Zozué 4 - ꞌRe Ihâimana Uꞌâsi Mono Zadawa Wasuꞌu

12 na ẽne da te dasiwi isa'razé wasu'u, ãma idasipo're pu'u za'ra zéb da

¹ Tawamhã uburé Izaraéu norĩ Zodã pa â na te te saprĩ za'ra pari, ma tô Uburé Danhib'apito hã tãma tinha ãne, Zozuéhé ma:

² — Ma'ãpé aibâ norĩ 12 na pisutu za'ra na, Izaraéu nhihudu wamri mono bâ misi si.

³ Tawamhã te za ãne tãma iwaihu'u za'ra za: “Ma'ãpé ẽne hã 12 na asiwi waibui wa'aba Zodã pa â wa'wamhã, sasedoti norĩ iwa isimasabzéb ãmamhã. Tawamhã ta hã ẽne hã te za i'wasari 'wa, asiwi sa'ra wa'aba da, ã mara na za 'ri hã asima isãrĩ za'ra wa'aba zéb ãmamhã.”

⁴ Tawamhã Zozué, aibâ 12 na te te ipisutu za'ra norĩ zô, te hâ.

⁵ Tahawa, te ãne tãma nharĩ za'ra: — Mo oto ai'aba'réi wa'aba, ate za'ra wa'wa Uburé Danhib'apito 'Re ihâimana u'âsi mono te, wedehâ're 'manharĩ nhowa. Tawamhã te za tô ime ai'aba'réi wa'wa, Zodã pa â aiwa ãma isipo'o u. Aihâiba mono bâ te za misi si asisé u isa'ra wa'wa ẽne hã, Izaraéu nhihudu wamri za'ratazéb zarina.

⁶ Ta hã ẽne hã Uburé Danhib'apito nhimi'manharĩzém na ãma 're idasipo're pu'u za'ra mono zéb da hã, te za 're simi'wara. Apto'o ré, ai'ra norĩ wa'wa hã ã hã ẽne marĩ te te iwasu'u na te te 're asadanharĩ za'ra wa'aba mono wamhã,

⁷ te za tãma 're iwasu'u za'ra wa'aba mo, 'Re ihâimana u'âsi mono te, wedehâ're 'manharĩ, Zodã pa â na te te saprĩ wa, tô taha bâtâ na â ipraba nhimizazâri na hã. Tahawa ã hã ẽne hã Izaraéu nhihudu norĩ ma, te za sina tãma wasu'u za'ra, õne u'â ãma 're isipo're pu'u za'ra mono zéb da hã.

⁸ Tawamhã aibâ norĩ hã, Zozué te te tãma iwaihu'u za'ra zéb zarina, ma tô siwi mreme 'manha. Zozuéhé ma, Uburé Danhib'apito te te tãma inharĩzéb zarina ma tô Zodã pa â wa'wa ãma ẽne 12 na siwi waibu, Izaraéu nhihudu wamri mono bâ misi si. Tawamhã te te oto 'wasari wamhã, ma tô sa'ra za'ra, romhâ 'manharĩ na 'ri isisõré ãma.

⁹ Tawamhã Zozuéhé zama ma tô 12 na ẽne hã Zodã pa â wa'wa ãmamhã dame sa'ra, sasedoti norĩ, wedehâ're 'manharĩ te te siwi âri wa, iré isimizahâri za'ra zéb ãma. (Ta hã ẽne te zahadu 're simi'wara.)

¹⁰ Tahawa, sasedoti norĩ hã ma tô Zodã pa â wa'wamhã mazahâri za'ra, Uburé Danhib'apito hã, Zozuéhé ma te te iwaihu'uzéb zarina a'uwẽ norĩ hã uburé te te i'manharĩ za'ra zéb u, Mozésihi ma rotizéb zarina. Tawamhã a'uwẽ norĩ â na ma tô sa'ẽtẽ saprĩ za'ra.

¹¹ Uburé te te saprĩ za'ra wamhã, ma tô wedehâ're hã sina sõ're za'ra, isõwab za'ra duré hâimana za'ra da. Tawamhã sasedoti norĩ zama ma tô sina danho're za'ra, danhowa hâimana za'ra da, ta norĩ hã.

¹² Aibâ Rubẽhẽ nhihudu norĩ hã, Gadihi nhihudu norĩ hã, duré Manaséhé nhihudu norĩ hã bâtâ pusizém hawimhã, ma tô danhowa saprĩ za'ra, simire za'ra sina si'wapé za'ra da hã, Mozési te te iwaihu'uzéb zarina.

¹³ 40 miu na aibâ norĩ hã ma tô si'wapé za'ra da, simire sina â na saprĩ za'ra, 'Re ihâimana u'âsi mono Uburé Danhib'apito nho'a, romharé u Zerico niwĩ.

¹⁴ Tawamhã taha bâtâ na hã Izaraéu nhihudu norĩ, Zozué aibâ dama isa'ẽtẽ na te te waihu'u za'ra da hã, ma tô Uburé Danhib'apito hã tãma 'manharĩ za'ra. Tahawa Mozési te te siwi 're iwazéb za'ra mono ne, ma tô duré Zozué hã te te siwi 're wazé pese.

¹⁵ Tawamhã Uburé Danhib'apito te Zozuéhé ma tinha, ãne:

¹⁶ — Sasedoti norĩ, ĩte wedehâ're te te siwi i'âri norĩ ma, nharĩ za'ra na, Zodã pa â hawimhã wairébé da.

¹⁷ Tawamhã Zozué ma tô ãne hã 'manha.

¹⁸ Tawamhã sasedoti norĩ, Zodã pa â hawi wairébé wa, ti'a i'ré tipara na te te wati'i za'ra pari, ma tô â hã oto apâ tipraba. Duré iwana te te isuwai mono ne, ma tô apâ pazaihâ hã te te suwa.

¹⁹ Tahawa, a'amo za'ratazé imorĩ'rata na bâdâ dia 10 na ma tô a'uwẽ norĩ saprĩ za'ra, Zodã pa â na hã. Tawamhã Gilga na 'ri wa'õtõ nhisi ãma ma tô sima 'ri nhoré za'ra, Zerico ãma bâtâ pusizém niwĩ.

²⁰ Tame ma tô Zozué, 12 na ẽne hã sa'ra, Zodã pa â hawi te te isani za'ra hã.

²¹ Tawamhã Izaraéu nhihudu norĩ ma, ma tô ãne nharĩ za'ra: — Niwa apto'o ré, ẽne marĩ te te iwasu'u na ai'ra norĩ hã duré asihudu wa'aba mono hã, timama te te 're sadanharĩ za'ra mono wamhã,

²² te za ãma tãma 're irowasu'u za'ra wa'aba mo, Izaraéu nhihudu norĩ, Zodã pa pa'ré na te te isaprĩ za'ra zém na hã.

²³ Uburé Danhib'apito ate wa'wa 'Re ihâimana u'âsi mono, ma tô Zodã pa â hã aima 'ré za'ra wa'wa, ãma isaprĩ za'ra wa'aba zéb da hã, Âpré na â poré nhisi te te wama i'ré za'ra ne, wa te ãma isaprĩ za'ra zéb da hã.

²⁴ Ãne wa, te za daro mono bâ uburé pese da te 're waihu'u za'ra, Uburé Danhib'apito ate wa'wa 'Re ihâimana u'âsi mono iwaihu'u pese nhiptetezé hã. Taha dâ'âsina te za duré a norĩ wa'wa õne u'â 're iwazéb za'ra wa'aba mo za.