Zozué 24 - ꞌRe Ihâimana Uꞌâsi Mono Zadawa Wasuꞌu

Zozué, sisõ'a ré te te ida'rã'õtõzé wasu'u

¹ Tawamhã Zozué, ma tô Izaraéu nhihudu norĩ wa'õtõ mono bâ 'rã'õtõ, Siquẽ na 'ri nho'õmo nhisi ãma. Tahawa, ma tô dama roti'wa norĩ zô tihârâ za'ra, dama i'rãnho'õmo norĩ zô, da'ãma rowairébé'wa norĩ zô, duré Izaraéu nhihudu norĩ ma ipire zô hã. Tawamhã ma tô ta norĩ hã oto 'Re ihâimana u'âsi mono nho'remhã aimasa.

² Tahawa te Zozué uburé dama tinha, ãne: — Ãne te tinha, Uburé Danhib'apito, Izaraéu nhihudu norĩ te, 'Re ihâimana u'âsi mono hã: “Duréi aihi'rata norĩ wa'wa pa nho'u Eufrati pa zara niwĩ 're hâimana za'ra mono ré hã ihâiba'õ waihu'u pese newa ãma 're idawata za'ra mono ãma ma tô 're wata za'ra. Aihi'rata norĩ wa'wa, Tera, Abra'ãhã mama, duré Naoho mama.

³ Tane nherẽ, wa hã, Abra'ã Eufrati pa zara niwĩ ti'ai hawimhã wa tô waze, uburé ãme Cana'ã ti'ai mono bâ 're morĩ da. Wa hã wa tô duré tãma sõmri za'ra isihudu hã, ahâ uptabi na hã. Abra'ãhã ma, Izaqui hã wa tô tãma tisõ.

⁴ Izaquihi ma, Zaco norĩ Ezau me hã wa tô tãma sõmri zahuré. Duré Ezauhu ma, wa tô Se'i na romnhisi ẽtẽ ãma ro hã tãma tisõ. Tane nherẽ, Zaco, ti'ra norĩ me Ezitu u si ma tô tinhowada za'ra.

⁵ Taha pari, Mozési norĩ, Arãhã me te satõrĩ zahuré wamhã, wa tô duré Ezitu ãma ropipa za'ẽne hã dama 'manha. Ãhã wa, wa tô ta hawimhã tiwi asani za'ra wa'wa.

⁶ Tawamhã duré aihi'rata norĩ wa'wa Ezitu hawi te sani za'ra wamhã, ma tô aihutu, Âpré na â poré wamri u hã. Tane nherẽ, ma tô ezipsiu norĩ hã taha u isarina za'ra sisa're, awaru na wedewara zapore na dasi'wapézém na duré awaru na dasi'wapéi 'manharĩzém na hã.

⁷ Tahawa, Izaraéu nhihudu norĩ te te ĩwi rowaptẽrẽ za'ra wamhã, wa tô robra wa hã 'manha, ezipsiu norĩ wi te ãma isimi'uri za'ra zéb da hã. Duré â ma, wa tô tinha ezipsiu norĩ nhisiwi sisa'wari da hã. Ãhã wa, ma tô suwa za'ra. Tawamhã a norĩ wa'wa atõmo na, wa hã, ezipsiu norĩ ma, te i'manharĩzé hã ma tô i'madâ'â za'ra wa'wa. Taha pari ma tô duré rop si a'ubuni wi 're irosa'wari mono ãmamhã, 're aihâimana hâ za'ra wa'aba mo.

⁸ — “Tawamhã wa hã wa tô amoreu norĩ nhipti'ai u te asimroi wa'wa, Zodã pa zara niwĩ bâtâ pusizém niwĩ 're ihâimana za'ra mono norĩ u hã. Tawamhã ma tô amoreu norĩ te te siwi aiwano'õ 'wa. Tane nherẽ, wa tô wa hã da'ãma i'ai'uté za'ra wa'aba zé hã aima sõmri za'ra wa'wa. Tawamhã a norĩ wa'wa isipti'a za'ra hã asiwi âri aba wamhã, wa tô duré asõ'a za'ra wa'aba uprosi.

