Zozué 11 - ꞌRe Ihâimana Uꞌâsi Mono Zadawa Wasuꞌu

Apito Zabĩhĩ ãma, duré ime 're ihâimana za'ra mono norĩ ãma, da te i'ai'uté za'ra zé wasu'u

¹ Tawamhã rowasu'u wisi wamhã, Hazo na 'ri nho'õmo nhisi te apito Zabĩ hã. Ma tô romreme hã apito norĩ ma sõmri za'ra: Zobabe, Madõ te apito ma; Sĩrõ ãma apito ma, duré Aquisape ãma apito ma;

² ẽtẽ ãma apito 're ihâimana za'ra mono norĩ ma, hâiwa nhimi'e niwĩmhã; Zodã pa ãma ẽtẽ nhi'riti romharé wa, 're ihâimana za'ra mono norĩ ma, hâiwa nhimire niwĩ pu Galiléa na isisi ãmamhã; duré Dori na 'ri nho'õmo nhisi 'rata pazaihâ na romharé wa, 're ihâimana za'ra mono norĩ ma.

³ Tawamhã a'uwẽ, Zodã pa pazaihâ si'uiwa na 're ihâimana za'ra mono norĩ tẽmemhã ma tô duré rowasu'u'wa norĩ satõrĩ za'ra cananeu norĩ u hã, amoreu norĩ u hã, duré hitita norĩ u hã, perizeu norĩ u hã, ẽtẽ ãma zebuzeu norĩ 're ihâimana za'ra mono norĩ u hã, duré heveu norĩ ẽne Hermo na isisi zahâpâ Mispa na rowamri ãma 're ihâimana za'ra mono norĩ u hã.

⁴ Tahawa ma tô ta norĩ, uburé tite dasi'wapéi 'manharĩ'wa norĩ ré hã wairé ahâ uptabi na, pazaihâ na supara'ré 're ihâimana za'ra mono ne. Duré awaru hã ahâ uptabi di. Awaru na wedewara zapore na dasi'wapézéb zama duré ahâ uptabi di.

⁵ Uburé apito norĩ, ma tô tite dasi'wapéi 'manharĩ'wa norĩ hã te te 'rã'õtõ. Merõ na sipti nhisi 'rata ma tô sima 'ri nhoré za'ra, Izaraéu nhihudu norĩ te te 'wapé za'ra da hã.

⁶ Tawamhã Uburé Danhib'apito te Zozuéhé ma tinha, ãne: — Tãma aipahi za'ra tõ. Awẽmhã tô ãne bâtâ na wa za ta norĩ hã uburé pese uprosi, Izaraéu nhihudu norĩ ma. Tawamhã a hã ite za'ra awaru te za tiwi i'amorĩ'õ. Te za duré ãma tiwi i'azazu, wedewara zapore na dasi'wapézém na hã.

⁷ Ãne Zozué, uburé dasi'wapéi 'manharĩ'wa norĩ me, ma tô Merõ na romnhisi ãma sipti 'rata sahu za'ra, simiza'rese õ ré.

⁸ Tawamhã Uburé Danhib'apito hã ma tô Izaraéu nhihudu norĩ ma sõmri za'ra, te te da'ãma i'ai'uté za'ra zé hã. Tinhitob'ru norĩ te te sahui wamhã, ma tô Sidõ u isarina sisa're, Misrefote-Ma'ĩ na 'ri nho'õmo nhisi u hã, duré bâtâ pusizém niwĩ ẽtẽ nhi'riti romharé ãma Mispa na ẽtẽ siwa'aba wa romharé nhisi u hã. Tame, ma tô duré 'wapé za'ra, te te uburé i'uprosizéb u.

⁹ Tawamhã Zozué, Uburé Danhib'apito te te tãma i'ruzé hã ma tô 'manha. Awaru ite za'ra ma tô te te amorĩ'õ. Wedewara zapore na dasi'wapézém na ma tô duré te te ãma aro'o.

¹⁰ Tawamhã Zozué te oto apâ mo. Apâ morĩ wamhã, ma tô 'ri nho'u Hazo hã ti'â. Ma tô duré tiwĩ, ite apito hã. Tahawa, ã hã daza'ru niwĩmhã Hazo ãma da'madâ'âzé hã isiptede, uburé da'madâ'â'wa norĩ hâiba amoi ma hã.

¹¹ Ma tô Izaraéu nhihudu norĩ, iwa 're ihâimana za'ra mono norĩ hã uburé siwi uprosi. Duré 'ri nho'õmo na ma tô ãma siwi ro'o.

