Zenezi 41 - ꞌRe Ihâimana Uꞌâsi Mono Zadawa Wasuꞌu

Zuzé, apito nhimirosawẽrẽ na te te ãma tãma isaprĩzé wasu'u

¹ Tawamhã ma tô oto maparane tiwahu. Nimahã bâtâ na Ezitu te, apito hã ma tô rosawẽ, Nilu na panho'õmo nhisi zaihâ na isam na.

² Taha ré powawẽ ihâipe iwẽ ihâsu 7 na â hawimhã ma tô wairé. Wairébé wi, te duré pazaihâ na du hã te te 're huri.

³ Taha wi, ma tô duré isarina â hawimhã powawẽ 7 na ihâiba amo norĩ hã wairé, i'wahi pesere iwasété uptabire hã. Ta norĩ hã te imorĩ'rata na pazaihâ na isimasab siré aimasa.

⁴ Tawamhã powawẽ i'wahire iwasétére hã ma tô ihâipe iwẽ ihâsu hã siwi uprosi. Tawamhã apito ma te oto toporo.

⁵ Taha pari ma tô duré apâ hã tõmo hato. Tõmo sito wamhã, ma tô duré rosawẽ. Sõtõ 'rowimhã, ma tô 'madâ, amnho trigu te, misi nherẽ, 7 na ihawi iteihi mono bâ i'rã iwairébé mono hã. Ta norĩ hã iwẽ uptabi i'rã zurutu na hã.

⁶ Taha wi, ma tô duré 7 na i'rãi 'ré hã wairé, ropsi 're iropsa'wari mono hawi rowa'u'u wa'ro te te iteihi 'ré mono 'rã hã.

⁷ Tawamhã ta norĩ hã ma tô 7 na i'rãi wẽ norĩ ré hã siwi sõmri za'ra. Tawamhã apito, oto apâ topo'o wamhã, ma tô waihu'u, sõtõ 'rowi te te irosawẽrẽzém na si.

⁸ Tawamhã awẽm na mararé te te isahoi mono zém na hã hâtâ'â di, duré tãma robzei õ di. Tahawa Ezitu ãma romhõsi'wa norĩ zô, duré rowaihu'u pese norĩ zô te uburé sô tihârâ za'ra. Tawamhã apito te tinhimirosawẽrẽ hã tãma wasu'u za'ra. Tane nherẽ, ni'wa te te ãma tãma saprĩ waihu'u õ di.

⁹ Tahawa uwa 'rãi wa'u isé za'wari'wa norĩ nhib'ihâ'a hã ma tô apito ma tinha ãne: — Ãhã na ĩwasété na te ãma i'upazém na hã wa oto ĩsina po're puru.

¹⁰ Nimahã bâtâ na ĩzada asiti'rui wamhã, duré i'u'ẽtẽ 'manharĩ'wa zada asiti'rui wamhã, ma tô dama iwahâiba 'ru, dazazéb 're, da te waza da, apito 'madâ'â'wa norĩ nhib'ihâ'a nhorõwa ãma.

¹¹ Tawamhã nimahã mara na hã wa tô wahâiba si'uiwa na rosawẽrẽ ni. Wanhimirosawẽrẽ, aiwab'õ na marĩ te te wama iwasu'uzém na.

¹² Tamemhã te hebreu wasiré hã 're hâimana, apito 'madâ'â'wa norĩ nhib'ihâ'a ma, romhuri'wa hã. Tawamhã taha ma, wa tô wanhimirosawẽrẽ hã tãma wasu'u ni. Tahawa ma tô ãma wama saprĩ, wa te irosawẽrẽzé, marĩ te te iwasu'uzém na hã.

¹³ Tawamhã te te ãma wama isaprĩzéb zarina ma tô watobro. Wa hã wa tô te 're iromhuri 'rata mono zéb u hã apâ ãzé. Duré i'u'ẽtẽ 'manharĩ'wa hã ma tô ibutu wazi na hã dasiwi wĩrĩ ni, tô te te wama ãma isaprĩzéb zarina rosawẽrẽ hã.

¹⁴ Tawamhã apito Fara'o, Zuzéhé zô ma tô hâ. Sô hârâ wamhã, te waptu na sô ta'maimorĩ ni, dazazém hawi da te dasiwi wazere da. Tahawa, ma tô a'â siwatasu pa. Ma tô duré ti'uza na hã a'â saprĩ. Taha pari te oto apito u hã mo, isõ're sab da.

