Zozué 12 - ꞌRe Ihâimana Uꞌâsi Mono Zadawa Wasuꞌu

Mozési, apito norĩ ãma, te te i'ai'uté za'ra zé nhihâtâ wasu'u

¹ Apito norĩ ãma, ma tô Izaraéu nhihudu norĩ hã ai'uté za'ra, Zodã pa zara niwĩ bâtâ zasizém niwĩ 're ihâimana za'ra mono ãma hã. Ma tô duré isipti'a za'ra na hã ãma tiwi ate za'ra. Ã hã ti'ai mono hã, Arno na romharé nhisi hawimhã ma tô nomro, Zodã na romharé nhisi zarina, Hermo na ẽtẽ nhisi u hã. Apito norĩ ãma, Izaraéu nhihudu te te ãma i'ai'uté za'ra mono nhisi hã ãne:

² Imorĩ'rada hã Seõ na isisi, amoreu norĩ nhib'apito, Hesbõ ãma 're isãmra mono. Taha si'i'rãnho'õmozé hã Arno zada'ré na romharé ãma, aiwa rom na ãma isipo'o na Aro'e hawi, Zaboqui na pa wamri u hã, amonita norĩ nhipti'a zada'ré ãmamhã. Taha si'i'rãnho'õmozé hã Ziliadi na ro aiwa ãma isipo'ozém na.

³ Tawamhã Zodã na romharé nhisi niwĩ bâtâ pusizém niwĩmhã, Galiléa na pu'u nhisi hawi Bete-Zesimote u hã, ma tô Seõ isi'i'rãnho'õmozé hã tihâiba, Â warĩrĩ na pu'u nhisi ãma bâtâ pusizém niwĩmhã, hâiwa nhimire niwĩ, Pisga na ẽtẽ nhisi zahâpâ u.

⁴ Ogue hã, Basã norĩ nhib'apito ãmab zama ma tô Izaraéu nhihudu norĩ hã ãma ai'uté za'ra, a'uwẽ Refa'ĩ na iwamri ma isi'i'rãnho'õmo na te te ida'rãsutu ãmamhã. Tawamhã ta hã ma tô Astarote ãma, duré Edrei na 'ri wa'õtõ nhisi ãma te te 're da'ab'madâ'â.

⁵ Isimi'madâ hã Hermo na ẽtẽ nhisi niwĩb zama, Sa'uca hã, uburé Basã na romnhisi hã, Gezuri norĩ Ma'acati norĩ nhipti'a zada'ré u hã, duré Ziliadi ti'a na aiwa ãma isipo hã, Hesbõ norĩ nhib'apito Seõhõ nhipti'a zada'ré u hã.

⁶ Mozési, Uburé Danhib'apito ma romhuri'wa, Izaraéu nhihudu norĩ me hã ma tô ãne hã da'ãma ai'uté za'ra. Tahawa ma tô ti'a ã hã apito norĩ te hã tisõ, Rubẽhẽ nhihudu norĩ ma, Gadihi nhihudu norĩ ma, duré bâtâ pusizém niwĩ Manaséhé nhihudu norĩ ma.

Zozué, apito norĩ ãma te te duré i'ai'uté za'ra zé wasu'u

⁷ Uburé Zodã pa zara niwĩ bâtâ zasizém niwĩ apito norĩ ti'ai 're, 're ihâimana za'ra mono ãmamhã ma tô Zozué norĩ, Izaraéu nhihudu norĩ me hã ãma ai'uté za'ra, romharé nhisi Libanu ãma Baau-Gadi hawi, Halaque na ẽtẽ nhisi u, Se'i niwĩmhã. Zozué, ã hã ti'a, tisiré Izaraéu nhihudu wa'õtõ mono ma hã ma tô ãma tãma sipo'o, õne u'â ite na tãma 're hâimana za'ra mono da hã.

⁸ Ã hã ti'a norĩ hã, ẽtẽ niwĩmhã, romharé hã, Zodã na ẽtẽ nhi'ridi romharé hã, ẽtẽ u ti'a inomro hã, duré hâiwa nhimire niwĩ supara 'ré si ro 're isa'wari mono hã. Ã hã ti'ai 'remhã hitita norĩ aré 're ihâimana za'ra mono hã, amoreu norĩ, cananeu norĩ, perizeu norĩ, heveu norĩ, duré zebuzeu norĩ.

^9-24 Apito norĩ ãmamhã da te i'ai'uté za'ra hã, ãne 'ri nho'õmo nhisi 'rem norĩ hã: Zerico, Ai (Bétéu 'ratamhã), Zeruzalẽ, Hebrõ, Zamute, Laqui, Égrõ, Geze, Débi, Gede, Horma, Arade, Libna, Adurã, Maqueda, Bétéu, Tapua, Héfé, Afeca, Lasarõ, Madõ, Hazo, Sĩrõ-Merõ, Aquisape, Ta'anaqui, Megido, Quedesi, Zocne'ã (Carmeru ti'a niwĩmhã), Dori (pu'u zaihâ niwĩmhã), Go'i (Galiléa niwĩmhã), duré Tirza niwĩmhã. Uburé apito norĩ za'ratazé, 31 na ihâiba hã.