Zenezi 22 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, Abra'ã sena zô te te ipibuzé wasu'u

¹ Tawamhã wahu hã duré si'utõrĩ mono pari, 'Re ihâimana u'âsi mono, ma tô Abra'ã hã pibu, sena na te te sina 're umnhasi pese mono zô. Tahawa isisi na te te 'mahârâ wamhã, ma tô ãne sada'â asa: — E marĩ. Ãhãta ãme wa za.

² Tawamhã 'Re ihâimana u'âsi mono te ãne tãma tinha: — Misi uptabi ai'ra si'aibâ Izaqui, 're isawi pese mono hã ma'ãpé saprõni, Moria na romnhisi u. Tawamhã tame ẽne te aima ihâi'ré ãma, te za ai'ra unhama na iza, ĩma ãma asõprub da hã.

³ Tawamhã Abra'ã mara hâ ré robza'rã ré, utu wamhã, ma tô awaru po're pore sima bazadâ. Duré mi, ma tô sima anhihâ, tinhoprubzé te te ãma izatazéb da hã. Taha pari, 'Re ihâimana u'âsi mono, ro te te tãma iwasu'u u morĩ da, ma tô oto watobro. Tawamhã Izaqui norĩ, maparane tãma romhuri'wa norĩ me, ma tô isiré ai'aba'ré.

⁴ Tawamhã si'ubdatõ bâtâ ãma zahadu itẽme si'aba'réi ré, ma tô romhâ na ré ẽne te te tãma iwasu'u hã tisã.

⁵ Tahawa te tite romhuri'wa norĩ ma tãma nharĩ zahuré ãne: — Ãme aimasisi aba, awaru po're pore 'rata. Wa norĩ si wa za ĩ'ra si'watébrémi me hã wanem ni õwamhã, 'Re ihâimana u'âsi mono ãma wawata da. Ãma wawata parip si, wa za we apâ wanem ni za.

⁶ Tawamhã Abra'ã, 'Re ihâimana u'âsi mono ma, tinhoprub zata zéb da mimi wasi te te sa'rai wamhã, ma tô ti'ra Izaquihi nhisé tãma tihi. Tahawa sib'ézé, pré'a me ma tô imama hã timra. Taha pari, ma tô oto siré tineb zahuré.

⁷ Ineb zahuré na ãma ronomro õ ré, te Izaqui, timama ma tinha ãne: — Ĩmama. — Ĩ'ra, e marĩ. — Ãne Abra'ã, ma te asa ti'ra hã sada'â: Tawamhã Izaqui, te timama sadanha ãne: — Ãhãta mi, duré ãhãta uzâ. E mame te bété pone'ẽrebâ 'ra hã za, izata da hã, 'Re ihâimana u'âsi mono ma.

⁸ Tawamhã imama Abra'ã, ma te ãma sada'â ãne asa: — Ĩ'ra, 'Re ihâimana u'âsi mono si te za pone'ẽrebâ 'ra, te tãma izata na ãma tãma ĩnhoprub da hã tisõ. Ãne pari te duré siré tineb zahuré.

⁹ Tawamhã 'Re ihâimana u'âsi mono, ẽne te te tãma ipisutu u oto simasisi wamhã, ma tô Abra'ã, ẽtẽ za'ra hã 'manha. Duré ẽtẽ nhisi wi, ma tô mi hã sa'ra. Taha pari, ma tô ti'ra Izaqui pa ubumro, te te wapre mono da. Te te wapre mono pari, ma tô mimi za'ra nhisi wi oto tihi.

¹⁰ Tawamhã awa'awi sib'ézé, ma tô sada sarõtõ, ti'ra te te ãma wĩrĩ da.

¹¹ Tane nherẽ, te te sada sarõtõ wi, Uburé Danhib'apito te, hâiwa ãma romhuri'wa, te hâiwa hawi 'mahâ ãne: — Abra'ã. Abra'ã. — E marĩ. Ãhãta wa za. — Ãne ma asa sada'â.

