Salmu 22 - ꞌRe Ihâimana Uꞌâsi Mono Zadawa Wasuꞌu

Robzépata wa, danho're, 'Re ihâimana u'âsi mono ãma dawatazém na danho're me

Dawihi nho're

¹ Ĩte 'Re ihâimana u'âsi mono, ĩte 'Re ihâimana u'âsi mono, e marĩ da, ma tô ĩrẽ. E marĩ da, ma tô romhâ na ĩnhiti aihâiba. E marĩ wa, duré ĩpawaptob da, ĩmreme 'rãihâ na te aiwi iwaptẽrẽzém na hã ĩwapari õ di.

² Ĩte 'Re ihâimana u'âsi mono, bâtâ sidâpâsi te 're ai'mahârâ u'âsi mono nherẽ, 're ĩzada'âbâ mono õ di. Duré bara na te 're ai'mahârâ mono nherẽ, 're ĩwa'utu waihu'u mono õ di.

³ Tane nherẽ, a hã marĩ iwasédé, ai'ãma 're ihâimana mono õ, Danhib'apito simasisizéb ãma 're i'asãmra mono. Duré Izaraéu nhihudu norĩ, ai'ãma 're iwata za'ra mono zé hã te 're i'awapari mo.

⁴ Wahi'rata norĩ hã ma tô sina te te 're ai'umnhasi za'ra. Te te sina 're ai'umnhasi za'ra mono wa, ma tô 're i'anho'reptui mo.

⁵ Ta norĩ hã asimipawaptobzéb zô, mreme 'rãihâ na te te aiwi 're waptẽrẽ za'ra mono wamhã, ma tô marĩ isimimnhasi wi 're wairébé. Te te sina 're ai'umnhasi za'ra mono wamhã, te te sina 're ai'umnhasi baba za'ra mono õ di.

⁶ Wa hã, ti'ai ãma a'uwẽ na oto ĩhâimana õ di. Ai'uténhanarã pré ne hã wa oto ĩhâiba. Tahawa, te uburé na hã ĩ'ãma 're dawa'ẽ za'ra. Ma tô duré da te dasiwi 're ĩwazéb'õ.

⁷ Uburé da te dasiwi 're ĩ'madâ'â za'ra mono hã, te ĩ'ãma hã 're wa'ẽ za'ra. Te duré ĩma tizoto te te 're sani za'ra. Te duré ĩma 're 'rãsiwamnarĩ za'ra.

⁸ Te duré te te ĩma 're nharĩ za'ra ãne: “A hã, ma tô Uburé Danhib'apito hã asina 're i'umnhasi mo. Ma'ãpé ta hã te te asõ'reptu. Taha ma, sena na asawi di pâ, pé te te asõ'reptu.”

⁹ Tane nherẽ, aiwétési ma tô ĩna dub're hawimhã ĩwaze. Ĩna hâ te duré 're wapsõmri mono ré, ma tô 're ĩ'madâ'â wẽ mo.

¹⁰ Ĩpotozém hawim haré, wa tô asimi'madâ'â na 're ĩhâimana. Ta hawim haré, te ĩte 'Re ihâimana u'âsi mono na ĩma 're aihâimana mo.

¹¹ Tahawa, ĩma ai'ré tõ. E marĩ wa. Za te irobzépatazéb da hã 'râwi pesere hâimana wa, duré za ni'wa te te ĩpawaptob dai õ wa.

¹² Powawẽ iba'õmo ne, ma te ĩnhitob'ru norĩ hã siwi ĩ'uirĩ. Uburé pese te ĩmana wawimhã tihâimana za'ra, Basã na romnhisi ãma powawẽ iba'u isahi 're ihâimana za'ra mono ne hã.

¹³ Hu'u zérépa, wairõ sina, tizadawa te te 're po'o za'ra mono wa, te te oto 're idanhiwazu za'ra mono ne, ma tô ĩzada hã tihâimana za'ra.

¹⁴ Wa tô siptete hai'utõ, â ti'a u da te 're isa'wari za'ra mono ne. Uburé ma tô ĩhi hã ĩwi wairé. Duré ĩpẽ'ẽ 'remhã rob'uiwẽzé 're uwa pese mono wa, 're iwa'ui a'a za'ra mono ne, wa tô ĩhâiba.

¹⁵ Ĩnho're 'ré hã 'ré uptabi di, aiwa ti'a zaprum ne. Duré ĩzadai'ré hã te nasi ĩnhoto to. A hã ma tô robzaprui wa'wa ĩrẽ, ĩdâ'â ne.

¹⁶ Aibâ iwasété norĩ hã ma tô siwi ĩ'uirĩ za'ra. Ta norĩ hã ma tô oto siwi ĩ'resu'u pese, wapsã norĩ ĩnhib'rada hã duré ĩpara hã te te siwi iwazui mono ne.

