Salmu 112 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono nhimiroti 'madâ'â pese 'wa norĩ, to sina 're inomro mono norĩ wasu'u

¹ Uburé Danhib'apito ãma 're wawata u'âsi za'ra wa'aba mono! Ni'wa, Uburé Danhib'apito wazép sina 're isãmra mono hã, duré isimiroti te te 're iwapari zei u'âsi mono hã te za to sina 're hâimana.

² Taha nhihudu norĩ hã te za ti'a na ropisutu téb ãma siptete na 're hâimana za'ra. Te za duré rowẽ na si 're hâimana za'ra, ta norĩ hã.

³ Isõrõwa ãma hã simarĩ ahâ uptabi di. Duré õhõ ma, te za 're ihâimana wẽ mono zé wa'rãmimhã iwẽ na si marĩ hã tãma 're pusi.

⁴ Sena na 're inomro mono norĩ ma, te rob'uiwẽzé robra na hã te te tãma 're rowa'a za'ra, wẽ na te te dama 're i'manharĩ za'ra mono norĩ ma, duré da'ãma 're isiwamri wẽ za'ra mono norĩ ma, duré i'uwaibaba na si 're inomro mono norĩ ma.

⁵ Ni'wa hã, marĩ da te tiwi waptẽrẽ wa, sõprum na a'â iwa'rãmib zô te te dama isõmri hã te za toi u'âsi 're sãmra. Sena na tinhimarĩ na te te ãma 're iromhuri mono hã te za duré toi u'âsi 're sãmra.

⁶ Ni'wa i'uwaibaba na si marĩ te te 're i'a'manharĩ mono hã, niwa sihâimanazé wamnarĩ õ di za. Õne u'â te za duré ãma 're dapo're pu'u u'âsi za'ra.

⁷ Romreme iwasété ma hã, tãma 're pahi mono õ di za. Pẽ'ẽ nhiptete na te za 're hâimana u'âsi, Uburé Danhib'apito si te te sina 're umnhasi mono wa.

⁸ Õ hã te za hâtâ'â ãna 're hâimana, 're pahi mono ãna. Tahawa, te za tinhitob'ru norĩ ãma ai'utézé hã waihu'u siro, sena na.

⁹ Isimarĩ'õ norĩ ma, te za duré sõprum na tinhimarĩ hã te te 're anhomri. Õne u'â te za duré isimizawizé hã da'ãma 're hâimana. Ta hã dama pire di, duré dama iwazéb za'ẽne.

¹⁰ Iwasété norĩ, ãne na isimi'manharĩzé te te siwi 're 'madâ'â mono wamhã, te za sada 're siti'ru za'ra. Te za duré 're 'wasitete za'ra. Te za duré 're sihâimanazé uprosi za'ra. Duré marĩ zô te te sima 're irob'ruiwapari za'ra mono zé hã, marĩ dai õ di, tarére.