¹² Tawamhã hâiwa ãma romhuri'wa te tãma tinha ãne: — Tô'ã. 'Watébrémi hã u'a tõ. Iwasédé hã tãma 'manharĩ tõ. Wa tô oto aiwaihu'u, 'Re ihâimana u'âsi mono 're iwazé pese mono na, ai'ra si'aibâ misi nherẽ hã tiwi sawi õ wa.

¹³ Tawamhã Abra'ã sibabarãi u te te 're rob'madâ'â mono wamhã, ma tô pone'ẽrebâ zéré mapure si'aibâ wede zapore panhipti wa'rudu te te i'õmo tédé hã tisã. Te te sãmri wamhã, ma tô sô mo. Ma tô ti'â. Tawamhã ma tô ti'ra hâiba upana 'Re ihâimana u'âsi mono ma tãma zata, ãma tãma sõprub da.

¹⁴ Tawamhã Abra'ã taha ẽne hã ma tô sisi, “Uburé Danhib'apito, te za marĩ ibâ na te te dama 're anhomri u'âsi”. Tahawa te ta hawim haré da te ãma 're romnhisi za'ra, ãne: “Uburé Danhib'apito, tite ẽtẽ ãma marĩ ibâ na te te dama 're i'anhomri u'âsi mono” na.

¹⁵ Tawamhã Uburé Danhib'apito te, hâiwa ãma romhuri'wa te duré 'mahâ hâiwa hawi, Abra'ã hã.

¹⁶ Te tãma tinha ãne: — Ãne hã 'manharĩ wa, ai'ra si'aibâ misi nherẽ, ĩwi sawi waihu'u õ wa, ĩnhisi na wa za wa hã Uburé Danhib'apito aima ropisutu, iwẽ hã te aima 're apisutu u'âsi mono da.

¹⁷ Asihudu sidâpâsi ahâ uptabi na 're hâimana za'ra mono da, wa za 'manha, wasi, hâiwa na 're isimasa mono ne, duré pazaihâ na supara 're isimi'wara mono ne. Asihudu norĩ hã te za tinhitob'ru norĩ te, 'ri nho'õmo norĩ ãma te te 're ai'uté za'ra.

¹⁸ Asihudu norĩ u'âbâmhã wa za a'uwẽ mono bâ ropâ 're ĩdahâimana za'ra mono iwẽ hã te tãma 're apisutu, a hã te aima iwaihu'uzém na ĩwapari pese wa, ãne hã 'manharĩ wa.

¹⁹ Tawamhã Abra'ã, tite romhuri'wa norĩ isimasisi zahuré zéb u ma tô apâ mo. Tamomo apâ wisi wamhã, ma tô siré oto ai'aba'ré, Beseba na 'ri wa'õtõ u. Tawamhã tame te oto 're sãmra, Abra'ã hã.

Naoho nhihudu norĩ wasu'u

²⁰ Tawamhã wahu hã duré si'utõrĩ mono pari, ma tô Abra'ã tisisãnawã Naoho 'ra, imro Milcaha zé're hawi 8 na tãma ipoto za'ra wasu'u hã wapa.

²¹ Ta norĩ 'remhã dama ipoto'rada hã Uz na isisi hã. Isõsi hã Buz na isisi, Quemu'é na isisi, Arãhã mama hã.

²² Taha pari, ipoto za'ra nhisi hã ãne: Quesede, Hazo, Pilda, Zidlafe, duré Betu'é.

²³ Betu'é hã, Rebecaha mama. Ã norĩ hã 8 na Milca zé're hawi ipoto za'ra, Nao, Abra'ãhã sisãnawãi ma.

²⁴ Tawamhã duré imro prã Reumahã 'ra nhisi hã ãne: Teba, Ga'ã, Ta'asi, duré Ma'aca.