¹⁵ Tawamhã te apito hã tãma tinha ãne: — Wa tô rosawẽ, ni'wa te te ĩma ãma isaprĩ waihu'u õ na hã. Tane nherẽ, rosawẽrẽ na ãma isaprĩ waihu'u'wa na wa tô aiwasu'u hã wapa.

¹⁶ Tawamhã Zuzé ma te asa ãma tãma wa'rã, ãne: — Ta hã, ĩsi'uihâ na hãi õ di. 'Re ihâimana u'âsi mono si, te za irosawẽrẽzém na hã ãma asada'â, marĩ hã za ihâimanazé romnhowam na ãma iwaihu'u wẽ zéb da hã.

¹⁷ Tawamhã apito, ma tô tãma wasu'u ãne, tinhimirosawẽrẽ hã: — Te irosawẽrẽ 'rem hã Nilu panho'õmo zaihâ na wa tô za.

¹⁸ Taha ré powawẽ ihâipe iwẽ ihâsu 7 na â hawimhã ma tô wairé. Wairébé wi, te duré pazaihâ na du hã te te 're huri.

¹⁹ Taha pari, ma tô duré isarina â hawimhã powawẽ 7 na ihâiba amo norĩ hã wairé, i'wahi pesere iwasété uptabire hã. Niwamhã õ norĩ sine hã Ezitu 'remhã te i'mai'madâ'â õ, wa ĩnhotõ 'rowimhã ab'madâ, iwasété uptabi na hã.

²⁰ Tawamhã powawẽ i'wahire iwasétére hã ma tô ihâipe iwẽ ihâsu hã siwi sõmri za'ra.

²¹ Tane nherẽ, ihâipe te te sõmri za'ra nherẽ, te ãma sidupu za'ra ãna aimasa, 'wahi u'âsi. Tawamhã wa tô oto toporo.

²² Taha parimhã wa tô duré rosawẽ. Ĩnhotõ 'rowimhã wa tô 'madâ, amnho trigu te, misi nherẽ, 7 na ihawi iteihi mono bâ i'rã iwairébé mono hã. Ta norĩ hã iwẽ uptabi isu wawẽ i'rã zurutu na hã.

²³ Taha pari ma tô duré 7 na i'rãi 'ré hã wairé, ropsi 're iropsa'wari mono hawi rowa'u'u wa'ro te te iteihi 'ré mono 'rã hã.

²⁴ Tawamhã ta norĩ hã ma tô 7 na i'rãi wẽ norĩ ré hã duré siwi sõmri za'ra. Ã hã wa tô romhõsi'wa norĩ ma hã aré tãma wasu'u za'ra. Tane nherẽ, ni'wa te te ĩma ãma saprĩ waihu'u õ di.

²⁵ Tawamhã Zuzé, te apito ma tãma tinha ãne: — Maparane isahoi mono zé te misi haré marĩ hã wasu'u zahuré. Ta norĩ na hã ma tô 'Re ihâimana u'âsi mono, marĩ hã aima waihu'u siro, za marĩ te te i'manharĩzéb da hã.

²⁶ Powawẽ iwẽ ihâipe, 7 na ihâiba hã te 7 na wahu hã wasu'u. Duré 7 na amnho te hawi iteihi mono bâ i'rã iwairébé, i'rã iwẽ uptabi isu wawẽ isurudu hã, aiwa te tô 7 na wahu hã wasu'u zahuré.

²⁷ Tawamhã duré powawẽ i'wahire iwasétére, powawẽ ihâipe iwẽ za'u, â hawi 7 na iwairébé hã, duré i'rãi 'ré ropsi 're iropsa'wari mono hawi rowa'u'u wa'ro te te iteihi 'ré mono 'rã 7 na ihâiba hã, aiwa te duré wahu hã wasu'u zahuré, 7 na za da'ãma iwahu, mra da te 're isépata za'ra mono na hã.

²⁸ I'uwaibaba na wa tô ĩmreme na hã ãma aima rowasu'u. 'Re ihâimana u'âsi mono, ma tô marĩ za te te i'manharĩzé hã aima hâi'ré siro, apito.

²⁹ Ezitu 'remhã te za 7 na da'ãma tiwahu, daro mono bâ danho ahâ ré hã.

³⁰ Taha pari, 7 na te za duré da'ãma tiwahu, mra da te 're sépata za'ra mono ré hã.

³¹ Mra da te 're sépata za'ẽtẽ za'ra mono wa, Ezitu ãma mrab ahâ dama 're ihâimana za'ra mono na 're idapo're pu'u za'ra mono da hã mare di za.

