Zenezi 26 - ꞌRe Ihâimana Uꞌâsi Mono Zadawa Wasuꞌu

Izaqui, Filisteu norĩ nhipti'ai ãma 're ihâimana mono zé wasu'u

¹ Tawamhã taha ti'ai 're, mra te da te 're sépata za'ra, Abra'ã, 're hâimana mono ré, amnho ihâimana õ wam ne. Tahawa Izaqui, 'ri nho'u Gera na isisi u ma tô mo, Abimelequi filisteu norĩ nhib'apito 're ihâimana mono zéb u hã.

² Tawamhã tame Uburé Danhib'apito ma tô Izaquihi ma, sihâi'ré. Tahawa, te ãne tãma tinha: — Ezitu u hã aimorĩ õ di za. Ti'a te aima ipisutuzéb ãmap si te za 're asãmra mo.

³ Ãme te za tô a'â 're aihâimana mo. Tawamhã wa hã wa za asiré 're ĩhâimana. Wa za duré iwẽ hã te aima 're apisutu u'âsi. Asihudu norĩ ma, wa za ã hã uburé ti'a hã te tãma 're anhomri. Ãhã wamhã, wa za ãma tãma uwaimra, aimama Abra'ãhã ma, ĩnhimiropisudu te tãma i'manharĩzé hã.

⁴ Wa hã wa za pisutu, asihudu norĩ ahâ na 're hâimana za'ra mono da hã, wasi hâiwa na 're isimasa mono ne. Wa za duré uburé ã hã ti'a te tãma 're anhomri. Asihudu norĩ u'âbâmhã, wa za a'uwẽ mono bâ iwẽ hã te tãma 're pisutu za'ra, ro pâ.

⁵ E marĩ wa. Abra'ã hã ma tô ĩmreme duré ĩnhimiroti te te 're wapari pese. Ma tô te tãma 're iwaihu'u mono zé hã te te ĩma ãma 're uwaimrami.

⁶ Ãne ma tô tawamhã Izaqui, Gera ãma hã 're sãmra.

⁷ Tawamhã aibâ norĩ tô õhõ 're, 're irob za'ra mono, imro na te te sadanharĩ za'ra wamhã, ma tô tihidiba na tãma wasu'u za'ra. Rebeca hã pi'õ iwẽ uptabi. Tahawa Izaqui timro na te te iwasu'u da hã pahi di, õhõ 're, aibâ norĩ 're irob za'ra mono hã te te siwi wĩrĩ õ'umnhasite, imro zô.

⁸ Tawamhã Izaqui, taha 'remhã ma tô 're hâimana hâ pese. Tawamhã nimahã bâtâ na Abimelequi, filisteu norĩ nhib'apito hã ma tô Izaqui, timro Rebeca tinhib'rata na te te hâiba upi mono ré, zanela 'ri zadazâri hâimo hawi sipapara 'madâ.

⁹ Tahawa, Izaquihi zô hârâ wamhã, ma tô sadanha ãne: — Sena õ hã tô aimro. E marĩ da, ma tô bété aihidiba na iwasu'u. — Wa hã te rosa'rata wa ãne, ĩmro na te aima wasu'u za'ra wa'aba wamhã, asiwi ĩwĩrĩ aba õ'umnhasite. — Ãne Izaqui ma te asa ãma tãma wa'rã.

¹⁰ Tawamhã Abimelequi te duré tãma tinha ãne: — E marĩ da, ma tô ãne hã wama i'manharĩ za'ra. Wama za'ra aré wapure di, iré iwa'manomro da hã waptâ wa. Ane 'wa'âhã, asimi'manharĩzéb zarina te aré wawasédé hã wama iwazere za'ra.

¹¹ Tawamhã Abimelequi, ma tô uburé tinhib'a'uwẽ norĩ ma, dapo're pu hã 'manha, ãne: “Ni'wa ã hã aibâ norĩ ma, imro me, marĩ iwasédé te te tãma 'manharĩ zahuré wamhã, te za wĩrĩ ni za.”

