Salmu 119 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono nhimiroti wẽ wasu'u

¹ Iwasédé, da te ãma 're isa'ra waihu'u mono õ norĩ si, te to sina hã 're nomro, Uburé Danhib'apito nhimiroti zarina si 're ihâimana za'ra mono norĩ hã.

² 'Re ihâimana u'âsi mono nhimiroti, tipẽ'ẽ 're te te sima 're itété za'ra mono norĩ si, te to sina 're hâimana za'ra, te te duré 're iwapari pese za'ra mono norĩ si.

³ Marĩ iwasédé te te 're i'manharĩ waihu'u za'ra mono õ norĩ si, te to sina 're nomro, Uburé Danhib'apito nhirã zarina si 're ihâimana za'ra mono norĩ hã.

⁴ A hã ma tô asimiroti hã wama isõmri za'ra, wa te 're iwapari pese za'ra mono zém na, wa te ãma aima 're i'uwaimrami za'ra mono da hã.

⁵ Wa ĩsima wẽ upta, asimiroti te 're iwapari pese mono da si, duré te ãma aima 're i'uwaimrami mono da si.

⁶ 'Re ĩnhimipari pese mono na, uburé asimiroti te 're wapari pese mono wamhã, niwamhã 're ĩnhisé mono da hã mare di.

⁷ Wa hã i'uwaibaba na asimiroti hã te 're i'awaihu'u mono zép sidâpâsi, wa za ai'ãma 're ĩwata u'âsi, ĩpẽ'ẽ 'rem na.

⁸ Asimiroti wa za te 're 'madâ'â pese. Tahawa, ma'ãpé niwamhã ĩrẽme tõ za.

Aimreme hã wa ĩpẽ'ẽ 'remhã ĩsima te 're tété u'âsi

⁹ E niha te za wasété ãna iprédupté hâimana wẽ uptabi na hã 're hâimana. Aimreme hã te te 're wapari pese mono wapsi hã, te za tô wasété ãna 're mo.

¹⁰ Wa hã wa ĩpẽ'ẽ na niha na ai'ãma si 're ĩmorĩ da hã ĩsima te 're rosa'rata. Ma'ãpé tahawa, ĩwi sawi na, aimreme te rẽme tõ da.

¹¹ Aimreme hã wa tô ĩsima te 're tété ĩpẽ'ẽ 'remhã, ĩwasédé te aiwi 're 'manharĩ tõ mono da.

¹² Uburé Danhib'apito, wa ai'ãma 're ĩwata! Asimiroti na, ma'ãpé ãma ĩma rowahutu.

¹³ Ĩmreme 'rãihâ na wa uburé asimiroti ĩma isõmri na hã nasi ãma rowasu'u.

¹⁴ Ĩma rowẽ za'ẽtẽ di, asimiroti te 're iwapari pese mono zarina 're ĩhâimana mono zém na hã, danhimarĩ pese na 're idahâimana za'ra mono zém nhipai u.

¹⁵ Asimiroti na te 're romnhoré mono wa, wa aimreme hã te 're 'madâ'â u'âsi.

¹⁶ Asimiroti ĩma ise zarina, aimreme na hã 're ĩpo're simrami waihu'u mono õ di.

Wa ĩsima wẽ upta, ĩma ipisutuzé hã te waihu'u da

¹⁷ Uburé Danhib'apito, ma'ãpé aima romhuri'wai ma, iwẽ hã ĩma 're 'manharĩ mono, ti'ab ré ĩhâimanazém na te ãma 're uzusi mono da, duré aimreme hã te 're wapari pese mono da a'â.

¹⁸ Ma'ãpé ĩto hã ĩma 'ridawa zahuré na, asimiroti iwẽ uptabi sena hã te ãma 're 'madâ'â mono da.

¹⁹ Wa hã wa ti'ai ãma suru na 're ĩhâimana hutu. Tahawa, ma'ãpé asimiroti na ĩma 're ba'a mono õ di za.

²⁰ Asimiroti na irowaihu'uzé hã te ĩsima 're iwẽ pese mono zéb zarina, te ĩhâiba uptabi hã ĩwi 're sé pusi.

