Zenezi 42 - ꞌRe Ihâimana Uꞌâsi Mono Zadawa Wasuꞌu

Zuzéhé dub'rata norĩ, Ezitu u isi'aba'rézé wasu'u

¹ Tawamhã Zaco, Ezitu ãma amnho ahâ wasu'u te te wapari wamhã, ma tô ãne ti'ra norĩ ma nharĩ za'ra: — E marĩ da, te taré nasi asi'madâ'â za'ra wa'wa.

² Ezitu ãma amnho ahâ wasu'u hã wa tô wapa. Tahawa te za tamomo ai'aba'réi wa'wa, dawi 'mai'uipra za'ra wa'aba da, mrap te, wasi'utõrĩ tõ da ãmemhã.

³ Tawamhã Zuzéhé dub'rata norĩ 10 na ihâiba za'ra hã te oto Ezitu u ai'aba'ré, amnho te te dawi 'mai'uipra za'ra da hã.

⁴ Tane nherẽ, Zaco Zuzéhé noi uptabi Bẽzamihĩ ma hã te te waprosi õ di, isiré za'ra morĩ da hã, marĩ sô watobro õ'umnhasite, ãne na ãma hâtâ'â siromo wa.

⁵ Tawamhã Zacoho 'ra norĩ ma tô ni'wam norĩ aimawi siré amnho te te 'mai'uipra za'ra da hã ai'aba'ré, tô uburé ti'ai wa'õtõ nho'u Cana'ã na romnhisi ãma mra da te sépata za'ra wa, idasi'aba'ré norĩ siré.

⁶ Tahawa, Zuzé dama i'rãnho'õmo dâ'âsina daza'rui amoi hawi 're idasihutu mono ma hã ma tô amnho te te dama 're awede. Tawamhã idub'rata norĩ itẽme sihutu wamhã, ma tô isõ'remhã hi'rãtitõ tãma asimro. Ma tô duré ti'ubu na ti'ai u hã tãma roptob za'ra.

⁷ Tawamhã Zuzé tisisãnawã norĩ te te 'madâ'â za'ra wi, ma tô waihu'u za'ra. Tane nherẽ, te te iwaihu'u za'ra õ ne, te mreme tete na hã sadanharĩ za'ra ãne: — E ma hawimhã bété, a norĩ wa'wa hã. — Cana'ã hawimhã wa norĩ wa we ai'aba'ré ni. Wa tô wasima wẽ za'ra ni, mra wa te 'mai'uipra za'ra da. — Ãne ma tô asa ãma tãma wa'rãmi za'ra, timreme na hã.

⁸ Zuzé hã ma tô tisisãnawã norĩ waihu'u za'ra. Tane nherẽ, tino hã asa te te siwi waihu'u õ di.

⁹ Tawamhã Zuzé te te ãma isaho za'ra mono na hã ma tô oto po're puru. Tahawa, te ãne tãma nharĩ za'ra: — Ĩma hã a norĩ wa'wa, dama wapsãi'a'wa norĩ te we ai'aba'réi wa'wa, ti'ai wa'õtõ nho'õmo 'remhã nima niwĩ wanhitob'ru norĩ ma, ro sib'uwa na 're isa'wari mono zô asiwi sabui wa'aba da hã.

¹⁰ Tawamhã asa ma te ãne ãma tãma wa'rãmi za'ra: — Mare di, wanhib'apito. Taha dai õ di. Wa norĩ hã aima romhuri'wa norĩ, mra wa te 'mai'uipra za'ra da si wa tô we ai'aba'ré ni.

¹¹ Wa norĩ hã simisutu na wamama wama 're ihâimana za'ra mono 'ra. Duré apito, wa norĩ hã dama wapsãi'a'wa norĩ õ di. Sena na i'uwaibaba na si 're iwahâimana za'ra mono.

¹² — Te ãma asaze za'ra wa'aba õ di. Tô ti'ai wa'õtõ nho'õmo 'remhã nima niwĩ ro sib'uware na 're isa'wari mono zô asiwi waihu'u aba da, te we ai'aba'réi wa'wa. — Ãne ma te asa tãma ãma wa'rãmi na sahu za'ra.

¹³ Tawamhã asa te duré ãne tãma siwasu'u za'ra: — Wa norĩ hã Cana'ã ãma wa 're wahâimana za'ra. Duré wa norĩ hã aré wamama 'ra 12 na wahâiba za'ra hã. Tane nherẽ, wano misi ma tô wawi aimani za'ra. Wa'rãsutu si te wamama 'ratamhã nhamra, ãhã na hã.

¹⁴ Tawamhã Zuzé ma te duré asa ãma tãma wa'rãmi za'ra ãne: — Mare di. Te tô we dama iwapsãi'a za'ra wa'aba mo.

