ã norĩ, Danhib'apito te hã za. Ta hã te za ite marĩ wa'âbâ za'ẽtẽ nhimi'warazéb 're dasiwi sa'ra ni.

²⁰ Tawamhã sasedoti norĩ hã tinhimnhihãsizé te te oto hãsi. Tawamhã ihârâ, Izaraéu nhihudu norĩ te te wapari za'ra wi, ma tô sa'ẽtẽ uptabi tihârâ za'ra. Ta hawi ma tô 'ri 'wawi wa'ra 'rãihâ hã õne haré waptãrã. Tawamhã uburé ãma isite mono bâ ma sisisi. Tahawa, ma tô siwi ti'â, 'ri nho'u hã.

²¹ Ma tô duré tinhi'wa na aibâ norĩ hã, pi'õ norĩ hã, ai'uté norĩ hã duré ihi norĩ hã te te siwi simro, 'ri nho'õmo wa, uburé 're ihâimana za'ra mono norĩ hã. Ma tô duré te te siwi simro, powawẽ norĩ zama hã, pone'ẽrebâire, duré awaru po're pore.

²² Tawamhã te Zozué, aibâ norĩ te te iwapsãi'a zahuré ma hã, tãma nharĩ zahuré, ãne: — Ma'ãpé azasi aba, Ra'abi siwa'ru 're ihâimana mono nhorõwa u, we wazere aba da rob u, isiré isõrõwa 're, isi'ubumro norĩ me, tãma iropisutu aba zéb zarina.

²³ Ãne te te tãma nharĩ zahuré wamhã, ma tô wapsãi'a'wa norĩ hã Ra'abihi nhorõwa u tizasi zahuré. Tawamhã Ra'abi hã ma tô wazere zahuré, imama, ina, isisãnawã norĩ, duré uburé isõrõwa 're, 're ihâimana za'ra mono norĩ hã. Uburé pese isõrõwa 're, 're ihâimana za'ra mono norĩ, 'ri hawi te te azani zahuré wamhã, ma tô duré Izaraéu nhihudu norĩ te, romhâ 'manharĩ na 'ri mana u hã da'a'ãwisi zahuré.

²⁴ Tawamhã 'ri nho'õmo ãma ma tô oto siwi ro'o, duré uburé pese marĩ iwa ihâimana za'ra ãma. Tane nherẽ, ẽtẽ waipo pré oru 'manharĩ norĩ hã, ẽtẽ waipo prã prata 'manharĩ, ẽtẽ topsada brõzi 'manharĩ, duré isi'uwazi tete 'manharĩ norĩ hã da te ãma dasiwi ro'o õ di. Ã norĩ si ma tô Uburé Danhib'apito nhorõwa 're, marĩ iwa'âbâ za'ẽtẽ nhemezéb 're dasiwi séme ni.

²⁵ Tawamhã Zozué, ma tô Ra'abi siwa'âbâ zô 're isisõmri mono si duré uburé pese isõrõwa 're, 're ihâimana za'ra mono norĩ hã rẽme za'ra hâiba ré, wapsãi'a'wa norĩ Zerico u te te isatõrĩ zahuré hã, te te simi'uri zahuré wa. Taha dâ'â sina te isihudu hã Izaraéu nhihudu norĩ siré 're hâimana za'ra, ãhã na zama.

²⁶ Tahawa, ma tô Zozué hã 'Re ihâimana u'âsi mono nhisi na 'ri nho'u ihâimana ãma ipire na ropisutu, ãne: — Ni'wa, 'ri nho'u Zerico te te apâ 'ri wahutu wamhã, te za Uburé Danhib'apito nhimirob'manharĩ wasété zéb ré si 're hâimana! Duré ni'wa 'ri nhana'ratazéb da, te te sa'ra wamhã, te za ti'ra poto'rada hã simini! Duré ni'wa hã 'ridawa isa'ẽne te te apâ ãma sasõmri za'ra wamhã, te za ti'ra nhobabati hã simini!

²⁷ Ãne ma tô Uburé Danhib'apito, Zozuéhé siré tihâiba. Tawamhã ma tô iwasu'u za'ẽne hã ti'ai wa'õtõ nho'õmo mono bâ te te ropé.