Salmu 40 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono ãma dawatazém na danho'rezé wasu'u

Dawihi nho're

¹ Uburé Danhib'apito nhimipawaptobzéb zô, wa tô ĩwa'a ãna sô 're ĩnhimipari. Ãhã wa, ma tô ĩwapa. Te te ĩpawaptob da, ĩmreme te tiwi iwaptẽrẽzé hã ma tô wapa.

² Ma tô ĩwaze ab're ipipa uptabi hawimhã, rowai'oi hawimhã. Ẽtẽ tõmo wawẽ nhisiwimhã ma tô ĩnha, isirési'õ nhisiwi ĩnhiptete na 're ĩza mono da.

³ Õ hã ma tô duré danho're ité hã ĩma tisõ, wate 'Re ihâimana u'âsi mono ãma danho're na 're idawata za'ra mono zé hã. Ãne hã da te 're 'madâ'â za'ra mono wamhã, te za Uburé Danhib'apito hã da te 're wazéb za'ra. Tawamhã te za oto da te dasina 're umnhasi za'ra.

⁴ Tãma 're rowẽ uptabi mono di ni'wa hã, Uburé Danhib'apito si te te sina 're umnhasi mono hã, duré romhâibarĩ te te sina 're i'umnhasi mono õ hã, duré ihâiba'õ norĩ ãma 're iwata za'ra mono norĩ te te sina 're ihâiba tob za'ra mono õ hã.

⁵ Uburé Danhib'apito, wate 'Re ihâimana u'âsi mono, a hã ma tô marĩ sa'ẽtẽ na wama 're i'ab'manharĩ wẽ u'âsi mo. Ni'wa asine hã hâimana õ di. A hã ma tô marĩ wama 're ab'manharĩ wẽ mono da hã asimirowa'õno iwẽ hã 're i'a'manharĩ mo. Uburé ãne na te ãma inharĩ da hã, waihu'u õ di, ahâ uptabi wa, sa'rata waihu'u õ wa.

⁶ A hã danhimizama zata na duré amnho na aima danhoprubzé hã, asima wẽ õ di. Danhimizama wahuré ẽtẽ za'ra na, da te aima 're zata za'ra mono da hã waptẽrẽ õ di, dawasété parizéb da. Taha wa'rãmi ma tô ai'ãma 're ĩsipo're pu'u mono zéb da si, ĩpo're hã ĩma i'rida.

⁷ Tahawa, wa tinha ãne: “Ãhãta wa ĩhâiba! Asimiroti na romnhihâtâ 'remhã te ĩhâimana wẽ zéb da hã te te ĩma 're roti.

⁸ Ĩte 'Re ihâimana u'âsi mono, ĩma 're i'apisutu mono zéb zarina, marĩ te 're i'a'manharĩ mono da hã ĩma sei uptabi di! Asimiroti wa tô ĩpẽ'ẽ 'remhã te ĩsima 're tété u'âsi.”

⁹ Uburé Danhib'apito, aihĩni asib'a'uwẽ 're isi'rã'õtõ mono zéb ãma hã, wa tô rowasu'u wẽ hã te dama 're wasu'u, a hã 're iwa'anho'reptui mono na hã. Aima waihu'u pese di, za rowasu'u wẽ 'mahârâzém na niwa te isazâri õ na hã.

¹⁰ Asiminho'reptuzé wasu'u hã, ĩsima si te 're tété mono õ di. Õne u'â ai'umnhasizém na hã wa tô te ãma 're robzanhamri u'âsi, duré asiminho'reptu nhiptetezém na zama. Asib'a'uwẽ 're isi'rã'õtõ mono zéb ãma hã, 're ida'azawi mono zé wasu'u na hã, duré ai'umnhasizém na hã, ĩmreme ãna ari'iwi 're ĩhâimana mono õ di.

¹¹ Uburé Danhib'apito, wa hã ĩma waihu'u pese di, niwa marĩ ĩma 're i'ab'manharĩ wẽ mono zé hã za ĩwi isazâri õ na hã. Asimizawizé hã duré ai'umnhasizé hã, te za õne u'â ĩ'wawimhã 're simapa u'âsi.

Dapawaptobzé waptẽrẽzé wasu'u

¹² Ropire uptabi hã ma tô siwi ĩ'uirĩ, ĩma isa'rata waihu'u'õ hã. 'Re ĩwasété mono zé hã te te ĩzasãmri wamhã, te oto 're rob'madâ'â waihu'u mono õ di, ĩsisõwamhã. Ĩ'rã na ĩzéré 're ihâimana za'ra mono nhipai'u, 're ĩwasété mono zé hã ahâ uptabi di. Tahawa, ĩma hã robzei'õ uptabi di.

¹³ Uburé Danhib'apito, ma'ãpé ĩnho'reptu na! Ma'ãpé sa'ẽtẽ ĩpawapto na!

¹⁴ Te te siwi ĩwĩrĩ da, te te sima iwẽ za'ra norĩ hã da te ãma i'ai'uté za'ra da si, duré rowazé tãma ihâimana za'ra da si, ibâre hã. Duré ĩma ropire wa, te te ĩ'ãma sima irowẽ za'ra norĩ hã rowazép te, apâ ĩma isipizari za'ra da si, ĩma iwẽ hã.

¹⁵ Ĩ'ãma iwa'ẽ za'ra norĩ, tãma irowazéb za'ra zarina, sima si'rãmi za'ra da si, ĩma iwẽ hã.

¹⁶ Uburé ai'ãma 're iwata za'ra mono norĩ hã, rowẽ sina duré to sina 're ihâimana za'ra mono da si, iwẽ hã! Duré asiminho'reptuzép si te te sima 're isawi za'ra mono norĩ hã ãne te te 're nharĩ u'âsi za'ra mono da si: “E niha 'Re ihâimana u'âsi mono hã iwaihu'u pese uptabi!”

¹⁷ Wa hã ĩnhimarĩ'õ, duré marĩ zô ĩwi 're irowaptâ'â mono. Tane nherẽ, a hã Uburé Danhib'apito, ma tô ĩ'ãma 're aihâtâ'â mo. A hã 're ĩpawapto mono 'wa, duré ĩma marĩ nhiwasi'wa. Ĩte 'Re ihâimana u'âsi mono, asimipawaptobzéb zô hã rowaptâ'â hâ tõ!