Zozué 1 - ꞌRe Ihâimana Uꞌâsi Mono Zadawa Wasuꞌu

Zozué hã, Mozésihi nhowa're're ihâimanazé wasu'u

¹ Tawamhã Mozési, Uburé Danhib'apito ma romhuri'wa, dâ'â parimhã, ma tô 'Re ihâimana u'âsi mono hã ipawapto'wai ma, Zozué na isisi, Nuhu 'ra ma tinha ãne:

² — Ĩma romhuri'wa Mozési hã ma tô dârâ. Tahawa te za ãhã na a hã, uburé Izaraéu nhihudu norĩ me asima irob'ubumro za'ra wa'wa za, Zodã pa panho'u â za'ẽtẽ na saprĩ za'ra wa'aba da, ti'a za te aima isõmri za'ra wa'aba zéb u asisisi aba da.

³ Mozésihi ma, te iropisutuzéb zarina, wa za uburé pese ti'a za 're iwati'i za'ra wa'aba mono hã aima sõmri za'ra wa'wa.

⁴ Ãne asipti'a zada'ré mono hã za: Hâiwa nhimire niwĩmhã, rop si 're irosa'wari mono u isada'ré hã; hâiwa nhimi'e niwĩmhã, ẽne Libanu na isisi u isada'ré hã; bâtâ pusizém niwĩmhã, panho'u â isa'ẽne Eufrati na isisi u isada'ré hã; uburé hitita norĩ nhipti'ai u zama isada'ré hã; duré bâtâ zasizém niwĩmhã â poré u isada'ré hã.

⁵ Tawamhã niwamhã da te ai'ãma i'ai'uté da hã mare di za. E marĩ wa. Wa hã za asiré 're ĩhâimana u'âsi mono wa, Mozésihi siré 're ĩhâimana mono ne. Niwamhã te airẽme õ di za.

⁶ Asiptete, duré asib'ru na, a hã za ã hã a'uwẽ norĩ hã simroi mono dâ'âsina, ti'a te te siwi âri da hã, ihi'rata norĩ ma, te tãma ãma iropisutu za'ra hã.

⁷ Tô asiptete, sada asib'ru uptabi duré. Taré oto ãma pibui pese, ĩma romhuri'wa Mozési, ĩnhimiroti uburé te te aima isõmrizéb zarina si ãma 're aihâimana mono da. Ĩnhimiroti te te aima isõmri wi hã 're aipizari mono tõ. Tawamhã ãne wamhã nimomo 're ane mono sidâpâsi, te za 're i'aihâimana mono wẽ zé hã asina 're i'a'uwaimrami mo za.

⁸ Ma'ãpé ãma irob'ui'éré na hã õne u'â ãma 're aimreme mono. Bâtâ na hã duré mara na hã ãhã ibaihâ na ãma 're romnhoré mono, ãma 're asiptete mono wa, uburé ãma irob'ui'éré zarina asina ãma 're uwaimrami mono da. Tawapsi, te za 're i'aihâimana mono wẽ zé hã asina 're i'uwaimrami mo.

⁹ Ĩnhimirowaihu'u na aima hã, ma'ãpé ãma aipo're pu'u: “Asiptete, duré asib'ru na! Aiwi robzei'õ tõ, duré aipahi tõ! E marĩ wa. Wa hã Uburé Danhib'apito, ate 'Re ihâimana u'âsi mono, nimomo 're ane mono sidâpâsi, wa za asiré 're ĩhâimana.”

Zodã pa na Izaraéu nhihudu norĩ te te saprĩ za'ra da, te te sima irob'ubumro za'ra zé wasu'u

¹⁰ Tawamhã Zozué te Izaraéu nhihudu norĩ 'rãnho'õmo norĩ ma waihu'u za'ra ãne:

¹¹ — A'uwẽ norĩ romhâ 'manharĩ na 'ri te te sima isõré mono wa'waibaba, ma'ãpé ropéi wa'aba mono, ãne tãma waihu'u za'ra wa'aba mono da: “Dasa norĩ hã ma'ãpé asiwi ubumroi wa'aba mono, si'ubdatõ bâtâ na ã hawimhã za aiwairébé aba wa, Zodã pa â na saprĩ za'ra wa'aba da, Uburé Danhib'apito ate 'Re ihâimana u'âsi mono 'wa, ti'a za te te aima isõmri za'ra wa'wa, asiwi âri aba da hã.”

¹² Tawamhã Zozué te oto Rubẽhẽ nhihudu norĩ ma, Gadihi nhihudu norĩ ma, duré Manaséhé nhihudu norĩ bâtâ pusizém niwĩ 're ihâimana za'ra mono norĩ ma, nharĩ za'ra ãne:

¹³ — Ma'ãpé Uburé Danhib'apito ma romhuri'wa, Mozésihi nhimirowaihu'u na hã ãma aipo're pu'u za'ra wa'aba: “Uburé Danhib'apito, wate 'Re ihâimana u'âsi mono, te za ti'a aima sõmri za'ra wa'wa, iwa 're aihâimana za'ra wa'aba mono da, asima iwẽ na.

¹⁴ Tawamhã Mozési, ti'a te te aima isõmri za'ra wa'aba ãma te za pi'õ norĩ ate wa'wa hã, duré ai'ra norĩ wa'wa hã 're hâimana za'ra za. Asimizama za'ra wa'wa hã te za ãme isiré za'ra hã 're hâimana za'ra, Zodã pa zara niwĩ bâtâ pusizém niwĩmhã. Aibâ norĩ si te za da'wapéi'wa da tinhimnhi'ã hã waibu za'ra, tisiré Izaraéu nhihudu norĩ nhowa te te saprĩ za'ra da panho'õmo na hã te te pawapto za'ra da dasi'wapé na hã.

¹⁵ Tawamhã Uburé Danhib'apito, wate 'Re ihâimana u'âsi mono, ti'a za te te tãma isõmri za'ra na hã te za ãma ate za'ra, iwa 're hâimana za'ra mono da oto. Ãne niwa marĩ hâimana wamhã, te za asipti'ai u apâ we ai'aba'réi wa'wa, za iwa 're aihâimana za'ra wa'aba mono da, Mozési, 'Re ihâimana u'âsi mono ma romhuri'wa, ãme te te aima isõmri za'ra wa'aba ãma, Zodã pa â bâtâ pusizém niwĩmhã.”

¹⁶ Tawamhã ta norĩ hã ma tô ãma sada'âbâ za'ra ãne, Zozué hã: — Uburé wama i'ru za'ra zé hã wa za 'manharĩ za'ra ni tô. Duré 're wazatõrĩ za'ra mono sidâpâsi, wa za tô 're wanomro.

¹⁷ Õne u'â Mozésihi mreme wa te 're iwapari pese za'ra mono ne, wa za tô duré aimreme zama wa te 're wapari pese za'ra. Uburé Danhib'apito, ate 'Re ihâimana u'âsi mono, za aime 're hâimana mono da, wa wasima wẽ za'ra ni, Mozésihi siré 're ihâimana mono ne.

¹⁸ Tawamhã duré ni'wa hã te te i'aimreme wapari õ zarina, siwa'ru asimirowaihu'u wi sipi'rai wamhã, te za wĩrĩ ni. Tahawa asiptete na si, duré asib'ru na si hã aihâimana mono za.