Zenezi 50 - ꞌRe Ihâimana Uꞌâsi Mono Zadawa Wasuꞌu

¹ Tawamhã Zuzé, ma tô timama nhisiwimhã waptãrã, tinho'utu te te âri da. Tahawa, ma tô ãma siwa'õ sina tob'rata hârâ na sawi.

² Tawamhã dawede'wa norĩ te te tãma 're iromhuri za'ra mono ma, ma tô tãma waihu'u za'ra, imama hã te te siwi hâiba u'ré da, 'ro tõ da. Ãne te te tãma waihu'u za'ra wa, ma tô imreme zarina ta norĩ hã siwi 'manha.

³ Te te siwi hâiba u'réi ré hã, ma tô bâdâ 40 na ãma timorĩ za'ra, tô da te 're idahâiba u'ré za'ra mono zé bâtâ wabre. Tawamhã ezipsiu norĩ hã ma tô 70 bâtâ na tipẽ te te ãma isépata za'ra zarina sô 're siwa'õ za'ra.

⁴ Tawamhã oto imama ãma dapẽ'ẽzé da te isépata za'ra zé si'utõrĩ wamhã, ma tô Zuzé, Ezitu ãma apito nhimiromhurizé 'ri 'rãihâ 're dama ipire norĩ ma hã tãma nharĩ za'ra ãne: — Ĩzawi na hã ma'ãpé apito ma, ãne romreme asiwi âri aba:

⁵ “Ĩmama hã tidâ'âzéb u ma tô ĩwi waptẽ, te tãma ropisutu da, ti'ai wa'õtõ nho'u Cana'ã ãma ti'a te te sima i'maipisutu ãma, te sẽrẽ da. Tahawa, a'â ĩma rowairébé, ĩmama ãma te ti'a da ĩmorĩ da. Taha parip si wa za we apâ ĩsina siri.”

⁶ Tawamhã apito Fara'o, ma te ãne Zuzé hã ãma sada'â asa: — Mo oto pé aimorĩ, aimama ãma a'â ti'a da, tãma iropisutuzéb zarina.

⁷ Tawamhã Zuzé, ma tô oto mo, timama te te sẽrẽ da. Tahawa, te isiré ai'aba'ré, apito siré dama ipire na te te 're iromhuri za'ra mono norĩ hã, apito nhimiromhurizé 'ri 'rãihâ 're danhib'ihâ'a norĩ hã, duré uburé Ezitu ãma dama i'rãnho'õmo norĩ hã.

⁸ Tawamhã duré Zuzéhé hawi a'uwẽ norĩ zama, isisãnawã norĩ zama, duré uburé Zacoho nhorõwa ãma 're ihâimana za'ra mono norĩ zama, ma tô isiré hã ai'aba'ré. Ãhã wa, Gosẽ ãma ma tô sisa'u za'ra rẽme za'ra ai'uté norĩ hã, pone'ẽrebâ norĩ hã, pone'ẽrebâ zéré uzé norĩ hã, duré powawẽ norĩ hã.

⁹ Tawamhã ni'wam norĩ aibâ zama ma tô awaru na, duré wedewara zapore na hã dasiré ai'aba'ré. Tahawa, dawa'õno hã sa'ẽtẽ uptabi di.

¹⁰ Tawamhã Atade na romnhisi u oto sihutu wamhã, Zodã â bâtâ pusizém niwĩ 're isa'wari mono u hã, ma tô amnho trigu da te 're ipré'é za'ra mono zéb ãma ihâiba na siwa'õ 'rãihâ na hã sô rob'rã ze za'ra, 7 bâtâ 'remhã.

¹¹ Tawamhã Cana'ã ãma 're idahâimana za'ra mono, da'ahâ na idasiwa'õ za'ra na te te da'madâ'â za'ra wamhã, te ãne sima nharĩ za'ra: “E niha ma tô ezipsiu norĩ hã siwa'õ pire na hã sô ti'ru'ru.” Tahawa ma tô ta ro hã siwi sisi, Abéu-Misraĩ na.

¹² Ãne ma tô Zacoho 'ra norĩ siwi 'manha, imama za'ra uburé te te tãma ipisutu za'ra zéb zarina.

¹³ Cana'ã u ma tô ihâiba hâ hã siwi ti'â. Tahawa, ma tô a'ubuni wi ẽtẽ na ab're siromo wa siwi tisẽ, Maquipela ãma Mare bâtâ pusizém niwĩ, ti'a Abra'ã, hitita norĩ siré Efrõhõ wi te te i'uiprazéb ãma, tisiré a'uwẽ norĩ 'ru da hã.

¹⁴ Tawamhã da te ãma dasiwi ti'ai pari, ma tô Zuzé hã tisisãnawã norĩ siré, duré uburé isiré isi'aba'ré norĩ siré apâ hã Ezitu u mo.

