Zozué 2 - ꞌRe Ihâimana Uꞌâsi Mono Zadawa Wasuꞌu

Zozué hã, Zerico u wapsãi'a'wa norĩ te te isatõrĩ zahuré zé wasu'u

¹ Tawamhã Zozué, Sitĩ hawi ma tô wapsãi'a'wa norĩ hã satõrĩ zahuré, pi'uriwi. Ãne te tãma rob'ru zahuré: — Ti'a hã 'râwi sabui wẽ wa'aba da, te za ane wa'wa. Tane nherẽ, 'ri nho'u Zerico si te za iwaihu'u wẽ wa'wa, danhipai u. Tawamhã oto neb zahuré wamhã, ma tô tizasi zahuré, pi'õ Ra'abi na isisi iwa'âbâ zô 're isisõmri mono nhorõwa u, tame sõtõ zahuré da.

² Tawamhã Zerico ãma apito u, ma tô romreme ãne itẽme wi: — Izaraéu nhihudu hã ma tô we ãwamhã bara na 'maihaimasisi, ti'a te te waimrami zahuré mono da hã.

³ Tahawa ma tô apito ãne romreme hã tãma tisõ, Ra'abihi ma: — Aibâ norĩ asõrõwa u ãma izasi zahuré hã, uburé ti'a te te waimrami zahuré da, ma tô we aimasisi. Ta norĩ hã ma'ãpé rob u we sani na.

⁴ Tawamhã Ra'abi iwana za'ra aibâ norĩ te te simi'uri zahuré wa, ma tô apito ma romreme 'wapéi'wai norĩ ma, ãne ãma tãma wa'rãmi za'ra: — Tô sena ma tô we ĩnhorõwa u aibâ hã tineb zahuré. Tane nherẽ, wa hã te waihu'u õ di, nima hawim na we inem na hã.

⁵ Oto robra wa, 'ri nho'õmo te 'ridawa za'ẽne za da te dasiwi isitobzé bâtâ ãma, ma tô oto tipusi zahuré. Tahawa, te waihu'u õ di, nimomo inebzé hã. Tane nherẽ, a norĩ wa'wa hã isarina zahuré, sa'ẽtẽ a'e za'ra wa'aba mono wamhã, ãté te za asiwi imrami 'wa.

⁶ Tane nherẽ, Ra'abi wapsãi'a'wa norĩ hã, ma tô 'ri nhisi hâpâ u hâimo iwana za'ra saprõni zahuré. Tame ma tô simi'uri zahuré, aro teihi ne za'wari 'rãihâ 'rowi.

⁷ Tawamhã apito ma romreme 'wapéi'wa norĩ hã ma tô oto isarina ai'aba'ré. Tawamhã 'ri nho'õmo hawi wairébé wi, ma tô 'ridawa za'ẽne hã isa'u za'ra dasiwi sitom ni. Tawamhã wapsãi'a'wa norĩ zô ma tô sô sõpré, Zodã pa tẽme bâdâdi inomro na.

⁸ Tawamhã Ra'abi, wapsãi'a'wa norĩ hã sõtõ zahuré wana ré, ma tô itẽme sai'uri zahuré, 'ri nhisi hâpâ u hâimo te te tãma nharĩ zahuré da, ãne:

⁹ — Wa tô waihu'u wa hã, ã hã ti'a Uburé Danhib'apito te te aima isõmri za'ra wa'aba zém na hã, Izaraéu nhihudu norĩ ma. Tahawa sena na wa za tinha, uburé wa norĩ hã wa tô aima za'ra wa'aba wapahi pese za'ra ni.

¹⁰ E tihai wa. Wa tô waihu'u za'ra ni, Uburé Danhib'apito, asõ'reb za'ra wa'aba, Ezitu hawi aiwairébé aba wamhã, Âpré na â poré nhisi te te i'â'rézém na hã. Duré Zodã pa zara niwĩ bâtâ pusizém niwĩmhã, amoreu norĩ te apito Seõ norĩ, Oguehe me, duré ite zahuré dasi'wapéi 'manharĩ'wa norĩ isi'utõrĩzéb zama wa tô waihu'u za'ra ni.

¹¹ Ã hã wa te wapari za'ra wamhã, wa tô siptete hai'utõrĩ za'ra ni. Tahawa wa tô uburé pese aima za'ra wa'aba wapahi pese za'ra ni, ate za'ra wa'wa 'Re ihâimana u'âsi mono, Uburé Danhib'apito, hâiwa ãma hâimo 're hâimana mono wa, duré ti'ai 'rowib zama.

¹² Tahawa ma'ãpé, Uburé Danhib'apito nhisi na, ĩma ropisutu aba, iwẽ hã te aima 'manharĩ aba wa, a norĩ wa'aba zama ĩsisãnawã norĩ ma iwẽ hã 'manharĩ aba da, aiwab da. Ãne da, wa za aiwi rowaptẽrẽ 'wa, sena na aimreme wasu'u aba zéb da, tiha ĩma 'manharĩ aba da, ĩsima iwẽ na ĩhâimana da rosa'rata ahâ ãna.