¹⁵ Aimreme za'ra wa'wa sena zô, wa za pé ãne na hã aima 'manharĩ za'ra wa'wa. Anoi wa'wa we ãwamhã wisi õ nherẽ, ã hawimhã niwamhã aiwairébé aba da hã mare di za. Ã hã apito zadawa para, wa sena na aima ropisutu za'ra wa'wa.

¹⁶ Misi te za sô ai'maimorĩ 'wa, anoi wa'aba zô hã. Tawamhã a norĩ wa'wa hã te za asisa'u hã dazazéb 'remhã aimasa wa'wa, sena na duré niha wamhã, senai õ na i'asiwasu'u za'ra wa'aba zém na te i'aiwaihu'u za'ra wa'aba zéb u. Sena hãi õ wamhã, dama wapsãi'a'wa na wa za tô aiwaihu'u za'ra wa'wa. Ã hã apito zadawa para, wa sena na aima ropisutu za'ra wa'wa, ãne na.

¹⁷ Tawamhã si'ubdatõ bâtâ na dazazéb 're simasab da, ma tô dama 'ru za'ra.

¹⁸ Ãhã wa, si'ubdatõ bâtâ ãma te Zuzé tãma siwasu'u za'ra ãne: — Wa hã 'Re ihâimana u'âsi mono hã wa tô te 're wazé pese. Tahawa, te aima iwaihu'u za'ra wa'aba zéb zarina, ĩma 'manharĩ za'ra wa'aba wapsi, da te ai'uprosi aba da hã te dama asa'ré za'ra wa'aba õ di za.

¹⁹ Sena na i'uwaibaba na si 're aihâimana za'ra wa'aba mono wamhã, te za misi asisa'u dazazéb 're ai'manhamra 'wa, nima norĩ apâ ai'aba'réi wa'aba nherẽ, 'wasari aba da amnho hã, ai'ra norĩ ma mra hã ãma tãma simroi wa'aba da.

²⁰ Taha parimhã te za ai'rãsutu'wa we ĩma asiwi isaprõni 'wa. Tawapsi sena na aimreme na te aiwaihu'u za'ra wa'aba wamhã, i'ai'utõrĩ aba da hã mare di za. Tawamhã te te tãma iwaihu'u za'ra zém na hã ma tô ãma saze za'ra.

²¹ Tahawa te ãne sima nharĩ za'ra: — Sena na wa oto robzépata za'ra ni, wanoi ma, wa te tãma irob'manharĩ za'ra zarina. Ta hã te te robzépata wa, wapo're na'rata te te sina wawi rowaptẽrẽ za'ra nherẽ, wa te wasiwi wapari õ di. Tahawa awa'awi na wa oto robzépata za'ra ni.

²² Tawamhã Rubẽ ma te tino norĩ hã ãma sada'âbâ za'ra ãne: — Wa tô aré aima nharĩ za'ra wa'wa, wanoi ma, marĩ iwasédé tãma 'manharĩ za'ra wa'aba tõ da hã. Tane nherẽ, asiwi ĩwapari aba õ di. Tahawa iwapru sisa'warizé wa'rãmimhã, wa oto ãhã na hã wasiwi wa'âbâ ni.

²³ Tawamhã Zuzé te te sina isadaihu'u za'ra zém na, õ norĩ hã te te siwi waihu'u õ di, õ norĩ mreme hã nasi da te ãma tãma saprĩ wa, te te sadaihu'u za'ra õ newa.

²⁴ Tawamhã Zuzé ãne na imreme te te wapari za'ra wa, ma tô oto ihawib za'ra hã watobro. Tahawa, ma tô aiwa'õ. Siwa'õi pari, duré apâ itẽme wisi za'ra wamhã, ma tô tidub'rata norĩ nho'a Simiã, da te dasiwi pawasisi da hã dama ti'ru.

Zuzéhé dub'rata norĩ, Cana'ã u apâ isi'aba'rézé wasu'u

²⁵ Tawamhã idub'rata norĩ sa'u we te te i'wasari 're, amnho da te tãma 'masisi za'ra mono da hã ma tô romhuri'wa norĩ ma hã tãma 'ru za'ra. Duré apâ rob'uiprazé ite za'ra sa'ui mono bâ, amnho zu da te tãma séme mono da hã ma tô dama 'ru za'ra. Duré bâdâdi na ĩsazé, da te tãma sõmri za'ra da zama ma tô duré dama ti'ru. Ãne ma tô tãma 'manharĩ wẽ za'ra.

²⁶ Tawamhã awaru po're pore ba nhisiwi ma tô amnho te te i'wasari da hã oto sa'ra za'ra. Taha pari, te oto tawamhã ai'aba'ré.

