Salmu 36 - ꞌRe Ihâimana Uꞌâsi Mono Zadawa Wasuꞌu

Dawasété wasu'u, 'Re ihâimana u'âsi mono nhimizawi pese zé wasu'u me

Dawihi nho're

¹ Dawasédé hã te iwasété norĩ pẽ'ẽ 're, te te tãma 're anharĩ. Tahawa, iwasété norĩ hã 'Re ihâimana u'âsi mono wazébzé hã te te 're waihu'u za'ra mono õ di.

² A'uwẽ iwasédé hã te 'râwi tipire na 're si'madâ'â. Te duré sina te te 're rosa'rata, 'Re ihâimana u'âsi mono, iwasédé te te tiwi i'upsibi mei õ na hã za, duré taha zarina za niha te te tãma irob'manharĩ õ na hã.

³ Isimirobzanhamrizé hã iwasété na si, duré isadawa nhipese na si. Ta hã simiza'rese wẽ na 're ihâimana mono zé hã ma tô tirẽ. Tahawa, marĩ te te 're i'ab'manharĩ wẽ mono da hã, te te sima 're wẽ mono õ di oto.

⁴ Tinhimiwaptâ wa, 're sa'wari mono ré, te marĩ iwasédé te te i'manharĩ da hã te te sima ãma 're rowa'õtõ. Bâdâdi iwasété na si hã te 're mo. Duré niwamhã marĩ iwasédé hã te te siwi 're awẽ'õ waihu'u mono õ di.

⁵ Uburé Danhib'apito, ãma hâiwa u te asimizawizé hã te te sina 're rob'uwei pese. Duré hâiwa'a u te ai'umnhasi na 're i'aihâimana mono zé hã te te sina 're rob'uwei pese.

⁶ Ẽtẽ 'rãihâ rési ãna 're isa mono ne, te i'uwaibaba na si dama 're i'arowairébé mono zé hã 're hâimana. Duré â poré â 'rehâ uptabi ne, te dama 're i'apisutu mono zé hã 're hâimana. Uburé Danhib'apito, a hã te a'uwẽ norĩ hã, abaze norĩ me 're i'ab'madâ'â pese mo.

⁷ 'Re ihâimana u'âsi mono, e niha asimizawizé hã iwẽ uptabi! Asaripi na asimi'awã zahâpâ, wa wa'wawi 're i'aimapa mono zé hã wa te 're sõpẽtẽ za'ra.

⁸ Wasa na wa wa te wasima 're rowẽ za'ra, wama 're i'anhomri u'âsi mono na, sa'ẽtẽ na. A hã te duré â isei uptabi hã wama i'anhomri mo, wa te 're i'âhuri mono da hã.

⁹ A hã dahâimanazém nhana'rada. Asimirowa'a zarina, wa duré wa norĩ hã tô õ hã rowa'a hã 'madâ'â za'ra ni.

¹⁰ 'Re ihâimana u'âsi mono, te te 're i'aiwaihu'u za'ra mono norĩ hã ma'ãpé ãma 're uzusi mono, 're isawi za'ra mono zém na hã. Duré marĩ tãma 're ab'manharĩ wẽ u'âsi mono, sena na ipẽ'ẽ wẽ norĩ ma hã.

¹¹ 'Râwi 're isi'madâ'â ze za'ra mono norĩ te te siwi ĩwati'i da hã tãma ĩhâiba za'ré za'ra tõ. Duré wasété na 're inomro mono norĩ ma, ĩhâiba za'ré za'ra tõ, te te siwi ĩzamarĩ da, tiwi ĩwara za'ra da hã.

¹² Õhõta ma tô ta norĩ hã rere. Ma tô ta norĩ hã 'marõpãrĩ za'ra ni. Iwahutu waihu'u za'ra da hã mare uptabi di za.