²¹ A hã te 're isi'madâ'â ze za'ra mono norĩ ma hã 're ipri'i mo. Duré asimiroti wi 're isipizari za'ra mono norĩ ma hã te ipipa si tãma 're i'apisutu mo.

²² Ma'ãpé ĩma ba'a, da te ĩ'ãma 're iwasété za'ra mono zém na hã, duré ĩ'ãma 're idawa'ẽi mono zém na hã, wa hã asimiroti te 're wapari pese mono wa.

²³ Tô dama ipire norĩ, rosa'rada te te ĩ'ãma sima 're 'manharĩ za'ra mono da, ĩzada 're si'rã'õtõ mono nherẽ, wa hã aima romhuri'wa, wa za tô asimiroti na si te ĩsima ãma 're romnhoré atãma na.

²⁴ Asimiroti na ãma ĩma rosa'rata zei uptabi di. Ta hã ĩma 're iroti mono 'wa na, te ĩma 're hâimana za'ra.

Asimiroti na ĩma rowahutu

²⁵ Wa hã ti'a zapru wamhã wa tô oto nomro. Tahawa, ma'ãpé asimiropisutuzéb zarina ĩnhiptede hã apâ ĩma sõmri.

²⁶ Uburé marĩ te 're i'a'manharĩ mono zé, te aima wasu'u wamhã, ma tô a hã duré ãma ĩzada'â. Ma'ãpé asimiroti na ãma ĩma 're rowahutu mono.

²⁷ Uburé Danhib'apito, ma'ãpé ĩpawapto na, asimiroti te sadaihu'u wẽ da. Tawamhã wa za asimiroti wẽ na te ãma 're rosa'rata u'âsi.

²⁸ Ĩpẽ'ẽ 'remhã ĩma robzei'õ uptabi wamhã, te ĩhâimana ze zé hã ĩwi 're si'utõrĩ. Tahawa, ma'ãpé ĩnhiptede apâ ĩma sõmri, iropisutuzéb zarina.

²⁹ Ma'ãpé bâdâdi senai'õ nhiti 're ĩmorĩ da si, ĩ'ãma 're a'ubei mono. Ma'ãpé duré asimi'manharĩ wẽ zarina asimiroti na ãma ĩma 're rowahutu mono.

³⁰ Wa hã wa tô ĩsima pisutu, sena na bâdâdi 're ihâimana mono zém na si 're ĩmorĩ da. Asimiroti na 're irowaihu'u mono zém na si 're ĩmorĩ da hã, wa tô duré ĩsima te 're rowairébé.

³¹ Uburé Danhib'apito, asimiroti te ĩsima 're itété mono na si, wa tô 're mo. Ma'ãpé tahawa, ĩma 're ba'a mono, ĩhâimanazém na 're ĩwaptã'ã mono wa, rowazém na 're ĩhâimana mono tõ da.

³² Tawamhã wa hã, wa sa'ẽtẽ asimiroti nhirã zarina si 're ĩsisamro. Ãne wa, te za ĩ'rãiwaihu'u za'ẽne hã ĩma 're isõmri mo.

Ĩpẽ'ẽ to sina, wa asimiroti hã te ãma 're uwaimrami

³³ Uburé Danhib'apito, ma'ãpé asimiroti na ãma ĩma 're rowahutu mono, te waihu'u wẽ da. Ãhã wamhã, wa za õne u'â ãma 're morĩ u'â, 're ĩhâimana 'rãsutu mono zéb u.

³⁴ Ma'ãpé ĩ'rãiwaihu ĩma 're sõmri mono, asimiroti te ãma ĩsima 're tété mono da, duré ĩpẽ'ẽ na ãma 're ĩmorĩzém na te ãma 're uwaimrami u'âsi mono da.

³⁵ Ma'ãpé asimiroti zarina si 're ĩmorĩ da hã 're ĩzaprõni mono, taha na si ĩma 're irowẽ mono zé hã te 're sõpẽtẽ mono wa.