¹⁷ Uburé ĩhi hã sõ'awi oto ai'uréiwi hâimana za'ra wa, sa'rata waihu'u pese di. Duré ta norĩ hã te ĩ'ãma wa'ẽ za'ra sina siwi ĩ'madâ'â pese.

¹⁸ Ta norĩ hã ma tô duré ĩ'uza hã te te sima sõmri za'ra. Duré ma tô ĩsi'ubuzéb zô niha hã datozébre nasi siwi wabzu.

¹⁹ Uburé Danhib'apito, ma'ãpé ĩma ai'ré tõ. Sa'ẽtẽ we ĩtẽme aimorĩ, ĩnho'reptu da.

²⁰ Sib'ézé 'wa pa wi hã ma'ãpé ĩnho'reptu na. Duré ã hã wapsã norĩ te te siwi ĩwĩrĩ da hã tãma ĩrẽme za'ra tõ.

²¹ Ã hã hu'u zérépa norĩ zadai'ré wi hã ĩnho'reptu na. Duré rom na powawẽ i'õmo ré norĩ isahi wi hã ĩsi'wawimhã ĩsimapa waihu'u õ di.

²² Tawamhã wa hã uburé marĩ ĩma 're i'a'manharĩ mono zé hã, wa za ĩsiré norĩ ma wasu'u za'ra. Duré 're iwasi'rã'õtõ mono zéb ãma ai'ãma 're ĩwata mono sina, wa za ãne tinha:

²³ “Uburé Danhib'apito 're iwazéb za'ra wa'aba mono norĩ, uburé te za ãma 're aiwata za'ra wa'aba mo. Zacoho nhihudu norĩ, 'Re ihâimana u'âsi mono ãma 're aiwata za'ra wa'aba mono! Izaraéu nhihudu norĩ, Uburé Danhib'apito hã asiwi 're wazé pese za'ra wa'aba mono!

²⁴ Ta hã isimarĩ'õ norĩ hã te te 're arẽme waihu'u mono õ di. Duré 're po're simrami mono õ di, te te 're irobzépata za'ra mono ãma hã. Tiwi hã 're sima'uri waihu'u za'ra mono õ di. Mreme 'rãihâ na te te isõ'reptu za'ra zé te te tiwi 're waptẽrẽ za'ra mono wamhã, te za te te 're amreme wapari.”

²⁵ Uburé 're idasi'rã'õtõ za'ra mono zéb ãma hã, marĩ ĩma 're i'a'manharĩ mono zém na, wa za ai'ãma 're ĩwata. Uburé te te 're i'aiwazéb za'ra mono norĩ nho'a hã, wa hã, danhimizama zata na hã wa za ãma aima 're ĩnhopru, te aima iropisutuzéb zarina.

²⁶ Isimarĩ'õ norĩ te za tisa hã te te ãma 're huri, te te 're i'mahâpãrĩ za'ra mono zéb u. Duré Uburé Danhib'apito zô 're isõpré mono norĩ si, te za ãma 're wata u'âsi za'ra. Ta norĩ hã õne u'â rowẽ sina 're ihâimana za'ra mono da si, ĩma iwẽ hã.

²⁷ Niwa apto'o ré daro mono bâ 're idahâimana za'ra mono norĩ, te za Uburé Danhib'apito ãma 're po're pu'u za'ra. Te za duré apâ itẽme hã 're dasipizari za'ra. Duré te za a'uwẽ mono bâ ãma 're dawata za'ra.

²⁸ Uburé Danhib'apito ma si, te te 're ida'a'madâ'â mono zé isiptede hã te 're hâimana. Taha si te da'rãnho'õmo na uburé a'uwẽ mono bâ te te 're da'a'madâ'â.

²⁹ Uburé 'râwi 're isi'madâ'â ze za'ra mono norĩ hã te za isõ're tãma 're siwẽ'ẽ za'ra za. Uburé te za aihĩni idadâ'â za'ra norĩ hã duré za idadâ'â za'ra zama ãma 're dawata za'ra.

³⁰ Apto'o ré dasiparabâsi 're idasitébré za'ra mono hã, te za õhõ ãma si 're nomro. Ta norĩ hã te za duré daro mono bâ dapoto tém norĩ ma, Uburé Danhib'apito hã te te tãma 're wasu'u za'ra.

³¹ Zahadu 're ipoto za'ra mono õ norĩ hã, te za niwamhã zahadu wapsi, 'Re ihâimana u'âsi mono te te 're i'manharĩ mono zé hã te te 're wapari za'ra za: “'Re ihâimana u'âsi mono, tinhib'a'uwẽ hã ma tô anho'reptu!”