¹² Tawamhã Izaqui, taha wahum na ma tô tame rob're hã 'manha. Tawamhã te te oto tehâri wamhã, te te i'a're nhipai u ma tô waze, 100 na isa'rata nhipai u. E marĩ wa. Uburé Danhib'apito iwẽ na te te pawapto wa.

¹³ Tawamhã we oto simarĩ pese mono wamhã, te oto sibro pese na 're hâimana.

¹⁴ Izaquihi nhimizama pone'ẽrebâ hã, pone'ẽrebâ zéré uzé hã, powawẽ hã, duré tãma iromhuri'wa norĩ hã ahâ uptabi di. Tahawa te filisteu norĩ hã te te siwi 're 'ruiwapari oto.

¹⁵ Tahawa, ma tô uburé â zô ab're hã ti'a na te te sitob za'ra, Izaquihi mama, Abra'ã 're hâimana mono ré, tãma iromhuri'wa norĩ te te siwi i'ab're mono hã.

¹⁶ Tawamhã Abimelequi, te Izaquihi ma, nimahã bâtâ na tãma tinha ãne: — Te za oto aimo, wanhipti'a za'ra hawimhã. Asiptete uptabi na te wama za'ra hã 're aihâimana mo.

¹⁷ Tawamhã Izaqui, ta hawi oto watobro wamhã, ma tô romharé Gera na isisi ãma romhâ 'manharĩ na 'ri hã sima sõré, tame a'â 're hâimana mono da.

¹⁸ Tawamhã Abra'ã 're hâimana mono ré, â zô da te i'ab're za'ra mono hã, duré dâ'â pari filisteu norĩ te te aré siwi isitob za'ra hã ma tô apâ ab're hawimhã ti'a te te siwi sãmra, Izaquihi ma romhuri'wa norĩ hã. Tawamhã imama te te isisi za'ra zém na ma tô duré apâ tô õhõ na te te anhisi.

¹⁹ Tawamhã nimahã bâtâ na Izaquihi ma romhuri'wa norĩ romharé ãma te te siwi i'ab're ãmamhã ma tô siwi sõpẽtẽ, ub're nasi ipu hã.

²⁰ Tane nherẽ, Gera ãma pone'ẽrebâ 'madâ'â'wa norĩ, Izaquihi ma, pone'ẽrebâ 'madâ'â'wa norĩ me hã ma tô ãma sisada'âbâ za'ra, õ hã â zô ab're ite za'ra na hã. Tahawa Izaqui â zô ab're hã ma tô sisi ãne, “ãma idasisada'âbâ za'ra zém” na.

²¹ Taha pari Izaquihi ma romhuri'wa norĩ, ma tô aimawi hã siwi ab're. Tawamhã ma tô duré taha na ãma sisada'âbâ za'ra. Tahawa ma tô duré ta hã sisi, “dazahi na dasisada 're idahâimana za'ra mono zém” na.

²² Tawamhã Izaqui ta hawi oto watobro wamhã, ma tô duré â zô ab're hã 'manha. Tawamhã ãma idasisada'âbâzé tame hâimana õ wa, ma tô sisi, “Rob're Za'ẽtẽ” na. Tahawa te duré tinha ãne: — Uburé Danhib'apito, ã hã ro isa'ẽne iwa 're iwahâimana za'ra mono zéb da, ma tô oto wama sõmri za'ra. Tahawa wasima iwẽ na wa za oto ãmemhã 're wasi'ubumro.

²³ Ta hawi Izaqui ma tô oto mo, Beseba na 'ri nho'õmo nhisi u hã.

²⁴ Tawamhã tô taha mara na, Uburé Danhib'apito tãma sihâi'ré wamhã, te ãne tãma tinha: — Wa hã, Abra'ã aimama te, 'Re ihâimana u'âsi mono. Aipahi õ di za, wa hã asiré 're ĩhâimana u'âsi mono wa. Ĩma romhuri'wa Abra'ãhã u'âbâ, wa za iwẽ hã te aima 're apisutu. Duré asihudu norĩ ahâ uptabi na 're hâimana za'ra mono da wa za aima 'manha.

