Salmu 44 - ꞌRe Ihâimana Uꞌâsi Mono Zadawa Wasuꞌu

Ni'wa norĩ ãma, da te ãma ai'uté za'ra nherẽ, 'Re ihâimana u'âsi mono, te te sina 're i'umnhasi za'ra mono zé wasu'u

¹ 'Re ihâimana u'âsi mono, wahi'rata norĩ te te wama 're irob'rãzarõtõ za'ra mono wasu'u zé hã wa tô wapo're na wa te 're wapari za'ra, duréihã ta norĩ 're hâimana za'ra mono ré, uburé marĩ iwẽ 're i'a'manharĩ mono zém na hã.

² A'uwẽ aimawi norĩ, ai'ãma isimizazei'õ 're ihâimana za'ra mono, a hã isipti'ai hawi 're sani za'ra mono wa, asib'a'uwẽ norĩ oto iwa 're iséme za'ra mono zém na zama ma tô duré te te wama 're wasu'u za'ra. Tô õ norĩ a'uwẽ aimawi norĩ ma, niha na tãma 're rob'manharĩ za'ra mono wa, asib'a'uwẽ norĩ ma, iwẽ na si oto 're romhâimana za'ra mono da, 're i'apawapto mono na hã ma tô duré te te wama 're wasu'u za'ra.

³ Wahi'rata norĩ hã sib'ézé i'wa pa nai õ di, ti'a te te siwi dawi i'âri hã. Duré tinhiptete nai õ di, te te da'ãma i'ai'uté za'ra hã. Ta norĩ hã aiwaihu'u pese na si, duré asiptete na si duré ai'ãma rowa'a na si ma tô da'ãma ai'uté za'ra. Ãne zarina, ma tô a hã asimizawizé hã ãma ihâi'ré za'ra.

⁴ A hã Ĩnhib'apito, duré ĩte 'Re ihâimana u'âsi mono. A hã te asib'a'uwẽ norĩ ma da'ãma ai'utézé hã 're i'anhomri mo.

⁵ Asiptete zarina, wa wanhitob'ru norĩ ãma wa te 're ai'uté za'ra. Wasiré aihâimana za'ra wa, te te iwa'wapé za'ra norĩ hã wa wapara na wa te 're wati'i za'ra.

⁶ Ĩnhimnhi'ã, wa hã te umnhasi õ di. Duré ĩte sib'ézé 'wapa hã te da'ãma ai'utézé hã te te ĩma sõmri õ di.

⁷ Tazahã aiwétési ma tô wanhitob'ru norĩ wi hã iwa'azani. Duré aiwétési ma tô te te 're iwa'ruiwapari za'ra mono norĩ ma hã rowazé ihiri za'ra.

⁸ Bâtâ bâre wa za ai'ãma 're wawata u'âsi za'ra. Duré õne u'â wa za asisi na hã ai'ãma 're wawata za'ra.

⁹ Tane nherẽ, 'Re ihâimana u'âsi mono awa'awi na hã ma tô a hã iwawẽ'õ za'ra. Duré da te wa'ãma ai'uté za'ra da hã ma tô iwaza'ré za'ra, wate dasi'wapéi 'manharĩ'wa norĩ siré 're aimorĩ õ wa oto.

¹⁰ A hã wanhitob'ru norĩ ma, wasisa'rei mono da, wama 'manharĩ za'ra wa, ma tô uburé wanhimarĩ za'ra hã siwi 'wasa.

¹¹ A hã ma tô pone'ẽrebâ ipãrĩzéb u 're inomro mono ne, wama i'manharĩ za'ra. Ma tô duré a'uwẽ aimawi norĩ wa'wa u wa'ãma iropé.

¹² Asib'a'uwẽ norĩ wawa'âbâ suru na ma tô iwawede za'ra, iwawa'âbâ suru za'ra zé ne hã.

¹³ Wama i'manharĩ za'ra zé, wawaptoma a'uwẽ 're ihâimana za'ra mono te te 'madâ'â za'ra wamhã, te wa'ãma tiwa'ẽ za'ra.

¹⁴ A hã ma tô a'uwẽ aimawi wa'ãma iwa'ẽ za'ra zéb da hã wama i'manharĩ za'ra. Ta norĩ hã te wa'ãma wa'ẽ sina wama 're 'rãsiwamnarĩ za'ra, te te 're wa'madâ'â za'ra mono wamhã.

¹⁵ Tahawa, te õne u'â rowazé hã ĩma 're pusi. Wa duré 're ĩsi'ubu ubu, rowazép te,

¹⁶ wanhitob'ru norĩ wa'ãma 're iwa'ẽ za'ra mono zé hã te 're awapari mono wa, duré si'ruiwa'âbâ za'ra da, te te sima iwẽ za'ra hã te te ĩ'ãma 're iwasété za'ra mono zéb zama.

¹⁷ Uburé ma tô ãne hã wama tiromhâimana za'ra, wa norĩ hã ai'ãma wapo're si'âri za'ra õ nherẽ, duré asib'a'uwẽ norĩ ma, asimiropisutu zahi 'manharĩzé, wa te 're 'madâ'â rẽme za'ra mono õ nherẽ.

¹⁸ Wapẽ'ẽ 'remhã apâ aiwi wasipizari za'ra õ di. Ate bâdâdi nhiti hã wasipa za'ra õ di.

¹⁹ Tane nherẽ, a hã ma tô iwawati pese za'ra, robzahi wa'wa iwasimasam ne. Ma tô duré robra uptabi ãma iwarẽme za'ra.

²⁰ Wate 'Re ihâimana u'âsi mono, ai'ãma 're iwawata za'ra mono zé, wa te rẽme za'ra 'wa'âhã, duré ai'upana nimahã ihâiba'õ ma, 're wamreme zusi mono 'wa'âhã,

²¹ te aré tô iwa'a'upsibi me, a hã niha na uburé danhimirosa'rada hã aima waihu'u pese wa, dasi'rep si pi'uriwi da te 're irosa'rata za'ra mono zé hã.

²² Tane nherẽ, aiwétési wa te 're i'ai'madâ'â za'ra mono zarina, wa bâtâ sidâpâsi wadâ'âzé isimimnha hã wa te 're 'wapé za'ra. Duré wa norĩ hã pone'ẽrebâ da te 're isimroi mono zéb u 're inomro mono ne, wa 're wahâimana za'ra.

²³ Uburé Danhib'apito, atopo'o! E marĩ wa, te asõ. Ai'utu. Õne u'â wa'awẽ'õ tõ.

²⁴ E marĩ wa, ma tô wawi aima'uri za'ra. E marĩ wa, ma tô wa te irobzépata za'ra na hã, duré wawi irobzei'õ pese za'ra na hã aipo're si'â.

²⁵ Wapẽ'ẽ 're, wawi robzei'õ pese za'ra wa, wa tô ti'ai u hã warere'e ni. Ma wa'ãma ai'uté za'ra ni. Tahawa ma tô duré ti'a hã wahâiba tob za'ra.

²⁶ Ma'ãpé, aiwahutu, wa'apawaptob da. Asimizawizéb zarina, ma'ãpé wa'anho'reptu na.