Salmu 16 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, ĩsiré õne u'â 're ihâimana mono zé wasu'u

Dawihi nho're

¹ 'Re ihâimana u'âsi mono, ma'ãpé ĩ'wawimhã 're aimapa u'âsi mono, ai'ãma si marĩ wi ĩsima'urizé hã ĩma hâimana wa!

² Wa hã Uburé Danhib'apito ma, wa tinha, ãne: “A hã, Ĩnhib'apito. Uburé marĩ iwẽ ĩma 're ihâimana mono hã, aihawip si.”

³ 'Re ihâimana u'âsi mono ma, 're isisõmri u'âsi za'ra mono norĩ si hã danhipai u tô sena iwẽ uptabi. Ta norĩ siré 're ĩhâimana mono da si, ĩma iwẽ hã.

⁴ Aimawi ihâiba'õ norĩ zô 're irĩtĩ za'ra mono norĩ hã te 'râwi robzépatazé hã te te sisô 're sani za'ra. Isiré 're ĩhâimana za'ra mono õ di za, tinhoprubzé danhimizama wapru na ihâiba'õ norĩ ma, 're isõprub za'ra mono na hã. Duré ite za'ra ihâiba'õ ãma hã isiré za'ra 're ĩwata mono õ di za.

⁵ Uburé Danhib'apito, aiwétési te ĩnhimarĩ na hã ĩma 're aihâimana mo. Duré za niwa apto'oré ĩma iromhâimanazé hã te asib'ratamhã tihâiba. A hã te duré ĩhâimanazé hã ĩma 're isaprõni mo.

⁶ E niha ma tô marĩ iwẽ si ĩma 're i'apisutu mo. E niha iwẽ uptabi!

⁷ Uburé Danhib'apito ãma hã wa 're ĩwata, õ hã ĩma roti wẽ 'wai wa. Duré mara na hã te za 'râwi ĩnhimirosa'rata na si nherẽ, te te sina 're ĩpo're pu'u mono.

⁸ Tô sena te Uburé Danhib'apito hã ĩsiré u'âsi 're mo. Ĩnhimire niwĩ 're ihâimana mono wa, marĩ te te ĩ'marõwĩrĩ da hã, mare uptabi di.

⁹ Tahawa, ĩpẽ'ẽ 'remhã ĩma robzei uptabi mono di. Duré ĩma hã rowẽ za'ẽtẽ di. Wa duré ĩsima iwẽ na ĩsina ĩhâtâ'â ãna 're ĩnhamra.

¹⁰ E marĩ wa. A hã 'Re ihâimana u'âsi mono, dadâ'â nhiptetezé wi 're ĩ'madâ'â u'âsi mono wa. Wa hã ai'ãma si 're ĩmorĩ wa, ĩrẽme õ di za, dadâ'â pese zéb u ĩmorĩ da hã.

¹¹ A hã te 're idanomro mono zép té na bâdâdi hã ĩma 're iwasu'u mo. Duré ĩsiré 're i'aihâimana mono zé hã te rowẽ hã te te ĩma 're sa'ẽtẽ. Te duré õne u'â ĩma 're irowẽ mono zé hã te te ĩma 're sani.