³² Asimirosawẽrẽ na ãma isahu hã, 'Re ihâimana u'âsi mono, za marĩ te te i'manharĩ su'u da, te te sima irowairébézé, te wasu'u.

³³ Tawamhã Zuzé, ma te duré ãma uzusi, ãne timreme na tãma: — Tahawa aré iwẽ, apito, aibâ i'rã nhimiza'rese wẽ isimirowaihu'u pe ipisutu da hã, ti'ai wa'õtõ nho'u Ezitu 're, te te 're irob'madâ'â mono da hã.

³⁴ Tawamhã apito te za duré aibâ norĩ romhuri 'madâ'â'wa da, ipisutu za'ra, Ezitu 're uburé daza'rui mono bâ 're inomro mono da hã, amnho tehâri ré misi sa'u na imrotõ hawip sidâpâsi da te 're po'o za'ra mono da, te te dama 're i'ru za'ra mono da hã, 7 na wahu morĩ ré danho ahâ ré, da te 'rã'õtõ mono da hã, 'ri nho'õmo mono bâ.

³⁵ Tawamhã oto wahu iwẽ we hâimana za'ra mono ré hã, te za tô aibâ norĩ amnho trigu hã te te ubumro za'ra, 'ri nho'õmo mono bâ amnho ubumrozéb 're, te te 'rã'õtõ mono da, asimiwada'uri zarina.

³⁶ Tawamhã amnho ubumro hã te za 7 na mrab zépata ré wahu morĩ ré hã dama tihâimana za'ra, ti'ai wa'õtõ nho'u Ezitu 're. Tahawa, mrap te, idasi'utõrĩ da hã mare di za.

Zuzé hã, apito zapari Ezitu ãma isi'i'rãnho'õmozé wasu'u

³⁷ Tawamhã Zuzéhé nhimirowa'õtõ 'manharĩzé, ma tô apito hã wẽsã. Tãma iromhuri'wa norĩ zama ma tô duré siwi wẽsã.

³⁸ Tahawa te apito, tite romhuri'wa norĩ ma nharĩ za'ra ãne: — Ni'wa hã wa te wasiwi sãmri õ di, aibâ Zuzéhé ne hã, 'Re ihâimana u'âsi mono pẽ'ẽzani ré 're ihâimana mono hã, wate ti'ai wa'õtõ nho'õmo 're, dama isi'rãnho'õmo da hã.

³⁹ Ãne te te tãma nharĩ za'ra pari, ma tô Zuzéhé u hã oto aipi'ra. Tawamhã te ãne tãma tinha: — 'Re ihâimana u'âsi mono, ma tô ãne na hã uburé aima hâi'ré. Tahawa ni'wa asipai u marĩ waihu'u'wa hã, duré isimiza'rese wẽ hã hâimana õ di.

⁴⁰ Tahawa te za a hã ĩnhimiromhurizé 'ri za'ẽtẽ 'remhã, dama i'rãnho'õmo na hã 're aihâimana mo. Tahawa, te za uburé ĩnhib'a'uwẽ norĩ asimiwada'urizém na hã te te siwi 're aimreme wapari pese. Tawamhã ĩwétési wa za asipai u dama ĩpire na hã 're ĩhâimana, wa hã apito uptabi na 're ĩhâimana mono wa.

⁴¹ Tahawa, ãhã na wa za oto aipisutu, Ezitu ãma uburé daza'rui mono bâ dama asi'rãnho'õmo da.

⁴² Tawamhã apito Fara'o, ma tô tinhiptõmohi wasisizé danhib'apito waihu'uzém na isihâtâ ré hã waze. Te te wazere wamhã, ma tô Zuzé hã ãma siptõmohi wasisi. Taha pari, ma tô duré da'uza ihâ su'u na hã uza. Ẽtẽ waipo pré oru 'manharĩ na tinho'rebzu hã ma tô duré tãma tisẽ.

⁴³ Taha pari, Ezituhu nhib'apito uptabi zapari dama i'rãnho'õmo te, awaru na wedewara zapore na 're wara da hã, ma tô duré tãma sa'ré, apito na da te ãma waihu'u za'ra da. Tahawa, ma tô duré tite aibâ norĩ ma, isõwab za'ra ãne hãsi mono sina si'aba'ré da hã, duré tãma rob'ru za'ra: “Tãma hã asiwasi aba mono!” Ãne ma tô Zuzé hã dama si'rãnho'u, Ezitu ãma.

