Zenezi 11 - ꞌRe Ihâimana Uꞌâsi Mono Zadawa Wasuꞌu

Babé na 'ri 'rãihâ nhisi wasu'u

¹ Tawamhã tô tame we 're romhâimana mono ré, ma tô misi damreme na si dasima 're damreme zusi. Tô õhõ na si te uburé dasima da te 're robzanhamri za'ra.

² Tawamhã ni'wam norĩ a'uwẽ bâtâ pusizém hawi isi'aba'ré norĩ hã, ma tô Sina na romharé nhisi u hã aihutu, tame iwa 're hâimana za'ra mono da.

³ Tawamhã ni'wam norĩ hã te nimahã bâtâ na ãne sima nharĩ za'ra: — Oto ti'a u'ẽne, wa te u'ẽtẽ za'ra wa'aba mono, sebre pese na! Ãne wa, te ta norĩ ma, ti'a u'ẽtẽ zebre hã tãma tihâimana za'ra, te te ãma siwi i'ri da hã, ẽne hã ihâimana za'ra upana. Wedewa'u top si te duré tãma tihâimana za'ra, te te ãma siwi i'ri uptob da hã, ti'ai wai'o hã ihâimana upana.

⁴ Tawamhã te ãne oto sima nharĩ za'ra: — Oto 'rinho'u, wa te wasiwi 'ri aba. Tawamhã taha 'remhã wa za 'ri 'rãihâ wada hã wasiwi 'manharĩ ni, hâiwa te te sina itété pese da hã. Ãhã wamhã, dama wawasu'u za'ẽtẽ na wa za 're wahâimana za'ra. Duré wa te 're iropéi mono da hã mare di za, ti'ai mono bâ 're wahâimana za'ra mono da hã.

⁵ Tawamhã Uburé Danhib'apito, 'ri 'rãihâ a'uwẽ te te siwi i'ri, te te 'madâ'â da hã ma tô si'ra.

⁶ Tahawa, te ãne 'râwi sima tinha: — Ã hã a'uwẽ norĩ, te misi haré iwamri na hã 're hâimana za'ra. Duré misi timreme na te uburé 're mreme zusi, misi haré. Ãne te te siwi i'manharĩ na'rata zarina te za oto niha hã uburé marĩ sima iwẽ na te te 're 'manharĩ za'ra.

⁷ Tahawa, oto wa te si'ra za'ra na, 're imreme zusi mono zé hã wa te tiwi 'wa'rutu za'ra da, marĩ na te te sima 're nharĩ za'ra mono wa, oto 're sisadaihu'u za'ra mono tõ da.

⁸ Ãne ma tô tawamhã Uburé Danhib'apito hã te te da'ãma ropé, ti'ai mono bâ. Tahawa 'ri nho'u te te siwi i'ri na hã te te ãma siwi 'rãiwa'õmo õ di. Ma tô siwi sazâ.

⁹ Tawamhã 'ri nho'u ma tô Babé na dasiwi sisi ni. E marĩ wa. Tame Uburé Danhib'apito, ti'ai 're, 're idahâimana za'ra mono wi damreme te te tiwi 'wa'rutu za'ra wa, uburé ãma 're idamreme zusi mono zé hã. Duré ta hawi ma tô Uburé Danhib'apito hã da'ãma te te ropé, ti'ai mono bâ oto 're dahâimana za'ra mono da hã.

Sẽhẽ 'ra norĩ wasu'u, isihudu norĩ wasu'u me

¹⁰ Ã hã Sẽhẽ 'ra norĩ za'ratazé, duré isihudu norĩ za'ratazé. I'â pusi mono zém na maparane wahu parimhã, Sẽhẽ ãma 100 na ãma iwahub ãma ma tô i'ra hã tãma podo, Arpaxade na isisi hã.

¹¹ Taha pari ma tô duré 500 na wahub 'remhã 're hâimana. Taha ré, ma tô duré i'ra si'aibâ norĩ, i'ra sipi'õ norĩ me hã tãma tipoto za'ra.

¹² Tawamhã duré Arpaxade ãma 35 na ãma iwahub ãma, ma tô i'ra Sela na isisi hã tãma podo.

