Zona 3 - ꞌRe Ihâimana Uꞌâsi Mono Zadawa Wasuꞌu

Zona hã Niniwé u oto imorĩzé

¹ Uburé Danhib'apito hã maparane ãma te Zonahã ma duré tinha, ãne:

² — Ma'ãpé asima rob'ubumro na, Niniwé u aimorĩ da, 'ri nho'u hã dama iwaihu'u za'ẽtẽ u, tame dama rowahutu da, ĩmreme za te aima isõmrizém na.

³ Tawamhã Zona hã ma tô oto sima rob'ubumro. Taha pari te oto mo, Niniwé u hã, Uburé Danhib'apito te te tãma ipisutuzéb zarina. Niniwé hã 'ri nho'u isa'ẽtẽ uptabi. Ni'wa te te ãma ro'razâri da wamhã, si'ubdatõ bâdâ te za ãma ne, para na morĩ wamhã.

⁴ Zona hã wisi wamhã, ma tô ãzé 'ri nho'õmo u hã. Tame bâtâ wahuré na ma tô 're mo, 'ri baba. Tawamhã ma tô oto ãma sãna'rata, te te dama irowahutu na hã, ãne: — Bâdâ 40 na isi'utõrĩzéb ãma hã, Niniwé hã te za ai'utõrĩ pese.

⁵ Tahawa Niniwé 're, 're idahâimana za'ra mono norĩ hã ma tô saze za'ra, 'Re ihâimana u'âsi mono hã. Ma tô duré sima pisutu za'ra, hâiba mono bâ mreme zusi da, sai ãna a'â. Tawamhã dahâiba mono bâ dama ipire norĩ hã duré dama iwapu norĩ zama ma tô uburé pese si'uza za'ra sa'u ihâiro na, tiwasété na isiwẽ'õ za'ra zém na sihâi'ré za'ra da hã.

⁶ Niniwé ãma apito, ãne hã te te waihu'u wamhã, ma tô oto wahudu, tisimasisizém hawi. Ma duré waze tinho'utu ubuzé ipanoi'õ hã, sa'u ihâiro na si'uza da. Taha pari ma tô nhamra, 'ru'a nhisiwi.

⁷ Ma tô duré dama ti'ru, da te ãma dapo're pu'u za'ra da, 'ri nho'õmo 're, 're idahâimana za'ra mono norĩ hã ãne: “Ã hã apito nhimiroti, duré isapari tãma iromhuri'wa norĩ nhimiroti zama. Ni'wa isa da hã mare di za. Aihĩni norĩ hã, duré abaze norĩ hã, powawẽ norĩ hã duré pone'ẽrebâ zéré mapure norĩ zama isaihuri da hã, mare di za. Duré â te te i'âhuri da hã mare di za, uburé marĩ wa'u norĩ zama.

⁸ Uburé a'uwẽ norĩ hã duré abaze norĩ zama te za ãma si'uza za'ra, sa'u ihâiro na. Dahâiba mono bâ te za sa'ẽtẽ tamreme zusi ni za, 'Re ihâimana u'âsi mono ma hã. Te za duré danhibâdâdi iwasédé hã rẽme za'ra ni, danhimirob'manharĩ wasété zéb zama.

⁹ Ãté ãne wamhã, 'Re ihâimana u'âsi mono hã te za tinhimirosa'rata na saprĩ. Ãté isahi hã te za taré tiwi ai'utõ. Ãne wamhã, wasi'utõrĩ õ di za.”

¹⁰ Tawamhã 'Re ihâimana u'âsi mono hã ma tô 'madâ, marĩ te te i'manharĩ za'ra zé hã, duré tinhibâdâdi iwasédé hã te te irẽme za'ra zéb zama. Tahawa, ma tô tinhimirosa'rata na ãma saprĩ, te te tãma rob'manharĩ za'ra tõ da oto, 'ri nho'õmo 're, 're ihâimana za'ra mono norĩ ma hã, te te aré nharĩ nherẽ, te te da'uprosi da hã.