³⁶ Ĩma 're 'manharĩ mono, asimiroti si te 're 'madâ'â pese mono da, 're ĩsisibro pese mono zô si, te ĩsima 're irob'ruiwapari mono upana, ãma 're ĩhâimana wẽ mono da, taha na si.

³⁷ Ma'ãpé tarére marĩ 're ihâimana za'ra mono te 're a'madâ'â tõ mono da, ĩtõmo ré, 're ĩ'rã pizari mono. Iwẽ hã ĩma 're 'manharĩ u'âsi mono, iropisutuzéb zarina.

³⁸ Aima romhuri'wai ma asimiropisudu hã ma'ãpé ãma ĩma uwaimrami, aiwazé'wa norĩ ma, taha asimiropisudu tô tãma 're i'manharĩ za'ra mono hã.

³⁹ Ma'ãpé ĩma 're ba'a mono, da te ĩ'ãma 're iwasété za'ra mono zé hã, ta hã te te nasi ĩpẽ'ẽ susi wa. E marĩ wa. Dama 're irowairébé mono zé hã wẽ uptabi wa.

⁴⁰ Wa hã wa tô ĩsima wẽ pese, asimiroti te 're 'madâ'â pese mono da hã. Tahawa, ma'ãpé ĩhâiba ré 're ĩhâimana hâ mono da hã a'â ĩma pisutu, tô i'uwaibaba na si dama 're i'arowairébé mono zéb zarina.

Asimiroti te rowẽzé hã te te ĩma sina 're sani

⁴¹ Uburé Danhib'apito, 're ĩzawi pese mono zém na ma'ãpé ĩ'ãma asihâi'ré na. Duré ĩnhitob'ru norĩ na hã ĩma ba'a, asimiropisudu i'manharĩzéb zarina.

⁴² Tawamhã ĩ'ãma 're iwa'ẽi u'âsi za'ra mono 'wai ma hã, wa za te 're waihu'u siromo, te ãma tãma 're iwa'rãmi za'ra mono zéb da hã ĩmreme na, aimreme si te ĩsina 're umnhasi mono wa.

⁴³ Ma'ãpé ĩzadawa hawimhã sena na 're ĩmreme mono zé hã ĩwi 're sani mono tõ. E marĩ wa. A hã dama 're i'arowairébé mono zé, ĩma umnhasi za'ẽtẽ wa.

⁴⁴ Bâtâ sidâpâsi wa za asimiroti hã te 're wapari pese. Duré õne u'â wa za te ãma 're uwaimrami.

⁴⁵ Ĩsima iwẽ na, wa za 're ĩhâimana, te ĩsima 're romnhimimnhasi mono ãna, asimiroti na si 're ĩmorĩ da, sô 're ĩsi'wapéi u'âsi mono wa.

⁴⁶ Uburé Danhib'apito, apito norĩ nho'remhã wa za asimiroti na te tãma 're rob'mahârâ za'ra, 're ĩnhisé mono ãna.

⁴⁷ Asimiroti te rowezé hã te te ĩma sina 're sani, te 're sawi pese mono wa.

⁴⁸ Aima wa ĩnhib'rada hã te 're wẽ hâimo, te 're i'aiwazé mono zéb zarina. Asimiroti na wa duré te ãma 're romnhoré u'âsi.

Asimiropisutuzéb zô si, wa 're ĩnhimipari

⁴⁹ Aima romhuri'wai ma, aimreme na ĩma inharĩzém na hã ma'ãpé ãma aipo're pu'u. Tahawa, wa taha zô si umnhasi sina 're ĩnhimipari.

⁵⁰ Ta hã ma tô ĩpẽ'ẽ hi, te robzépata ré. Asimiropisudu ma tô duré ti'ab ré 're ĩhâimana mono zé hã ĩma te 're sõmri.

⁵¹ 'Râwi 're isi'madâ'â ze za'ra mono norĩ, te bâtâ bâre ĩ'ãma 're wa'ẽi u'âsi za'ra. Tane nherẽ, asimiroti wi hã 're ĩza'o hâ mono õ di.

⁵² Uburé Danhib'apito, duréi asimiroti na irowaihu'uzém na wa ãma 're ĩsipo're pu'u u'âsi. Tahawa, te ta hã te te 're ĩpẽ'ẽ nomri.