Zuzéhé wasu'u 'rãsutu zé wasu'u

¹⁵ Tawamhã imama tiwi si'ré za'ra parimhã, ma tô Zuzéhé sisãnawã norĩ ãne sima ãma romnomri za'ra, tinoi hâiba na: — Ãté Zuzé te za oto wazada tinhiti'ru za'ra. Ãté te za duré si'ruiwa'â, iwasédé wa te tãma i'manharĩ za'ra wa'rãmimhã.

¹⁶ Tahawa Zuzéhé ma, ma tô romreme hã ãne tãma me za'ra: — Aimama dâ'â wana ré,

¹⁷ ma tô wawi waptẽrẽ za'ra, ãne wa te aima nharĩ za'ra da hã: “Asisãnawã norĩ iwasédé te te aima i'manharĩ za'ra zém na hã, asina pa'ruiwapari za'ra õ di za.” Tahawa, wa ãhã na hã aiwi waptẽrẽ za'ra ni, wawasédé, wa te aima i'manharĩ za'ra zé, wa'ãma 'madâ'â za'ra tõ da, asina 're iwapaza'rata za'ra mono õ zarina, wa norĩ hã aimama te, 'Re ihâimana u'âsi mono nhib'a'uwẽ na 're wahâimana za'ra mono dâ'âsina. Tawamhã ãne na Zuzé isadawa wasu'u za'ra, te te wapari wamhã, ma tô aiwa'õ.

¹⁸ Taha pari, isisãnawã norĩ si'uihâ na oto itẽme si'aba'réi wa, isõ're tãma siwẽ'ẽ za'ra wamhã, ma tô ãne tãma nharĩ za'ra: — Ãhãta wa wa norĩ asib'a'uwẽ, awa'awi na ãme wahâimana za'ra ni.

¹⁹ Tane nherẽ, ma te Zuzé ãne ãma tãma wa'rãmi za'ra: — Aipahi za'ra wa'aba õ di za. E wa hã, 'Re ihâimana u'âsi mono upana ĩsisẽrẽ da bâ, te aima irob'manharĩ za'ra wa'aba da hã.

²⁰ Sena na ma tô aré tô iwasété na ĩ'ãma asima irowa'õtõ za'ra wa'wa. Tane nherẽ, 'Re ihâimana u'âsi mono, ĩzada aihâimana wasété za'ra wa'aba hawimhã, ma tô iwẽ u ĩma ãma aiwi saprĩ za'ra wa'wa, ãhã na da'ahâ uptabi na te 're ida'anho'reptui mono zé ma ropibu ma.

²¹ Tahawa aipahi ãna 're aihâimana za'ra wa'aba mono. E marĩ wa. Wa hã wa za ai'ra norĩ me hã oto te 're ai'madâ'â za'ra wa'wa. Ãne ma tô timreme wazidi wẽ na, pẽ'ẽhiri za'ra.

²² Tawamhã Zuzé, timama nhib'a'uwẽ norĩ me, ma tô Ezitu ãma 're hâimana za'ra. Tawamhã Zuzéhé ãma ma tô tiwahu, 110 na.

²³ Ma tô duré Efraĩhĩ nhihudu norĩ hã hâiba ré te te 're a'madâ'â. Tawamhã ma tô duré isihudu Maquihi 'ra norĩ hã tipa te te 're azazari, Manaséhé 'ra sipodo hã.

²⁴ Tawamhã nimahã bâtâ na te Zuzé, tisisãnawã norĩ ma sina tãma nharĩ za'ra ãne: — Nimahã na romhutu na wa za tô oto dârâ. Tane nherẽ, ĩ'uirĩ na te za tô sena na 'Re ihâimana u'âsi mono si te te 're aipawaptob za'ra wa'wa. Duré taha si te za ã hã ti'ai wa'õtõ nho'õmo hawimhã apâ te te asimroi wa'wa, Abra'ãhã ma, Izaquihi ma, duré Zacoho ma, te te ãma iropisutu siromo u.

²⁵ Tawamhã Zuzé, tisisãnawã norĩ wi, te te tãma iropisutu za'ra zéb da hã, ma tô tiwi waptẽrẽ za'ra ãne: — 'Re ihâimana u'âsi mono si te za tô te te 're aipawaptob za'ra wa'wa. Ãne hã niwa romhâimana wamhã, te za ĩhi norĩ hã asiré asiwi iduri 'wa za.

²⁶ Tawamhã Zuzé, 110 na ãma iwahub ãma ma tô oto dârâ. Tahawa, te te siwi hâiba u'réi parimhã, ma tô Ezitu ãma wedehâ're 're oto siwi tisẽ.