Zenezi 48 - ꞌRe Ihâimana Uꞌâsi Mono Zadawa Wasuꞌu

Zaco, Zuzéhé 'ra norĩ ma, 'Re ihâimana u'âsi mono, iwẽ te te tãma 're apisutu zahuré mono da, ãma imreme zahuré zé wasu'u

¹ Tawamhã we ronomro pari, te Zuzéhé ma imama hã tãma wasu'u ni, ihâzé pire na. Tahawa, te Zuzé te te sabu da itẽme mo, ti'ra Manasé norĩ ré, Efraĩhĩ me.

² Ãhã wa, Zacoho ma, ma tô tãma 'mairowasu'u ni ãne: — Ai'ra Zuzé te te asabu da te wei mo. Ãne wa, Zaco nimaire nherẽ, sahâ na sãmra da ma tô siptete sina udu.

³ Tawamhã oto itẽme wisi wamhã, ma tô ãne Zuzéhé ma tinha: — 'Re ihâimana u'âsi mono danhipai u iwaihu'u pe, 'ri nho'u Rowa'a na isisi ãma ma tô ĩma sihâi'ré, Cana'ã ti'ai ãma 're ĩhâimana mono ré. Tahawa, ma tô ĩwẽ hã ĩma pisutu.

⁴ Ãhã wa, ma tô ãne ĩma tinha: “Ai'ra ahâ na aima 're hâimana za'ra mono da hã wa za aima pisutu. Duré asihudu norĩ hã te za sipu'u pese na a'uwẽ ahâ uptabi na 're sitébré za'ra. Tawamhã asihudu norĩ ma, wa za ã hã ti'a hã duré tãma sõmri za'ra, isipti'a na õne u'â tãma 're hâimana za'ra mono da oto.”

⁵ Tawamhã Zaco ma duré timreme na Zuzéhé ma, ãma uzusi ãne: — Ai'ra Efraĩ norĩ hã, Manaséhé me we ãwa ĩmorĩ wana ré, Ezitu 're ãme ipoto zahuré hã, te za ĩte na ĩma 're hâimana zahuré. Ĩte uptabi na hã te za ĩma 're hâimana zahuré, Rubẽ norĩ, Simiãhã me, ĩte na ĩma 're ihâimana zahuré mono ne.

⁶ Ta norĩ za'u ai'ra norĩ 'maipoto za'ra wamhã, ta norĩ hã za oto ate si. Tawamhã duré ta norĩ, Efraĩ norĩ no na Manaséhé me hâimana za'ra wa, te za tô i'uirĩ na zahuré hã za isimarĩ zahuré hã dame tãma tihâimana za'ra.

⁷ Asépari'wa Raqueu hâiba u'âbâmhã wa ãne hã 'manha. Mezopotãmia hawi apâ wa te wasina siri za'ra ré, ĩwi irobzei'õ pese da hã, ma tô ti'ai wa'õtõ nho'u Cana'ã ãma ĩwi ai'utõ, Efrata tẽme oto iwasihutuzéb u. Tawamhã tame wa tô bâdâdi zada'ré, ãma ti'a, Efrata, Belẽ na isisi amo tẽme bâdâdi zada'ré ãma.

⁸ Tawamhã Zaco, Zuzéhé 'ra te te 'madâ'â zahuré wamhã, ma tô ãma anharĩ zahuré ãne: — E 'wam norĩ hã ã hã.

⁹ — Ĩ'ra norĩ, ã hã. 'Re ihâimana u'âsi mono, Ezitu ãma 're ĩhâimana mono ré, te te ĩma isõmri zahuré. — Ãne ma te asa Zuzé hã ãma sada'â, timama hã. Tawamhã imama Zaco te tãma tinha, ãne: — Ma'ãpé we 'râwi ĩ'rata simizusi, 'Re ihâimana u'âsi mono ma, ãma ĩmreme zahuré da.

¹⁰ Tawamhã Zaco, isi'ihi pese zarina simirob'madâ'â nhib'uware di oto. Tahawa te te 'madâ'â wẽ zahuré õ di. Tawamhã Zuzé, ti'ra norĩ, ma tô 'râwi oto itẽme saprõni zahuré. Tahawa imama ma tô tinhihudu norĩ hã te te sitẽme ãma roptob zahuré sina tob'rata hârâ na sawi zahuré.

¹¹ Tahawa, Zaco te ãne Zuzéhé ma tinha: — Wa hã wa tô aré te 're rosa'rata, niwa za te i'ai'madâ'â zahu õ na hã. Tane nherẽ, 'Re ihâimana u'âsi mono, ãhã na awa'awi na ma tô ĩma aihâiba nho, te ai'madâ'â zahu da hã. Duré ai'ra norĩ te 'madâ'â zahuré da zama ma tô ĩma hâiba nhomri zahuré.

