Salmu 132 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, Dawihi ma te te iropisutuzé wasu'u

¹ Uburé Danhib'apito, ma'ãpé Dawihi ãma aipo're pu'u, duré te te 're irobzépata mono zém na zama.

² Ta hã ma tô ãne aima ropisutu, Uburé Danhib'apito ma, Zacoho te Iwaihu'upese ma:

³ “'Ri u ĩmorĩ õ di za. Duré ĩwa'utu da hã mare di za.

⁴ Duré ĩnomro õ di za. Ĩnhotõ da hã, mare di za,

⁵ Uburé Danhib'apito ma, ro te 'manhopẽtẽ õ ré hã, 'ri wa Zacoho te Iwaihu'upe 're isãmra mono zéb da hã.”

⁶ Asimiroti na rob'ui'éré ré wedehâ're 'manharĩ, Efrata ãma isam na, wa te waihu'u za'ra wamhã, wa tô duré Zearĩ na itehutu wamri ãma wasiwi sõpẽtẽ ni.

⁷ Tawamhã wa tô ãne wasima nharĩ za'ra ni: “Oto Uburé Danhib'apito nhorõwa u hã wasi'aba'réi wa'aba. Oto ãma wawata za'ra wa'aba, isimasisizém nho'remhã.”

⁸ Uburé Danhib'apito, ma'ãpé we aimorĩ, asõrõwa 'ri 'rãihâ u, asimiroti na rob'ui'éré ré duré aiwaihu'u pese ré wedehâ're 'manharĩ ré, tame õne u'â 're aihâimana mono da hã iré.

⁹ Ate sasedoti norĩ, õne u'â marĩ i'uwaibaba na si te te 're i'manharĩ za'ra mono da si, iwẽ hã! Duré aima romhuri'wa norĩ, sena na ai'ãma si 're inomro mono hã rowẽ te, sa'ẽtẽ sadari sina hârâ 'rãihâ na te te sima 're iromhu'u za'ra mono da si, iwẽ hã!

¹⁰ A hã aima romhuri'wa Dawi we 're isawi mono zéb u'âbâmhã, ma'ãpé apito ipisudu hã asiwi wẽ'õ tõ.

¹¹ Uburé Danhib'apito, Dawihi ma ropisudu hã ma tô i'manha, asimiropisutu na ãma isaprĩ waihu'u õ na, ãne: “Wa hã wa za asihudu hã tisã za, ai'uirĩ na apito na te te 're da'a'madâ'â mono da.

¹² Ai'ra norĩ, wa hã te dama iropisutuzém na duré ĩnhimiroti te tãma 're isõmri za'ra mono na, sena na ãma 're nomro mono wamhã, taha 'ra norĩ zama te za apito te asãmrazém na hã 're si'ubumroi u'âsi, sidâpâsi.”

¹³ Uburé Danhib'apito, Siã hã ma tô pisutu, iwa 're isãmra mono zéb da hã. Ãne te tinha:

¹⁴ “Ãme wa za õne u'â 're ĩhâimana. Duré ãme dama i'rãnho'õmo na te 're ĩda'a'madâ'â mono da hã, wa tô ĩsima wẽ.

¹⁵ Wa hã wa za danho ahâ na, ro te ipisutu ma hã 're ĩnhoprub u'âsi. Duré isibrob'õ iwa 're isi'ubumroi mono norĩ ma, wa za dasa ahâ na te tãma 're sõmri za'ra.

¹⁶ Sasedoti iwa te te 're irob'ma'wamarĩ mono norĩ hã wa za iwẽ hã te tãma 're pisutu za'ra, wẽ na te te 're romhuri za'ra mono da. Tahawa, sena na tame iwa 're idahâimana za'ra mono norĩ te za da te ãma dasima 're romhu'u za'ra, dama irowẽ za'ẽtẽ za'ra zarina.

¹⁷ Tame wa za Dawihi ne siptete na apito na te te 're da'a'madâ'â mono da, isihudu hã pisutu. Tame wa za duré 'manha, apito te ipisudu te te dama 're irob'uiwẽ mono da hã.

¹⁸ Wa za isitob'ru norĩ ma rowazé hã tãma hiri za'ra. Tane nherẽ, te za õ hã te te 're rowa'a u'âsi, pire na te te 're ida'a'madâ'â mono zém na hã.”