Zenezi 49 - ꞌRe Ihâimana Uꞌâsi Mono Zadawa Wasuꞌu

Zaco, ti'ra norĩ, 'Re ihâimana u'âsi mono, iwẽ te te tãma 're apisutu za'ra mono da, ãma imreme za'ra zé wasu'u

¹ Tawamhã Zaco ma tô ti'ra norĩ zô sima sô tihârâ za'ra. Tahawa, ma tô ãne tãma nharĩ za'ra: — Ma'ãpé asiwi ĩ'uirĩ wa'aba, apto'oré aihâiba mono bâ wa'aba za marĩ aima ihâimana za'ra wa'aba zém na te aima nharĩ za'ra wa'aba da.

² “Zacoho 'ra norĩ, ma'ãpé asiwi ĩ'uirĩ wa'aba, asiwi ĩwapari aba da. Izaraéu aimama aba mreme te za asiwi ĩwapari 'wa.

³ “Ĩ'ra Rubẽ, a hã imorĩ'rata na dama aipoto 'rada. A hã, ai'uté poto 'manharĩzém na ĩnhiptetezé hã ma tô asina ĩma 're isani mo, asô 're ĩzapa'a mono wamhã. Duré imorĩ'rata na ĩhâiba hawi ĩnhiptetezéb zarina ĩma 're i'aihâimana mono, 'râwi asi'madâ'â ze za'ẽtẽ na 're i'aihâimana mono, duré ĩ'ra asisãnawã norĩ nhipai u asiptete na 're i'aihâimana mono.

⁴ A hã asitété waihu'u õ, â wara nhiptede 're ipraba mono ne. Tahawa, dama aipire na oto 're aihâimana mono õ di za, ĩmro prãi ré asõtõ wa, taha u'âbâ aimama nhimiwaptâ hã wazéb õ wa.

⁵ “Simiã, Levi tisisãnawãi me, te tinhimnhi'ãsi na te te ãma dama 're rob'manharĩ u'âsi zahuré.

⁶ Isimiroti zahuré 'remhã wa hã ĩhâimana õ di za. Duré te te ida'rã'õtõ zahuré zéb ãma hã ime zahuré ĩhâimana õ di za, siti'ru zahuré ré, aibâ norĩ hã te te uprosi zahuré wa, duré sima to zahuré na powawẽ iba'õmo norĩ hã te te amorĩ'õ zahuré wa.

⁷ Isiti'ru zahuré zé ma, 'Re ihâimana u'âsi mono, iwẽ'õ te te ipisutu da si, wa ĩsima wẽ, ta hã dapãrĩzé wa. Wa hã wa za Izaraéu nhipti'a na ãma ĩsipo'o, isihudu zahuré hã te ãma ropéi mono da, te te sina dahâiba tob za'ra wa, isisãnawã nhihudu norĩ siré siwa'ru 're hâimana za'ra mono da.

⁸ “Zuda, asisãnawã norĩ te za ai'ãma 're wata za'ra. Asõ're te za aima 're siwẽ'ẽ za'ra. Te za duré asitob'ru norĩ, ibutu na 're i'atété mo.

⁹ Ĩ'ra Zuda, hu'u zéré pa ihâiba tém ne hã te 're hâimana. Ta hã 're sisõpãrĩ za'ra mono pari te za siwati sina nomro. Ãhã ré hã e ni'wa sada sib'ru da bâ, te te irési da hã.

¹⁰ Zuda, apito siwazusizé hã te za te te 're tété. Duré isihudu norĩ hã te za õne u'â dama i'rãnho'õmo na dama 're hâimana za'ra. Te za danhoprubzé hã da te tãma 're 'wasari, daro mono bâ. Tawamhã te za duré isimiroti hã da te 're wapari pese za'ra.

¹¹ Ta hã te za tite awaru po're pore 'rare na iwata wazi na te te ãma 're wasisi, uwa 'ru iwẽ uptabi 're isa mono na hã. Te za uwa 'rãi wa'u isé na ti'uza te te 're ahâi'upsõ. Duré te za uwa 'rãi wa'u isé na tisi'ubuzé hã te te 're upsõ, dawapru ne na rob'rãi wa'u na hã.

¹² Tawamhã te za duré uwa 'rãi wa'u isé te te 're ihâsi u'âsi mono zarina, 're topré pusi, Zuda hã. Te za duré powawẽ hâiwa'u te te 're hâsi u'âsi mono zarina 're 'wa'ã'a.

¹³ “Zébulõ, â poré zaihâ ãma te za 're sãmra, uba're 're isimizahâri za'ra mono zém niwĩ. Tawamhã duré isipti'a zada'ré, Sidõ na 'ri wa'õtõ nhisi u te za ti'rãsutu.

¹⁴ “Isaca, awaru po're pore isiptede, tinhimiro'wapé wa'wa 're isa'wari mono ne, te 're hâimana.

¹⁵ Tawamhã ti'ai wa'õtõ nho'u dawa'utuzéb da, iwẽ na te te 'madâ'â wamhã, te za ahâpâ, marĩ tiba na te te iduri da hã te te sima hiri da. Tahawa, te za duré siwapsari ãna te te 're romhuri, pawa'âbâ ãna te te dama 're iromhuri za'ra mono ne.