⁹ Tawamhã Moabi te apito, Baraqui, Zipoho 'ra hã Izaraéu nhihudu norĩ da, dasi'wapé te te 'manharĩ da, te te sima rosa'rata wamhã, ma tô Be'oho 'ra Balaã zô da'mazatõ. Tawamhã ma tô tiwi waptẽ, ĩnhimirob'manharĩ wasété zé hã te te aima pisutu zahi za'ra wa'aba da hã.

¹⁰ Tane nherẽ, wa hã, Balaã te iwapari da hã te ĩsima wẽ õ di. Ãne nherẽ, ma tô nasi rowẽ hã aima pisutu za'ra wa'wa. Taha zarina wa tô Baraquihi nhib'rata wi asõ'reptu za'ra wa'wa.

¹¹ A norĩ wa'wa pa nho'u Zodã pa na saprĩ za'ra wa'aba pari, ma tô 'rinho'u Zerico u hã aihutu 'wa. Tawamhã Zerico ãma aibâ norĩ ma tô ai'wapé za'ra wa'wa. Duré taha pari amoreu norĩ zama ma tô ai'wapé za'ra wa'wa, perizeu norĩ, cananeu norĩ, hitita norĩ, gigazeu norĩ, heveu norĩ, duré zebuzeu norĩ hã. Ãhã wa, wa hã da'ãma i'ai'uté za'ra wa'aba zéb da hã wa tô asib'rata aima sõmri za'ra wa'wa.

¹² Aihutu aba wana ré, wa tô amoreu norĩ nhib'apito hã samarĩ zahuré. Wa tô ipahi pese zé hã tãma sõmri zahuré, sisamro da. Ate za'ra wa'wa sib'ézé 'wa pa ma, asimnhi'ãsi za'ra wa'aba ma, duré asiptoro za'ra wa'aba ma, ta norĩ hã pusi õ di.

¹³ Ãne wa tô aima sõmri za'ra wa'wa ti'a hã, niwa iwa 're iromhuri za'ra wa'aba mono õ hã, duré niwa 'rinho'u iwa i'ri za'ra wa'aba õ hã. Tahawa, te oto 'ri nho'õmo wamhã 're aihâimana za'ra wa'aba mo. Te duré uwa 'ru 'rã hã duré azeitona wede 'rã hã 're ihuri aba mo, 're izuri aba mono õ 'rã hã.”

¹⁴ Tawamhã Zozué ma te ãne timreme hã tãma 'rãsutu za'ra: — Tahawa te za ã hawim haré ãhã na hã 'Re ihâimana u'âsi mono, Uburé Danhib'apito hã 're iwazéb za'ra wa'aba mo, isib'a'uwẽ sena na ãma 're anomro aba mono da. Duré asisiti sãmra aba, aihi'rata norĩ Mezopotãmia ãma, duré Ezitu ãma, ihâiba'õ ãma waihu'u pese newa ãma 're iwata za'ra mono hã, Uburé Danhib'apito ãmap si 're anomro aba mono da oto.

¹⁵ Tane nherẽ, Uburé Danhib'apito ma, 're anomro aba mono da, asima wẽ za'ra wa'aba õ wamhã, ãhã na awa'awi na hã asima pisutu za'ra wa'aba, nimahã ãma si 're anomro aba mono da wamhã. Niha hã wamhã, te za tô asima irowairébé za'ra wa'wa, aihi'rata norĩ hã Mezopotãmia ãma, ihâiba'õ ãma 're iwata za'ra mono ma si 're anomro aba mono da hã, niha wamhã, amoreu norĩ te ihâiba'õ norĩ ma hã, ã hã ti'ai 're, 're ihâimana za'ra mono zéb ãma hã. Tane nherẽ, wa za tô wa norĩ hã wanhorõwa 're, 're iwahâimana za'ra mono norĩ hã Uburé Danhib'apito ãmap si 're wanomro.