¹² Ãne Zozué, uburé 'ri nho'õmo norĩ, duré ite apito norĩ te te waibui wamhã, ma tô uburé uprosi, Uburé Danhib'apito ma romhuri'wa, Mozési te te iwaihu'uzéb zarina.

¹³ Tane nherẽ, Izaraéu nhihudu norĩ, 'ri isiprum nhisiwi da te 're i'ri za'ra mono ãma hã te te ãma siwi sazui õ di. Hazo ãmap si ma tô Zozué hã ãma ro'o.

¹⁴ Tawamhã marĩ iwa'âbâ za'ẽtẽ norĩ na, duré 'ri nho'õmo norĩ te danhimizama na hã ma tô Izaraéu nhihudu norĩ hã uburé pese ãma ate za'ra. Tane nherẽ, ma tô uburé pese siwi da'uprosi, ni'wa hã hâiba ré hã hâimana ãna.

¹⁵ Uburé Danhib'apito, Mozési tãma iromhuri'wai ma, te te iwaihu'uzém na ma tô Zozuéhé ma tãma waihu'u, Mozési hã. Ta hã ma tô duré wapari pese, te te rẽme ãna, Zozué hã. Tahawa ma tô uburé pese marĩ 'manha, Uburé Danhib'apito, Mozésihi ma te te 'manharĩ da, te te tãma i'ruzéb zarina.

Zozué hã te te duré da'ãma i'ai'utézé wasu'u

¹⁶ Ãne ma tô Zozué uburé ti'a hã waibu, Zuda ti'a niwĩ ẽne ihâimana hã, uburé hâiwa nhimire niwĩ ti'a hã, uburé Gosẽ na romnhisi niwĩ ti'a hã, Zuda ti'a niwĩ romharé hã, Zodã pa ãma ẽtẽ nhi'riti siwa'aba wa, romharé hã, ẽtẽ niwĩ ti'a hã, duré Izaraéu na romnhisi niwĩ pu'u zaihâ na romharé zama hã.

¹⁷ Taha ro hã Halaque na ẽtẽ wamri hawi, Se'i na romnhisi 'ratamhã, Libanu ãma romharé niwĩ Baau-Gadi na 'ri wa'õtõ nhisi u hã te nomro, Hermo na ẽtẽ zahâpâ na'rata ãma. Zozué hã taha rom norĩ na ma tô uburé uprosi, apito norĩ hã.

¹⁸ Ã hã apito norĩ hã ma tô Zozué bâtâ ahâ na hã te te a'wapé.

¹⁹ Ã hã 'ri nho'õmo norĩ nima hã Izaraéu nhihudu norĩ me ãma sisaze za'ra õ di, si'wapéi ãna siré 're ihâimana za'ra mono da na hã. Gibiã norĩ si ma tô ãne hã tãma 'manharĩ za'ra, nima norĩ heveu 're ihâimana za'ra mono ãma. Ihâiba amo norĩ si ma tô dasiwi waibu ni, dasi'wapéi u'âbâ.

²⁰ Uburé Danhib'apito, ã hã 'ri nho'õmo norĩ 're, 're ihâimana za'ra mono ma hã ma tô tãma 'manharĩ za'ra, pẽ'ẽ tete na Izaraéu nhihudu norĩ te te 'wapé za'ra da, duré taha zarina uburé ta norĩ hã si'utõrĩ da, ãma pẽ'ẽzé za'ra ãna, duré ãma siwamri za'ra ãna, ãne na Uburé Danhib'apito, Mozésihi ma, te te iwaihu'uzéb zarina.

²¹ Tawamhã ãne hã romhâimana ré, ma tô Zozué, a'uwẽ i'rãihâ anaqui na iwamri norĩ, ẽtẽ ãma 're ihâimana za'ra mono hã uprosi: Hebrõ ãma, Débi ãma, Anabe ãma, uburé Zuda niwĩ ẽtẽ ãma hã, duré Izaraéu niwĩmhã. Tawamhã uburé pese ma tô Zozué hã uprosi, duré ite za'ra 'ri nho'õmo norĩ zama.

²² Tawamhã anaqui norĩ, hâiba ré hã da te 'mairẽme õ di, Izaraéu nhihudu norĩ nhipti'ai ãmamhã. Gaza ãmap si, Gati ãma, duré Asidodi ãma ma tô ni'wam norĩ dâ'â ãna hã tihâimana za'ra.

²³ Ãne ma tô Zozué, uburé ti'a norĩ hã waibu, Uburé Danhib'apito, Mozésihi ma te te inharĩzéb zarina, Izaraéu nhihudu wa'õtõ mono bâ te te sõmri za'ra mono da, ãma isipo'o mono hã. Ãne ti'a hã ma tô oto wa'udu, dasi'wapé na hã.