¹⁶ “Dã te za tinhihudu norĩ hã 'râwi te te sima 're a'madâ'â, ihâiba amo Izaraéu nhihudu norĩ ne.

¹⁷ Ta hã wahi, bâdâdi zada'ré 're isa'wari mono ne, te za 're hâimana, awaru 'mapraba'wa, ibabarãi u waptã'ã da, awaru ipara'õtõ wi te te isari ne hã.

¹⁸ “Uburé Danhib'apito, ĩte 'Re ihâimana u'âsi mono, ĩnho'reptubzéb zô si wa 're ĩnhimipari u'âsi.

¹⁹ “Gadi hã te za isimisaihuri norĩ siwi susi za. Tane nherẽ, te za apâ te te duré awano'õ.

²⁰ “Aséhé nhipti'ai 'remhã, amnho te za tãma 're 'rãiwẽ uptabi za'ra. Tahawa ã hã amnho hã apito norĩ ma, iwẽ uptabi si hã.

²¹ “Naftali, pozé sima iwẽ na rom na 're isisamroi mono ne, te 're hâimana, duré i'ra iwẽ uptabi tãma 're ipoto za'ra mono ne hã.

²² “Zuzé hã te rowede, â na'rata 'rata 'rãi pese na 're isa mono ne 're hâimana, ipanhipti 'ri 'wawi wa'ra 'rãihâ na hâimo te te 're irowaibui mono ne.

²³ Isitob'ru norĩ hã te za siwi susi, sada siwa'ro za'ra sina. Tahawa, te za siwi sama, tinhimnhi'ãsi na, duré tite za'ra ti'i na.

²⁴ Tane nherẽ, tinhimnhi'ã te te rési ãna, te za itété tete na hã ãma uzusi. Duré ipaihi si'uiwa na paihi nhiptete zahuré di za, Zacoho te 'Re ihâimana u'âsi mono iwaihu'u pese nhiptetezém hawim na wa, Pone'ẽrebâ 'madâ'â'wa ne Izaraéu nhihudu norĩ te, Ẽtẽ tõmo wawẽ nhisi na hã.

²⁵ Aimama te, 'Re ihâimana u'âsi mono te za te te 're aipawapto. Iwaihu'u pese uptabi te za iwẽ hã te te aima 're anhomri, hâiwa hawi â hã, ti'ai 'rowi â hã, abaze norĩ i'ahâ hã, ai'ra i'ahâ hã,

²⁶ amnho hã, sirãrã i'ahâ hã, ẽtẽ norĩ duréi 're isimasa mono 're, marĩ ise 're ihâimana u'âsi za'ra mono hã. Tawamhã uburé ã norĩ iwẽ hã Zuzéhé 'rã nhisiwi hâimana za'ra da hã, ĩma iwẽ. Uburé ã norĩ iwẽ, hâimana za'ra da hã tô ĩma iwẽ, 'Re ihâimana u'âsi mono isisãnawã norĩ hawi te te ipisudu, uihâ na hã.

²⁷ “Bẽzami, asada'rã abaze isahi uptabi ne hã te 're hâimana, mararé tinhisõpãrĩ te te i'rẽne ne, duré hâiwahâ tinhisõpãrĩ nhisi'atarẽme na ãma isipo'o ne.”

²⁸ Ã norĩ hã Izaraéu 'ra norĩ 12 na ihâiba za'ra hawimhã te za 12 na dawamri dasitébré za'ra, i'ra nhisi mono zarina. Ãne ma tô imama za'ra hã ti'ra norĩ ma waihu'u za'ra. Tahawa, hâiba mono bâ ma tô romnhowam na iwẽ na hã ãma tãma nharĩ siromo za'ra, ite mono bâ.

Zaco, dâ'â wa, da te isẽrẽzé wasu'u

²⁹ Tawamhã Zaco, ma tô ti'ra norĩ ma sina tãma rowaihu'u siromo za'ra: — Nimahã na romhutu na wa za oto dârâ. Ĩdâ'â wamhã, ĩhi'rata norĩ 'ru ãma te za asiwi ĩnherẽ 'wa, hitita norĩ siré Efrõhõ nhipti'ai 're a'ubuni wi ẽtẽ na ab're siromo wa,

³⁰ Maquipela ãma Mare bâtâ pusizém niwĩ, ti'ai wa'õtõ nho'u Cana'ã 'remhã. Ta hã ma tô Abra'ã Efrõhõ wi uipra, imana wawi ti'a inomro siré, da'ru iwa 're ihâimana u'âsi mono da hã.

³¹ Tame Abra'ã norĩ, imro Saraha me hã ma tô ãma ti'a zahuré ni. Izaqui norĩ, imro Rebecaha me, ma tô duré ãma ti'a zahuré ni. Tame, wa tô wa hã Léia hã tisẽ.

³² Ti'a, iwa ẽtẽ na ab're siro hã ma tô hitita norĩ wi uipra za'ra.

³³ Tawamhã ãne na Zaco, ti'ra norĩ ma, te te sina tãma rowaihu'u za'ra pari, ma tô apâ waptâ wamhã nomro. Tahawa, ma tô õne haré oto tõmo hato, pẽ'ẽ si'utõrĩ wa.