¹² Tawamhã Zuzé, timama wai'ré hawi ma tô ti'ra sani zahuré. Te te sani zahuré wamhã, ma tô hi'rãtitõ hã nhamra. Duré ti'ubu na ma tô ti'ai u hã ropto.

¹³ Tawamhã Zuzé ma tô Efraĩ tinhimire niwĩmhã pa'â. Duré Manasé ma tô tinhimi'e niwĩmhã pa'â. Tahawa, ma tô duré timama Zacoho 'rata 'râwi oto simizusi. Ãhã wa, Efraĩ ma tô Zacoho nhimi'e niwĩmhã za. Duré Manasé, ma tô isimire niwĩmhã za.

¹⁴ Tawamhã Zaco, tipaihi te te oto sarõtõ wamhã, tinhib'rata na duré siwa'rãmi wamhã, ma tô tinhib'rata nhimire niwĩmhã dano nherẽ, Efraĩhĩ 'rã nhisi wimhã tihi. Ma tô duré idub'rada Manaséhé 'rã nhisi wimhã tinhib'rata nhimi'e niwĩmhã ãma tihi.

¹⁵ Taha pari ma tô ti'ra Zuzéhé ãma, 'Re ihâimana u'âsi mono ma hã mre, ãne: “'Re ihâimana u'âsi mono, ĩmama norĩ Abra'ã, Izaquihi me te te aima 're iromhuri zahuré mono hã ma'ãpé ã hã ipréduptém norĩ ma, iwẽ hã tãma 're apisutu zahuré mono. Duré 'Re ihâimana u'âsi mono, ibâ na 're ĩmorĩ ré ã bâtâ u hã ĩnhimizama 'madâ'â na 're ĩhâimana mono ré, we ĩzaprõni wẽ 'wa, ma'ãpé iwẽ hã tô tãma 're apisutu zahuré mono.

¹⁶ Hâiwa ãma romhuri'wa uburé marĩ iwasété wi te te 're ĩpawapto mono 'wa hã, ã hã 'watébrémi norĩ iwẽ na te te 're ipawapto zahuré mono da si, ĩma iwẽ hã. Ĩnhisi na duré ĩmama norĩ Abra'ãhã nhisi na Izaquihi nhisi me ã norĩ hâiba u'âbâmhã ãma 're idasipo're pu'u u'âsi za'ra mono da si, ĩma iwẽ hã. Duré i'ra norĩ isihudu norĩ zama daro mono bâ isitébré za'ẽtẽ za'ra mono da hã wa aiwi waptẽ.”

¹⁷ Tawamhã Zuzé, timama nhib'rada, Efraĩhĩ 'rã nhisiwi te te ihiri na te te 'madâ'â wamhã, ma tô wẽ'õ. Tahawa Efraĩ 'rãi hawimhã, ma tô sib'rata â, Manaséhé 'rã nhisiwi te te sib'rata hiri da aré.

¹⁸ Taha ré, te ãne ãma tãma tinha, timama ma: — Ĩmama, mare di. Ta hãi õ di. Ãhãta idub'rada. Ma'ãpé asib'rata nhimire niwĩmhã, asib'rada i'rã nhisi wimhã ãma hiri.

¹⁹ Tane nherẽ, Zaco te te sima wẽ'õ di. Tahawa te ãne tãma tinha: — Ĩ'ra, ĩma waihu'u pese di tô. Manaséhé nhihudu norĩ zama te za dama pire na 're hâimana za'ra. Tane nherẽ, ino hã te za pire na isipai u tãma 're hâimana. Duré isihudu norĩ hã te za a'uwẽ mono bâ sipu'u pese na 're sitébré ahâ za'ra.

²⁰ Tawamhã Zaco, tô taha bâtâ na te tinhihudu norĩ ãma mre ãne: — Izaraéu nhihudu norĩ te za asisi wa'aba na tisiré norĩ ma, marĩ iwẽ te te tãma 're pisutu za'ra mono da hã te te 're nharĩ za'ra za ãne: “'Re ihâimana u'âsi mono, Efraĩhĩ norĩ ma, Manaséhé me, iwẽ te te tãma 're i'apisutu zahuré mono ne hã te za aima 'manha.” Tawamhã Zaco, ma tô Efraĩ ino nherẽ, idub'rada Manaséhé ãma saprĩ, imorĩ'rada pire na 're hâimana mono da hã.

²¹ Taha pari te Zuzéhé ma oto tinha ãne: — Wa za oto dârâ. Tane nherẽ, te za 'Re ihâimana u'âsi mono, asiré za'ra wa'aba 're hâimana, apâ aihi'rata za'ra wa'aba nhipti'ai u te te asimroi wa'aba mono da hã.

²² Wa hã, Siquẽ hã wa aima tisõ, mare di asisãnawã norĩ ma hã. Siquẽ hã amoreu norĩ wi te i'âri hã, ĩnhi'wa na, duré ĩnhimnhi'ãsi na te sô i'a'wapé zarina.