Zenezi 47 - ꞌRe Ihâimana Uꞌâsi Mono Zadawa Wasuꞌu

Zaco, Ezitu ãma oto 're ihâimana mono zé wasu'u

¹ Tawamhã Zuzé, apito ma, te te rowasu'u ãwisi da, ma tô itẽme mo. Ãhã wa, te ãne tãma rowasu'u: — Ĩmama, ĩsisãnawã norĩ me Cana'ã ti'ai hawi we izâmorĩ hã, te oto Gosẽ ãma uburé tinhimizama pone'ẽrebâ norĩ ré, powawẽ norĩ ré, duré uburé marĩ tãma 're ihâimana za'ra mono norĩ ré tihâimana za'ra.

² Taha pari te tisisãnawã norĩ 5 na ihâiba za'ra na, apito u te te simro, te te tãma hâiba waihu'u za'ra da.

³ Tawamhã apito te ãne sadanharĩ za'ra: — E marĩ na asimiromhuri za'ra wa'aba zé hã. Tawamhã ma te ãma sada'âbâ za'ra ãne: — Apito, pone'ẽrebâ tébré na si, wa wa norĩ hã wa te 're rob'ma'wamarĩ, wahi'rata norĩ te te sima 're itébré za'ra mono ne.

⁴ Cana'ã ti'ai wa'õtõ nho'õmo 'remhã wanhimizama sazéb da, du hã hâimana õ wa, duré mrab zépada sa'ẽtẽ wa, wa tô we wawairébé ni, ã hã daza'rui 're, 're wahâimana za'ra mono da oto. Tahawa ma'ãpé wazawi za'ra na hã Gosẽ ãma 're wahâimana za'ra mono da wama sa'ré za'ra na.

⁵ Tawamhã apito, te Zuzéhé ma tinha ãne: — Aimama, asisãnawã norĩ me hã asiré 're hâimana za'ra mono da, we atẽme si'aba'réi wa,

⁶ te za tô Ezitu ti'ai wa'õtõ nho'õmo 'remhã niha hã asima irowairébé za'ra wa'wa, asima iwẽ za'ra wa'aba zéb uwaibaba. Gosẽ ãma danhipai u ti'a iwẽ uptabi hã te za tãma isõmri za'ra, iwa 're hâimana za'ra mono da. Te za duré nima norĩ roptébré nhipese 'wa, aima iwaihu'u pese norĩ hã asimirosa'rata na bâ ipisutu za'ra, ĩnhimizama 'madâ'â'wa norĩ da hã.

⁷ Taha parip si te Zuzé, timama Zaco hã saprõ, apito u, te te tãma hâiba waihu'u da. Tahawa, Zaco, apito tãma wazéb sina te te sawi parimhã,

⁸ ma tô ãne sadanha: — E niha ai'ãma iwahu hã.

⁹ Tahawa, Zaco ma tô sada'â ãne: — 130 na ma tô oto ĩ'ãma tiwahu, hâiwi si nimomomhã 're ĩmorĩ ré hã. 'Re ĩhâimana mono zé hã 'ruture di, duré pire di. Tahawa, ĩhi'rata norĩ ãma wahub ahâ na 're iwahub za'ra mono ne, ĩ'ãma iwahub ahâ da hã waihu'u õ di.

¹⁰ Tawamhã Zaco, apito sisa'u iwẽ na te te sawi pari, ma tô oto mo.

¹¹ Tawamhã Zuzé, timama ma, duré tisisãnawã norĩ ma, ma tô Ezitu ãma ti'a iwẽ 're isa'wari mono hã tãma sõmri za'ra, 'ri nho'u Ramesé na isisi 'ratamhã apito te te tãma iwaihu'uzéb zarina. Tahawa ti'a norĩ na ãma site za'ra wa, te oto iwamhã 're hâimana za'ra.

¹² Tawamhã Zuzé, timama, tisisãnawã norĩ hã, duré tisisãnawã siwadi norĩ hã ma tô mram na te te 're upari za'ra, i'ra norĩ hâiba za'ratazéb zarina.

