Zona 1 - ꞌRe Ihâimana Uꞌâsi Mono Zadawa Wasuꞌu

Zona hã 'Re ihâimana u'âsi mono nhimiroti te te irẽmezé wasu'u

¹ Nimahã bâtâ na te Uburé Danhib'apito hã tinha, Amita'ihi 'ra Zona na isisi ma, ãne:

² — Ma'ãpé asima rob'ubumro na, aimorĩ da, 'ri nho'u isa'ẽne Niniwé na isisi u. Tame te za aimreme 'rãihâ na irowasu'u, 'ri nho'õmo wa, 're idahâimana za'ra mono norĩ ma. E marĩ wa. Ta norĩ 're iwasété za'ra mono zé hã ma tô we ĩtẽme wi. Ta hã wa tô wapa.

³ Tawamhã Zona hã ma tô oto sima rob'ubumro, morĩ da aré. Tane nherẽ, Uburé Danhib'apito te te tãma irob'ruzéb upana, ma tô aimawi Zope na 'ri wa'õtõ nhisi u si mo. Tame ma tô uba're isa'ẽne hã sõpẽtẽ, Espãnha na romnhisi u iwara da hã. Ma tô sima wa'â, ãma imorĩzéb da. Taha pari ma tô oto ãzé uba're wa dame, isari'wa norĩ me, Espãnha u morĩ da, Uburé Danhib'apito nhiti hâimana da, romhâ na.

⁴ Tane nherẽ, 'Re ihâimana u'âsi mono hã ma tô rob'ru, rowa'u isiptete uptabi ma, sa'ẽtẽ â hã te te sasisi da. Tahawa, te â hã sa'ẽtẽ sisasisi. Sisasisi mono wa, sa'ẽtẽ â hã, simimnhasi di aiwa ãma isipo'o da si, uba're ãma hã.

⁵ Uba're sari'wa norĩ hã ma tô tipahi pese za'ra. Ma tô duré sadari za'ra hâiba mono bâ, ãma 're iwata za'ra mono norĩ ma, ihâiba'õ norĩ ma, te te pawaptob za'ra da. Uba're hã wapu na wara da hã, ma tô ro te te sãmra za'ra âi ba, siré te te i'wasari hã. Taha wana ré, ma tô Zona hã si'ra uba're 'ri 're wa'wa hâiba amoi u hã pi'reba. Tame ma tô nomro. Aptâ'â uptabi wa, ma tô aré nhotõ pe.

⁶ Tawamhã uba're 're, da'madâ'â'wa hã ma tô tame sõpẽtẽ, sõtõ ré. Tahawa, te ãne tãma tinha: — E niha te a hã aiprédu ma asõ. Ai'utu, rowaptẽrẽ da, ate ihâiba'õ ãma 're i'aiwata mono wi, te te aipawaptob da. Ãté ta hã te za wa'ãma tipẽ'ẽzé za'ra, wasi'utõrĩ tõ da.

⁷ Uba're sari'wa norĩ hã te duré sima nharĩ za'ra ãne: — Oto wa te wasiwi mei wa'aba ẽtẽ zapotore i'ui'éré ré hã, ni'wa hã marĩ na te te i'upa, wa te wasiwi upsibi me da, taha nhimi'manharĩzéb upa zarina romnhimimnha wama ihâimana za'ra zé hã. Tahawa, ma tô siwi time, ẽtẽ zapotore hã. Tawamhã Zonahã nhisi hã ma tô watobro.

⁸ Te siwi sadanha oto ãne: — Ma'ãpé wama asiwasu'u za'ra na. E 'wa hã marĩ na i'upai'wa merẽ. E marĩ asimiromhuri. E ma hawi te we aimo. Duré e ma hã ate ti'ai wa'õtõ nho'u. E ma hã duré asib'a'uwẽ.

⁹ Ãne te tãma siwasu'u za'ra, Zona hã: — Wa hã hebreu na ĩwamri. Duré Uburé Danhib'apito 'Re ihâimana u'âsi mono ãma si wa ãma 're ĩwata, hâiwa ãma 're isãmra mono ãma, âporé 'manharĩ'wai ãma, duré ti'ai 'manharĩ'wai ãma.

¹⁰ Taha pari, te Zona hã duré tãma siwasu'u za'ra: — Uburé Danhib'apito wi, wa tô aimani. Tahawa uba're sari'wa norĩ hã ma tô tipahi pese za'ra oto. Ãne te tãma nharĩ za'ra: — E marĩ ma tô bété i'manha!

¹¹ Ãne wa, te rowa'u'u za'ẽne hã sa'ẽtẽ uptabi te te rob'rãi waihi hârâ oto. Te duré siwi sadanha, uba're sari'wa norĩ hã, Zona ãne: — E marĩ, wa za aima 'manharĩ za'ra ni, âsisasi hã simizazâri da hã.

¹² Zona hã ma tô asa ãma tãma wa'rãmi za'ra ãne: — Asiwi ĩ'âri aba, asiwi ĩmei wa'aba da âi ba, simizazâri da, âsisasi hã. E marĩ wa. Wa hã ĩma waihu'u pese di, te i'upazéb zarina rowa'u isa'ẽne hã asô iwatobro za'ra wa'aba na hã.

¹³ Uba're sari'wa norĩ hã ãne hã te te siwi 'manharĩ da nherẽ, te te a'â siwi wasi u'âsi, siptete na te te siwi sari pibu da, supara'ai u. Tane nherẽ, te te siwi sari waihu'u õ di, rowa'u hã wa'u'u nhiptete uptabi wa.

¹⁴ Tahawa, te oto mreme zu, mreme 'rãihâ na ãne: — Uburé Danhib'apito, wahâ za'ra tõ, wasi'utõrĩ da hã, ãhã aibâ hâimanazé, wa te wasiwi i'uprosizém na hã. A hã Uburé Danhib'apito te ãne hã i'manha. Duré marĩ iwatobro hã asima iwẽzéb zarina hã.

¹⁵ Taha pari ma tô uba're sari'wa norĩ hã siwi ti'â oto Zona hã. Ma tô siwi time, âi ba. Tahawa, ma tô awa'awi âsisasi hã 'mazazâ.

¹⁶ Ãne hã te te 'madâ'â za'ra wamhã, ma tipahi pese za'ra, 'Re ihâimana u'âsi mono ma. Tahawa, ma tô tinhimizama hã misi tãma zata za'ra, tinhoprub za'ra zé hã. Te duré ropisudu hã sina tãma 'manharĩ za'ra.

¹⁷ Tawamhã Uburé Danhib'apito hã ma tô tebe hã isa'ẽtẽ ma ti'ru, Zona te te sõmri da hã, hâiba wahuré. Tame, te si'ubdatõ bâtâ 're duré si'ubdatõ mara na, tepe za'ẽtẽ waihõ 'remhã tihâiba.