¹⁶ Tawamhã a'uwẽ norĩ, ma te ãma sada'âbâ za'ra ãne: — Niwamhã Uburé Danhib'apito wa te wasiwi irẽme da hã wa te rosa'rata za'ra õ di, ihâiba'õ ãma si i'upa na 're wanomro mono da hã.

¹⁷ Õ hã Uburé Danhib'apito, wate 'Re ihâimana u'âsi mono ma te tô wahi'rata norĩ me simisutu na hã wa'awaze, Ezitu ãma wapawa'âbâ ãna wa te 're iromhuri za'ra mono zém hawimhã. Duré marĩ iwaihu'u'õ isa'rese'õ te te i'ab'manharĩ mono zé hã wa tô 'madâ'â za'ra ni. Duré õ hã ma tô te te 're wa'ab'madâ'â pese, bâdâdi na 're wanomro mono ré hã, duré ti'ai wa'õtõ nho'õmo wa'waibaba 're wanomro mono ré hã.

¹⁸ Wa norĩ hã taha zarina i'rowi 're wanhisisi mono nhidâpâsi, ma tô Uburé Danhib'apito, a'uwẽ norĩ hã te te wama 're awano'õ, amoreu norĩ ã hã ti'ai 're, aré 're ihâimana za'ra mono norĩ zama. Tahawa, wa za wa norĩ zama ãma 're wanomro, Uburé Danhib'apito ãma hã. E marĩ wa. Ta hã wate 'Re ihâimana u'âsi mono wa.

¹⁹ Tawamhã te Zozué dama tinha, ãne: — Uburé Danhib'apito ãma 're i'anomro aba mono da hã mare di ãté. E marĩ wa. Õ hã, 'Re ihâimana u'âsi mono, marĩ iwasédé, ãma 're ihâimana mono õ, iwẽ uptabi. Duré õ hã ihâiba'õ ãma 're iwata za'ra mono norĩ hã te te 'wapé zei õ di. Tahawa, aiwasété za'ra wa'wa te te aima 're i'apari aba mono da hã, mare di za.

²⁰ 'Re ihâimana u'âsi mono, Uburé Danhib'apito 're rẽme za'ra wa'aba mono wamhã, duré asiré a'uwẽ'õ norĩ te, ihâiba'õ na si 're aiwata za'ra wa'aba mono wamhã, te za apâ õ hã asada 're hâimana za'ra wa'wa. Te za duré te te 're aihâ za'ra wa'wa. Iwẽ na aima 're hâimana za'ra wa'aba mono parim nherẽ, te za tawamhã ai'uprosi 'wa.

²¹ Tawamhã a'uwẽ norĩ ma tô ãne ãma sada'âbâ za'ra: — E niha hã. Ãne hã romhâimana õ di za! Wa tô wasima wẽ za'ra ni, 'Re ihâimana u'âsi mono, Uburé Danhib'apito ãma si 're wanomro mono da.

²² Tahawa te Zozué, duré ãne tãma nharĩ za'ra: — Asisõ'a za'ra wa'aba ma tô 'râwi asima ipisutu za'ra wa'wa, Uburé Danhib'apito ãma 're anomro aba mono da hã. — Ĩhe, wa norĩ hã wa tô wasisõ'a wasima pisutu za'ra ni! — Ãne ma tô ãma tãma wa'rãmi za'ra.

²³ Zahadu te Zozué tãma nharĩ za'ra ãne: — Tane wamhã, pé tô sãmra za'ra wa'aba, asiré a'uwẽ'õ norĩ te, ihâiba'õ aima ihâimana za'ra wa'wa hã. Duré asina ropisutu za'ra wa'aba, sena na Uburé Danhib'apito, Izaraéu nhihudu norĩ te, 'Re ihâimana u'âsi mono ãma si 're i'anomro aba mono zém na hã za.

