Salmu 78 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono wasu'u, isib'a'uwẽ wasu'u me

Asafihi nhimirob'ui'éré

¹ Ĩnhib'a'uwẽ norĩ, ma'ãpé te aima iroti za'ra wa'aba zé hã wapari pese za'ra wa'aba! Duré aipo're pese na marĩ na te aima irowaihu'u za'ra wa'aba zé hã wapari pese za'ra wa'aba!

² Romnhimiré'é na wa za ãma aima nharĩ za'ra wa'wa. Duréi pese marĩ we ihâimana dama isa'rese'õ na, wa za duré aima za'ra wa'aba hã oto hâi'ré,

³ niha na marĩ wa te 're iwapari za'ra mono hã, duré wa te 're iwaihu'u za'ra mono hã, wahi'rata norĩ te te wama 're iwasu'u za'ra mono zé hã.

⁴ Ta hã, wa'ra norĩ wi hã wa te 're udâ za'ra mono õ di za. Wa za wanhihudu norĩ ma hã Uburé Danhib'apito nhiptetezé hã wa te 're wasu'u za'ra, duré tinhiptete na marĩ te te 're i'ab'manharĩ wẽ mono zém na hã.

⁵ Uburé Danhib'apito, ma tô Izaraéu nhihudu norĩ ma, tinhimiroti hã tãma sõmri za'ra, Zacoho nhihudu norĩ ma hã. Wahi'rata norĩ ma hã ma te duré tãma waihu'u za'ra, isimiroti na ti'ra norĩ ma, te te ãma tãma 're rowasu'u za'ra mono da,

⁶ isihudu norĩ te te 're waihu'u za'ra mono da, ta norĩ zama te te duré ti'ra norĩ ma, ãma tãma 're rowasu'u za'ra mono da.

⁷ Ãne te za õ norĩ zama ti'umnhasizé, 'Re ihâimana u'âsi mono ma, te te sina tãma 're sõmri za'ra. Marĩ te te 're i'ab'manharĩ mono zém na hã ãma 're po're simrami za'ra mono õ di za. Õne u'â te za isimiroti hã te te 're wapari pese za'ra.

⁸ Ta norĩ hã tihi'rata norĩ ne, 'Re ihâimana u'âsi mono mreme na ãma 're nomro mono õ di za. Ihi'rata norĩ hã a'uwẽ iwasédé ma tô tinhimipari õ na si 're nomro. Ta norĩ hã niwamhã siptete na 'Re ihâimana u'âsi mono hã te te sina 're umnhasi za'ra mono õ di. Duré õne u'âsi õhõ ãma hã i'uwaibaba na ãma 're nomro mono õ di.

⁹ Efraĩhĩ hawi a'uwẽ si'aibâ norĩ hã simnhi'ãsi ré, duré ti'i ré ma tô bâtâ na dasi'wapéi wamhã dawi aimani za'ra.

¹⁰ Izaraéu nhihudu norĩ, 'Re ihâimana u'âsi mono tinhimiropisutu zahi te te tãma i'manharĩ za'ra zém na hã te te ãma siwi uwaimrami õ di. Duré isimiroti zarina 're inomro mono da hã te te sima wẽ za'ra õ di.

¹¹ I'ubu nho'a za'ra, marĩ iwaihu'u'õ te te tãma 're i'ab'manharĩ mono zém na hã ma tô duré ãma po're ha'âri pese za'ra.

¹² Ihi'rata norĩ nho'a marĩ iwaihu'u'õ hã, ma tô 'Re ihâimana u'âsi mono hã 'manha, Ezitu ti'ai 're, Zoã na romharé nhisi ãma.

¹³ Â na ma tô ãma aipo'o, te te ãma saprĩ za'ra da hã. Ãhã wa, te taré â zada'ré si'uiwa hã ti'âtâ zahuré, 'ri 'wawi wa'ra 'rãihâ ne.

¹⁴ Bâtâ sidâpâsi te 'Re ihâimana u'âsi mono hâiwa'a zarob'a pisutu pese na te te 're simro. Duré mara sidâpâsi te unhama ro'o pisutu pese na hã te te duré 're simro.