¹³ Taha pari ma tô duré 403 na wahub 'remhã 're hâimana. Taha ré, ma tô duré i'ra si'aibâ norĩ, i'ra sipi'õ norĩ me hã tãma tipoto za'ra.

¹⁴ Selaha ãma 30 na ãma iwahub ãma, ma tô i'ra Ébé na isisi hã tãma podo.

¹⁵ Taha pari ma tô duré 403 na wahub 'remhã 're hâimana. Taha ré, ma tô duré i'ra si'aibâ norĩ, i'ra sipi'õ norĩ me hã tãma tipoto za'ra.

¹⁶ Tawamhã duré Ébéhé ãma 34 na ãma iwahub ãma ma tô i'ra Peregui hã tãma podo.

¹⁷ Taha pari ma tô duré 430 na wahub 'remhã 're hâimana. Taha ré, ma tô duré i'ra si'aibâ norĩ, i'ra sipi'õ norĩ me hã tãma tipoto za'ra.

¹⁸ Pereguihi ãma 30 na ãma iwahub ãma, ma tô Re'u na isisi hã tãma poto.

¹⁹ Taha pari ma tô duré 209 na wahub 'remhã 're hâimana. Taha ré, ma tô duré i'ra si'aibâ norĩ, i'ra sipi'õ norĩ me hã tãma tipoto za'ra.

²⁰ Tawamhã duré Re'u ãma 32 na ãma iwahub ãma, ma tô i'ra Serugui na isisi hã tãma podo.

²¹ Taha pari ma tô duré 207 na wahub 'remhã 're hâimana. Taha ré, ma tô duré i'ra si'aibâ norĩ, i'ra sipi'õ norĩ me hã tãma tipoto za'ra.

²² Seruguihi ãma 30 na ãma iwahub ãma, ma tô i'ra Nao na isisi hã tãma podo.

²³ Taha pari ma tô duré 200 na wahub 'remhã 're hâimana. Taha ré, ma tô duré i'ra si'aibâ norĩ, i'ra sipi'õ norĩ me hã tãma tipoto za'ra.

²⁴ Tawamhã duré Nao ãma 29 na ãma iwahub ãma, ma tô i'ra Tera na isisi hã tãma podo.

²⁵ Taha pari ma tô duré 119 na wahub 'remhã 're hâimana. Taha ré, ma tô duré i'ra si'aibâ norĩ, i'ra sipi'õ norĩ me hã tãma tipoto za'ra.

²⁶ Tawamhã Tera ãma 70 na ãma wahu pari, ma tô si'ubdatõ i'ra norĩ hã tipoto za'ra, ãne isisi za'ra hã: Abrã, Nao, Harã.

Teraha 'ra norĩ wasu'u, isihudu norĩ wasu'u me

²⁷ Ã hã Teraha 'ra norĩ wasu'u, isihudu norĩ wasu'u me. Tera hã, Abrãhã mama, Naoho mama, duré Harãhã mama. Tawamhã duré Harã hã, Loho mama.

²⁸ Tawamhã Tera, Babilonia ãma i'ra Harã idâ'â uirĩ na hã te zahadu 're hâimana, 'ri nho'u Ur na isisi wa ipotozéb ãma.

²⁹ Tawamhã Abrã hã ma tô Sara'ihi ãma timro. Duré Nao, Milca na isisi ãma ma tô timro. Milca norĩ, Iscaha me hã, Harãhã 'ra sipi'õ zahuré.

³⁰ Tawamhã Sara'i hã te 'ra waihu'u ãna 're hâimana, 'razé wasété wa.

³¹ Tawamhã Tera, 'ri nho'u Ur na isisi hawi watobro wamhã, Cana'ã na romnhisi u morĩ da, ma tô ti'ra Abrãhã siré, tinhihudu Lo hã siré saprõ, Harãhã 'ra hã. Duré tisani'wa Sara'i, ti'ra mro hã ma tô duré siré saprõ. Tawamhã Harã na 'ri nho'õmo nhisi u oto sihutu wamhã, ma tô duré oto tamemhã 're hâimana za'ra.

³² Ãhã wamhã Tera, Harã ãma ma tô 205 na ãma iwahub ãma oto dârâ.