Zozué 3 - ꞌRe Ihâimana Uꞌâsi Mono Zadawa Wasuꞌu

Zozué norĩ hã, Zodã pa â na te te isaprĩ za'ra zé wasu'u

¹ Tawamhã Zozué duré uburé Izaraéu nhihudu norĩ me ma tô robza'rã ré wairé, Sitĩ hawimhã si'aba'ré da, Zodã pa u. Tawamhã pa nho'õmo na te te saprĩ za'ra wana ré, ma tô tame a'â sima 'ri nhoré za'ra.

² Tawamhã si'ubdatõ bâtâ pari dama i'rãnho'õmo norĩ hã romhâ 'manharĩ na 'ri isisõré mono wa'waibaba te te ropéi mono wamhã,

³ ma tô ãne a'uwẽ norĩ ma hã te te tãma waihu'u za'ra: — Levita sasedoti norĩ hã Uburé Danhib'apito, wate 'Re ihâimana u'âsi mono nhimiroti ré wedehâ're 'manharĩ te te siwi âri ré 'madâ'â za'ra wa'aba wamhã, te za asimarĩ hã asima i'ubumro za'ra wa'wa, isarina ai'aba'réi wa'aba da.

⁴ Ãne te za nimomo ai'aba'réi wa'aba zéb da hã iwaihu'u za'ra wa'wa, ã hã bâdâdi na niwamhã ãma 're anomro aba mono õ wa. Tane nherẽ, wedehâ're 'manharĩ hã asina tété za'ra wa'aba õ di za. Misi ti'ai pibuzém na te za romhâ prã na asiwi ipibu za'ra wa'aba mo za.

⁵ Tawamhã Zozué te dama tinha, ãne: — Ma'ãpé aipẽ'ẽ 'remhã asipese za'ra wa'aba. E marĩ wa. Uburé Danhib'apito te za awẽmhã aima za'ra wa'aba marĩ isa'ẽne hã 'manha.

⁶ Taha pari, te sasedoti norĩ ma nharĩ za'ra, ãne: — Ma'ãpé, danhowa ai'aba'réi wa'aba da, 'Re ihâimana u'âsi mono te, wedehâ're hã asiwi âri aba. Tawamhã Zozué te te tãma i'ru za'ra zéb zarina ma tô siwi mreme 'manha.

⁷ Tawamhã Uburé Danhib'apito, te Zozuéhé ma tinha, ãne: — Ã bâtâ na za marĩ te i'manharĩzéb zarina, uburé Izaraéu nhihudu norĩ hã te za siwi aiwaihu'u, aibâ dama i'asa'ẽtẽ na hã. Te za tawamhã duré siwi ĩwaihu'u, Mozésihi siré 're ĩhâimana mono ne, duré asiré zama 're ĩhâimana mono na hã.

⁸ Ma'ãpé duré ãne tãma waihu'u za'ra na, sasedoti norĩ ĩnhimiroti ré wedehâ're te te siwi i'âri norĩ ma: “Pa nho'õmo u aihutu aba wamhã, asimizahâri za'ra wa'aba za a'â, â 'remhã pazaihâ 'rata.”

⁹ Tawamhã Zozué hã te dama tinha, ãne: — We ãwa ai'aba'réi wa'aba, Uburé Danhib'apito, wate 'Re ihâimana u'âsi mono te te inharĩzé hã wapari za'ra wa'aba da.

¹⁰ Ãne wamhã, 'Re ihâimana u'âsi mono idâ'â'õ asiré ihâimana za'ra wa'aba na te za iwaihu'u za'ra wa'wa, sena na cananeu norĩ hã, hitita norĩ hã, heveu norĩ hã, perizeu norĩ hã, gigazeu norĩ hã, amoreu norĩ hã, duré zebuzeu norĩ hã za te te isani za'ra na zama.

¹¹ Tahawa ma'ãpé 'madâ'â za'ra wa'aba. Uburé Danhib'apito nhimiroti te, wedehâ're 'manharĩ hã te za asõwab za'ra wa'aba saprĩ, pa nho'u Zodã pa â na hã.

¹² Ma'ãpé ãhã na pisutu za'ra wa'aba, Izaraéu nhihudu norĩ hã iwamri mono bâ 12 na ihâiba hã.

¹³ Tawamhã sasedoti norĩ, Uburé Danhib'apito te, wedehâ're 'manharĩ te te siwi âri ré, â wa tipara hã te te sõré wamhã, te za Zodã pa â ipraba hã mazazâ. Tawamhã â hã sãrã u hã te za taré ti'â 'masisi.

^14-15 Roptehârizé a'amo na ma tô ãne hã tiromhâiba, â hã pa nho'õmo na pazaihâ hã te te upsibi mono ré hã. Ãhã ré, ma tô romhâ 'manharĩ na 'ri hawimhã a'uwẽ norĩ hã wairé, Zodã pa â na te te saprĩ za'ra da. Tawamhã sasedoti norĩ danhowamhã te ai'aba'ré, 'Re ihâimana u'âsi mono te, wedehâ're 'manharĩ hã te te siwi âri sina. Duré oto â zaihâi u sihutu wamhã, â wa tipara hã te te sõré wi,

¹⁶ ma tô â praba hã mazazâ. Tawamhã ma tô taré sãrã u ti'âtâ, Sartã na 'ri nho'õmo nhisi niwĩ 'ri nho'u Adã na isisi tẽmemhã. Tawamhã pi'reba ma tô â hã õne haré ti'ré pese, Â Warĩrĩ na pu'u nhisi u. Tahawa ma tô oto a'uwẽ norĩ hã saprĩ za'ra, Zerico 'rata ti'ai u hã.

¹⁷ Izaraéu nhihudu norĩ hã ti'ai 'ré te te iwati'i za'ra na ma tô saprĩ za'ra. Taha ré, ma tô sasedoti norĩ 'Re ihâimana u'âsi mono nhimiroti ré wedehâ're 'manharĩ te te siwi i'âri hã rob'ré wa iré mazahâri za'ra Zodã pa â wa'wamhã. Tahawa, ma tô a'â tamem haré aimasa, uburé da te ãma isaprĩ za'ra zéb u.