¹⁵ Ta hã supara 'ré na ro 're iropsa'wari mono ãma ẽtẽ tõmo wawẽ te te itopo'o hawimhã ma tô ti'ai 'rowi uptabi hawim ne â hã sa'ẽtẽ na tãma pu'u za'ra, a'uwẽ te te i'âhuri da hã.

¹⁶ Ẽtẽ tõmo wawẽ hawi panho'õmo ne â ipraba da hã ma tô âpu'u.

¹⁷ Tane nherẽ, wahi'rata norĩ, ma tô 'Re ihâimana u'âsi mono wi tiwasédé te te 're i'manharĩ za'ra mono zém na hã te te ãma 're uzusi u'âsi za'ra. Ta norĩ hã ma tô supara 'ré na ropsi 're iropsa'wari mono ãma te te siwi 're wẽ'õ pese za'ra, danhipai u Isiptede 're ihâimana mono hã.

¹⁸ Tahawa, niha na rosa'rada sihawim na te te sima i'manharĩ za'ra zarina, ma tô 'Re ihâimana u'âsi mono hã niha zô sina te te 're pibu za'ra, dasa te te tiwi 're iwaptẽrẽ za'ra mono na.

¹⁹ 'Re ihâimana u'âsi mono na ma tô ãne nharĩ wasété za'ra: “E 'Re ihâimana u'âsi mono waihu'u pese bâ supara 'ré na ropsi 're iropsa'wari mono ãma dasa te te wama isõmri za'ra da hã.

²⁰ Ãne hã tô wama waihu'u pese za'ra di, ẽtẽ tõmo wawẽ te te õ hã topo'o wa, â ihawi iprabazém na, panho'õmo ãma ipraba ne hã. E ãne nherẽ, i'u'ẽtẽ wapu za te te wama isõmri za'ra da hã tãma waihu'u pese bâ. E ãne nherẽ, tinhib'a'uwẽ norĩ ma, romnhi hã za te te tãma sõmri za'ra da bâ.”

²¹ Ãne hã Uburé Danhib'apito te te sina wapari wamhã, ma tô sada tinhiti'ru za'ra. Tahawa, unhama ro'o na ma tô susi za'ra. Ma tô duré sada isiti'ru za'ra zé hã sina hâimo pese.

²² E marĩ wa. Ta norĩ hã 'Re ihâimana u'âsi mono te te 're saze za'ra mono õ wa, duré tiwaihu'u pese na za te te 're isõ'reptu za'ra mono zém na te te sina 're umnhasi za'ra mono õ wa.

²³ Tane nherẽ, 'Re ihâimana u'âsi mono, hâiwa ma, te te nharĩ wamhã, ma tô hâiwa 'ridawa norĩ ma hã tãma 're 'ru za'ra, si'uihâ na si'ridawa za'ra da hã.

²⁴ Ma tô hâiwa hawi i'u'ẽtẽ wapu ne hã mana na isisi tisa te te ãma huri mono da, tãma rere'e mono da hã nasi tãma 'manharĩ za'ra.

²⁵ Ãne wa, te a'uwẽ norĩ hã hâiwa ãma romhuri'wa norĩ sazém na i'u'ẽtẽ wapu na tisa hã te te huri. 'Re ihâimana u'âsi mono, tisa sima iwẽ na te te huri mono da hã ma tô tãma sõmri za'ra.

²⁶ Taha pari hâiwa hawi, bâtâ pusizém hawi rowa'u te te rowapõrĩ da hã ma tô wada'u. Hâiwa nhimire hawi tiwaihu'u pese na rowa'u watobro da hã, ma tô duré wada'u, te te rowapõrĩ da.

²⁷ A'uwẽ nhisiwi, si ahâ uptabi na rere'e da hã ma tô 'manha, robzapru te te 're irob'upsibi mono ne, niha wamhã duré âporé zaihâ na supara 'ré 're isimi'wara mono ne.

²⁸ Romhâ 'manharĩ na 'ri isisõré wa'wa ma rere'e, si norĩ hã, 'ri mana wi baba.

²⁹ Ãhã wamhã, Izaraéu nhihudu norĩ sima iwẽ na ma tô tihu. Ãne ma tô te te 'mahâpãrĩ.

