Zenezi 10 - ꞌRe Ihâimana Uꞌâsi Mono Zadawa Wasuꞌu

Nowéhé 'ra norĩ nhihudu wasu'u

¹ Ã hã Nowéhé 'ra norĩ nhihudu za'ratazé, Sẽhẽ nhihudu norĩ, duré Cã, duré Zafé. Ta norĩ 'ra hã ma tô â pusi mono parimhã, tãma 're poto za'ra.

² Zaféhé 'ra norĩ nhisi hã ãne: Gome, Magogui, Mada'i, Zavã, Tuba'u, Meseque, duré Tira.

³ Gomehẽ 'ra norĩ nhisi hã ãne: Asquenasi, Rifate, duré Togama.

⁴ Zavãhã 'ra norĩ nhisi hã ãne: Elisa, Tarsi, Quitĩ, duré Rodani.

⁵ Ãne Zaféhé nhihudu norĩ hã. Ta norĩ hã te â poré zada'ré ãma duré rob'ré za'iti mono wa, 're si'ubumro. Misi si, te a'uwẽ na tiwamri ré si tisihâiba ré si, duré timreme na 're imreme zusi mono ré si, siré si 're hâimana za'ra, upsãtã pese na.

⁶ Tawamhã duré Cãhã 'ra norĩ nhisi hã ãne; Cuxe, Mizra'ĩ, Futi, duré Cana'ã.

⁷ Cuxehe 'ra norĩ nhisi hã ãne; Seba, Havira, Sabta, Ra'ama, duré Sabteca. Ra'amahã 'ra norĩ nhisi hã ãne; Saba, duré Dedã.

⁸ Tawamhã Cuxe, Nirodi na isisi hã ma tô poto, ti'ai 'remhã danhib'ihâ'a imorĩ'rata na siptete uptabi na dama 're ihâimana mono hã.

⁹ Ta hã Uburé Danhib'apito nhimipawaptobzéb zarina, ma tô aba'wa dama iwasu'u za'ẽtẽ na 're hâimana. Tahawa te dasima da te 're nharĩ za'ra, ãne: “Ma'ãpé, Nirodihi ne hã 're ai'maihâimana aba mono, Uburé Danhib'apito nhimipawaptobzéb zarina aba pese 'wa dama isa'ẽtẽ na hã.”

¹⁰ Tawamhã dama i'rãnho'õmo na 're ihâimana mono na hã ma tô sãna'rata, 'rinho'u Babilonia ãma, duré Erequi na 'ri nho'õmo nhisi ãma, duré Acade na 'ri nho'õmo nhisi ãma, tô Sina na romnhisi ãma si'ubdatõ 'ri nho'u 're ihâimana za'ra mono ãma hã.

¹¹ Tawamhã ta hawi Nirodi ma tô mo, Asiria u. Tame 'ri nho'u Niniwé hã ma tô tawamhã 'manha, Reobote-Ir na 'ri nho'õmo nhisi hã, Cala na 'ri nho'õmo nhisi hã,

¹² duré Resẽ, Niniwé norĩ 're, Cala na isisi 're, 'ri nho'u isa'ẽne 're ihâimana mono hã.

¹³ Mizra'ĩhĩ nhihudu norĩ hã ãne: Lidia norĩ hã, Ana norĩ hã, Leabehe norĩ hã, Naptuhu norĩ hã,

¹⁴ Patrusihi norĩ hã, duré Calu norĩ hã, duré Creta norĩ hã, filisteu na a'uwẽ iwamri ihawi 're ihâimana za'ra mono da hã.

¹⁵ Tawamhã duré Cana'ã hã maparane i'ra norĩ nhisi hã ãne: Idub'rata nhisi hã Sidõ na, duré ino nhisi hã, Hete na.

¹⁶ Cana'ã nhihudu norĩ hã ãne: Zebuzeu norĩ, amoreu norĩ, gigazeu norĩ,

¹⁷ heveu norĩ, arquita norĩ, zineu norĩ,

¹⁸ arvadita norĩ, zemareu norĩ, duré hamateu norĩ.

¹⁹ Tawamhã cananeu norĩ nhipti'a zada'ré Sidõ na 'ri nho'õmo nhisi hawi, Gera na 'ri nho'õmo nhisi u hã ma tô 're hâimana, Gaza na 'ri nho'õmo nhisi 'rata 're ihâimana mono u. Sodoma na 'ri nho'õmo nhisi u, Gomora na 'ri nho'õmo nhisi u, Adma na 'ri nho'õmo nhisi u, duré Zebo'ĩ na 'ri nho'õmo nhisi u, ma tô 're hâimana, Lasa na 'ri nho'õmo nhisi 'rata 're ihâimana mono tẽme.

²⁰ Ãne Cãhã nhihudu norĩ hã. Misi si, te a'uwẽ na tiwamri ré si duré tisihâiba ré si, duré timreme na 're imreme zusi mono ré si, siré hã 're hâimana za'ra, upsãtã pese na.

Sẽhẽ nhihudu norĩ wasu'u

²¹ Tawamhã Sẽ, Zaféhé dub'rada hã, uburé hebreu norĩ hi'rata na te 're hâimana.

²² Sẽhẽ 'ra norĩ nhisi hã ãne: Elã, Assur, Arpaxade, Lude, duré Arã.

²³ Arãhã 'ra norĩ nhisi hã ãne: Uz, Huli, Gété, duré Mas.

²⁴ Arpaxade hã, Selaha mama. Duré tô Sela hã, Ébéhé mama.

²⁵ Tawamhã Ébéhé 'ra hã te maparane 're hâimana zahuré. Ihâiba amo nhisi hã, Peregui na. E marĩ wa. Ta hã 're hâimana mono ré, dasima dasipo hã hâimana dâ'âsina. Isisãnawã nhisi hã Zoctã na.

²⁶ Tawamhã duré Zoctã hã, Almodaha mama, Selefehe mama, Haza-Mavéhé mama, Zeraha mama,

²⁷ Adonirãhã mama, Uza'uhu mama, Diclaha mama,

²⁸ Oba'uhu mama, Abima'éhé mama, Sabaha mama,

²⁹ Ofihi mama, Haviraha mama, duré Zobabehe mama. Ã norĩ hã uburé pese te Zoctãhã 'ra hã 're hâimana za'ra.

³⁰ Ta norĩ hã ma tô Mesa na 'ri nho'õmo nhisi hawimhã, Sefa na 'ri nho'õmo nhisi u 're hâimana za'ra, bâtâ pusizém niwĩ ẽne 're ihâimana mono ãma.

³¹ Ãne Sẽhẽ nhihudu norĩ hã. Misi si te a'uwẽ na tiwamri ré si duré tisihâiba ré si, duré timreme na 're imreme zusi mono ré si, te siré hã 're hâimana za'ra, upsãtã pese na.

³² Ã hã Nowéhé hawimhã te a'uwẽ mono bâ 're dahâimana za'ra, isihudu na we 're idahâimana za'ra mono sidâpâsi. Tawamhã ta hã â pusi mono parimhã, Nowéhé nhihudu dawamri mono bâ 're idahâimana za'ra mono norĩ, ma tô ti'ai mono bâ da te ropé.