Salmu 95 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono ãma danho're na dawatazé wasu'u

¹ We ai'aba'réi wa'aba, Uburé Danhib'apito ãma wanho're na wawata za'ra da! Duré wato sina, ẽtẽ tõmo wawẽ ne te te 're iwa'anho'reptui mono 'wai ãma wawata za'ra wa'aba.

² Oto wasi'aba'réi wa'aba, isõ're u ãma wawata za'ra da, wanho're na. Duré wato sina wanho're na ãma wazadawa'a'a wa'aba.

³ E marĩ wa. 'Re ihâimana u'âsi mono hã sa'ẽtẽ uptabi di. Duré Apito isa'ẽtẽ uptabi uburé ihâiba'õ norĩ nhisiwi 're isãmra mono.

⁴ Ẽtẽ na ab're 'rehâ uptabi hawi, ẽtẽ nhisi uptabi u hã te uburé marĩ hã tãma 're hâimana za'ra.

⁵ Âporé mono zama te tãma 're hâimana za'ra, te te 're apoto mono wa. Ti'ai 'ré zama ma te duré poto.

⁶ Oto we ai'aba'réi wa'aba, Wanhib'apito ma wahi'rãtitõ wasi'ubumro da, ãma wawata za'ra da. Oto tãma wasi'ubumroi wa'aba, wa'apoto mono 'wai ma, wahi'rãtitõ.

⁷ Õ hã, wate 'Re ihâimana u'âsi mono. Wa norĩ hã a'uwẽ te te 're iwa'anhimroi mono. Duré wa norĩ hã pone'ẽrebâ ne, te te õ hã 're iwa'a'madâ'â pese mono. Tahawa, ã bâtâ na ãne te te inharĩzé hã te za iwapari za'ra wa'wa:

⁸ “Aipẽ'ẽ tete na 're aihâimana za'ra wa'aba mono õ di za, aihi'rata norĩ Meriba na romnhisi, Masa na isisi amoi ãma ihâimana za'ra sine hã, ropsi 're iropsisa'wari mono wa.

⁹ Tame ma tô ta norĩ hã siwi ĩpibu. Ĩzada ma tô duré tihâimana za'ra, uburé marĩ te tãma 're i'manharĩ za'ra mono zé hã te te siwi 're 'madâ'â mono nherẽ.

¹⁰ A'uwẽ norĩ 40 wahub 'remhã ma tô sina ĩnhiti'rui wazere pese za'ra. Tahawa, wa tô tinha ãne: ‘A'uwẽ norĩ ipẽ'ẽ 'remhã wasété uptabi za'ra di! Ĩnhimiroti te te 're iwapari za'ra mono da hã te te sima wẽ za'ra õ di!’

¹¹ Tahawa, ĩnhiti'ru na ĩhâimana wa, wa tô duré ãne ropisudu hã 'manha: ‘Ta norĩ hã niwamhã ti'a na ropisudu ihâimana u isisisi da hã mare di za, 're idawa'utu za'ra mono zéb da, ti'a za te isõmri u hã.’ ”