³⁰ Tane nherẽ, zahadu te te huri ré, te te 'mahâpãrĩ uptabi za'ra õ ré,

³¹ ma tô 'Re ihâimana u'âsi mono sada tinhiti'ru za'ra. Tahawa Izaraéu nhihudu aibâ isiptete norĩ iprédupté hã, ma tô uprosi.

³² Tawamhã marĩ dama iwaihu'u'õ te te tãma 'manharĩ parib za'ra nherẽ, ma tô nasi tiwasété 'manharĩ na hã te te ãma uzusi u'âsi za'ra. 'Re ihâimana u'âsi mono na tinhimizaze hã te te sima 're wẽ za'ra mono õ di.

³³ Tahawa, ma tô ihâimanazéb za'ra waptu na tiwi 'rãtõ za'ra, dazadawa wa'u'u na isa'uri na ne, duré siwa'ru bâtâ na waptu na marĩ ipipa 're iwairébé mono ne.

³⁴ 'Re ihâimana u'âsi mono, te te 're ahâ za'ra mono sidâpâsi, 're dâ'â za'ra mono wamhã, ma tô ihâiba ré norĩ hã apâ sima sô 're sõpré. Ma tô duré apâ pẽ'ẽ toi wẽ te, itẽme 're sipizari za'ra.

³⁵ 'Re ihâimana u'âsi mono ãma ma tô 're po're pu'u za'ra, ẽtẽ tõmo wawẽ ne tãma 're ihâimana za'ra mono na hã. Danhisi danhipai u Isiptede 're isãmra mono Isõ'reptu za'ra 'wa na tãma 're ihâimana za'ra mono na hã ma tô duré ãma 're po're pu'u za'ra, we tãma 're romhâimana za'ra mono sidâpâsi.

³⁶ Tane nherẽ, ma tô apâ duré uburé sadawa nhipese na hã 're nomro. Imreme za'ra hã senai õ na si ma tô duré 're nomro.

³⁷ Tihâiba uptabi na sena na ãma tãma 're hâimana za'ra mono õ di. 'Re ihâimana u'âsi mono, tinhimiropisutu zahi te te aré tãma i'manharĩ za'ra zém na hã, duré sena na ãma 're nomro mono õ di, ta norĩ hã.

³⁸ Tane nherẽ, 'Re ihâimana u'âsi mono, tinhib'a'uwẽ ãma hã ma tô 're siwamri u'âsi za'ra. Iwasédé te te oto duré ãma 're ab'madâ'â mono õ di. Tahawa, õne haré te te duré 're a'uprosi mono õ di. Duré sada za'ra 're siti'rui pusi mono da nherẽ, ma tô nasi 'râwi sisõwada, sada 're siti'rui pese za'ra mono tõ da.

³⁹ Õ norĩ ãma hã ma tô 're po're pu'u u'âsi za'ra, idâ'â pese za'ra na hã, aiwa rowa'u te te 're rowapõrĩ mono pari, õne haré sô 're irob'é'é za'ra mono ne hã.

⁴⁰ E niha ma tô 'Re ihâimana u'âsi mono wi, rop si 're irosa'wari mono ãma hã nasi tiwi isipizari na sahu ahâ za'ra! E niha ma tô duré tiwasété 'manharĩ na nasi ãma sahu ahâ za'ra, robzei'õ hã te te ãma tiwi iwazere za'ra zéb da hã.

⁴¹ Tinhimi'manharĩ wasété zém na te te nasi ãma isisiwi za'ra zarina, ma tô 'Re ihâimana u'âsi mono hã siwaihu'u za'ra ãna taha na nasi ãma siwi pibu. Taha zarina ma tô duré 'Re ihâimana u'âsi mono, Izaraéu nhihudu norĩ ma, marĩ iwasédé, ãma 're ihâimana mono õ, iwẽ uptabi wi, nasi ãma tiwi robzei'õ zani za'ra.

⁴² Ta norĩ hã ma tô isiptete 'manharĩzém na ãma po're ha'âri pese za'ra, bâtâ na te te isõ'reptu za'ra zém na hã isitob'ru norĩ wi.

⁴³ Marĩ iwẽ uptabi, dama isa'rese'õ iwaihu'u'õ, Zoã romharé nhisi ãma bâtâ na te te tãma i'manharĩ za'ra zém na hã ma tô po're ha'âri pese za'ra, Ezitu ti'ai ãmam na.