⁵³ Wa sa'ẽtẽ 're ĩnhiti'rui pusi u'âsi, iwasété norĩ asimiroti te te siwi 're iwẽ'õ mono u'âbâmhã.

⁵⁴ Ti'ai 'remhã 're ĩhâimana huture mono ré, wa asimiroti na ĩnho're hã te 're ab'manharĩ.

⁵⁵ Mara na hã wa duré asisi na 're ĩsipo're pu'u mono, Uburé Danhib'apito! Asimiroti na wa duré te 're romnhoré.

⁵⁶ Ã hã ĩhâimanazéb 'remhã te 're i'manharĩ mono da hã: Asimiroti si te 're ĩwapari pese mono na 're ĩhâimana mono da hã.

Wa aima ropisutu, asimiroti si te 're 'madâ'â pese mono da

⁵⁷ Uburé Danhib'apito, ai'ãma si te ĩnhimarĩ niha hã ĩwẽ uptabi ĩma 're hâimana. Tahawa, wa ropisutu, asimiroti si te 're iwapari pese mono na 're ĩhâimana mono da hã.

⁵⁸ Ĩpẽ'ẽ na wa aiwi te 're rowaptẽrẽ: Ma'ãpé asimizawizéb zarina, ĩ'ãma aiwamri na iropisutuzéb zarina.

⁵⁹ 'Re ĩhâimana mono zéb 'rata na hã wa tô rosa'rata. Tahawa, wa tô duré apâ aipi'ra, asimiroti na si 're ĩmorĩ da oto.

⁶⁰ Wa hã, wa sa'ẽtẽ ĩsima 're ĩtob'uzu ĩsitété ãna, asimiroti si te 're 'madâ'â pese mono na 're ĩmorĩ da oto.

⁶¹ Iwasété norĩ, abaze da te 're iwaibui mono zém na ne, te te siwi 're ĩmrami mono da nherẽ, aimreme na hã 're ĩpo're simrami mono õ di, wa hã.

⁶² Mara wa'wamhã wa duré 're ĩ'utu, ai'ãma 're ĩwata mono da hã, asimiroti hã i'uwaibaba na si 're hâimana mono wa.

⁶³ Uburé te te siwi 're i'aiwazéb za'ra mono norĩ siwaihu'u na, duré asimiroti si te te 're iwapari pese za'ra mono norĩ siwaihu'u na wa duré 're ĩhâimana.

⁶⁴ Uburé Danhib'apito, ti'a hã te duré asimizawizéb ré sa'ẽtẽ na 're sa'wari. Tahawa, ma'ãpé asimiroti na ãma ĩma 're rowahutu u'âsi mono.

Asimiroti si, wa te te ĩsina 're umnhasi

⁶⁵ Uburé Danhib'apito, a hã ma tô aima romhuri'wai ma, iwẽ hã ĩma 're i'manharĩ mono, iropisutuzéb zarina.

⁶⁶ Ma'ãpé ĩ'rãi waihu, duré ĩ'rã nhimiza're ĩma sõmri, asimiroti si, te 're umnhasi u'âsi mono wa.

⁶⁷ Ĩ'azâri wana ré, wa tô ĩhâimanazém na te 're upa. Tane nherẽ, wa oto ãhã na hã aimreme te 're i'madâ'â pese mono na 're mo.

⁶⁸ Tô sena, i'aiwẽ uptabi. Taha zarina te duré marĩ iwẽ si 're i'ab'manharĩ mo. Tahawa ma'ãpé asimiroti na ãma ĩma 're rowahutu u'âsi mono.

⁶⁹ 'Râwi 're isi'madâ'â ze za'ra mono norĩ hã ma tô ĩnhisi na taré sadawanhipese na te te 're robzanhamri za'ra. Tane nherẽ, wa tô wa hã asimiroti si ĩpẽ'ẽ 'remhã te 're iwapari pese mono na hã 're ĩhâimana.