⁴⁴ Tawamhã apito Fara'o, te Zuzéhé ma tinha ãne: — Wa hã apito. Tane nherẽ, a hã dama 're rowairébé mono õ nherẽ, ni'wa Ezitu ti'ai 'remhã marĩ te te i'manharĩ da hã mare di za.

^45-46 Tawamhã apito, ma tô Zuzé hã sisi, Zafenate-Panéia na. Duré pi'õ Asenati na isisi, Potifera, sasedoti 'ri nho'u Heliopoli na isisi ãma 're ihâimana mono 'ra hã, ma tô duré tãma tisõ, imro da hã. Tawamhã Zuzé, 30 na ãma iwahub ãma ma tô Ezitu ãma apito ma romhurizéb u hã ãzé. Tawamhã apito nho're hawimhã ma tô oto watobro. Watobro wamhã, Ezitu ti'ai mono bâ hã te te oto rowaimrami.

⁴⁷ Tawamhã 7 na da'ãma wahub ré hã, ti'a hã sõ pese di, amnho na hã.

⁴⁸ Tawamhã Zuzé, ma tô uburé amnho hã te te a'ubumro. Te te a'ubumroi mono wamhã, ma tô 'ri nho'õmo mono bâ te te a'maza, siwaptoma roptehutu na daburu na da te 're itehâri za'ra mono hã.

⁴⁹ Ãne ma tô Zuzé hã trigu sa'ẽtẽ uptabi na te te a'rã'õtõ, pazaihâ na supara 'ré 're isimi'wara mono ne. Sa'ẽtẽ uptabi wa, ma tô isa'rada hã oto sazâ, da te dasiwi sa'rata waihu'u õ wa oto.

⁵⁰ Tawamhã mrab zépata te, wahum norĩ te te ãma sãna'rata wana ré, ma tô Zuzé, pi'õ Asenatihi wamhã, ti'ra hã maparane wabzu.

⁵¹ Tawamhã ipoto'rada hã ma tô sisi, Manasé na. Ãne ma te tawamhã, isisi na hã ãma dama tinha: “'Re ihâimana u'âsi mono hã ma tô ĩpawapto, te 're irobzépata mono na hã ĩpo're si'âri da, duré uburé ĩmama 'ra norĩ na zama ĩpo're si'âri da.”

⁵² Tawamhã duré isãna're ipodo hã ma tô sisi, Efraĩ na. Tahawa te duré tinha ãne: “'Re ihâimana u'âsi mono, ma tô ĩ'ra hã ĩma sõmri zahuré, ti'ai wa'õtõ nho'õmo 're, te 're irobzépata mono zéb 'remhã”.

⁵³ Tawamhã Ezitu ãma danho ahâ na 're romhâimana mono ré, ma tô oto 7 wahu hã ai'utõ.

⁵⁴ Tawamhã Zuzé te te iwaihu'uzéb zarina, ma tô 7 wahub da hã oto tinhana'rata, mra da te 're isépata za'ra mono da hã. Ti'ai wa'õtõ nho'u ihâiba amo norĩ ãma hã ma tô mra hã da te 're sépata za'ra. Tane nherẽ, Ezitu ti'ai mono na daza'ru norĩ na hã te mra na dasima iwẽ na 're dahâimana za'ra.

⁵⁵ Tawamhã ezipsiu norĩ mrab zépata na te te sãna'rata za'ra wamhã, ma tô apito u hã ai'aba'ré, te te tiwi rowaptẽrẽ za'ra da, mram na. Tahawa, te ãne tãma nharĩ za'ra: — Zuzéhé u si ai'aba'réi wa'aba. Tawamhã taha si te te aima iwaihu'u za'ra wa'aba zéb zarina si, te za niha hã asiwi i'manharĩ 'wa za.

⁵⁶ Tawamhã ti'ai wa'õtõ nho'u Ezitu 're uburé daza'rui mono bâ mra da te oto 're sépata za'ra mono wamhã, ma tô Zuzé, uburé amnho ubumrozé 'ri hã dama 'ridawa za'ra, amnho wede na ezipsiu norĩ ma, te te ãma sãna'rata da hã.

⁵⁷ Tawamhã uburé ti'ai wa'õtõ nho'u ihâiba amo norĩ ãma 're idahâimana za'ra mono, ma tô Ezitu u hã 're danomro, Zuzéhé wi amnho, da te 're uipra za'ra mono da, dasa zô hã ropâ dawi sô 're robaba za'ra mono wa.