Salmu 32 - ꞌRe Ihâimana Uꞌâsi Mono Zadawa Wasuꞌu

Dawasété na 're idasiwẽ'õ za'ra mono zé wasu'u

Dawihi nhimi'ui'éré

¹ Tãma 're rowẽ uptabi za'ra mono di, iwasédé 'Re ihâimana u'âsi mono te te ãma 're i'ab'madâ'â mono õ norĩ ma hã, iwasédé te te tãma 're i'apari mono norĩ ma hã!

² Tãma 're rowẽ uptabi za'ra mono di, Uburé Danhib'apito iwasédé te te ãma 're isa'ra mono õ norĩ ma hã, duré senai'õ na 're ihâimana za'ra mono õ norĩ ma hã!

³ Ĩwasété na 're ĩsiwẽ'õ mono õ ré hã, bâtâ bâre 're ĩsiwa'õ mono zém na hã wa 're ĩnhib'uwa pusi.

⁴ 'Re ihâimana u'âsi mono, bâtâ na hã duré mara na hã, ma tô asib'rata na ĩ'azâri pirezém na hã ĩma irob'manha. Ĩnhiptetezé hã ma iwi ai'utõ, wahum na rowa'ro 're isa'wari mono ne.

⁵ Tawamhã ĩwasété na wa tô aima ĩsiwẽ'õ. Ĩnhimi'manharĩ wasété zé hã te aiwi simi'uri õ di. Ĩwasédé hã te aima wasu'u da, wa tô ĩsima rowairébé. Tawamhã a hã uburé ĩwasédé hã ĩ'ãma 're a'madâ'â mono õ di oto.

⁶ Tahawa, uburé sena na ai'ãma 're inomro mono norĩ hã, ropire sô 're wairébé mono sidâpâsi, aima 're imreme zusi mono da si, ibâre hã. Ãne wamhã, â sisasisi wawẽ 're ipusi mono hã robzépatazé we 're ne mono wamhã, te te 're i'uwe za'ra mono da hã mare di za.

⁷ A hã ĩte 're ĩsima'uri mono zé. A hã te za duré ro'wa'rutu hawimhã 're ĩzani u'âsi mo. Asiminho'reptuzém na wa ĩnho're 'rãihâ na 're ĩnho're, ĩ'wawimhã 're aimapa mono wa.

⁸ Uburé Danhib'apito te ĩma tinha ãne: “Bâdâdi iwẽ na wa za ãma aima te 're rowasu'u, nimomo 're i'ane mono da hã. Wa za te 're asaprõni u'âsi. Duré wa za te 're ai'madâ'â pese.

⁹ Awaru hã, duré awaru po're pore, isadai'ré 're, isi'uwazi nhi'oto na si duré iwata wazizém na si, da te 're iwaratu za'ra mono, isimiza'rese'õ ne, tane a hã asimiza'rese ãna 're aihâimana mono tõ.”

¹⁰ Iwasété norĩ hã te te 're robzépata za'ẽtẽ za'ra mono di. Tane nherẽ, Uburé Danhib'apito, te te sina 're i'umnhasi za'ra mono norĩ hã te i'wawi 're simapa za'ra.

¹¹ Uburé sena na 're i'aihâimana za'ra wa'aba mono norĩ, asima 're rowẽ u'âsi za'ra wa'aba mono! Duré ato sina 're aihâimana za'ra wa'aba mono, Uburé Danhib'apito marĩ iwẽ te te 're i'ab'manharĩ mono zéb zarina! Aipẽ'ẽ to sina ma'ãpé 're asõ're za'ra wa'aba mono, uburé isimiroti wapari pese 'wa norĩ hã!