²⁴ Tawamhã Zozuéhé ma, a'uwẽ norĩ hã ma ãma tãma wa'rãmi za'ra ãne: — Uburé Danhib'apito, wate 'Re ihâimana u'âsi mono ãma wa za 're wanomro. Wa za duré isimiroti si wa te 're wapari pese za'ra.

²⁵ Ãne ma tô Zozué, Siquẽ ãma tô taha bâtâ na dapawapto, 'Re ihâimana u'âsi mono ma, da te dasina iropisutu za'ra zém na hã. Tame ma tô duré roti hã dama tisõ, da te 're i'madâ'â za'ra mono zéb da hã.

²⁶ 'Re ihâimana u'âsi mono mreme na ibaihâ nhisi na ma tô rob'ui'éré, roti na hã. Taha pari ẽtẽ tõmo wawẽ te te âri wamhã, ma tô wede iwazéb zahi zahâpâmhã tihi, 'Re ihâimana u'âsi mono, Uburé Danhib'apito ãma 're idawata za'ra mono zéb ãma.

²⁷ Tahawa te uburé dama tinha, ãne: — Ma'ãpé ã hã ẽne asiwi 'madâ'â aba! Ãma 're iwasipo're pu'u za'ra mono zéb da hã te za wama 're hâimana za'ra, wa te wasiwi 're 'madâ'â mono wa. Õ hã ma tô Uburé Danhib'apito te te wama inharĩ za'ra zé hã wapa. Niwa apto'oré 'Re ihâimana u'âsi mono 're rẽme za'ra wa'aba mono õ'umnhasite, te za te te 're ai'uwati za'ra wa'wa.

²⁸ Tawamhã ãne pari ma tô Zozué, a'uwẽ norĩ ma rob'ru za'ra, tinhipti'ai mono bâ te te ropéi mono da.

Zozué norĩ idâ'â zahuré zé wasu'u, Eriazaha me

²⁹ Tawamhã da'ãma ronomro pari, ma tô oto Zozué Nuhu 'ra hã dârâ, Uburé Danhib'apito ma romhuri'wa hã, 110 na ãma iwahum na.

³⁰ Ma tô isipti'a Timnate-Sera na 'ri wa'õtõ nhisi ãma dasiwi sẽrẽ ni, Efraĩhĩ niwĩ ẽne ihâimana ãma, Ga'asi na ẽtẽ nhisi ãma hâiwa nhimi'e niwĩmhã.

³¹ Tawamhã Izaraéu nhihudu norĩ, Zozué 're hâimana mono ré, ma tô 'Re ihâimana u'âsi mono, Uburé Danhib'apito ãmamhã 're nomro. Duré dâ'â parib zama ma tô ãma 're nomro pese, dama i'rãnho'õmo norĩ, 'Re ihâimana u'âsi mono, Izaraéu nhihudu norĩ ma, uburé pese te te 're i'ab'manharĩ mono zé waihu'u pese 'wa norĩ, 're hâimana za'ra mono ré hã.

³² Tahawa, Izaraéu nhihudu norĩ, Ezitu hawi Zuzéhé hi te te siwi i'âri hã, ma tô Siquẽ na romnhisi ãma siwi ãma ti'a, Hamohõ 'ra norĩ wi, Zaco ti'ai wa'õno te te tiwi i'uipra zahuré ãma, 100 na prata wa'õtõ na, Siquẽhẽ mama wi. Tawamhã ã hã ti'a hã ma tô Zuzéhé nhihudu norĩ hã tihi'rata uirĩ na hã ãma ate za'ra.

³³ Tawamhã Arãhã 'ra Eriaza zama dâ'â wamhã, ma tô duré Zibea na 'ri nho'õmo nhisi ãma siwi ãma ti'a, Efraĩhĩ niwĩ ẽne hã ihâimana ãma, i'ra Finezaha ma, da te isõmri wa.