⁴⁴ Tame ma tô panho'õmo mono na â hã âwaprui mono da hã 'manha. Ãne wa, ezipsiu norĩ ma, â hã hâimana õ di, te te i'âhuri da hã.

⁴⁵ Ubu ahâ uptabi na hupu'u da hã ma tô tãma rob'ru, taha na a'uwẽ norĩ hã te te ãma robzépata za'ra da. Uti zarãpré ma, ma tô duré rob'ru, rom na hã uburé marĩ te te tiwi i'uprosi za'ra mono da hã.

⁴⁶ Tawamhã 'riti ma zama hã ma tô rob'ru, amnho te te itehâri mono, te te tiwi ihuri mono da hã, duré rob're te te tiwi iwamnarĩ pese za'ra mono da hã.

⁴⁷ Tawamhã tã ipĩni nhama ré na, ma tô uwa 'ru daburu na hã tiwi uprosi za'ra. Duré figuera wede i'rãi ré hã ma tô rowahâzé u'ẽtẽ na hã tiwi uprosi za'ra.

⁴⁸ Powawẽ hã, pone'ẽrebâ norĩ zama hã tã ipĩni nhama za'ẽtẽ na, duré tãiwapsa'a na tiwi si'utõrĩ da hã ma tô duré tãma 'manharĩ za'ra.

⁴⁹ Õ hã ma tô unhama ne na tinhiti'ru na hã duré sahi uptabi na hã sada tihâimana za'ra, hâiwa ãma romhuri'wa ahâ uptabi na te te 're da'uprosi mono da, we dazô 're inomro mono ne.

⁵⁰ Tawamhã tinhiti'ruzé wi hã sitété õ di. Duré dâ'â tõ za'ra da hã, te te tãma ba'a za'ra õ di. Tãma irob'manharĩ wasété za'ra zé ipipa na hã ma tô uprosi.

⁵¹ Ezitu ti'ai ãma 'ri mono bâ hã ma tô 'Re ihâimana u'âsi mono, da'ra si'aibâ ipoto'rata si hã uprosi.

⁵² Taha pari, pone'ẽrebâ 'madâ'â'wa tinhimizama te te 're isimroi mono ne, ma tô 'Re ihâimana u'âsi mono, Izaraéu nhihudu norĩ hã Ezitu hawimhã te te simro, rop si 're irosa'wari mono wa'waibaba.

⁵³ Tawamhã ta hã tãma romnhimimnhasi ãna te te simro mono wa, te pahi ãna tihâimana za'ra. Ãhã wamhã, isitob'ru norĩ si hã ma tô âporé na â hã suwa za'ra.

⁵⁴ 'Re ihâimana u'âsi mono hã ma tô Izaraéu nhihudu norĩ, tinhipti'a iwazéb zahi u hã te te simro, ẽtẽ ãma tô õ hã te te da'ãma i'ai'utézéb u.

⁵⁵ Tawamhã isib'a'uwẽ, ti'ai u te te sina rotété za'ra mono sidâpâsi, ma tô ti'ai 're, 're idahâimana siromo za'ra mono norĩ hã te te tãma 're satõrĩ za'ra. Tahawa, Izaraéu nhihudu wa'õtõ norĩ 're ma, ma tô ti'a hã te te tãma 're po'o za'ra. Duré i're 're idasi'ubumroi mono norĩ nhorõwa siromo wa, Izaraéu nhihudu 're ihâimana za'ra mono da hã ma tô tãma sa'ré za'ra.

⁵⁶ Tane nherẽ, Izaraéu nhihudu norĩ, 'Re ihâimana u'âsi mono danhipai u 're isãmra mono wi ma tô tiwi aipizari za'ra. Ma tô duré 'Re ihâimana u'âsi mono hã sihâimana waihu'u za'ra ãna sina siwi pibu. Tahawa, isimiroti hã te te 're wapari za'ra mono õ wa,

⁵⁷ ma tô apâ sima iwẽ na marĩ iwasété zô hã 're sipizari za'ra, tihi'rata norĩ ne. Umnhi'ãsi 'manharĩ wasédé hã dama i'umnhasi õ ne, te umnhasi ãna hã 're hâimana za'ra.