²⁵ Tawamhã Izaqui, tame ẽtẽ za'ra te te 'manharĩ wamhã, ma tô Uburé Danhib'apito ãma tiwata. Duré tô taha ti'ai 're romhâ 'manharĩ na te te sima 'ri nhoré mono wamhã, ma tô duré tame tãma romhuri'wa norĩ hã â zô ab're hã siwi ab're.

Izaqui norĩ, Abimelequihi me roti na isisaze zahuré zé wasu'u

²⁶ Tawamhã nimahã bâtâ na Abimelequi Gera hawi ma tô mo, Izaquihi ma te te robzanhamri da. Tahawa, isiré ma tô isiwaihu Auzate hã mo, Fico dasi'wapéi 'madâ'â'wai me.

²⁷ Tawamhã te Izaqui sadanha ãne: — E marĩ zô, te we ĩtẽme ai'aba'réi wa'wa, ĩma robzanhamri za'ra wa'aba da. Oro ĩzada asiti'ru za'ra wa'aba za nimahã na hã. Oro duré asiwi ĩwazere aba za, asipti'a za'ra wa'aba hawimhã.

²⁸ Tawamhã asa ma te siwi sada'â ãne: — Uburé Danhib'apito, sena na asiré 're ihâimana mono na hã wa tô oto ai'ãma waihu'u za'ra ni. Tahawa, wa ãne wasima nharĩ za'ra ni: Ropisutu zahi hã wa za wasima 'manharĩ za'ra ni, itete na, ãne na:

²⁹ A hã niwamhã iwasédé hã wama 'manharĩ za'ra õ di za. Duré wa norĩ hã niwamhã iwasédé wa te aima 'manharĩ za'ra õ di za. Iwẽ na hã wa tô wa te aima 're 'manharĩ u'âsi za'ra. Duré rowẽ na warob za'ra hawi aiwatobro da hã wa tô aima waprosi za'ra ni. Ãhã na wa tô oto waihu'u za'ra ni, Uburé Danhib'apito iwẽ te te aima 're i'apisutu mono zém na hã.

³⁰ Tawamhã Izaqui, dasa isa'ẽne te te tãma 'manharĩ za'ra wamhã, ma tô duré isimihârizé te te tãma i'manharĩ za'ra zém na tisa hã uburé ãma simihâri za'ra.

³¹ Tawamhã duré awẽm na mararé uptabi utu zahuré wamhã, ma tô roti na hã sisaze zahuré. Ma tô duré ropisudu hã sima 'manharĩ zahuré. Taha pari Izaqui sisa'u te te sawi wamhã, ma tô oto rowẽ sina hã ai'aba'ré.

³² Tawamhã tô taha bâtâ na Izaquihi ma romhuri'wa norĩ te te siwi i'ab're wa, ub're nasi ipu ãne te te tãma wasu'u za'ra da hã, ma tô itẽme ai'aba'ré: “Wa te wasiwi i'ab're 'remhã â hã wa tô wasiwi sõpẽtẽ ni!”

³³ Tahawa Izaqui, ma tô â zô ab're hã sisi, Seba na. Tawamhã ta hawim haré ã hã 'ri nho'õmo nhisi hã, Beseba na te oto 're hâimana.

Ezau mro norĩ wasu'u

³⁴ Tawamhã Ezau ãma 40 na ãma iwahub ãma, ma tô Zudite, Beeri 'ra ãma hã timro, duré Basemate, Elõhõ 'ra sipi'õi ãma hã, hitita norĩ siré azarutu norĩ ãma.

³⁵ Tawamhã duré ã hã azarutu norĩ hã ma tô Izaqui norĩ ma, Rebecaha me ro'wa'rézé hã te te sina tãma 're sõmri zahuré, si'uiwa na.