Salmu 118 - ꞌRe Ihâimana Uꞌâsi Mono Zadawa Wasuꞌu

Da'ãma ai'utézém na, 'Re ihâimana u'âsi mono ãma dawatazé wasu'u

¹ Uburé Danhib'apito ãma si te za 're aiwata u'âsi za'ra wa'aba mo, õhõ si wẽ wa, duré isimizawizé hã õne u'â 're hâimana mono wa.

² Izaraéu nhihudu norĩ, ma'ãpé ãne 're nharĩ za'ra wa'aba mono: “Asimizawizé hã te õne u'â 're hâimana!”

³ Sasedoti norĩ, ma'ãpé duré a norĩ wa'aba zama ãne 're nharĩ za'ra wa'aba mono: “Asimizawizé hã te õne u'â 're hâimana!”

⁴ Uburé Danhib'apito, uburé asiwi 're iwazéb za'ra wa'aba mono norĩ, ma'ãpé a norĩ wa'aba zama 're nharĩ za'ra wa'aba mono, ãne: “Asimizawizé hã te õne u'â 're hâimana!”

⁵ Te irobzépata 'remhã, wa tô Uburé Danhib'apito wi hã rowaptẽ. Tahawa, ma tô ãma ĩzada'â. Ma tô duré te irobzépata za'ẽtẽ hawimhã ĩwaze.

⁶ Uburé Danhib'apito ĩsiré 're hâimana mono wa, wa hã 're ĩpahi waihu'u mono õ di. E marĩ, da te ĩ'ãma 're 'manharĩ mono da bâ.

⁷ Uburé Danhib'apito te ĩsiré 're hâimana. Ta hã te te 're ĩpawapto. Tahawa, wa za ĩnhitob'ru norĩ ãma apto'o ré, te 're i'ai'uté mono zé hã te 're 'madâ'â.

⁸ Tahawa tô iwẽ, Uburé Danhib'apito da te 're i'umnhasi za'ra mono zé hã, 'râwi dasiré hã da te dasina 're i'umnhasi za'ra mono zém nhipai u.

⁹ Wẽ uptabi di, Uburé Danhib'apito da te dasina 're i'umnhasi za'ra mono zé hã, dama ipire, da te dasina 're i'umnhasi za'ra mono zém nhipai u hã.

¹⁰ Dapoto wamri mono bâ da'ahâ uptabi na da te dasiwi 're ĩ'uirĩ mono nherẽ, wa tô Uburé Danhib'apito nhisi na te ãma 're ai'uté za'ra.

¹¹ Õ norĩ ma tô aré uburé siwi te 're ĩ'uirĩ. Tane nherẽ, Uburé Danhib'apito nhisi na hã wa tô te 're a'uprosi.

¹² Õ norĩ, mohõnire i'ahâ uptabi ne, ma tô te te siwi 're ĩ'uirĩ. Tane nherẽ, 'wabzéré panhipti 'ré unhama na awa'awi 're izata su'u za'ra mono ne, ma tô awa'awi 're si'utõrĩ su'u. Uburé Danhib'apito nhisi na wa tô ãma ai'uté za'ra.

¹³ Õ norĩ siptete sina te te siwi ĩmei wamhã, ma tô aré ĩ'ãma ai'uté za'ra. Tane nherẽ, Uburé Danhib'apito ma tô ĩpawapto.

¹⁴ Uburé Danhib'apito, apâ 're ĩnhiptete mono 'wa. Ta hã ma tô ĩnho'reptu.

¹⁵ Ma'ãpé te te da'ãma ai'uté za'ra wẽ te, sadari sina te te sima iromhu'u za'ra zé wapari za'ra wa'aba, 'Re ihâimana u'âsi mono nhib'a'uwẽ romhâ 'manharĩ na 'ri nhoré ãma isi'ubumro norĩ zadari hã, ãne: “Uburé Danhib'apito nhiptetezé, ma tô da'ãma ai'utézé hã wama sõmri za'ra.

¹⁶ Tinhiptete na ma tô marĩ hã 'manharĩ za'ẽtẽ. Uburé Danhib'apito nhiptede hã ma tô da'ãma ai'utézé hã duré wama sõmri za'ra.”

¹⁷ A'â ĩdâ'â da hã mare di. Wa za a'â tô ĩhâiba ré 're ĩhâimana, Uburé Danhib'apito nhimi'manharĩ wẽ zé wasu'u na te ãma 're da'apo're pu'u mono da hã.

¹⁸ Uburé Danhib'apito isé na ma tô ĩ'azâ. Tane nherẽ, ĩdâ'â ma hã te te ĩhâiba za'réi õ di.

¹⁹ Ma'ãpé 'Re ihâimana u'âsi mono nhorõwa u 'ridawa za'ẽtẽ na 're idanhisisi mono zé hã asiwi ĩma 'ridawa aba. Tawamhã wa hã ĩzébré wamhã, Uburé Danhib'apito ãma wa za ĩwata.

²⁰ Ã hã, Uburé Danhib'apito te, 'ridawa za'ẽne te 're sa. Taha na te za isimiroti 'madâ'â pese 'wa norĩ si 're sisisi.

²¹ 'Re ihâimana u'âsi mono, wa ai'ãma hã ĩwata, te ãma aiwi irowaptẽrẽzém na we ãma ĩzada'âbâ wa, duré taha zarina ĩnho'reptui wa.

²² Ẽtẽ tõmo waré hã wẽ nherẽ, 'ri'wa norĩ wasété newa, te te siwi iwẽ'õ hã, aré 'ri na'ratazéb da ihâiba hã te taré nherẽ, danhipai u pire uptabi na 'ri na'rata sisasé ãma oto 're sa'wari u'âsi, wẽ nherẽ.

²³ Ã hã Uburé Danhib'apito hawip si, isimi'manharĩzé iwẽ uptabi te wama 're hâimana za'ra.

²⁴ Ã bâdâ hã Uburé Danhib'apito, te te da'ãma i'ai'utézé bâdâ te wasu'u, ãma iwapẽ'ẽ to za'ra zé bâtâ da hã, duré wa te ãma wasima irowẽ za'ra zé bâtâ da hã!

²⁵ Ma'ãpé wa'anho'reptu na, Uburé Danhib'apito, wanho'reptu na! Wa te wasima iwẽ za'ra zéb zarina, ma'ãpé ãma wama uwaimrami za'ra na, 'Re ihâimana u'âsi mono!

²⁶ Uburé Danhib'apito nhisi na we imorĩ ma hã, te iwe si te te tãma 're pisutu u'âsi. Duré isõrõwa 'ri 'rãihâ 'remhã wa iwẽ si wa te aima 're pisutu za'ra wa'wa.

²⁷ Uburé Danhib'apito, ta hã 'Re ihâimana u'âsi mono. Ta hã te wama te te 're rob'uiwẽ u'âsi za'ra. Wede panhipti asib'rata 're 'wasari aba ré, ma'ãpé dato na asiwi ãma sãna'rata za'ra wa'aba. Te za duré danhimizama zatazé wedezane 'manharĩ hã nasi asiwi isa'oto 'wa.

²⁸ A hã, ĩte 'Re ihâimana u'âsi mono. Tahawa, wa za tô ai'ãma 're ĩwata. A hã, Ĩte 'Re ihâimana u'âsi mono. Tahawa, aiwasu'u za'ẽtẽ na hã wa za te 're da'apo're pu'u u'âsi.

²⁹ Uburé Danhib'apito ãma si te za 're aiwata u'âsi za'ra wa'aba mo, õhõ si wẽ wa, duré isimizawizé hã õne u'â 're hâimana mono wa.