Salmu 69 - ꞌRe Ihâimana Uꞌâsi Mono Zadawa Wasuꞌu

Aibâ ãma da te 're iro'wa'rutu mono, 'Re ihâimana u'âsi mono wi te te 're irowaptẽrẽ mono zé wasu'u

Dawihi nho're

¹ 'Re ihâimana u'âsi mono, ma'ãpé ĩnho'reptu na, â hã ĩbutu u we oto te te sina ropto wa!

² Rowai'o i'rehâ uptabi 're wa ãzébré pe. Nimomo ĩpara hã te sãrĩ waihu'u õ di, ãma ĩsiwazere da hã. Â 'rehâ u ĩzébré wa, te â wara nho'u hã ĩ'mazébré pese.

³ Ĩnho'reptuzéb zô ĩhârâ wa'a wa, wa ĩnho're'a. Ĩtõmo zadâ'â zahuré di oto, ĩte 'Re ihâimana u'âsi mono, asô 're ĩnhimipari mono zém na ĩnho'reptu da.

⁴ Taré nherẽ, ĩzada isiti'ru za'ra norĩ hã ahâ uptabi di, ĩ'rã na ĩzéré 're ihâimana za'ra mono nhipai u. Ĩnhitob'ru norĩ hã te ĩhâiba na sadawa nhipese na te te 're rowasu'u za'ra. Ta norĩ hã siptete di. Te te sima 're wẽ u'âsi za'ra, te te siwi ĩwĩrĩ da hã. Duré marĩ te simi'uri õ nherẽ, te ta norĩ hã te te ĩwi 're waptẽrẽ zadawa za'réi'õ za'ra, te tãma sõmri za'ra da hã.

⁵ 'Re ihâimana u'âsi mono, 're ĩwasété mono zé hã aiwi 're sima'uri waihu'u mono õ di. Duré ĩ'rã nhimiza'rese ãna 're ĩhâimana mono zé hã aima waihu'u pese di.

⁶ Uburé Danhib'apito, 'Re ihâimana u'âsi mono Iwaihu'upe, te te sina 're i'ai'umnhasi za'ra mono norĩ ma, ĩnhimi'manharĩzé u'âbâmhã te ĩsina tãma rowazé wazere za'ra tõ da, ĩzawi na hã ĩpawapto na! Izaraéu nhihudu norĩ te, 'Re ihâimana u'âsi mono, ai'ãma 're iwata za'ra mono norĩ ma, te ĩsina tãma rowazé wazere za'ra tõ da, ĩzawi na hã duré ĩpawapto na!

⁷ Te 're i'asawi mono zéb zarina, wa tô da te ĩ'ãma 're iwasété za'ra mono zéb da hã 're ĩnhiptete. Taha zarina ma tô duré ĩma 're irowazé mono zé hã te te 're ĩ'ubu zuwa.

⁸ Tahawa, ĩsisãnawã norĩ ma, aimawi a'uwẽ ne, wa 're ĩhâimana. Ĩna 'ra norĩ ma, ĩza'rese za'ra õ ne, wa 're ĩhâimana.

⁹ Asõrõwa zawi pe ĩma 're ihâimana mono hã te unhama ne ĩpẽ'ẽ 'remhã ĩma 're hâimana. Duré ai'ãma iwasété'wa norĩ, te te ai'ãma 're iwasété za'ra mono zé hã te duré ĩnhisiwimhã 're waptã'ã.

¹⁰ 'Re ĩsiwa'õi mono wamhã, duré ĩsai ãna 're ĩsimasisi mono wamhã, te ĩ'ãma 're dawa'ẽ u'âsi za'ra.

¹¹ 'Re da'ru'ru mono wa, da'uza ihâi wasédé te ĩsima 're zai mono sidâpâsi, te ĩ'ãma 're dato za'ra.

¹² 'Re idasisõpẽtẽ pese za'ra mono zéb ãma, te duré te te sima ĩ'ãma 're robzanhamri za'ra. Âzé zei'wa norĩ hã te duré ĩ'ãma niha na 're sõ're za'ra, siwa'ru.

¹³ Tane nherẽ, Uburé Danhib'apito, wa hã wa za aiwi rowaptẽ. 'Re ihâimana u'âsi mono, ma'ãpé te ãma aiwi irowaptẽrẽzém na hã ĩzada'âbâ, nimahã bâdâ asima iwẽ zéb zarina, 're ĩzawi pese uptabi mono wa! Duré ĩnho'reptu na, iropisutuzéb zarina.

¹⁴ Rob'uwa na ĩzébré tõ da, ĩwazere. Duré ma'ãpé ĩnhitob'ru norĩ na hã ĩma ba'a, duré â 'rehâ na zama.

¹⁵ Â sisaru te te duré ĩhâiba ubu tõ da ĩma ba'a. Ã 'rehâ na ĩzébré tõ da, ĩma ba'a. Duré adâ'â da, ab're hã te te ĩnhomri tõ da, ĩma ba'a.

¹⁶ Uburé Danhib'apito, ma'ãpé aiwi ĩnhimirowaptẽrẽzém na hã ĩzada'âbâ, asimizawi pese wẽ uptabi zarina. Duré ĩ'ãma 're aiwamri za'ẽtẽ mono zarina, ma'ãpé ĩzô aipi'ra na.

¹⁷ Asib'a'uwẽ wi, ĩwi hã aima'uri tõ. Ãhã na awa'awi na ãma ĩzada'âbâ, ĩma romnhimimnhasi za'ẽtẽ na ĩhâimana wa.

¹⁸ We ĩtẽme asina rotété 'râwi, ĩnho'reptu da. Ĩnhitob'ru norĩ hã ĩma ba'a.