⁵⁸ Ta norĩ hã ihâiba'õ norĩ ãma 're iwata za'ra mono zéb da, wedezane 'manharĩ hã te te siwi 're i'manharĩ mono u'âbâmhã ma tô siwi te te 're siti'ru zani. Duré senai'õ ihâiba'õ norĩ poto na romhâibarĩ te te siwi 're i'manharĩ mono u'âbâmhã ma tô duré te te 're i'ruiwapari za'ra mono zé hã te te sina tãma 're sani za'ra, 'Re ihâimana u'âsi mono ma hã.

⁵⁹ Ãne hã 'Re ihâimana u'âsi mono te te 'madâ'â wamhã, ma tô tinhiti'ru. Ma tô duré tinhib'a'uwẽ hã siwi awẽ'õ pese.

⁶⁰ Tahawa, romhâ 'manharĩ na tinhorõwa iwazéb zahi, Silo ãma 're isa mono hã ma tô tirẽ, 'ri 're dawa'wa, iwa 're ihâimana mono zé hã.

⁶¹ Wanhitob'ru norĩ ma, ma tô tãma sa'ré za'ra, tinhimiroti ré ite wedehâ're 'manharĩ hã te te wawi âri za'ra da hã, 're ihâimana mono hã iwaihu'u pese ré, duré ite rowẽ za'ẽtẽ ré hã.

⁶² Tawamhã tinhib'a'uwẽ da siti'ru wa, ma tô isitob'ru norĩ ma hã tãma sa'ré za'ra, sib'ézé 'wa pa na te te siwi simro da.

⁶³ Tahawa, ipréduptém norĩ hã ma tô dasi'wapé na ai'utõ. Tahawa duré azarutu norĩ hã ni'wai ãma 're mro za'ra mono da hã waihu'u õ di.

⁶⁴ Tawamhã sasedoti norĩ sib'ézé 'wa pa na ma tô ai'utõ. Tahawa, i'amo aba norĩ hã ãma 'ru'ru waihu'u õ di.

⁶⁵ Tawamhã ni'wa topo'o wim ne, ma tô oto Uburé Danhib'apito hã rob'madâ, aibâ isib'ru uwa 'rãi wa'u isé na si'rãiwamnarĩ pari, itopo'o wim ne.

⁶⁶ Õ hã ma tô tinhitob'ru norĩ ma sisa'rei mono da hã, duré da te ãma 're ai'uté za'ra mono wa, õne u'â tãma rowazép sina 're hâimana za'ra mono da, tãma 'manharĩ za'ra.

⁶⁷ Õ hã ma tô duré Zuzéhé nhihudu norĩ hã siwi wẽ'õ za'ra. Efraĩhĩ hawi a'uwẽ norĩ hã te te duré pisutu za'ra õ di.

⁶⁸ Ta norĩ wa'rãmi, ma tô Zudaha hawi a'uwẽ si hã pisutu za'ra. Siã na ẽtẽ nhisi te te 're isawi pese mono ma tô duré pisutu.

⁶⁹ Tawamhã tinhorõwa 'ri, hâiwa ãma 'ri, 're isa mono ne hã ma tô tete na 'manha, ti'a õne u'â tete na 're isa'wari mono ne.

⁷⁰ Tawamhã 'Re ihâimana u'âsi mono, ma tô Dawi tãma 're iromhuri mono 'wa hã pisutu. Ma tô pone'ẽrebâ 'wawi wa'ra hawimhã waze,

⁷¹ pone'ẽrebâ ubumroi'wa na 're ihâimana mono zém hawimhã. Ta hã ma tô Izaraéu nhihudu norĩ nhib'apito na tãma 're hâimana za'ra mono da tisẽ, pone'ẽrebâ 'madâ'â'wa ne 'Re ihâimana u'âsi mono nhib'a'uwẽ ma, 're hâimana mono da.

⁷² Tawamhã Dawi, tihâimanazé te te 're pibui wẽ mono sina ma tô te te 're ab'madâ'â. Duré tinhimirowaihu'u wẽ na ma tô te te 're anhimro, a'uwẽ norĩ hã.