Zenezi 36 - ꞌRe Ihâimana Uꞌâsi Mono Zadawa Wasuꞌu

Ezauhu nhihudu norĩ wasu'u

¹ Ã hã Ezauhu nhihudu norĩ za'ratazé wasu'u, Edõ na isisi amo nhihudu norĩ hã.

² Ezau maparane pi'õ norĩ ãma ma tô timro zahuré, ti'ai wa'õtõ nho'u Cana'ã ãmam na, isisi hã Ada na, hitita norĩ siré Elõhõ 'ra hã. Duré imro hâiba amo nhisi hã Oolibama na, Anahã 'ra, Zibe'ãhã nhihudu, heveu norĩ siré hã.

³ Ãhã wa, Basemate, Ismaeu 'ra, Nebaiotehe hidiba na zama hã ma tô duré timro.

⁴ Ada hã, Elifasihi na, duré Basemate hã, Reu'éhé na,

⁵ Oolibama hã, Ze'usihi na, duré Zalãhã na, duré Coraha na. Ã norĩ hã Ezauhu 'ra, Cana'ã ãma 're hâimana mono ré ipoto za'ra.

⁶ Tawamhã Ezau, timro norĩ ré, ti'ra si'aibâ norĩ ré, ti'ra sipi'õ norĩ ré, duré uburé isõrõwa 're isiré 're idahâimana za'ra mono norĩ ré, ma tô rob amoi u hã mo, tino Zacoho nhiti romhâ na 're hâimana mono da. Tahawa, ma tô uburé pone'ẽrebâire norĩ hã, pone'ẽrebâ zéré uzé norĩ, duré uburé powawẽ norĩ hã siré te te simro. Duré ti'ai wa'õtõ nho'u Cana'ã ãma uburé marĩ te te sima 're i'azani mono zama ma tô siré tidu.

⁷ Tawamhã Ezau ma tô ta hawimhã oto watobro, tino Zacoho me ti'ai wa 're ihâimana zahuré mono hã, tãma zahuré hã surure wa, duré powawẽ na hã simizama ahâ uptabi zahuré wa. Tahawa oto siré 're ihâimana zahuré mono da hã waihu'u õ di.

⁸ Tawamhã Ezau, Edõ na zama isisi amo hã ma tô Se'i na romnhisi ãma ẽne 're ihâimana za'ra mono ãma hã oto 're hâimana.

⁹ Ã hã Ezauhu nhihudu norĩ za'ratazé wasu'u, edomita norĩ hi'rada, Se'i na romnhisi ãma ẽne 're ihâimana za'ra mono zéb ãma 're isi'ubumroi mono hã.

¹⁰ Ã hã, Ezauhu 'ra norĩ nhisi: Elifasi, Adaha zé're hawi ipodo, duré Reu'é, Basemate zé're hawi ipodo.

¹¹ Ã hã Elifasihi 'ra norĩ: Tema, Omar, Zefô, Gaetã, duré Quenazi.

¹² Elifasi, Ezauhu 'ra ma, imro prã Timna na isisi 're ihâimana mono hã, ma tô i'ra tãma 'maipodo isisi hã Amalequi na. Ta norĩ hã Ezauhu mro Adaha nhihudu norĩ.

¹³ Ã hã duré Reu'éhé 'ra norĩ: Na'ate, Zera, Sama, duré Miza. Ta norĩ hã Ezauhu mro Basematehe nhihudu norĩ.

¹⁴ Ãhã Ezauhu mro Oolibamaha 'ra norĩ, Anahã 'ra, Zibe'ãhã nhihudu zé're hawi ipoto za'ra: Ze'usi, Zalã, duré Cora.

¹⁵ Ã hã Ezauhu nhihudu norĩ nhib'ihâ'a norĩ nhisi za'ratazé. Ezauhu 'ra dama ipoto'rada Elifasi 'ra norĩ hã: Tema, Omar, Zefô, Quenazi,

¹⁶ Cora, Gaetã, duré Amalequi. Ã norĩ hã danhib'ihâ'a, Elifasihi nhihudu norĩ Edõ na romnhisi ãma, Adaha nhihudu norĩ hã.

¹⁷ Ã hã Reu'éhé nhihudu norĩ nhisi za'ratazé hã: Na'ate, Zera, Sama, duré Miza. Ã hã duré Basemate, Ezauhu mro hâiba amoi nhihudu norĩ.

