Salmu 51 - ꞌRe Ihâimana Uꞌâsi Mono Zadawa Wasuꞌu

Dawi hã siwẽ'õ wa, 'Re ihâimana u'âsi mono ma, iwasédé te te ãma 're ab'madâ'â mono tõ da, te te tiwi iwaptẽrẽzé wasu'u

Dawihi nho're, Bate-Sebaha na tiwasédé te te 'manharĩ wa, Natã iwasété na te te ãma tãma nharĩ pari, te te irob'ui'érézé

¹ 'Re ihâimana u'âsi mono, asimizawizéb zarina, ma'ãpé ĩ'ãma aiwamri na. Duré sa'ẽtẽ na ĩ'ãma aipẽ'ẽzé zarina, ma'ãpé ĩwasédé hã ĩma pari.

² Ma'ãpé uburé marĩ te 're i'ab'manharĩ wasété mono zé hã ĩma pari pese. Duré ma'ãpé ĩ'upsõ na, 're ĩwasété mono zém na hã.

³ E marĩ wa. Marĩ na te 're i'upai mono zé hã ĩma waihu'u pese di. Ta hã te te sina 're ĩnho're u'âsi.

⁴ Aiwi wa tô ĩwasédé hã 'manha, tô aiwi si. Aima iwẽ'õ hã wa tô 'manha. Tahawa, tô ibâre ma tô niha hã ĩ'ãma iwaihu, taha zarina niha na ĩma irob'manharĩ da hã.

⁵ Sena ĩpotozém hawim haré, te ĩwasédé hã ĩma 're hâimana. Ĩna wasãzém hawim haré, wa tô ĩwasété ré hã 're ĩnhamra tô.

⁶ A hã, dapẽ'ẽ 're, sena na i'uwaibaba na si 're idahâimana za'ra mono zép si aima iwẽ hã. Tahawa ma'ãpé ĩpẽ'ẽ 'remhã asimirowaihu iwẽ hã ĩma sa'ẽtẽ.

⁷ Ma'ãpé ĩwasédé hã ĩma pari, ĩ'uptob ãna oto ĩhâimana da. Duré ĩ'upsõ na, rowahâ pĩni u'ẽtẽ zarob'a nhipai u, ĩzarob'a uptabi na 're ĩhâimana mono da.

⁸ Ma'ãpé ĩpẽ'ẽ 're ĩto sina 're ĩhâimana mono zé hã apâ ĩma sõmri, a hã 're ĩwati mono nherẽ, robze sina apâ 're ĩnhamra mono da.

⁹ Ĩwasédé hã ma'ãpé ĩ'ãma 're a'madâ'â mono tõ. Uburé pese ĩma pari, marĩ te 're i'ab'manharĩ wasété mono zé hã.

¹⁰ 'Re ihâimana u'âsi mono, ma'ãpé ĩpẽ ĩpe hã sena uptabi hã ĩma sõmri. Ma'ãpé ipẽ'ẽ 're ĩnhiptede ité hã apâ ĩma sõmri.

¹¹ 'Re i'asãmra mono zém hawimhã ma'ãpé ĩwazere tõ. Duré aipẽ'ẽzani iwẽ hã ĩhawimhã wazere tõ.

¹² Apâ rowẽzém na 're ida'anho'reptui mono zé hã, ma'ãpé apâ ĩma sõmri. Duré ma'ãpé asimiroti te 're iwapari pese mono da hã, 're ĩ'upari mono.

¹³ Ãne wamhã, wa za asimiroti te te 're iwapari za'ra mono õ norĩ ma, te tãma ãma 're aroti. Tawamhã te za apâ atẽmemhã 're sipizari za'ra.

¹⁴ 'Re ihâimana u'âsi mono, Ĩnho'reptui'wa, ĩdâ'âzé wi hã ma'ãpé ĩnho'reptu na. Tawamhã ĩto sina, wa za asiminho'reptuzé wasu'u na hã te dama ãma 're rob'mahârâ!

¹⁵ Uburé Danhib'apito, ma'ãpé ĩzadawa na damreme iwẽ hã ĩma 're sõmri mono. Tawamhã wa za ai'ãma 're ĩwata u'âsi.

¹⁶ A hã asima 're wẽ mono õ di, danhimizama zata na aima 're ĩnhopru mono da hã. Asima wẽ 'wa'âhã, wa aré tô ãma aima 're ĩnhopru.

¹⁷ 'Re ihâimana u'âsi mono, aima ĩnhoprubzé hã, ĩpẽ'ẽ 'remhã 'râwi 're ĩsi'madâ'â zei mono õ zém na. A hã dapẽ'ẽ 're, 'râwi 're idasi'madâ'â ze za'ra mono õ zé hã duré dawasété wa, 're idasiwẽ'õ za'ra mono zé hã, 're awẽ'õ mono õ di.

¹⁸ 'Re ihâimana u'âsi mono, ma'ãpé asimi'manharĩ wẽ zéb zarina, Zeruzalẽ hã pawapto na, apâ i'wawi wa'ra 'rãihâ hã da te dasiwi 'manharĩ da!

¹⁹ Tawamhã danhimizama zata na aima danhoprubzé hã te za asima 're i'awaibui wẽ mo. Te za duré powawẽ iba'õmore ihâiba té wedezane nhisiwimhã da te aima 're zata za'ra.