Zuzé, mra da te sépata za'ra ré, dama isi'rãnho'õmozé wasu'u

¹³ Mrab zô hã uburé daza'rui mono bâ tiwi sô irobaba na hã tiwi 'maiba'a õ di. Tahawa ma tô mrab zépada hã te te dawi sina hâimo u'âsi. Mra, da te 're isépata za'ra mono zarina, ma tô Ezitu ãma duré Cana'ã ãma 're danhib'uwa za'ra.

¹⁴ Tawamhã amnho da te 're i'uipra za'ra mono zém na rob'uiprazé, Zuzé te te 're i'a'ubumroi mono hã ma tô apito nhimiromhurizé 'ri 'rãihâ u hã te te 're a'maza.

¹⁵ Tawamhã duré Ezitu ãma duré Cana'ã ãma rob'uiprazé dawi si'utõrĩ mono wamhã, ma tô uburé ezipsiu norĩ, Zuzéhé u hã 're nomro. Ãne te tahawa te te tãma 're nharĩ za'ra: — Ma'ãpé wazawi na hã mra wama a za'ra na. Wasi'utõrĩ da hã taré wa'madâ'â za'ra tõ, wate rob'uiprazé hã wawi si'utõrĩ za'ra wa.

¹⁶ Tawamhã Zuzé, ma te ãma sada'âbâ za'ra: — Rob'uiprazé baba wamhã, ma'ãpé ate za'ra wa'wa powawẽ norĩ hã we simroi wa'aba mono, mram na te ãma aiwi saprĩ za'ra wa'aba da taré.

¹⁷ Tahawa ezipsiu norĩ, Zuzéhé ma, ma tô awaru hã, pone'ẽrebâ zéré mapure hã, pone'ẽrebâ zéré uzé hã, powawẽ hã, duré awaru po're pore hã te te tãma simro, tô taha wahum na ãma ihâimana za'ra zéb da, mram na hã te te ãma tiwi saprĩ za'ra da.

¹⁸ Tawamhã wahu oto si'utõrĩ wamhã, ma tô wahub amo na apâ Zuzéhé u si'aba'réi wamhã, ãne tãma nharĩ za'ra: — Wanhib'apito, niha na romhâimanazé wa te aiwi udâ waihu'u za'ra õ di, ãne na hã. Wate rob'uiprazé hã ma tô wawi ai'utõrĩ za'ra. Duré tahawa uburé wanhimizama hã oto ate na te 're simasa. Taha zarina marĩ hã wa te aima isõmri za'ra da hã waihu'u õ di. Wahâiba za'ra si te wanhipti'ai me hã oto wama tihâimana za'ra, wa te aima isõmri za'ra da hã.

¹⁹ Mrap te, wasi'utõrĩ da hã taré wa'madâ'â za'ra tõ. Duré atõmobre, wanhipti'a za'ra baba na 're sa'wari mono da hã, taré 'madâ'â tõ. Ma'ãpé wa'uipra za'ra na. Duré wanhipti'a za'ra hã uipra na, trigu wa'rãmi. Tawamhã wa za wa norĩ hã apito Fara'oho ma, wapawa'âbâ ãna wa te tãma 're romhuri za'ra. Duré romnhamare zama wama 'manhomri za'ra na, wa te zuri mono wa, wahâimanazém na wa te tô ãma uzusi za'ra da, mrap te, wasi'utõrĩ tõ da, wanhipti'a za'ra iwa rob're õ pese na 're sa'wari tõ mono da taré.

²⁰ Tawamhã Zuzé, uburé Ezitu ãma danhipti'a ma tô apito ma hã uipra, uburé ezipsiu norĩ ma, ti'ai upana marĩ hã hâimana õ wa, te te iwede za'ra da hã, tô mrab zô hã robaba za'ẽtẽ wa. Tahawa ma tô oto apito ma, uburé danhipti'a hã tãma tihâimana za'ra.

²¹ Tawamhã ti'ai wa'õtõ nho'u Ezitu 're daza'rui mono bâ ma tô Zuzé, ezipsiu norĩ pawa'âbâ ãna romhuri'wa da hã tãma pisutu za'ra.