⁷⁰ Ta norĩ hã te pẽ'ẽ tete na 're hâimana za'ra. Tane nherẽ, ĩma hã sei uptabi di, asimiroti si te 're iwaihu'u mono da hã.

⁷¹ Tô ĩma hã wẽ di, ĩma irob'manharĩzé hã, taha zarina asimiroti si te 're iwaihu'u mono da hã oto.

⁷² Asimiroti hã uburé pese danhimarĩ dama 're ihâimana za'ra mono nhipai u, tô sena ĩma iwẽ uptabi na te 're hâimana.

Asimiroti na ĩma rosa'rata zei uptabi di

⁷³ 'Re ihâimana u'âsi mono, asib'rata na ma tô ĩpo. Ma'ãpé tahawa, ĩ'rã nhimiza'resezé hã ĩma sõmri, asimiroti te ãma iwaihu'uzéb da hã.

⁷⁴ Te te siwi 're i'aiwazéb za'ra mono norĩ, te te siwi 're ĩ'madâ'â mono wamhã, te ta norĩ hã sima 're pẽ'ẽ toi u'âsi za'ra. E marĩ wa. Asimiroti si te ĩsima 're tété mono wa, ãma 're ĩhâimana mono zéb da hã.

⁷⁵ Uburé Danhib'apito, ĩma waihu'u pese di, i'uwaibaba na si dama 're irowairébé mono zé hã. Duré ĩma waihu'u pese di, sena na 're i'aihâimana mono zéb zarina, niha hã ĩma 're irob'manharĩ mono zé hã.

⁷⁶ Wa aiwi te 're waptẽrẽ, asimizawizé te te 're ĩpẽ'ẽ nomri mono da hã, aima romhuri'wai ma, ĩma iropisutuzéb zarina.

⁷⁷ Ma'ãpé ĩ'ãma aiwamri na, ĩhâimanazém na te ãma uzusi mono da, asimiroti na ãma ĩma rosa'rata zei uptabi wa.

⁷⁸ 'Râwi 're isi'madâ'â ze za'ra mono norĩ ma, tãma 're irowazéb za'ra mono da si, iwẽ hã. E marĩ wa. Ta norĩ hã sadawa nhipese na taré ĩwasédé hã te te ĩ'ãma hiri za'ra wa. Tane nherẽ, wa tô wa hã asimiroti na si te ãma ĩsima 're rosa'rata zei u'âsi.

⁷⁹ Te te 're i'aiwazéb za'ra mono norĩ we ĩtẽme 're inomro mono da si ĩma iwẽ hã, asimiroti waihu'u'wa na 're ihâimana za'ra mono norĩ hã.

⁸⁰ Tô ibâ na asimiroti si te 're i'madâ'â pese mono da si, wa ĩsima te 're wẽ, ĩsima 're ĩnhisép tõ mono da.

Asimiroti hã tô ibâ na da te 're i'umnhasi za'ra mono zé wasu'u

⁸¹ 'Re ihâimana u'âsi mono, asiminho'reptuzéb zô ĩsina 're ĩnhimipari mono ré, wa tô ĩpẽ'ẽ 're, 're ĩnhib'uwa pusi. Tane nherẽ, wa tô aimreme si te ĩsina 're umnhasi.

⁸² Rob'madâ'â wa'a uptabi di, iropisutuzéb zô ĩnhimipari mono na hã. Tahawa, wa nasi ĩsisadanha, ãne 'râwi: “E niwapsi te za ĩpẽ'ẽ hi.”

⁸³ Wa hã, romhâ 'manharĩ na ub'rẽ 'ratare ne marĩ dai õre nherẽ, asimiroti na hã 're ĩpo're simrami mono õ di.

⁸⁴ E mahã bâtâ u wa za wa hã aima romhuri'wa 're ĩnhimipari bété, we ĩzada 're ihâimana za'ra mono norĩ ma, i'arob'manharĩ za'ra zéb zô hã.

⁸⁵ Isi'madâ'â ze norĩ te te ãma siwi ĩ'âri da hã, ma tô ĩzô te te siwi 're ab're, asimiroti zarina 're inomro mono õ norĩ hã.

