Salmu 91 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, wa'wawi 're isimapa mono wasu'u

¹ Ni'wa hã, 'Re ihâimana u'âsi mono danhipai u 're Isãmra mono nhimi'madâ'âzéb zahâpâ 're isãmra mono hã, duré danhipai u Iwaihu'u pese uptabi nhimi'awã zahâpâ sima iwẽ na 're iwa'utu mono hã,

² te za tãma tinha ãne, Uburé Danhib'apito ma: “Ĩte 'Re ihâimana u'âsi mono, a hã ĩ'wawi 're aimapa mono 'wa, duré 'ri 'rãihâ isiptete ne, ĩma 're i'aihâimana mono, duré te 're i'ai'umnhasi mono.”

³ Ta hã, dama i'madâ'â waihu'u'õ isimimnhasi hawimhã te za asõ'reptu, duré dahâzé isipãrĩ waihu'u pese hawimhã.

⁴ Te za duré tizaripi na hã ai'ubu. Isaripi zahâpâmhã te za asima iwẽ na 're asãmra mo. I'umnhasizé hã te za ibaihâ 'manharĩ na dasi'wawi dasimapazém ne hã ai'wawi 're simapa.

⁵ Robra na romnhimimnhasi ma hã 're aipahi mono õ di za, duré bâtâ na ti'i na da te 're i'asimrimi za'ra mono ma zama hã.

⁶ Robra na dahâzé ipire waptu na te te 're idaduri mono ma hã, 're aipahi mono õ di za, duré abzuma wa'wa marĩ iwasédé te te 're idanhimroi mono ma zama hã.

⁷ Asababa miu na darere'e nherẽ, niha wamhã 10 miu na asimire niwĩmhã duré darere'e nherẽ, te te duré i'ai'uwaimrami da hã mare di za.

⁸ Taré te za atõmo na i'madâ, niha hã iwasété norĩ ma rob'manharĩzé hã.

⁹ A hã, ma tô Uburé Danhib'apito, ai'wawi 're isimapa mono 'wa da hã tãma asisa'ré. Danhipai u 're Isãmra mono nhimi'madâ'âzéb zahâpâ 're asãmra mono da hã, ma tô duré tãma asihâiba nho.

¹⁰ Niwamhã marĩ ipire uptabi asô iwatobro da hã mare di za. Duré asõrõwa u marĩ iwasété uptabi iwisi da hã mare di za.

¹¹ 'Re ihâimana u'âsi mono hã te za tite hâiwa ãma romhuri'wa norĩ ma hã tãma rob'ru za'ra, te te siwi i'ai'madâ'â da hã, duré nimomo 're ane mono sidâpâsi, ai'wawi 're simapa za'ra mono da.

¹² Ta norĩ hã te za tinhib'rata na te te siwi 're atété, ẽtẽ na aipara wimhã 're asi'u'a mono tõ da.

¹³ Aipara na te za hu'u zérépa norĩ hã, wahi norĩ me, 're i'azu pese mo, hu'u zérépa isahi norĩ hã, duré wahi isé norĩ hã.

¹⁴ 'Re ihâimana u'âsi mono hã te tinha ãne: “Wa hã, te te 're ĩzawi pese za'ra mono norĩ hã wa za te 're anho'reptu u'âsi. Duré ĩnhisi waihu'u wẽ pese 'wa norĩ 'wawib za'ra hã, wa za 're ĩsimapa.

¹⁵ Ta norĩ hã te te 're ĩ'mahârâ za'ra mono wamhã, wa za te 're azada'âbâ. Duré ropire 're, 're hâimana za'ra mono ré hã, wa za tô isiré 're ĩhâimana u'âsi za'ra. Ta norĩ te duré 're anho'reptui mono wamhã, dama wazé pese na 're hâimana za'ra mono da hã, wa za niha na te tãma 're ab'manharĩ.

¹⁶ Tawamhã ipawa'âbâ za'ra iwẽ uptabi na wa za, 're ihâimana hâ za'ra mono zéb da hã te tãma 're anhomri. Wa za tô duré 're ĩnhiminhõ'reptui mono zé hã tãma te 're ahâi'ré.”