¹⁹ Aima hã waihu'u pese di, da te ĩ'ãma 're iwasété za'ra mono zé hã, ĩwi 're irowazé mono zé hã, duré 're ĩnhisé mono wa, te 're irobzépata mono zé hã. Uburé ĩnhitob'ru norĩ hã aima hâimanazé waihu'u pese za'ra di.

²⁰ Da te ĩ'ãma 're iwasété za'ra mono zé hã ma tô te 're ĩsiri wai're. Tahawa, marĩ iwẽ zô hã oto 're ĩnhimnhasi waihu'u mono õ di. Ni'wa ĩ'ãma isiwamri zô ne, wa aré mapa. Tane nherẽ, ni'wa hã ĩ'ãma siwamri õ di. Duré ni'wa te te sina ĩpẽ'ẽ tété da hã, wa aré mapa. Tane nherẽ, ni'wa ĩtẽmemhã we morĩ õ di.

²¹ Mram na 're ĩhâimana mono wamhã, ma tô duré õ norĩ hã marĩ isé pire na iwazari na ĩsa hã te te ĩma 're sõmri za'ra. Duré 'rubu na 're ĩhâimana mono wamhã, ma tô vinagri marĩ zazazép si te te ĩma 're sõmri za'ra, te 're hâsi mono da hã.

²² Datoi wa dasa isa'ẽtẽ siwa'ro'o, ropire da te dasisô 're isani za'ra mono da si, ĩma iwẽ hã. Duré danhimizaze na dato da te dasima 're i'manharĩ za'ra mono zé para, 're idasisito za'ra mono zéb u 're idarere'e mono da si, ĩma iwẽ hã!

²³ 'Re ihâimana u'âsi mono, ma'ãpé õ norĩ hã toptâ'â za'ra na, te te rob'madâ'â waihu'u za'ra tõ da! Duré ma'ãpé hâiba popo'o u'âsi za'ra da, tãma 'manharĩ za'ra na!

²⁴ Õ norĩ nhisiwimhã sada asiti'ru za'ra zé hã ma'ãpé sa'wari! Duré asiti'ruzé hã te te sasãmri za'ra da, tãma 'manharĩ za'ra na!

²⁵ Isib'ri za'ra, baba na 're isimasa mono da si, tô ĩma iwẽ hã! Ni'wa duré romhâ 'manharĩ na 'ri 'remhã hâiba ré hâimana ãna!

²⁶ Ta norĩ hã, a hã 're i'ahâ za'ra mono nhisiwimhã te duré tinhimi'manharĩ wasétézém na hã te te ãma tãma 're sisiwi u'âsi za'ra. Duré a hã, ni'wam norĩ 're i'u'a za'ra mono para, te te 're irobzépata za'ra mono zém na te duré õ norĩ hã 're wa'ẽi u'âsi za'ra.

²⁷ Õ norĩ, tiwasédé te te 're i'manharĩ za'ra mono zém na hã ãma 're arob'ui'éré za'ra mono. Duré 're ida'anho'reptui mono zé te te sina 're uwe za'ra mono tõ da hã, tãma 're arowairébé mono tõ.

²⁸ Tahawa, 'Re ihâimana u'âsi mono 'rata za 're idahâimana u'âsi za'ra mono norĩ nhisi ré ibaihâi hawi isisi za'ra hã tiwi i'apari da si ĩma iwẽ hã. Duré i'uwaibaba 're ihâimana za'ra mono norĩ nhisi zu isisi za'ra na 're irob'ui'éré mono õ da si, ĩma iwẽ hã.

²⁹ Wa hã marĩ iwẽ zô 're ĩnhimipari mono ãna, wa te 're robzépata. 'Re ihâimana u'âsi mono, ĩwahutu, duré ĩnho'reptu na!

³⁰ 'Re ihâimana u'âsi mono ãma danho're na hã wa za 're ĩwata. Duré danhipai u iwaihu'u pese na wa za te dama 're wasu'u wẽ sõ'awi, ãma 're ĩwata mono zém na hã.

³¹ Ã hã, Uburé Danhib'apito ma hã tãma wẽ uptabi di za, powawẽ iba'u iprédup siromo zata na tãma danhoprubzém nhipai u hã.

³² Tawamhã da te ãma 're iwati za'ra mono norĩ, ãne hã te te 're 'madâ'â za'ra mono wamhã, tãma 're rowẽ za'ra mono di za. Duré 'Re ihâimana u'âsi mono ãma 're iwata za'ra mono hã 're to za'ẽtẽ za'ra mono di za.

³³ E marĩ wa. Uburé Danhib'apito, marĩ zô tiwi 're iro'wanhi'riti za'ra mono norĩ, te te 're awapari mono wa, duré tinhib'a'uwẽ dazazéb 're, 're isimasa mono norĩ te te 're ab'madâ'â rẽme mono õ wa.

³⁴ Ti'a norĩ hâiwa me, 'Re ihâimana u'âsi mono ãma hã aiwata aba, duré âporé norĩ hã, duré uburé ropodo iwa 're ihâimana za'ra mono hã!

³⁵ Ta hã te za Zeruzalẽ 'ri hã sõ'reptu. Zuda ãma te za duré 'ri nho'õmo mono hã apâ wahutu za'ra. Isib'a'uwẽ te za tame 're hâimana za'ra. Te za duré ãma 're sipti'a za'ra.

³⁶ 'Re ihâimana u'âsi mono ãma si 're inomro mono nhihudu hã te za ti'a na ti'rata norĩ uirĩ na ãma 're sipti'a za'ra. Duré te te 're isawi pese za'ra mono norĩ hã te za i'remhã 're hâimana za'ra.