¹⁸ Tawamhã duré Ezauhu mro hâiba amo, Anahã 'ra, Oolibama na isisi 'ra norĩ nhisi hã ãne: Ze'usi, Zalã, duré Cora.

¹⁹ Ã norĩ hã uburé Ezauhu nhihudu norĩ si hã.

Se'ihi nhihudu norĩ wasu'u

²⁰ Ã hã horeu norĩ siré Lotãhã nhihudu norĩ nhisi za'ratazé: Sobau, Zibe'ã, Ana,

²¹ Disõ, Ézé, duré Disã. Ã norĩ hã uburé Se'ihi 'ra norĩ, te horeu norĩ ma, danhib'ihâ'a na tãma 're hâimana za'ra, Edõ 'remhã.

²² Ã norĩ hã Lotãhã 'ra norĩ: Hori, duré Hema. Duré Timna hã Lotãhã hidiba.

²³ Ã norĩ hã Sobauhu 'ra norĩ: Alvã, Mana'ate, Ebau, Sefô, duré Ona.

²⁴ Ã norĩ hã Zibe'ãhã 'ra norĩ: Ai'asi, duré Ana. Ã hã ma tô rop si 're irosa'wari mono ãma hã â wapu hã upsibi me, timama nhimizama awaru po're pore a'ubuni wi te te 're a'madâ'â mono ré.

²⁵ Ã norĩ hã duré Anahã 'ra norĩ: Disõ, duré Oolibama, pi'õ Anahã 'ra.

²⁶ Ã hã Disõhõ 'ra norĩ: Hẽdã, Esbã, Itrã, duré Querã.

²⁷ Ã hã Ézéhé 'ra norĩ: Birã, Za'avã, duré Acã.

²⁸ Ã hã duré Disãhã 'ra norĩ: Uz, duré Arã.

²⁹ Ã hã horeu norĩ nhib'ihâ'a nhisi: Lotã, Sobau, Zibe'ã, Ana,

³⁰ Disõ, Ézé, duré Disã. Ã norĩ hã tô horeu norĩ nhib'ihâ'a, isib'a'uwẽ norĩ sipo'o zarina, Se'i 'remhã.

Edõ ãma danhib'ihâ'a norĩ wasu'u

^31-39 Ã norĩ hã, Edõ na rowamri ti'ai ãma, Izaraéu nhihudu norĩ sidanhib'ihâ'a za'ra wana ré hã, ma tô dama i'rãnho'õmo na 're hâimana za'ra: Bela, Be'oho 'ra, 'ri nho'u Dinaba na isisi hawimhã. Tawamhã Bela dâ'â parimhã, ma tô isõwa're're ãzé Zobabe, Zeraha 'ra, Bosra na 'ri wa'õtõ nhisi hawimhã. Tawamhã Zobabe dâ'â parimhã ma tô Husã, Tema na romnhisi ti'ai hawimhã isõwa're're ãzé. Duré Husã dâ'â parimhã, ma tô Hadade, Bedadehe 'ra, 'ri nho'u Avite na isisi hawimhã isõwa're're ãzé. Ta hã ma tô midiãnita norĩ na ãma ai'uté, dasi'wapéi wamhã, Moabi ti'ai ãma hã. Duré Hadade dâ'â parimhã, ma tô Sãla, 'ri nho'u Masreca na isisi hawimhã isõwa're're ãzé. Duré Sãla dâ'â parimhã, ma tô Sau, Reobote hawimhã, Eufrati na pa nho'õmo nhisi 'ratamhã isõwa're're ãzé. Tawamhã Sau dâ'â parimhã, ma tô Baau-Hana, Acboho 'ra hã isõwa're're ãzé. Duré Baau-Hana Acboho 'ra dâ'â parimhã, ma tô Hadade hã isõwa're're ãzé. Taha te 'ri nho'õmo nhisi hã Pau na. Duré imro nhisi Me'etabe na, Matredehe 'ra, Me-Za'abehe nhihudu.

^40-43 Ã hã Ezauhu nhihudu norĩ, danhib'ihâ'a nhisi ãne: Timna, Alva, Zetete, Oolibama, Ela, Pino, Quenazi, Tema, Mibza, Magdiel, duré Irã. Ã norĩ hã Edõ ãma danhib'ihâ'a. Ã norĩ hã hâiba mono bâ ma tô 're ihâimana za'ra mono zé mono bâ te te 're da'madâ'â za'ra. Edomita norĩ hã tô Ezauhu nhihudu norĩ.