²² Tane nherẽ, sasedoti norĩ nhipti'a si te te tiwi uipra za'ra õ di, apito nhimi'uparizé mra hã te te nasi sima waibui wa, ihâimana za'ra zéb da hã. Taha zarina ta norĩ hã tinhipti'a te te dame iwede za'ra da hã mare di.

²³ Tawamhã Zuzé, te ãne dama tinha: — Ma'ãpé asiwi ĩwapari aba! Ãhã na wa tô ti'a aiwi uipra za'ra wa'wa apito Fara'oho ma. Ãhãta te ãme romnhamare hã tihâimana za'ra, rom na ate buru aba mono na asiwi izuri aba mono da hã.

²⁴ Tawamhã duré 're itehâri za'ra wa'aba mono, misi sa'u na imrotõ hawip sidâpâsi te za apito Fara'oho ma 're isani za'ra wa'aba mo. Duré ihâiba amo maparane si'uiwa na ãma sidâpâsi te za 're izuri aba mono da hã duré ãma 're asaihuri aba mono da hã 're isani za'ra wa'aba mo, ai'ra norĩ sazéb da, duré 'ri 're, asiré 're ihâimana za'ra wa'aba mono norĩ sazéb da zama.

²⁵ Tawamhã ma te ãma sada'âbâ za'ra ãne asa: — Apito, ma iwanho'reptu za'ra. Ma tô duré iwẽ na hã wama i'manharĩ za'ra. Tahawa wa za tô wapawa'âbâ ãna apito ma romhuri'wa na hã 're wahâimana za'ra.

²⁶ Ãne ma tô Zuzé, tinhimiroti ta hawim haré 're ihâimana mono da hã 'manha. Ãne na isimiroti hã: Ezitu ãma amnho, da te 're itehâri za'ra mono zép sidâpâsi te za misi sa'u na imrotõ hawip sidâpâsi apito ma, 're hâimana za'ra. Sasedoti norĩ nhipti'a si apito ma, 're hâimana za'ra mono õ di za.

Zaco, ti'ra Zuzéhé wi si'uirĩ na da, te te irowaptẽrẽzé wasu'u

²⁷ Tawamhã Izaraéu nhihudu norĩ hã te Ezitu, Gosẽ na romnhisi ãma 're hâimana za'ra, ti'a te te siwi i'uipra 're. Tawamhã tame ãma isite za'ra 're, ma tô tisitébré ahâ za'ra.

²⁸ Tawamhã duré Ezitu ãma 're isãmra mono zém na hã ma tô ãma tiwahu 17 na. Ãhã wa, ãma isitom na ma tô ãma tiwahu, 147 na.

²⁹ Oto niha na tidâ'âzéb da na siwaihu'u wamhã, ma tô Zaco, ti'ra Zuzéhé zô hã hâ. Ãhã wa, te ãne tãma tinha: — Ĩzawi wamhã, ma'ãpé ĩzadazute 'rowi asib'rada hã sẽrẽ sina, sena na ĩma ropisutu, asimizawizé ĩ'ãma ihâimana zarina duré ĩma i'ai'umnhasizéb zarina. Ezitu 'remhã ĩ'ãma ti'ai õ di za.

³⁰ Niwa ĩdâ'â wamhã, Ezitu hawimhã te za ĩhâiba hâ hã iwaze, ĩhi'rata norĩ da te 're iséme mono zéb 'ru zababa, sẽrẽ da, ihâiba hâ za'ra zu, tame 're sa'wari mono da. Tawamhã Zuzé, ma te ãma sada'â ãne: — Tane hã wa za 'manha tô, ĩwi iwaptẽrẽzé hã.

³¹ Te duré Zaco tãma tinha ãne: — Ma'ãpé ĩma ropisutu, tane na hã. Tawamhã Zuzé, ma tô ropisudu hã tãma 'manha. Tahawa Zaco, tiza'warizé 'rãihâ ãma siwẽ'ẽ sina, ma tô 'Re ihâimana u'âsi mono ãma wata sina hã mre.