²⁷ Tawamhã isimi'warazéb da, isimizahâri za'ra zéb u oto sihutu wamhã, ma tô nima hã tite sa'u hã wata wasihu, tinhimizama ma, te te tãma a da, ĩsa hã. Tahawa, sa'ui wata ãma rob'uiprazé amnho zu inomro hã ma tô tisã.

²⁸ Tawamhã tisisãnawã norĩ ma, ma tô tãma 'mahârâ za'ra ãne: — Ĩte rob'uiprazé apâ ma tô ĩma sẽrẽ ni. Ãhãta te nomro, ĩte sa'ui 'remhã. Tawamhã uburé si'rãmi za'ra wa, ma tô duré tirẽrẽ'ẽ za'ra, pahi te. Tahawa te ãne sima nharĩ za'ra: — E niha ma tô 'Re ihâimana u'âsi mono hã ãne na wama rob'manharĩ za'ra.

²⁹ Tawamhã oto Cana'ã u sihutu wamhã, ma tô timama ma, uburé tãma iromhâimana za'ra zé hã tãma wasu'u za'ra, ãne:

³⁰ — Aibâ Ezituhu nhib'apito zapari dama i'rãnho'u, mreme tete na ma tô wama nharĩ za'ra. Taré ti'ai wa'õtõ nho'u wa te wasiwi sabu da, wa te dama irobzabu za'ra mono na hã.

³¹ Tahawa, wa ãne ãma tãma wa'rãmi za'ra ni asa hã: “Wa norĩ hã wa aibâ sena na hã 're wahâimana za'ra. Tahawa wa te dama iwapsãi'a za'ra mono da hã we wasi'aba'réi õ di ãwamhã.

³² Wa norĩ hã aré 12 na wahâiba za'ra, wasisãnawã si wamama 'ra hã. Tane nherẽ, wano misi ma tô aimani. Isõsibi si te Cana'ã ãma wamama 'ratamhã 're hâimana.”

³³ Tawamhã dama i'rãnho'u hã te ãne wama nharĩ za'ra: “Sena na i'uwaibaba na si 're i'aihâimana za'ra wa'aba mono na te aiwaihu'u za'ra wa'aba da, te za misi asisa'u ai'manhamra 'wa, ãme i'rata. Ãhã ré, te za ni'wam norĩ hã dasa i'wasari 'wa, ai'ra norĩ ma, mra hã ãma tãma simroi wa'aba da.

³⁴ Anoi wa'wa te za duré we ĩma asiwi isaprõni 'wa ãwa. Ãne wamhã, sena na wa za aiwaihu'u za'ra wa'wa, we dama iwapsãi'a za'ra wa'aba mono õ na hã, duré sena na i'uwaibaba na si 're i'aihâimana za'ra wa'aba mono na hã. Tawapsi duré apâ asisãnawãi wa'wa te aima hâiba nhomri za'ra wa'aba wamhã, te za ãme ti'ai 're rowede na duré marĩ uipra na asima 're iromhuri za'ra wa'aba mo.”

³⁵ Tawamhã tite mono bâ sa'u amnho ré te te oto baba za'ra wamhã, ma tô rob'uiprazéb ré sa'u dub 'rare hã iwa isimi'wara mono hã sãmri za'ra. Ãhã wa, timama norĩ me rob'uiprazé te te 'madâ'â za'ra wamhã, ma tô tãma tipẽ'ẽwara pese za'ra.

³⁶ Tahawa te imama Zaco hã ãne tãma nharĩ za'ra: — Ĩ'ra na te za asiwi ĩ'uba wa'wa. Zuzéhé ãna hã wa tô 're ĩhâimana. Ãhã na zama duré Simiã hã hâimana õ di. E niha te za duré ãne nherẽ, Bẽzami hã asiwi saprõni aba da, asima iwẽ za'ra wa'wa. E 'wa te za ãne wamhã robzépata. Wa hã, wa za tô duré robzépata.

³⁷ Tawamhã Rubẽ te timama ma tinha ãne: — Ĩmama, we apâ Bẽzamihĩ na te siri õ wamhã, ĩ'ra te za ĩwi ipã. Za té wa hã ãma ĩsi'madâ, te i'madâ'â mono zém na hã.

³⁸ Tawamhã imama Zaco ma te asa ãma sada'â ãne: — Ĩ'ra, ãma aime za'ra wa'aba hã morĩ õ di za. Zuzé idub'rada hã ma tô dârâ. Tahawa Bẽzamihĩ si te oto ĩ'ratamhã 're sãmra. Duré ai'aba'réi aba ré, marĩ sô watobro wamhã, te za ĩsi'ihi wa, ĩpẽ'ẽzé zarina tô oto ĩdâ'âzé hã ĩzô iwazere za'ra wa'wa.