Zenezi 16 - ꞌRe Ihâimana Uꞌâsi Mono Zadawa Wasuꞌu

Aga norĩ wasu'u, Ismaeu me

¹ Tawamhã Sara'i, Abrãhã mro te zahadu timro ma, 'ra ãna 're hâimana. Tawamhã Sara'ihi ma, romhuri'wa te Aga na isisi tãma 're 'maihâimana, ezipsiu norĩ nhipi'õ hã.

² Tawamhã nimahã bâtâ na Sara'i 'ra õ wa, te Abrãhã ma tãma tinha ãne: — Uburé Danhib'apito, ĩ'ra da te te ĩma rowairébé õ 'ru te, ma'ãpé ĩma romhuri'wai ãma aihâimana mono. Ãhã wamhã, taha hâiba u'âbâ ãté te za ĩ'ra ne ĩma 're hâimana za'ra. Tawamhã Abrã, Sara'i tinhimirosa'rada te te ãne tãma iwaihu'uzém na ma tô ãma saze.

³ Tahawa, ma tô Aga imro prã na tãma 're ihâimana mono da hã oto tãma tisõ. Abrã Cana'ã na romnhisi ãma 're ihâimana mono zém na 10 na ãma iwahub ãma ma tô ãne na tiromhâiba.

⁴ Tawamhã Abrã, Agaha ãma hâimana mono wa, ma tô oto tiwasã. Tawamhã oto tiwasã na siwaihu'u wamhã, ma tô Aga hã, Sara'i tinhib'ihâ'a tãma i'madâ'â wapure zarina oto siwi wẽ'õ pese 'râwi.

⁵ Tahawa Sara'i te Abrãhã ma tinha ãne: — A hã i'upai u'âbâmhã ma tô Aga siwi ĩwẽ'õ. Tô wa hã asib'rata te aima sõmri nherẽ, oto tiwasã na siwaihu'u wamhã, ma tô siwi ĩwẽ'õ pese tô. Tahawa, Uburé Danhib'apito si te za wawaihu'u, tiha na wa te i'upazém na hã, a hã wamhã, duré wa hã wamhã.

⁶ Tawamhã Abrã, ma te ãma tãma wa'rã ãne: — Wẽ di tô, marĩ õ di. Aga, aima romhuri'wa te asimi'madâ'â na 're hâimana. Tahawa asima iwẽzéb uwaibaba, te za niha marĩ tãma i'manha. Tawamhã Sara'i nasi te te wada'uri pese wa, duré nasi timreme nhiti'ru na te te tãma nharĩ wa, ma tô oto a'ubuni u tiwi aimani.

⁷ Tawamhã a'ubuni wi rop si 're irosa'wari mono ãma, Su na romnhisi u bâdâdi inomro 'rata ub're ihâimana ãma sãmra ré, ma tô Uburé Danhib'apito ma, hâiwa ãma romhuri'wa sô 're irĩtĩ mono hã tisã.

⁸ Tahawa, ta hã te ãne sadanha: — Aga, Sara'ihi ma romhuri'wa, e ma hawi te wei aimo. E momo te za aimo. Tawamhã Aga ma asa ãma sada'â ãne: — Ĩnhib'apito wi, wa we tiwi aimani, Sara'ihi wi.

⁹ Tawamhã Uburé Danhib'apito ma, hâiwa ãma romhuri'wa, ma te ãne tãma waihu'u: — Apâ te za asib'apito u aimo. Isapari 're i'aihâimana mono na te za imreme 're iwapari pese mo.

¹⁰ Tawamhã te duré ãne tãma tinha: “Asihudu norĩ ahâ uptabi na 're hâimana za'ra mono da, wa za 'manha. Ahâ uptabi wa, da te 're sa'rata waihu'u za'ra mono õ di za.

¹¹ Ma tô, tô aiwasã, ai'ra aima hâimana da hã. Tahawa, te za isisi, Ismaeu na. E marĩ wa. Uburé Danhib'apito, robzépata wa, 're i'asadari mono zé te te wapari wa.

¹² Ã hã ai'ra te za awaru po're pore rom na sima iwẽ na 're ihâimana za'ra mono ne 're hâimana. Ta hã te za uburé te te 're da'a'wapé. Te za uburé da te dasiwi 're 'wapé. Duré uburé tisisãnawã norĩ nhiti te za ta hã romhâ na 're hâimana.”

¹³ Tawamhã Aga, ma tô Uburé Danhib'apito hã sisi, ãne: “'Re ihâimana u'âsi mono si te te 're ĩ'madâ'â mono.” Ãne 'Re ihâimana u'âsi mono te te tãma nharĩ wa, ma tô aré 'râwi sima tinha, ãne: “E ta hã te te 're ĩ'madâ'â mono hã wa te sena na ĩtõmo na 'madâ, ĩdâ'â ãna.”

¹⁴ Tahawa â zô ab're Cadi norĩ 're, Berete na 'ri wa'õtõ nhisi me ihâiba hã ma tô da te 're sisi za'ra, ãne: “Â zô ab're, 'Re ihâimana u'âsi mono te, te te 're ĩ'madâ'â mono te.”

¹⁵ Tawamhã Abrãhã ma, Agaha zé're hawi ma tô i'ra tãma podo. Tahawa, 'watébrémi hã imama, ma tô sisi, Ismaeu na.

¹⁶ Abrãhã ãma 86 na iwahub ãma, ma tô Ismaeu podo.