⁸⁶ Uburé asimiroti, te rob'umnhasizé hã te te sina ĩma 're sõmri. Tahawa, ma'ãpé ĩpawapto na, isadawa nhipese norĩ hã we ĩzarina 're nomro mono wa.

⁸⁷ Ta norĩ hã ma tô aré tô oto siwi ĩhâimana 'rãtõ, ti'ai ãmab ré. Tane nherẽ, asimiroti te irẽme da hã, waihu'u õ di.

⁸⁸ Ma'ãpé asimizawizé aima ihâimana zarina, ĩdâ'â tõ da ĩma ba'a, asimiroti si hã te oto 're 'madâ'â pese mono da.

Aimreme, õne u'â te 're hâimana, si'utõrĩ ãna

⁸⁹ Uburé Danhib'apito, aimreme hã te si'utõrĩ ãna 're hâimana u'âsi, hâiwa ne.

⁹⁰ Ai'umnhasizé hã te uburé danhihudu mono sidâpâsi we 're hâimana. A hã ma tô duré ti'a ihi. Tahawa, te oto siptete na 're sa'wari.

⁹¹ Tãma ipisutu za'ra zéb zarina, te duré ãhã bâtâ u zama uburé marĩ mono hã 're hâimana za'ra, uburé marĩ hã aima si 're hâimana za'ra mono wa.

⁹² Asimiroti hã te te ĩma 're rowẽ zani mono õ 'wa'âhã, te 're irobzépata mono zé hã te aré tô ĩwĩrĩ pese.

⁹³ Niwamhã asimiroti na ĩpo're si'âri da hã mare di za, taha zarina si ĩhâiba ré 're ĩhâimana hâ mono zéb da hã ĩma 're pisutu mono wa.

⁹⁴ Ma'ãpé ĩnho'reptu na, ate na aima 're ĩhâimana mono wa, duré asimiroti si te 're 'madâ'â pese mono da, te ĩsima 're rosa'rata mono wa.

⁹⁵ Iwasété norĩ te te siwi ĩwĩrĩ da hã te ĩzô te te 're rob'madâ'â u'âsi za'ra. Tane nherẽ, wa za wa hã asimiroti na ĩsima te 're rosa'rata zei u'âsi, wẽ wa ĩma.

⁹⁶ Uburé marĩ sitõ pese na we 're ihâimana za'ra mono zém na hã, wa tô waihu'u. Tane nherẽ, te asimiroti sitõ pese ãna 're hâimana u'âsi.

Asimiroti hã tô sena ĩma isawi

⁹⁷ Asimiroti hã wa te te 're sawi pese. Tahawa, wa bâtâ bâre õne u'â te ĩsima ãma 're rosa'rata u'âsi.

⁹⁸ Asimiroti hã te õne u'âsi ĩma 're hâimana. Ta hã te duré te te ĩma 're 'manharĩ, ĩnhitob'ru norĩ nhipai u, ĩ'rãiwaihu'u pese na 're ĩmorĩ da.

⁹⁹ Wa tô te 're waihu'u wẽ pese, ĩma romnhoré'wa norĩ nhipai u, asimiroti na te ĩsima ãma 're rosa'rata zei u'âsi mono wa, ĩma iwẽ zarina.

¹⁰⁰ Ĩ'rãiwaihu'u wẽ hã te sa'ẽtẽ na ĩma 're hâimana, ihi norĩ nhipai u, asimiroti si te 're wapari pese mono wa.

¹⁰¹ Bâdâdi iwasété wi, wa tô 're ĩza'o hâ, aimreme si te 're 'madâ'â pese mono da oto.

¹⁰² Asimiroti na irowaihu'u zé ma hã 're ĩza'o hâ mono õ di, a hã ãma ĩma 're rowahutu mono wa.

¹⁰³ Aimreme hã te aiwa marĩ isei uptabi ne, 're hâimana. Tô sei uptabi di, ropĩni nhipai u hã.

¹⁰⁴ Ĩ'rã nhimiza're hã te asimiroti hawim na te te ĩma sina 're hâimo. Tahawa, bâdâdi senai'õ da hã wa sada 're ĩnhiti'rui pusi.

