Zenezi 43 - ꞌRe Ihâimana Uꞌâsi Mono Zadawa Wasuꞌu

Zuzéhé dub'rata norĩ, apâ Ezitu u isi'aba'rézé wasu'u

¹ Tawamhã Cana'ã ãma, te mra hã zahadu da te 're sépata za'ẽtẽ za'ra.

² Tawamhã Zacoho 'ra norĩ, amnho Ezitu hawi te te i'ãwisi mono oto uburé te te siwi uprosi wamhã, ma tô imama duré tãma nharĩ za'ra ãne: — Ai'aba'réi wa'aba apâ, mra suru na wazada 'mai'uipra za'ra wa'aba da duré.

³ Tawamhã Zuda po're pu'u wa, te timama ma tinha ãne: — Aibâ hã ma tô wama nharĩ siromo za'ra, wano wame morĩ za'ra õ wamhã, za te te iwawaibui wẽ za'ra õ na hã.

⁴ Tahawa a hã wame satõrĩ za'ra wamhã, wa za tô ai'aba'ré ni, mra wa te asada 'mai'uipra za'ra da hã.

⁵ Wame za'ra morĩ da, satõrĩ õ wamhã, iwasi'aba'ré da hã mare di za. Ãne te duré wama nharĩ za'ra, aibâ hã: “Anoi wa'wa we asiwi saprõni aba wapsi wa za aiwaibui wẽ wa'wa za.”

⁶ Tawamhã Zaco te duré tãma tinha ãne: — E marĩ da, ma tô ropire sa'ẽtẽ na ĩma hâimana da hã asiwi iwazere 'wa. Duré e marĩ da, ma tô aibâ ma, ano ihâiba amo aima ihâimana za'ra wa'aba na tãma iwasu'u za'ra wa'wa bété.

⁷ Tawamhã asa ma te ãne duré ãma sada'âbâ za'ra: — Õ hã aibâ hã ma tô nasi wazadanharĩ na sahu za'ra, wahâiba na za'ra hã duré wa'ra norĩ na. Ãne ma tô duré wazadanharĩ za'ra: “E aimama 'wa te zahadu hâiba ré 're hâimana. E te duré asisãnawãi wa'wa aimawi hã 're 'maihâimana.” Tahawa, tô te te nasi wazadanharĩ za'ra wamhã, wa tô nasi tô õhõ wamreme na si ãma sada'âbâ za'ra ni. E niha wa aré bété waihu'u za'ra ni, wano wa te itẽme wasiwi saprõni da, te te wawi ihâiba waptẽrẽ za'ra zém na hã.

⁸ Tawamhã Zuda te duré timama ma tinha ãne: — Ma'ãpé ai'ra si'ritéi'wa satõrĩ, ãma ĩsiré morĩ da. Ãhã wamhã, awa'awi wa za oto ai'aba'ré ni. Ãne wamhã, ni'wa idâ'â da hã mare di za, niha hã wamhã wa norĩ hã, duré a hã, duré wa'ra norĩ hã.

⁹ Wa hã Bẽzamihĩ na wa za ãma ĩsi'madâ. Duré rowẽ na we apâ te ãma siri õ wamhã, wa hã wa za tô i'upai'wa na hã ĩhâiba. Ãhã wamhã, wa za duré te aima ãma i'upazém na õne u'âsi 're ĩhâimana.

¹⁰ Wazô rowaptâ'â za'ra ãna wahâimana za'ra õ 'wa'âhã, wa aré maparane wasi'aba'rézém na nasi wasina siri za'ra ni, õwamhã duré we apâ hã.

¹¹ Tawamhã te imama ãne tãma tinha: — Niha hã aimawi hã te oto aima waihu'u õ di. Tahawa ãne te za pé asiwi i'manharĩ 'wa za: Õ hã aibâ ma, taré tãma asõprub za'ra wa'aba zéb da hã te za ate wa'aba mono bâ sa'ui 're asiwi iséme aba mo. Wanhipti'ai 're, marĩ iwẽ 're ihâimana za'ra mono hã te za tãma i'wasari 'wa, taré tãma sõmri za'ra wa'aba da, suru na ba'usamo na wedewa'u tom nhisi hã, suru na ropĩ hã, suru na dasaiwarĩrĩzé hã, duré suru na amiduwi sine hã.