¹³ Ma'ãpé ĩmama hã sõ'reptui wa'aba, ĩna me, ĩsisãnawã norĩ hã, ĩsisãnawã sipi'õ norĩ hã, duré i'ra za'ra norĩ hã. Da te wa'uprosi tõ da ma'ãpé wa'madâ'â pese aba za.

¹⁴ Tawamhã aibâ norĩ ma tô ãma tãma wa'rãmi zahuré, ãne: — Wa za tô ropisutu ni aima. Tawamhã wamreme wa te wasina uwaimrami õ wamhã, tô i'uwaibaba na hã wa aré tô wa norĩ si wadâ'â ni. A hã aré i'atâ'â da hã mare di. Tawamhã a hã ãme wa te i'manharĩzé hã ni'wai ma wasu'u õ wamhã, aima wanhimiropisutuzé hã i'uwaibaba wa za tô wasina uwaimrami ni. Uburé Danhib'apito, apto'o ré ã hã ti'a te te wama sõmri za'ra wamhã, tawamhã iwẽ na hã wa za aima wasihâi'ré ni, sena na wa te aima inharĩ na hã.

¹⁵ Ra'abihi nhorõwa hã 'ri nho'õmo 'wawi wa'ra 'rãihâ 'manharĩ wa, te 're sa. Tahawa ma tô wapsãi'a'wa norĩ hã pawaptob zahuré, zanela 'ri zadazâri hawi te te si'ra zahuré da wedenhorõ na.

¹⁶ Tahawa, te ãne tãma nharĩ zahuré: — Ẽtẽ u ane wa'aba. Ane wa'aba õ wamhã, aibâ norĩ, asô wa'aba isõpré mono hã te za siwi asãmri 'wa. Õme si'ubdatõ bâtâ na aima'uri aba sina aihâimana aba, we apâ isi'aba'rézéb u. Taha parip si te za oto ane wa'wa.

¹⁷ Tawamhã te wapsãi'a'wa norĩ hã tãma nharĩ zahuré, ãne: — Wanhimiropisudu wawi iwaptẽrẽ hã wa za tô ãma aima uwaimrami ni, ãne na hã za wama 'manharĩ wapsi:

¹⁸ Nimahã na oto asipti'ai u wanhisisi wamhã, te za zazahâ hâiwaré ihâpré hã zanela 'ri zadazâri ãma iwasi, wa te isi'razéb ãma. Duré asõrõwa 're, ubumro na za aimama norĩ hã, ana, asisãnawã norĩ hã, duré uburé aimama sisãnawã siwadi norĩ hã. Ãne wapsi, wa za ãma aima uwaimrami ni, wanhimiropisutuzé hã.

¹⁹ Tawamhã ni'wa hã rob u 'ri para hawi watobro wamhã, 'râwi te te sima ãma i'upa zarina te za tô ta hã dârâ. Wa norĩ hãi õ di za tawamhã, i'upa hã. Tane nherẽ, ni'wa hã 'ri para aime hâimana nherẽ, tô da te u'a wapsi hã, wa norĩ hã za tô i'upa.

²⁰ Wa te i'manharĩzé dama wasu'u wamhã, wa te ãma uwaimrami da hãi õ di, wanhimiropisutuzé wawi iwaptẽrẽ hã.

²¹ Tawamhã Ra'abi hã ma te ãma sada'âbâ zahuré, ãne: — Wa tô ãma asazei wa'wa. Tahawa ma oto tãma waprosi zahuré, neb da. Tawamhã ma tô duré ãma wasisi zanela 'ri zadazâri na, zazahâ hâiwaré ihâpré hã.

²² Tawamhã wapsãi'a'wa norĩ hã ẽtẽ u te oto tineb zahuré. Tame ma tô aima'uri zahuré si'ubdatõ bâtâ na hã, isiniwĩb zahuré ro inomro na dasi'wapéi 'manharĩ'wa norĩ sô rĩtĩ za'ra mono ré hã. Tane nherẽ, te te siwi sãmri zahuré õ di. Tahawa ma tô apâ ai'aba'ré, Zerico u.

²³ Tawamhã wapsãi'a'wa norĩ hã ma tô oto ẽtẽ hawimhã si'ra zahuré. Zodã pa â na ma tô saprĩ zahuré. Taha pari te oto ne, Zozué te te sõpẽtẽ zahuré da hã. Tawamhã uburé pese marĩ tãma ihâimana zahuré zé hã ma tô tãma wasu'u zahuré.

²⁴ Ãne ma te rowasu'u na hã ãma tãma 'rãsutu zahuré: — Uburé Danhib'apito hã, õ hã ti'a uburé te te wama isõmri za'ra zém na hã wa tô wa norĩ hã sena na waihu'u ni. Tahawa ma tô õmemhã uburé pese wama tapahi pese za'ra ni.