Aimreme hã rob'uiwẽ'wa

¹⁰⁵ Aimreme hã ĩpara ma rob'uiwẽ'wa. Duré te te ĩma 're ibâdâdi uiwẽ mono 'wa.

¹⁰⁶ Te iropisutuzé hã wa za aima suwa, asimiroti i'uwaibaba na ãma asimirowaihu'uzé hã te 're i'madâ'â pese mono na.

¹⁰⁷ Uburé Danhib'apito, te 're irobzépata mono zé hã sa'ẽtẽ di. Tahawa, ma'ãpé ĩhâiba ré 're ĩhâimana hâ mono zéb da hã ĩma 're pisutu mono, iropisutuzéb zarina.

¹⁰⁸ Uburé Danhib'apito, ma'ãpé ĩzaihâ na ai'ãma ĩwatazé hã wapari. Duré ma'ãpé asimiroti na ãma ĩma 're rowahutu mono.

¹⁰⁹ Wa hã wa 're ĩhâimana u'âsi, romnhimimnhasi 'remhã. Tane nherẽ, asimiroti ma hã 're ĩrĩtĩ si'ẽi mono õ di, ãma 're ĩpo're simrami mono õ wa.

¹¹⁰ Iwasété norĩ abaze mramizém ne na te te siwi ãma ĩ'âri da hã ma tô niha na ĩ'ãma sima rowairébé za'ra. Tane nherẽ, asimiroti wi hã ĩsipi'rai õ di.

¹¹¹ Asimiroti hã te ĩnhimarĩ pese zém ne hã õne u'â ĩma 're hâimana. Ta hã te duré 're ĩpẽ'ẽ toi mono zém na ĩma 're hâimana.

¹¹² Wa hã wa tô 'râwi ĩsima rowairébé, asimiroti na irowaihu'u mono zé te 're wapari pese mono da hã, 're ĩhâimana mono zéb 'rãsutu u.

Asimiroti na irowaihu'uzé wa te te 're sawi pese

¹¹³ Dahâimana si'ahâ norĩ zada, wa 're ĩnhiti'rui pusi. Tane nherẽ, asimiroti si wa tô te 're sawi pese.

¹¹⁴ A hã ĩte 're ĩsima'uri mono zé. Duré ĩte ibaihâ 'manharĩ zapoto na ĩsimapazé, te ĩma 're aihâimana mo. Duré aimreme si, wa tô ĩsina te 're umnhasi.

¹¹⁵ Marĩ iwasété si 're i'manharĩ u'âsi za'ra wa'aba mono norĩ, mo oto ai'aba'réi wa'aba, ĩnhiti. Wa hã wa tô ĩsima wẽ upta, ĩte 'Re ihâimana u'âsi mono nhimiroti si te 're 'madâ'â pese mono da hã.

¹¹⁶ Ma'ãpé 're ĩ'upari mono, ĩma iropisutuzéb zarina, a'â 're ĩhâimana hâ mono da, ĩhâiba ré. Duré 're ĩ'madâ'â rẽme mono tõ, taré 're ĩnhimipari mono zém na hã 're ĩtoi 'ré tõ mono da.

¹¹⁷ Ma'ãpé 're ĩ'upari u'âsi mono. Tawapsi wa za ĩsima te 're romnhimimnhasi mono ãna 're ĩhâimana. Wa za duré ĩpo're pese na asimiroti hã te 're 'madâ'â u'âsi.

¹¹⁸ A hã te duré asimiroti te te 're i'madâ'â pese za'ra mono õ norĩ hã uburé asiwi 're i'awẽ'õ mo. E marĩ wa. Ta norĩ hã hâimana nhipese sina te te sima 're irowa'õtõ za'ra mono zé hã, aima hã marĩ dai õ wa, tarére wa.

¹¹⁹ A hã te ti'ai ãma uburé wasété na 're ihâimana za'ra mono norĩ, ropru da te 're isa'wari za'ra mono ne, tãma 're i'arob'manharĩ mo. Tahawa, wa asimiroti si hã te 're sawi pese.