¹² Rob'uiprazéb zama te za duré ãma isisiwi na tãma i'wasari 'wa za isiré. E marĩ wa. A norĩ wa'wa sa'ui 're amnho we i'wasari aba zu, isõpẽtẽ za'ra wa'aba wa'rãmimhã, apâ tãma isõmri za'ra wa'aba da si, ta hã te te ai'uptob za'ra wa'aba dâ'âsina. Ãté ta hã ma te sa'rese ãna aima séme za'ra wa'aba ni.

¹³ Te za duré ano asiwi isaprõni 'wa pé. Sa'ẽtẽ te za ai'aba'réi wa'wa, õ hã aibâ hã duré asiwi sõpẽtẽ aba hâ.

¹⁴ 'Re ihâimana u'âsi mono iwaihu'u pese si niha hã aibâ ma, te te i'manharĩ da hã wa ĩsima wẽ, taha zarina ai'ãma siwamri za'ra wa'aba wa, te te aima waprosi za'ra wa'aba da, asisãnawã norĩ na Bẽzamihĩ me we asiwi siri aba da ãwa. Bété duré ĩ'ra norĩ te simini za'ra wamhã, marĩ hã te 'manharĩ dai õ di wa hã. Ĩ'ra ãna wa za tô oto 're ĩhâimana.

¹⁵ Tawamhã Zacoho 'ra norĩ ma tô tinhoprubzé hã duré rob'uiprazé isisiwi na hã te te sima sé. Taha pari te oto tawamhã Ezitu u ai'aba'ré, tino za'ra Bẽzamihĩ ré. Tawamhã sihutu wi, ma tô Zuzéhé ma te te tãma nharĩ za'ra da hã itẽme ai'aba'ré.

¹⁶ Tawamhã Zuzé, Bẽzami isiré we imorĩ za'ra na te te 'madâ'â wamhã, ma tô tinhorõwa 'madâ'â'wai ma tinha ãne: — Ĩnhorõwa u, ma'ãpé ãhã aibâ norĩ hã simroi mono. Duré ĩnhimizama hã 'maiwĩrĩ, dasa hã ãma 'manharĩ da, abzuma za ĩsiré saihuri dâ'âsina.

¹⁷ Tawamhã te te tãma iwaihu'uzé hã ma tô 'manha. Tahawa isadawa zarina ma tô isisãnawã norĩ, Zuzéhé nhorõwa u te te simro.

¹⁸ Tawamhã isõrõwa u oto sihutu wamhã, ma tô tipahi pese za'ra. Tahawa te ãne sima nharĩ za'ra: — Ãwamhã ma tô we te te wanhimro, iwana wamhã, rob'uiprazé wate za'ra sa'ui 're apâ te te wama iséme mono u'âbâmhã, amnho zu. Sena na te za tô oto dasiwi wasusi za'ra ni. Te za duré wate awaru po're pore norĩ hã wawi waibu za'ra ni. Te za duré dasiwi wawaibu ni, wapawa'âbâ ãna wa te dama 're romhuri za'ra mono da hã.

¹⁹ Tawamhã isõrõwa 'ridawa u oto sihutu wamhã, 'ri 'madâ'â'wai ma, te tãma nharĩ za'ra ãne:

²⁰ — Ma'ãpé wazawi na hã wawapari za'ra na. Imorĩ'rata na mra, wa te 'mai'uipra za'ra da hã, wa tô we ãwamhã ai'aba'ré ni.

²¹ Tane nherẽ, wawi hâiwahâ za'ra wa, iwanhimi'warazéb u oto wasihutu wamhã, wa tô sa'u amnho ré wa te i'wasari, wa te wata wasihu za'ra wamhã, wate za'ra rob'uiprazé wahâiba mono bâ sãmri za'ra ni, wawi sô ro'wanhi'riti za'ra ãna. Ta hã wa tô duré apâ we 'wasari ni.

²² Taha nhipai u hã wa tô duré we ãma wasihâiba waptob za'ra ni, rob'uiprazém na, mra wa te duré ãma i'uipra za'ra da hã. Wa norĩ hã wa te waihu'u za'ra õ di, ni'wa rob'uiprazé apâ te te duré wama iséme za'ra na hã.

²³ Tawamhã 'ri 'madâ'â'wa asa ma te ãne ãma sada'âbâ za'ra: — Asima iwẽ na aihâimana za'ra wa'aba, aipahi za'ra wa'aba ãna. Ãté 'Re ihâimana u'âsi mono, ate za'ra wa'wa hã, duré aimama te wa'wa hã ma tô rob'uiprazé apâ hã aima séme za'ra wa'wa. E marĩ wa. Wa hã wa tô irowa'âbâ za'ra wa'aba zé rob'uiprazé hã ti'â tô. Tawamhã 'ri 'madâ'â'wa ma tô Simiã itẽmeb za'ra hã oto saprõ.

