Zozué 23 - ꞌRe Ihâimana Uꞌâsi Mono Zadawa Wasuꞌu

Zozué hã, te te dama inharĩzé wasu'u

¹ Tawamhã Uburé Danhib'apito, 'Re ihâimana u'âsi mono, ma tô Izaraéu nhihudu norĩ, isitob'ru te te siwi i'uirĩ norĩ wa'wa rowẽ na si 're ihâimana za'ra mono da hã oto tãma pisutu za'ra. Duré Zozué 're hâimana hâ mono wa, ma tô oto si'ihi pese.

² Tawamhã ma tô uburé Izaraéu nhihudu norĩ zô tihârâ za'ra, dama roti'wa norĩ zô, dama i'rãnho'õmo norĩ zô, da'ãma rowairébé'wa norĩ zô, duré dama ipire norĩ zô zama. Ãne te tãma nharĩ za'ra: — Wa tô oto wa hã ĩsi'ihi pese.

³ Uburé Danhib'apito, wate za'ra 'Re ihâimana u'âsi mono, ã hã a'uwẽ norĩ ma, ai'u'âbâ za'ra wa'aba te te i'manharĩzé hã ma tô a norĩ wa'wa uburé i'madâ'â za'ra wa'wa. Ma tô duré ta hã ai'ãma ai'wapé za'ra wa'wa.

⁴ Ma'ãpé ãma aipo're pu'u za'ra wa'aba! Wa hã wa tô ti'a hã aima te po'o 'wa, Izaraéu nhihudu wa'õtõ mono bâ, zahadu wa te ãma i'ai'uté za'ra õ tede'wa na 're aihâimana za'ra wa'aba mono da. Ãne wa tô duré danhipti'a na wa te ãma i'ai'uté za'ra hã te aima po'o 'wa, Zodã pa nho'õmo hawimhã, bâtâ pusizéb u hã, duré pu'u wawẽ Mediterãniu u hã, bâtâ zasizém niwĩmhã.

⁵ Uburé Danhib'apito, ate 'Re ihâimana u'âsi mono 'wa hã te za ã hã a'uwẽ norĩ hã aima te te wano'õ 'wa. Te za duré romhâ na te te aima sate za'ra wa'wa. Tawamhã a norĩ wa'wa ã hã a'uwẽ norĩ nhipti'a hã te za asiwi iwaibui wa'aba mo, Uburé Danhib'apito te te iropisutuzéb zarina.

⁶ Tahawa te za sada asiptete za'ra wa'wa, uburé pese Mozési te te ãma irob'ui'érézé hã 're 'manharĩ za'ra wa'aba mono da, niha na nima niwĩmhã isimiroti nhiti 're aihâimana za'ra wa'aba mono ãna.

⁷ Ã hã a'uwẽ isi'mairẽme norĩ hã aiwazari wa'aba 're hâimana za'ra mono nherẽ, ime hã 're aihâimana za'ra wa'aba mono tõ. Ite za'ra ihâiba'õ waihu'u pese newa ãma 're iwata za'ra mono norĩ nhisi na hã 're nharĩ za'ra wa'aba mono tõ. Ta norĩ nhisi na dama 're ropisutu za'ra wa'aba mono tõ. Ãma 're aiwata za'ra wa'aba mono tõ. Duré isõ'reb za'ra hã tãma 're aiwẽ'ẽ za'ra wa'aba mono tõ.

⁸ Uburé Danhib'apito 'Re ihâimana u'âsi mono siré si, 'râwi 're aihâimana za'ra wa'aba mono, we 're i'aihâimana za'ra wa'aba mono ne, ã bâtâ u hã.

⁹ Uburé Danhib'apito, a'uwẽ isa'ẽne hã, duré isiptede hã ma tô romhâ na hã te te sate. Duré ni'wa, ã bâtâ u hã asada za'ra wa'aba siptete waihu'u õ di.

¹⁰ Izaraéu nhihudu si misi nherẽ, te za tinhitob'ru norĩ ma hã te te arob'manharĩ, miu na ihâiba ma, sisa'rei mono da. E marĩ wa. Uburé Danhib'apito, ate 'Re ihâimana u'âsi mono 'wa hã, ai'ãma za'ra wa'aba 're si'wapéi mono wa, te te iropisutuzéb zarina.

¹¹ Tahawa ma'ãpé asimi'ẽ na Uburé Danhib'apito, ate 'Re ihâimana u'âsi mono aba si asiwi 're sawi za'ra wa'aba mono.

¹² Tane nherẽ, ãma 're i'anomro aba mono zé 're rẽme za'ra wa'aba mono wamhã, a'uwẽ isi'mairẽme norĩ aiwazari wa'aba 're ihâimana za'ra mono norĩ me 're asihâiba tob za'ra wa'aba mono wamhã, duré ta norĩ me oto asina 're aimro za'ra wa'aba mono wamhã,

¹³ te za sena na iwaihu'u za'ra wa'wa, a'uwẽ aiwazari 're ihâimana za'ra mono norĩ hã, za te te isate zahu za'ra õ na hã, aihawib za'ra wa'aba. Ãnei õ wamhã, te za ta norĩ hã apâ simimnhasi na asada 're hâimana za'ra wa'wa, abaze norĩ mramizéb ne ré hã, aiba wi wedenhorõ na da te 're i'aipré'é za'ra wa'aba mono ne, duré ro'ware atõmo aba 're, 're isisisi mono ne. Ãne na aima irob'manharĩ za'ra wa'aba na hã te za duré te te ãma aima uzusi za'ra wa'wa, ã hã ti'a iwẽ hawimhã asô irobaba za'ra wa'aba zéb u, Uburé Danhib'apito, ate 'Re ihâimana u'âsi mono 'wa hã te te aima isõmri za'ra wa'aba zém hawimhã.

¹⁴ — Ãhã na romhutu di oto ĩdâ'âzé hã. Uburé aima waihu'u pese za'ra wa'aba di, 'râwi aipẽ'ẽ aba mono na hã, Uburé Danhib'apito, ate 'Re ihâimana u'âsi mono 'wa hã, uburé marĩ iwẽ te te aima 're isõmri za'ra wa'aba mono na hã te te iropisutuzéb zarina. Õ hã ma tô uburé pese ãma uwaimra, te te duré ãma upai ãna.

^15-16 Ĩhe tô, Uburé Danhib'apito, ate 'Re ihâimana u'âsi mono 'wa hã, uburé marĩ iwẽ na te te aima 're i'aropisutu aba mono zéb zarina, ma tô te te 're ab'manharĩ. Tane nherẽ, a norĩ wa'wa aimawi ihâiba'õ na waihu'u pese newa ãma 're idawata za'ra mono ãma, 're aiwata za'ra wa'aba mono wamhã, duré isõ're tãma 're aiwẽ'ẽ za'ra wa'aba mono wamhã, tawamhã asada 're siti'ru za'ra wa'aba mono wa, te za te te 're aihâ za'ra wa'wa za. E marĩ wa. Ãne hã 're 'manharĩ za'ra wa'aba mono wamhã, te za Uburé Danhib'apito 'Re ihâimana u'âsi mono nhimiroti hã ãma 're uwaimrami za'ra wa'aba mono da, te te i'ru hã asiwi iwamnarĩ 'wa. Tawamhã ã hawi apto'oré hã ti'a iwẽ te te aima isõmri za'ra wa'aba 'remhã 're i'ai'maihâimana aba mono da hã mare di za.