¹²⁰ Asõ'remhã wa 're ĩrẽrẽ'ẽ u'âsi. Duré dama 're i'arowairébé mono zé ma hã wa 're ĩpahi u'âsi.

Asimiroti zarina si wa 're mo

¹²¹ I'uwaibaba na si, wa tô marĩ te 're ab'manharĩ iwẽ na si. Tahawa, ma'ãpé niwamhã ĩnhitob'ru norĩ nhib'rata tãma ĩhâiba nhomri za'ra tõ.

¹²² Ma'ãpé aima romhuri'wai ma, ĩma ropisutu, ĩpawaptob da. Duré tãma ĩhâiba za'ré za'ra tõ, 'râwi 're isi'madâ'â ze za'ra mono norĩ te te siwi 're ĩwati u'âsi mono tõ da.

¹²³ Rob'madâ'â wa'a uptabi di, ĩnho'reptu da, ĩma iropisutuzéb zô ĩnhimipari mono na hã, taha zarina ĩma ãma i'uwaimrami da hã.

¹²⁴ Ma'ãpé aima romhuri'wai ma, iwẽ hã ĩma 're 'manharĩ mono, asimizawizéb zarina. Duré ma'ãpé asimiroti na ãma ĩma 're rowahutu u'âsi mono.

¹²⁵ Wa hã aima romhuri'wa. Tahawa, ma'ãpé ĩ'rãiwaihu'u wẽ ĩma 're sõmri mono, asimiroti te ãma 're iwaihu'u mono zéb da hã sena na.

¹²⁶ Uburé Danhib'apito, bâdâ hã ma tô oto wi, niha hã marĩ i'manharĩzéb da hã, asimiroti da te oto dasiwi 're wazéb u'âsi za'ra mono õ wa.

¹²⁷ Asimiroti hã wa tô te 're sawi pese, ẽtẽ waipo pré oru nhipai u, duré tô oru uptabi marĩ na itõmo wazari'õ nhipai u.

¹²⁸ Tahawa, wa wa hã asimiroti zarina si 're mo. Wa duré uburé dazadawa nhipese na si 're idanomro mono zé bâdâdi hã ĩsiwi te 're wẽ'õ pese.

Uburé Danhib'apito mreme na isaprĩzé, ta hã te rowa'a hã te te dama sina 're sani

¹²⁹ Asimiroti hã tô sena iwẽ uptabi. Tahawa, wa ĩpẽ'ẽ na taha si te 're 'madâ'â pese.

¹³⁰ Aimreme na ãma isaprĩzé hã te rowa'a hã te te dama sina 're sani. Te duré 'rãiwaihu'u wẽ ãna 're ihâimana za'ra mono norĩ ma, i'rãnhimiza're hã te te tãma 're sõmri za'ra.

¹³¹ 'Re ĩzadaza'a mono wa, sa'ẽtẽ 're ĩpẽ'ẽ hârâ mono ne, wa wa hã asimiroti zô si ĩsima te 're rob'ruiwapari u'âsi.

¹³² Ma'ãpé we ĩzô aipi'ra na apâ ĩ'madâ'â da, ĩ'ãma aiwamri da, te te 're i'asawi pese za'ra mono norĩ ma, 're i'manharĩ u'âsi mono ne.

¹³³ Ma'ãpé ĩpara na 're ĩmorĩ ré, 're ĩzaprõni wẽ mono, aimreme zarina. Duré iwasédé siptete na ĩzada 're ihâimana mono ma, 're ĩ'madâ'â rẽme mono tõ.

¹³⁴ Te te ĩma 're irob'manharĩ wasété za'ra mono norĩ wi, tiwi ĩnho'reptu za'ra na, asimiroti hã te 're wapari pese mono da oto.

¹³⁵ Ma'ãpé aima romhuri'wai ãma, iwẽ si ĩ'ãma 're ab'manharĩ mono. Duré ma'ãpé asimiroti na ãma ĩma 're rowahutu mono.

¹³⁶ Ĩtõmo'u te panho'õmo ne ĩwi 're praba, asimiroti da te dasiwi 're 'madâ'â pese mono õ wa.