²⁴ Taha pari 'ri para u ma tô te te simro. Tawamhã ma tô duré â hã tãma sõmri za'ra, ãma sipara upsõ za'ra da. Awaru po're pore sazéb zama ma tô duré tãma sõmri za'ra, tisa te te ãma ihuri da hã isabâdâb za'ra.

²⁵ Tawamhã isisãnawã norĩ, Zuzé abzuma za itẽme wisi za'ra wa, te te tãma sõmri za'ra da, te te i'wasari hã ma tô oto sima sani siromo za'ra, te te waihu'u za'ra wa, za õme ime isa za'ra na hã.

²⁶ Tawamhã Zuzé ma tô wi, tinhorõwa u. Wisi wi, ma tô tinhibzari hã tãma sõmri za'ra, tiza'rui hawi te te siré tãma i'wasari hã. Te te tãma sõmri za'ra wamhã, ma tô hi'rãtitõ isõ'remhã tãma asimro, ti'ubu na te te tãma roptob za'ra sina, ti'ai u.

²⁷ Tawamhã tisisãnawã norĩ rowẽ zô te te sadanharĩ za'ra pari, te ãne duré sadanharĩ za'ra: — E aimama 'wa hã rowẽ na te 're sãmra, ã ĩma iwasu'u za'ra wa'wa ihi hã. E zahadu te hâiba ré 're hâimana.

²⁸ — Ĩhe, aima romhuri'wa wamama za'ra hã te zahadu rowẽ na 're hâimana.

²⁹ Tawamhã Zuzé sibabarãi u te te rob'madâ'â mono wamhã, ma tô tino Bẽzami hã 'madâ, tina 'ra hã. Tahawa, te ãne tidub'rata norĩ hã ãma sadanharĩ za'ra: — E õhõta asõbabati wa'wa, ĩma iwasu'u za'ra wa'wa hã. 'Ritéi'waire, 'Re ihâimana u'âsi mono si iwẽ hã te te aima 're i'apisutu mono da si, wa tô ĩsima aiwẽ.

³⁰ Tawamhã tino te te 'madâ'â wa, pẽ'ẽ toi uptabi di, Zuzé hã. Tahawa wara sina ma tô watobro, tiza'warizéb u sébré da, tamep si a'â siwa'õ da. Tame te oto tô tawamhã aiwa'õ.

³¹ Tawamhã siwa'õi ãna oto hâimana da, sitété wamhã, ma tô oto si'ubu upsõ. Taha pari ma tô duré oto watobro, tisisãnawã norĩ u. Tawamhã te oto dama tinha ãne: — Ma'ãpé, ĩsa hã tãma sa'ã za'ra wa'aba mono.

³² Tawamhã Zuzéhé ma, ma tô abzuma ĩsa hã tãma sãrĩ ni, danhiti wedeza tãma isabzéb ãma. Ma tô duré isisãnawã norĩ ma, ĩsa hã tãma sõré ni, wedeza aimawi tãma isab za'ra zéb ãma. Te duré wedeza aimawi hã za, ezipsiu norĩ tame dasiré isi'ubumro norĩ, ãma isaihurizéb da hã, ta norĩ hã Izaraéu nhihudu norĩ siré 're saihuri waihu'u mono õ wa, tãma za'ra hã iwẽ na 're hâimana mono õ wa.

³³ Tawamhã isisãnawã norĩ hã te Zuzéhé nho'remhã asimro. Ãhã wa, Zuzé ma tô dadub'rata uimrehẽne tisã. Isãna'remhã ma tô duré isõsi hã tisã. Ta hawimhã 're irere'e mono sidâpâsi ma tô te te anhoré, tidub'rata norĩ hã õ tinoi u. Ãne na õ norĩ si'madâ'â za'ra wamhã, ma tô si'madâ'â pese za'ra, si'ãma tob'uzu za'ra sina.

³⁴ Tawamhã Zuzéhé ma, ĩsa da te ĩsãrĩ hawi ma tô duré idub'rata norĩ ma, da te tãma sõré. Tawamhã Bẽzamihĩ ma si ma tô i'amrami na hã 5 na tãma ãma sahu ni, sa'ẽtẽ na. Tawamhã sima iwẽ na ma tô to sina simihâri za'ra, Zuzéhé siré.